‘Թող Բոլոր Բաները Շինութեան Համար Ըլլան’
1 Եղբայրներուն հետ մեր գործառնութեանց մէջ, ամէն բան անոնց շինութեան համար պէտք է ընենք։ Ասիկա կը նշանակէ թէ անոնց հոգեւոր շահերը պաշտպանելու նկատմամբ հետաքրքրուած պէտք է ըլլանք։ Եթէ աշխարհային գործ մը ունինք որ արտադրութիւն մը կամ սպասարկութիւն մը կը մատուցանէ, զգոյշ պէտք է ըլլանք որ մեր ըրածը եղբայրները չգայթակղեցնէ։—Բ. Կորն. 6։3. Փիլ. 1։9, 10
2 Ոմանք առեւտրական զանազան արկածախնդրական ծրագիրներու միջամուխ եղած են, իրենց հաւատակից Քրիստոնեաները հաւանական յաճախորդներ նկատելով։ Կարգ մը առեւտրական կազմակերպութիւններ իրենց ներկայացուցիչները կը քաջալերեն, որ ամէն ոք նկատեն որպէս հաւանական յաճախորդ մը, ի ներառեալ՝ իրենց պատկանած կրօնքին անդամները։ Կարգ մը եղբայրներ Վկաներու հսկայ հաւաքոյթներ կազմակերպած են, որպէսզի զանոնք քաջալերեն առեւտրական ձեռնարկի մը մասնակցելու։ Ուրիշներ իրենց արկածախնդրական ձեռնարկը յառաջ կը տանին անվճար առարկաներ, գրքոյկներ, Ինթըրնէթի վրայ տեղեկութիւններ, պատկերիզներ կամ ձայներիզներ ներկայացնելով իրենց հաւատակիցներուն։ Պատշաճ պիտի ըլլա՞ր որ Քրիստոնեայ մը իր աստուածպետական կապերը գործածէր իր հոգեւոր եղբայրները շահագործելու համար։ Ո՛չ։—Ա. Կորն. 10։23, 24, 31-33
3 Եղբայրները Զգոյշ Պէտք Է Ըլլան. Ասիկա չի նշանակեր թէ Քրիստոնեայ մը իր եղբօր հետ առեւտուր չի կրնար ընել։ Ասիկա անհատական հարց մըն է։ Սակայն, ոմանք ագահութիւն քաջալերող առեւտրական ծրագիրներ կը սկսին, եւ կը յորդորեն իրենց հաւատակիցները որ իրենց բաժնեկիցները կամ ներդրողները ըլլան։ Այս վտանգաւոր ձեռնարկներէն շատեր կը ձախողին, եւ անոնց մասնակցողներուն հսկայ գումարները կը կորսուին։ Թէեւ ձեռնարկին մասնակցողներուն շարժառիթն էր արագօրէն դրամ շահիլ, սակայն կազմակերպող անհատը պէտք չէ ինքզինք անմեղադրելի նկատէ՝ եթէ ձեռնարկը չյաջողի։ Ան նախապէս զգուշութեամբ նկատի պէտք է առնէ թէ իր եղբայրներուն հոգեւոր եւ ֆիզիքական բարօրութիւնը ի՛նչպէս կրնայ ազդուիլ, եթէ ձեռնարկը չյաջողի։ Աստուածպետական պատասխանատուութիւններ ունեցող անհատներ յատկապէս զգոյշ պէտք է ըլլան իրենց աշխարհային ձեռնարկներուն նկատմամբ, քանի որ ուրիշներ անոնց հանդէպ յարգանք ունին եւ իրենց վրայ որոշ վստահութիւն դրած են։ Սխալ պիտի ըլլար այդ վստահութիւնը չարաչար շահագործել։ Եթէ եղբայր մը ուրիշներու յարգանքը կորսնցնէ, սրբազան ծառայութեան առանձնաշնորհումները կրնան իրմէ առնուիլ։
4 Մեր նպատակակէտը պէտք է ըլլայ որ ‘բոլոր բաները շինութեան համար ըլլան’։ (Ա. Կորն. 14։26, Երուսաղէմ) Պէտք է խուսափինք ընելէ որեւէ բան որ ժողովքին մէջ առեւտրական գործունէութիւններ կը ներկայացնէ կամ զանոնք յառաջ կը մղէ։ Այսպիսի բաներ իրարու քով հաւաքուելու մեր սուրբ գրային պատճառներուն հետ ո՛չ մէկ առնչութիւն ունին։—Եբր. 10։24, 25