Ամառուան Համար Ի՞նչ Ծրագիրներ Ունիք
1 Ճիշդ չէ՞ որ արժէքաւոր նպատակակէտի մը հասնելու հաւանականութիւնը աւելի կ’ըլլայ, եթէ մեզի մատչելի եղող ժամանակը իմաստութեամբ յայտագրենք։ Ամառուան եղանակը, աստուածպետական շահերը յառաջացնելու համար զանազան պատեհութիւններ կու տայ մեզի։ (Առ. 21։5) Անոնցմէ ոմանք ի՞նչ են։
2 «Աստուծոյ Ընդունելի Ապրելակերպը» բնաբանով Համաժողովը, մեր յայտագիրներուն մէջ տեղ գրաւող դէպքերէն մէկը պէտք է ըլլայ։ Գործէն կամ դպրոցէն արձակուրդ առէք, որպէսզի կարենաք համաժողովի իւրաքանչիւր օրուան յայտագրին ներկայ գտնուիլ։ Բնակարանի եւ ճամբորդութեան համար նախօրօք վերապահումներ ըրէք։
3 Ինչո՞ւ չծրագրէք դաշտի ծառայութեան ձեր գործունէութիւնը աւելցնել ամառուան եղանակին։ Ուշ մթննալը եւ աւելի տաք եղանակը ձեզի թոյլ պիտի տան որ աւելի ժամանակ յատկացնէք քարոզչութեան գործին։ Դպրոցական արձակուրդը պատանիներուն պատեհութիւնը կու տայ, որ ամառը մէկ կամ աւելի ամիսներ որպէս օժանդակ ռահվիրաներ ծառայեն։ Ուրիշներ ալ կրնան հիմակուընէ ծրագրել, որպէսզի Օգոստոսին օժանդակ ռահվիրաներ ըլլան, օգտուելով հինգ շաբաթավերջերէն։ Այս Օգոստոսին, մինչ ծառայութեան տարին կ’աւարտենք, միասնակամօրէն ջանք պիտի թափենք մեր կարելին ընելու, որ իւրաքանչիւրս լման մասնակցութիւն մը բերենք ծառայութեան գործին։
4 Կը ծրագրէ՞ք ձեր մօտը գտնուող ժողովքի մը օգնել, որ իր թաղամասը ծածկելու համար օգնութեան կը կարօտի։ Շրջանային տեսուչը երէցները տեղեակ կրնայ պահել, ձեր շրջանին մէջ եղող կարիքներուն մասին։ Կամ, եթէ որակելի էք եւ կը փափաքիք Ընկերութեան դիմել՝ հազուադէպօրէն աշխատցուած կամ չնշանակուած թաղամասի մը մէջ աշխատելու համար, ձեր երէցներէն դիմումնագիր մը խնդրեցէք։ Եթէ ձեր տունէն հեռու պիտի անցընէք ձեր արձակուրդը, ծրագրեցէք այդ շրջանի ժողովքին ժողովներուն ներկայ ըլլալ եւ անոնց հետ դաշտի ծառայութեան մասնակցիլ։ Եթէ Եհովայի Վկաներ չեղող ազգականներ կ’այցելէք, նախապէս պատրաստուեցէք, որպէսզի ճշմարտութիւնը անոնց հետ բաժնեկցելու կերպեր գտնէք։
5 Ամառուան համար ի՞նչ ծրագիրներ ունիք։ Անկասկած, կ’ուզէք ֆիզիքապէս թարմանալ։ Բայց երբեք մի անտեսէք հոգեւորապէս աշխուժանալու աւելի կարեւոր պատեհութիւնները, շարունակելով Թագաւորութեան շահերը ձեր կեանքին մէջ առաջին տեղը դնել։—Մատթ. 6։33. Եփ. 5։15, 16