Ուրիշներուն Սորվեցնենք Թէ Աստուած Ի՛նչ Կը Պահանջէ

¹ Տակաւին կարելի է բազմաթիւ անհատներ գտնել, որոնք «Տէրոջը խօսքերը լսել»էն հոգեւորապէս զրկուած են։ (Ամովս. 8։11) Թէեւ շատեր կը հաւատան թէ Աստուած գոյութիւն ունի, սակայն անոնք իր նպատակներուն ու պահանջներուն նկատմամբ անտեղեակ են։ Հետեւաբար, կարիքը կայ որ անոնց սորվեցնենք Թագաւորութեան կեանք փրկող ճշմարտութիւնը։ Պատշաճօրէն զինուելով ու ամէն առիթի վկայելու պատրաստ գտնուելով, կրնանք Աստուծոյ պահանջները սորվիլ ուզող անհատներուն հասնիլ։

² Ապրիլին ու Մայիսին, Դիտարան–ի ու Զարթի՛ր–ի շատ այժմէական թիւեր պիտի բաշխենք։ Ասկէ զատ, առաջին անգամ ըլլալով Աստուած Ի՛նչ կը Պահանջէ Մեզմէ գրքոյկը պիտի ներկայացնենք։ Այս գրքոյկին գրաւիչ պատկերները ու միտք գրգռող հարցումները անոր շատ մեծ գրաւչութիւն մը կու տան։ Հետեւեալ թելադրութիւնները ներկայացուած են, որպէսզի կարենանք մեր հոյակապ գրականութիւնները ազդու կերպով գործածել։

³ Մարդիկը Փնտռել. Այն շրջաններուն մէջ, ուր մեր տունէ տուն այցելութեան ընթացքին շատեր տունը չեն գտնուիր, օգտակար տեսնուած է մարդիկը փնտռել ու անոնց խօսիլ՝ ո՛ւր որ գտնուին։ Սեպտեմբեր 1996 Մեր Թագաւորութեան Ծառայութիւնը թերթիկին յաւելուածականը քաջալերեց որ բարի լուրը քարոզենք ամէնուրեք. փողոցին, հանրային փոխադրամիջոցներուն, պարտէզներուն, կառատուներուն եւ առեւտրական վայրերուն մէջ։ Անիկա նաեւ անպաշտօն կերպով քարոզելու համար պատեհութիւններ ստեղծելու կարիքը ցոյց տուաւ մեզի։ Ասոր որպէս օրինակ, ռահվիրայ քոյր մը կենդանաբանական պարտէզ գնաց, իր հետ առնելով «Վտանգուած Տեսակներ—Ինչո՛ւ Մտահոգուիլ» յօդուածը բովանդակող 8 Օգոստոս 1996–ի Զարթի՛ր–էն որոշ քանակ մը։ Մէկ Ժամուան ընթացքին, ան 40 օրինակ տեղաւորեց, ասիկա մեծապէս արժեւորող անասունի կարգ մը սիրահարներուն։ Ամէնուրեք բարի լուրը քարոզելու մէջ ի՞նչ յաջողութիւն ունեցած էք մինչեւ հիմա։ Դիտարան–ը եւ Զարթի՛ր–ը, ինչպէս նաեւ՝ Ի՛նչ կը Պահանջէ գրքոյկը, յատկապէս պատրաստուած են ամէն տեսակ վկայութեան յարմարելու համար, քանի որ կը ներկայացնեն այնպիսի տեղեկութիւններ, որոնք մարդոց կեանքերուն կ’ազդեն ու միտք կը գրգռեն։

⁴ Խօսակցութիւններ Սկսիլ. Օգոստոս 1996–ի Մեր Թագաւորութեան Ծառայութիւնը թերթիկին վերջին էջը, մանրամասնութիւններ կու տայ թէ ի՛նչպէս Դիտարան եւ Զարթի՛ր պարբերաթերթերը ներկայացնելու համար մեր անհատական ներկայացումները պատրաստենք։ Միեւնոյն թելադրութիւնները գործնական պիտի ըլլան երբ՝ Ի՛նչ կը Պահանջէ գրքոյկին համար ձեր ներկայացումները կը պատրաստէք։ Ինչ որ կ’ըսենք, կրնայ քանի մը նախադասութենէ բաղկացած հակիրճ ներկայացում մը ըլլալ, կամ՝ սուրբ գրային գաղափար մը պարփակող բաւարար երկարութեամբ ներկայացում մը։ Կարեւոր է բացման խօսքերը զգուշութեամբ ընտրել, քանի որ անոնք են որ կ’որոշեն թէ անհատը պիտի շարունակէ լսել թէ ոչ։ Ոմանք հետեւեալ բացման խօսքով յաջողութիւն գտած են. «Յօդուած մը կարդացի որ զիս շատ քաջալերեց, կը փափաքիմ զայն ձեր հետ բաժնել»։ Կամ կրնանք հետաքրքրական հարցում մը հարցնել, դիմացի անհատը խօսակցութեան միջամուխ ընելու համար։

⁵ Եթէ ձեր շրջանին մէջ պատշաճ է, թերեւս փորձէք այս ամսուան ձեր ներկայացումներուն մէջ հետեւեալին նման հարցումներ հարցնել.

◼ «Այսօր պատերուն վրայ չափազանց շատ արձանագրութիւններ, ասդին անդին նետուած աղբեր եւ ապականութիւն կը տեսնենք։ Երկիրը մաքրելու ու զայն բնակութեան աւելի լաւ վայրի մը վերածելու համար ի՞նչ բանի կարիքը կայ»։ Թոյլ տուէք որ պատասխանէ, ապա բացատրեցէք թէ տեղեկութիւններ ունիք, որոնք մեզ կը վստահեցնեն թէ ի՛նչպէս ու ե՛րբ երկիրը երկրածաւալ պարտէզ մը պիտի դառնայ։ Ընթացիկ պարբերաթերթէն յատկանշական գաղափար մը, հակիրճ համար մը եւ գունագեղ պատկեր մը գործածեցէք ու ետքը զայն անհատին ներկայացուցէք որ ընթերցէ։ Յիշեցէք որ մեր գրականութիւնները կարդալէն հաճոյք ստացողները նուիրատուութիւն մը կու տան, զոր ուրախութեամբ կը տրամադրենք մեր երկրածաւալ գործունէութեան։ Խօսակցութեան վերջ չդրած, փորձեցէք վերայցելութեան կարգադրութիւն մը ընել։

◼ «Կը խորհի՞ք թէ Աստուած ուզեց որ խնդիրներով լեցուն կեանք մը ապրինք, ինչպէս է պարագան ներկայիս»։ Անհատը պատասխանելէ ետք, կրնաք ըսել. «Հաւանաբար ծանօթ է ձեզի այն աղօթքը զոր Յիսուս իր հետեւորդներուն սորվեցուց որ աղօթեն, խնդրելով Աստուծոյ Թագաւորութեան գալը։ Արդեօք մտածա՞ծ էք թէ Աստուծոյ Թագաւորութիւնը իրապէս ի՛նչ է»։ Ի՛նչ կը Պահանջէ գրքոյկին 6–րդ դասը բացէք ու կարդացէք դասին սկիզբը յիշուած հարցումները։ Յետոյ, մինչ պարբերութիւն 1–ը կը կարդաք, առաջին հարցումին պատասխանը ցոյց տուէք։ Բացատրեցէք թէ մնացեալ հարցումներն ալ նոյնպէս հակիրճ կերպով պատասխանուած են։ Գրքոյկը ներկայացուցէք, նուիրատուութեան կարգադրութիւնները յիշեցէք եւ առաջարկեցէք դարձեալ հանդիպիլ Թագաւորութեան մասին յաւելեալ տեղեկութիւններ բաժնեկցելու համար։

◼ «Շատ մը խորհող անհատներ սկսած են աշխարհի կրօնքները նկատել որպէս մարդկութեան խնդիրներուն պատճառը եւ ոչ թէ՝ լուծումը։ Դուք՝ ի՞նչ կը խորհիք ասոր մասին»։ Անհատին տեսակէտը մտիկ ընելէ ետք, ընթացիկ պարբերաթերթերէն բան մը ցոյց տուէք, որ սուտ կրօնքին ձախողութեան կամ անոր մօտալուտ կործանումին նկատմամբ իր հետաքրքրութիւնը կրնայ արթնցնել։ Հարցուցէք եթէ կը փափաքի զայն կարդալ։ Ձեր անունները փոխանակեցէք ու առաջարկեցէք դարձեալ հաղորդակցութեան մէջ մտնել, որպէսզի կարենաք բացատրել թէ ի՛նչպէս ճշմարիտ կրօնքը մարդկութիւնը յուսախաբ չէ ըրած։ Երբ յարմար ըլլայ, բացատրեցէք թէ հետաքրքրուած անհատ մը ի՛նչպէս կրնայ պզտիկ նուիրատուութիւն մը ընել։

◼ «Քանի որ ընտանեկան կեանքը այսքան շատ խնդիրներով լեցուն է, երբեք հարց տուա՞ծ էք թէ ընտանեկան ուրախութիւն ձեռք ձգելու գաղտնիքը ի՛նչ է»։ Սպասեցէք որ պատասխանէ, ապա բացատրեցէք թէ Աստուածաշունչին մէջ, Աստուած ընտանեկան ուրախութեան իսկական գաղտնիքը կը յայտնէ։ Թերեւս կարենաք կարդալ Եսայեայ 48։17–ն։ Ապա բացէք Ի՛նչ կը Պահանջէ գրքոյկին 8–րդ էջը եւ ցոյց տուէք Աստուածաշունչէն մէջբերուած կարգ մը համարներ, որոնք վստահելի առաջնորդութիւն կը հայթայթեն ընտանիքի իւրաքանչիւր անդամին։ Կարդացէք իւրաքանչիւր դասին սկիզբը գտնուած հարցումներուն ցանկը։ Հարցուցէք եթէ անհատը կը փափաքի պատասխանները կարդալ։ Եթէ այո, գրքոյկը իրեն տուէք ու բացատրեցէք որ թէեւ ձրի է, սակայն մեր աշխարհածաւալ գործունէութեան ի նպաստ եղած համեստ նուիրատուութիւններ կ’ընդունինք։ Առաջարկեցէք ուրիշ անգամ դարձեալ վերայցելել, ընտանեկան ուրախ կեանքի նկատմամբ Աստուածաշունչին բովանդակած գործնական յաւելեալ ուղեգծեր իրեն հետ բաժնելու համար։

⁶ Մարտ 1997 Մեր Թագաւորութեան Ծառայութիւնը թերթիկին յաւելուածականը մեզ քաջալերեց որ վերայցելութիւններ ընելու համարձակութիւնը ունենանք։ Անիկա յանձնարարեց Ի՛նչ կը Պահանջէ գրքոյկը գործածել սուրբ գրային ուսումնասիրութիւններ սկսելու համար, եթէ ոչ առաջին այցելութեան, գոնէ վերայցելութեան։ Մարդկութեան մեծագոյն կարիքն է՝ Աստուծոյ պահանջները սորվիլ, ապա զանոնք կատարել։ (Կող. 1։9, 10) Ապրիլ եւ Մայիս ամիսներու ընթացքին ուրիշներուն մեծապէս օգտակար պիտի ըլլանք, եթէ կարենանք սկսիլ անոնց սորվեցնել ի՛նչ որ գիտենք կեանքի նկատմամբ Եհովայի պահանջներուն մասին։—Ա. Կորն. 9։23