Այժմ Ձեր Առջեւ Ալ Ռահվիրայութեան Դուռը Բացուա՞ծ Է

¹ 1999–ի մեր տարուան համարը մեզի կը յիշեցնէ թէ տակաւին Եհովայի «փրկութեան օր»ուան մէջ ենք։ (Բ. Կորն. 6։2) Սակայն, անոր փրկութեան օրը շուտով վերջ պիտի գտնէ, որմէ ետք իր «դատաստանի օր»ը պիտի սկսի։ (Բ. Պետ. 2։9) Մինչ Եհովա կը շարունակէ փրկութեան պատեհութիւնը մարդկութեան առջեւ բաց պահել, որքա՜ն խայտալի է տեսնել հետզհետէ աւելի շատ անհատներու ընդառաջումը։

² Եհովայի ժողովուրդը ընդունած է ընդառաջողներուն հասնելու մարտահրաւէրը, քանի դեռ ուշ չէ։ Թագաւորութեան հրատարակիչներէն շատերուն համար, ասիկա նշանակած է ռահվիրայական ծառայութեան ձեռնարկել։ Այժմ ձեր առջեւ ալ ռահվիրայութեան դուռը բացուա՞ծ է։ Ինչո՞ւ կը հարցնենք։

³ Գնահատութեան Արտայայտութիւններ. Ինչպէս որ Յունուար 1999–ի Մեր Թագաւորութեան Ծառայութիւնը թերթիկին մէջ ծանուցանուեցաւ, կանոնաւոր եւ օժանդակ ռահվիրայութեան ժամերու պահանջը նուազեցաւ։ Նոր պահանջին հասնելու համար կանոնաւոր ռահվիրաները պէտք է ամէն ամիս 70 ժամ յատկացնեն ծառայութեան, այսինքն՝ ամբողջ ծառայութեան տարուան ընթացքին՝ 840 ժամ։ Իսկ օժանդակ ռահվիրաները ամէն ամիս ծառայութեան համար 50 ժամ պիտի յատկացնեն։ Այս վերաճշդումներուն որպէս հետեւանք, ահաւասիկ մեր ստացած գնահատութեան բազմաթիւ արտայայտութիւններէն քանի մը հատը.

«Ասիկա մեր երկնաւոր Հօրմէն ի՜նչ օրհնեալ պարգեւ մըն է»։

«Բառեր չեն կրնար արտայայտել այս կարգադրութեան հանդէպ իմ ունեցած ուրախութեան, սիրոյ եւ երախտագիտութեան զգացումներս»։

«Շատ աւելի դիւրաւ պիտի կարենանք մեր յայտագիրներուն հասնիլ»։

«Կ’աղօթենք որ հիմա աւելի մեծ թիւով անհատներ լիաժամ ծառայութեան ձեռնարկեն եւ վայելեն այն օրհնութիւնները որոնք յառաջ կու գան Եհովայի աւելի ընդարձակօրէն ծառայելէ»։

⁴ Մինչ Աստուծոյ փրկութեան օրուան բարձրակէտին կը մօտենանք, բացայայտ է թէ Եհովայի փափաքն է որ իր ժողովուրդը փառաբանութեան զօրաւոր ու վերջնական աղաղակ մը բարձրացնէ։ Այս պատգամին ծաւալը եւ ուժգնութիւնը կ’աւելնայ (1) Թագաւորութիւնը ծանուցանողներու թիւին անընդհատ յաւելումով եւ (2) Թագաւորութեան քարոզչութեան մէջ իւրաքանչիւր անհատի կարողութեան համաձայն կատարուած յաւելումով։ Եհովա, որ ‘կ’աճեցնէ’, երկու մարզերուն մէջ ալ յաջողութիւն տուած է, փրկութիւնը ընդունող բոլոր անհատներուն յօժարակամ հոգին օրհնելով։—Ա. Կորն. 3։6, 7. Սաղմ. 110։3

⁵ Զայն Պարապ Տեղ Մի՛ Ընդունիք. Եհովայի փրկութեան օրուան մասին էր որ Պօղոս իր հաւատակիցները խրատեց. «Մենք ալ [Եհովայի] գործակից ըլլալով՝ կ’աղաչենք որ Աստուծոյ շնորհքը պարապ տեղ ընդունած չըլլաք»։ Զայն «պարապ տեղ ընդունած» պիտի չըլլանք, եթէ ասիկա «ընդունելի ժամանակ» մը նկատենք, ամէն առիթով ուրիշներու փրկութեան համար գործելով։ (Բ. Կորն. 6։1, 2) Ներկայիս, Պօղոսի խօսքերը աւելի մեծ կարեւորութիւն կը ստանան։ Եհովայի հանդէպ սրտանց սէր ցուցաբերող Քրիստոնեաները, առանձնաշնորհում կը համարեն կարելի եղածին չափ լիովին մասնակցիլ այն ծառայութեան, զոր ինք անոնց նշանակած է։ Ներկայիս, կարո՞ղ էք ծառայութեան մէջ աւելի լիովին մասնակցութիւն բերել կանոնաւոր ռահվիրայ մը ըլլալով։

⁶ Անիկա Տրամաբանական Նպատակակէտ մըն Է. Միացեալ Նահանգներու մէջ, Սեպտեմբեր 1–էն սկսեալ նպատակակէտ դրինք 90,000 կանոնաւոր ռահվիրաներ տեսնել։ Կը խորհինք թէ ասիկա տրամաբանական եւ հասանելի նպատակակէտ մըն է։ Ինչո՞ւ այսքան վստահ ենք։ Մարտ 1997–ին, 116,335 եղբայրներ ու քոյրեր օժանդակ ռահվիրաներ եղան, իսկ Ապրիլ 1998–ին՝ մօտաւորապէս 90,000։ Մեծամասնութիւնը 60 ժամ տեղեկագրեց, այսինքն՝ կանոնաւոր ռահվիրայութեան նոր պահանջէն միայն 10 ժամ նուազ։ Եթէ այդ օժանդակ ռահվիրաներէն միայն 15,000–ը կանոնաւոր ռահվիրաներ ըլլան, այս ծառայութեան տարին չլրացած, կրնանք Սեպտեմբեր ամիսը սկսիլ 90,000 կամ աւելի լիաժամ ռահվիրաներով։

⁷ Յայտագրի Կարիքը Կայ. Տակաւին ամիսը 70 ժամ դաշտի ծառայութիւնը քիչ մը անհասանելի՞ կը թուի ձեզի։ Թերեւս եթէ մտածէք որ շաբաթը 17 ժամ է պահանջուածը, ասիկա որոշ չափով ձեզի օգնէ։ Յաջորդ էջին վրայ գտնուող յայտագիրներու նմոյշը գործածելով, փորձեցէք ձեր անձնական պարագաներուն յարմարող կանոնաւոր ռահվիրայութեան յայտագիր մը ստեղծել։ Զայն պատրաստելու համար, փորձառու ռահվիրաներու հետ խօսեցէք, անոնցմէ խրատներ ուզեցէք, իրենց ռահվիրայական ծառայութիւնը իրենց անձնական եւ ընտանեկան պատասխանատուութեանց հետ ի՛նչպէս հաւասարակշռելուն մասին։ Ձեր շրջանային տեսուչին հարցուցէք թէ շրջանին մէջ եղող ռահվիրաները ամէն շաբաթ իրենց ծառայութեան գործունէութիւնը ի՛նչպէս կը յայտագրեն։ Ապա Եհովայի ձգեցէք որ ռահվիրայութեան ձեր ծրագիրը օրհնէ։—Առ. 16։3

⁸ Ընտանեկան Ծրագիր մը Դարձուցէք. Արդեօք ռահվիրայութիւնը ընտանեկան ծրագիր մը դարձնելու մասին խորհա՞ծ էք։ Որպէս ընտանիք կրնաք նստիլ եւ խօսակցիլ թէ ի՛նչպէս՝ ուշադրութեամբ ծրագրելով եւ լաւ կերպով համագործակցելով, ընտանիքին մէկ կամ երկու անդամները կրնան ռահվիրաներ ըլլալ։ Հասկնալիօրէն, ոմանք պարկեշտօրէն իրենց պարագաները կշռելէ ետք պիտի նկատեն թէ հիմակուհիմա ռահվիրայութիւն չեն կրնար ընել։ Եթէ այս է պարագան, ռահվիրայութիւնը որպէս ապագայի համար նպատակակէտ մը դրէք։ Սակայն, սկսեցէք ծրագիրներ դնել որպէսզի որոշ թուականի մը ռահվիրայութեան սկսիք։ Թերեւս կրնաք տարին քանի մը անգամ օժանդակ ռահվիրաներ ըլլալ, մինչեւ որ կանոնաւոր ռահվիրայութեան նպատակակէտին հասնիք։

⁹ Միացեալ Նահանգներու մէջ, ներկայիս ծառայող աւելի քան 75,000 կանոնաւոր ռահվիրաները, զանազան պարագաներ ունին։ Բոլորն ալ լաւ առողջութեան տէր չեն, իսկ մեծամասնութիւնը ընտանեկան եւ դրամական պարտաւորութիւններ ունի։ Ռահվիրաներուն 26,000–էն աւելին 50 տարեկանէն վեր է, իսկ շուրջ 10,000–ը՝ 65 տարեկանէն վեր։ Շուրջ 27,000–ը ամուրի է, իսկ շուրջ 8,000–ը՝ 20 տարեկան կամ անկէ վար է։ Մօտաւորապէս, ռահվիրաներուն մէկ չորրորդը եղբայրներ են, որոնցմէ շատեր ընտանեկան եւ ժողովքային պատասխանատուութիւններ ունին։ Բոլորն ալ ռահվիրայութեան համար «ժամանակը ծախու» կ’առնեն, որ շատ մը պարագաներուն կը նշանակէ թէ աւելի պարզ՝ սակայն գոհունակ, կեանք մը պէտք է վարեն։—Կող. 4։5

¹⁰ Հարկ Կա՞յ որ Պարզացնէք. Ձեր կեանքը աւելի պարզացնելը ձեր առջեւ ռահվիրայութեան դուռը բացող բանալին կրնայ ըլլալ։ Ձեր կեանքը մեծ տա՞ն մը կը նմանի, որ անհրաժեշտ չեղող սենեակներ եւ կարասիք ունի, որու հոգ տանելու համար շատ ժամանակ, դրամ եւ աշխատանք կը պահանջուի։ Եթէ այս է պարագան, աւելի համեստ պայմաններու յարմարիլը կրնայ ռահվիրայութեան տեղ բանալ։ Աշխարհային գործի տրամադրուած ժամանակը կրնա՞ք նուազեցնել։ Կենսական չեղող գործունէութիւններէն կրնա՞ք ժամանակ ծախու առնել, կամ զբօսանքի յատկացուած ժամանակին նկատմամբ աւելի հաւասարակշռուած կրնա՞ք ըլլալ։

¹¹ Աստուածաշունչը Ա. Տիմոթէոս 6։8–ին մէջ կը խրատէ. «Կերակուր ու հանդերձ ունենալով՝ անոնցմով բաւականանանք»։ Քիչով բաւականանալը կարեւոր ազդակ մըն է որ Եհովայի ծառայութեան մէջ մեր լաւագոյնը ընենք, եւ հոգեւոր շահերը առաջին տեղը դնելը աւելի կը դիւրացնէ։ (Մատթ. 6։22, 33) 1998–ի Տարեգիրք–ին 104–րդ էջին վրայ, Ճափոնի տեղեկագրութեան մէջ քանի մը թելադրութիւններ ներկայացուած են թէ այդ երկրին մէջ ինչո՛ւ այսքան հոյակապ ռահվիրայութեան հոգի մը կայ։ Նկատի առէք ատոնցմէ մէկը. «Ընդհանուր առմամբ ճափոնական տուները որոշ չափով համեստ են, հետեւաբար հոգ տանելու նուազ ժամանակ կը պահանջեն, իսկ մեծաւ մասամբ մարդոց կեանքը աւանդականօրէն պարզ կը պահուի»։ Ասիկա Ա. Տիմոթէոս 6։8–ի բուն կէտը չէ՞։

¹² Երկրագունդի տարածքին, Աստուծոյ ծառաները բարի լուրը կը քարոզեն հետզհետէ աւելցող ուժգնութեամբ, Եհովայի փրկութեան օրը իր վախճանին չհասած։ Գովելիօրէն, անցեալ տարի միջին հաշուով շուրջ 700,000 անհատներ ամէն ամիս ռահվիրայութեան որոշ մէկ մարզին մէջ բաժին բերին։ Կրնա՞ք ձեր կեանքը վերաճշդումի ենթարկել, որպէսզի անոնց միանաք։ Ձեզ կը հրաւիրենք որ ուշադրութեամբ եւ աղօթքով ձեր պարագաները քննէք, մինչ կը պատասխանէք հետեւեալ հարցումին. «Այժմ ձեր առջեւ ալ ռահվիրայութեան դուռը բացուա՞ծ է»։

[Մէջբերում՝ էջ 3]

ՆՊԱՏԱԿԱԿԷՏ. 90,000 ԿԱՆՈՆԱՒՈՐ ՌԱՀՎԻՐԱՆԵՐ