Հեռաձայնով Վկայելով Յաջողութիւն Գտնել

¹ Որպէս Եհովայի Վկաներ մեր նպատակը միա՛յն բարի լուրի քարոզչութեան մասնակցիլ չէ, այլեւ՝ Թագաւորութեան պատգամը կարելի եղածին չափ ամէն անհատի հասցնել է։ (Գործք 10։42. 20։24) Թէեւ տունէ տուն քարոզելը կը շարունակէ մարդոց հասնելու գլխաւոր կերպը ըլլալ, սակայն կը գիտակցինք թէ նոյնիսկ այս մեթոտով ամենուն հետ կապ չենք պահեր։ Ուստի, ‘մեր ծառայութիւնը լիովին կատարելու’ համար ուրիշ մեթոտներ կը գործածենք՝ ի ներառեալ հեռաձայնով վկայելը՝ ոչխարանման անհատներ գտնելու համար։—Բ. Տիմ. 4։5

² Շատ մը շրջաններու մէջ, մարդիկ կը բնակին չափազանց ապահովուած յարկաբաժիններու, բազմաթիւ ընտանիքներ բովանդակող համալիրներու, կամ ալ՝ մուտքը արգիլուած շրջաններու մէջ, ուր մեր սովորական դռնէ դուռի մեթոտով մարդոց հասնիլը դժուար է։ Նոյնիսկ թաղամասերու մէջ ուր կրնանք տունէ տուն աշխատիլ, մեծաւ մասամբ մարդիկ տունը չեն։ Սակայն, հրատարակիչներէն շատեր մեծ յաջողութիւն ձեռք կը ձգեն, այս բնակիչներուն հեռաձայնելով։ Առաւօտ մը, մինչ տունէ տուն կը քարոզէին, ամուսնացած զոյգ մը ինը դուռ զարկին որոնց տանտէրները տունը չէին։ Թագաւորութեան Սրահ վերադառնալէ ետք, անոնք պրպտեցին հասցէագիրք մը, որ իւրաքանչիւր հասցէին համապատասխանող հեռաձայնի թիւը կը նշէ։ Անոնք այս թիւերուն հեռաձայնեցին եւ տանտէրներէն ութն՝ տունը գտան։

³ Ձեր ծառայութեան մէջ հեռաձայնով վկայելու կերպը որդեգրելու կը վարանի՞ք։ Եղբայր մը խոստովանեցաւ. «Չեմ սիրեր որ մէկը տունս հեռաձայնէ ինծի բան մը ծախելու համար, հետեւաբար, այս կերպով վկայելու մասին կանխայղացուած առարկութիւն ունիմ»։ Սակայն, միա՛յն երկու հեռաձայն ընելէ ետք, ան ըսաւ. «Սքանչելի՛ է։ Երբե՛ք չէի խորհեր թէ զայն պիտի սիրէի, բայց ահա՛, կը սիրեմ զայն։ Մարդիկ հեռաձայնի վրայ աւելի հանդարտ կ’ըլլան, եւ ինծի հարկ եղած բոլոր բաները մատչելի են։ Ասիկա հոյակա՛պ է»։ Քոյր մը միեւնոյն հակազդեցութիւնը ունեցաւ. «Հեռաձայնով վկայելը իրապէ՛ս զիս չէր ոգեւորեր։ Խօսքին բացը, չէի ուզեր զայն ընել։ Սակայն, փորձեցի եւ տեսայ թէ շատ արդիւնաբեր էր։ Հեռաձայնով վկայելով 37 վերայցելութիւններ հաստատած եմ, եւ այնքան շատ ուսումնասիրութիւններ ունիմ, որ չեմ հասնիր անոնց»։ Եթէ յօժար էք հեռաձայնով վկայութիւնը փորձել, դո՛ւք ալ կրնաք յաջողութիւն գտնել։

⁴ Հեռաձայնով Վկայելու Համար Կազմակերպուիլ. Ժողովքի վկայութեան գործունէութիւնը ծառայութեան տեսուչին հսկողութեան ներքեւ է։ Կարիքին համաձայն, երէցները կրնան ուրիշ երէց մը կամ օգնական ծառայ մը նշանակել, որ իր հետ սերտօրէն գործակցի հեռաձայնով վկայութիւնը կազմակերպելու համար։ Թաղամասերուն հոգ տանող եղբայրն ալ իր բաժինը պէտք է բերէ, քանի որ ան է որ թաղամասերը պիտի նշանակէ եւ այժմէական արձանագրութիւն մը պիտի պահէ։ Շրջանային տեսուչն ալ պիտի հետաքրքրուի այս յայտագրին յառաջդիմութեամբ։

⁵ Եթէ ձեր թաղամասին մէջ շրջաններ կան որոնք դռնէ դուռ վկայութեամբ անհասանելի են, հեռաձայնի թաղամասեր պէտք է պատրաստուին։ Նշանակուած եղբայրը բծախնդրութեամբ պիտի պատրաստէ այն հասցէներուն ցանկը, որոնք այսպիսի թաղամասերու պիտի վերածուին։ Ասոնք յարաբերաբար փոքր պէտք է պահուին, որպէսզի կարելի ըլլայ զանոնք կանոնաւորաբար աշխատիլ։ Այսպիսի շրջաններ բովանդակող թաղամասի բոլոր քարտէսներուն վրայ, նշան մը պէտք է դրուի, որ ցոյց կու տայ թէ այդ որոշ շրջանը հեռաձայնով վկայելու համար նշանակուած է։

⁶ Հեռաձայնի թիւերը ուրկէ՞ կրնաք ձեռք ձգել։ Հեռաձայնի թիւերը հասցէներու համաձայն ցուցակագրող ուղեցոյց մը կարելի է գտնել հանրային գրադարանի մը մէջ։ Եթէ չափազանց ապահովուած համալիր մը իր հեռաձայնի ցանկը ունի, թերեւս կարենաք անկէ առնել հեռաձայնի թիւերը։ Այլապէս, կրնաք բնակողներուն անունները ընդօրինակել շէնքին մուտքին գտնուող անուանացանկէն, ապա զանոնք սովորական հեռաձայնի գրքին մէջ փնտռել։

⁷ Երէցները կրնան այս գործին հանդէպ գործօն հետաքրքրութիւն ցոյց տալ, կարգադրութիւն ընելով որ հեռաձայնով վկայելու գործունէութեան մէջ փորձառու անհատներ ուրիշները մարզեն, թերեւս Ռահվիրաները Ուրիշներուն կ’Օգնեն յայտագրին միջոցաւ։ Պարբերաբար, Ծառայութեան Ժողովին մէջ տեղական կարիքներու համաձայն նիւթ մը կրնայ պատրաստուիլ, վկայութեան այս երեսակին յաջողութեան աւելի եւս նպաստելու համար։

⁸ Երբ երէցներ տունը արգելափակուած կամ անկարող անհատներու հովուական այցելութիւններ տան, անոնք արթուն կ’ըլլան այսպիսիները քաջալերելու որ հեռաձայնով վկայելու գործին մասնակցին։ Թերեւս երէց մը կրնայ քանի մը հեռաձայն ընել, մինչ հրատարակիչը զինք կը դիտէ։ Ապա, հրատարակիչը կրնայ հեռաձայն մը ընելու պատեհութիւնը վայելել։ Այս կերպով սկսողներէն շատեր, ամէն օր մի քանի վայրկեան այս գործունէութեան կը յատկացնեն, եւ զայն ի՛րապէս կը սիրեն։

⁹ Յաջողութեան Համար Թելադրութիւններ. Երբ Յիսուս իր աշակերտները քարոզելու ղրկեց, զանոնք «երկու երկու ղրկեց»։ (Ղուկ. 10։1) Ինչո՞ւ։ Ան գիտէր թէ միասին աշխատելով անոնք իրարմէ պիտի սորվէին եւ զիրար քաջալերէին։ Պարագան նոյն է հեռաձայնով վկայութեան։ Երկու հոգիով աշխատելով, կրնաք իրարմէ սորվիլ, ձեր արդիւնքներուն մասին խօսակցիլ, եւ յաջորդ խօսակցութեան համար թելադրութիւններ ներկայացնել։ Նոյնիսկ հեռաձայնային խօսակցութեան մը ընթացքին, կրնաք իրարու օգնել յարմար տեղեկութիւններ գտնելու համար։

¹⁰ Յստակ կերպով մտածելու եւ կեդրոնանալու համար, նստեցէք հոն՝ ուր կրնաք ձեր վկայութեան գործիքները ձեր առջեւ դնել. Աստուածաշունչ մը, Պատճառաբանել գիրքը, Ի՛նչ կը Պահանջէ գրքոյկը, պարբերաթերթեր, եւայլն։ Կարգ մը ներկայացումներ գրի առէք, եւ զանոնք ձեր առջեւ ունեցէք։ Պատրաստ եղէք ճշգրիտ եւ լման արձանագրութիւններ պահելու, ի ներառեալ թուականը եւ ժամը, որպէսզի գիտնաք թէ ձեր գտած հետաքրքրութիւնը ե՛րբ պիտի հետապնդէք։

¹¹ Երբ մարդիկ հեռաձայնին մէջէն օտար ձայն մը լսեն, յաճախ զգոյշ կ’ըլլան։ Ուստի, ջերմ, բարեկամական եւ փափկանկատ եղէք։ Ձեր անձնաւորութիւնը եւ անկեղծութիւնը բնորոշելու համար, տանտէրը միա՛յն ձեր ձայնի եղանակը ունի։ Հանդարտ եղէք եւ սրտանց խօսեցէք։ Կամաց եւ յստակ խօսեցէք, լսելի եղող ձայնածաւալով մը։ Տանտիրոջ առիթ տուէք որ խօսի։ Ձեր լման անունը գործածեցէք, եւ իրեն ըսէք թէ դուք այդ շրջանին մէջ կ’ապրիք։ Չենք ուզեր որ մարդիկ խորհին թէ մենք հեռաձայնով վաճառողներ ենք։ Փոխանակ ըսելու թէ որոշ շէնքի մը կամ համալիրի մը բոլոր բնակիչներուն կը հեռաձայնէք, ըսէք թէ յատկապէս իրեն կը հեռաձայնէք։

¹² Հեռաձայնային Ներկայացումներ. Պատճառաբանել գրքին էջ 9-15–ին մէջ գտնուող ներկայացումներէն շատերը կարելի է հեռաձայնով վկայութեան յարմարցնել։ Կրնաք ըսել. «Ձեզի կը հեռաձայնեմ, քանի որ անկարող եմ գալու եւ ձեզի անձամբ տեսնելու։ Հեռաձայնելուս նպատակն է ձեր տեսակէտը առնել շատ հետաքրքրական հարցումի մը մասին»։ Ապա հարցումը հարցուցէք։

¹³ Կրնաք «Ոճիր/Ապահովութիւն» ենթագլուխին ներքեւ եղող առաջին ներկայացումը գործածել, հետեւեալ կերպով. «Բարեւ. անունս _____ է։ Ես շրջանին մէջ կը բնակիմ։ Կ’ուզեմ ձեզ վստահեցնել թէ ես բան մը չեմ վաճառեր, ոչ ալ փորձագիտանք մը կ’ընեմ։ Կը հեռաձայնեմ, քանի որ անձնական ապահովութեան հարցով մտահոգուած եմ։ Մեր շուրջը ոճիրը աւելցած է եւ ասիկա մեր կեանքին վրայ կ’ազդէ։ Կը խորհի՞ք թէ պիտի գայ ժամանակ մը երբ բոլոր մարդիկ պիտի կարենան գիշեր ատեն ճամբան քալել եւ ապահով զգալ։ [Թոյլ տուէք որ պատասխանէ։] Թոյլ տուէք որ ձեզի կարդամ թէ Աստուած ի՛նչ խոստացած է ընել»։

¹⁴ Հեռաձայնի վրայ Աստուածաշունչի ուսումնասիրութիւններ ներկայացնելու համար ուղղակի մօտեցումի կերպը գործածելը, լաւ արդիւնքներ տուած է։ Կարելի է ուսումնասիրութիւնը ցուցադրել քանի մը վայրկեանի մէջ։ Անհատին առաջարկեցէք իրեն այցելել իր տան մէջ, որպէսզի ուսումնասիրութիւնը շարունակէք, կամ, եթէ անհատը վարանի, առաջարկեցէք ուսումնասիրութիւնը ուրիշ օր մը հեռաձայնով շարունակել։

¹⁵ Երբ խօսակցութիւնը աւարտէք, ի մտի ունեցէք ըսել բան մը, որ անհատին իր տան մէջ այցելելու կամ նամակատան միջոցաւ գրականութիւն մը ուղարկելու պիտի առաջնորդէ։ Եթէ անհատը վարանի ձեզի իր հասցէն տալու, առաջարկեցէք դարձեալ հեռաձայնել։ Թերեւս հարկ ըլլայ քանի մը անգամ հեռաձայնել, մինչեւ որ ան հանգիստ զգայ ձեզ իր տունը հրաւիրելու։

¹⁶ Նախաքայլը Առնել. Տասնըհինգ տարեկան քոյր մը իր առաւօտեան ծառայութիւնը հեռաձայնով մը սկսաւ։ Ան կնոջ մը խօսեցաւ որ համաձայնեցաւ Գիտութիւն գիրքը ընդունիլ։ Երբ քոյրը գիրքը կնոջ տունը տարաւ, կինը ուզեց գիտնալ թէ այս պատանուհին իր հեռաձայնի թիւը ուրկէ՛ առած էր, քանի որ անիկա հեռաձայնի ուղեցոյցին մէջ չկար։ Քոյրը թիւը սխալմամբ գործածած էր։ Կինը ընդունեց ուսումնասիրել եւ այժմ չմկրտուած հրատարակիչ մըն է։

¹⁷ Քոյր մը հեռաձայնի թաղամաս մը առաւ, սակայն, երեք շաբաթ զայն աշխատելու տատամսեցաւ։ Ի՞նչ բան իրեն քաջութիւն տուաւ որ սկսի։ Ան յիշեց Զարթի՛ր 22 Յունուար 1997–ի յօդուած մը, որու խորագիրն էր՝ «Երբ Տկար Եմ, Այն Ատեն Զօրաւոր Եմ»։ Անիկա Վկայի մը մասին էր, որ հակառակ իր ֆիզիքական սահմանափակումներուն, հեռաձայնով կը քարոզէր։ Քոյրը ըսաւ. «Աղօթեցի Եհովայի, եւ իրմէ զօրութիւն խնդրեցի։ Իրմէ խնդրեցի որ ներկայացումիս համար յարմար բառերը տայ»։ Հեռաձայնով վկայելու առաջին օրուան արդիւնքը ի՞նչ եղաւ։ Ան կը տեղեկագրէ. «Եհովա աղօթքիս պատասխանեց։ Անհատներ ինծի մտիկ ըրին եւ վերայցելութեան մը համար կարգադրութիւններ ըրի»։ Հետագային, հեռաձայնով վկայելը Աստուածաշունչի ուսումնասիրութեան մը առաջնորդեց։ Ան կ’եզրափակէ, ըսելով. «Անգամ մը եւս Եհովա ինծի սորվեցուց իրեն ապաւինիլ եւ ո՛չ թէ իմ անձիս»։—Առ. 3։5

¹⁸ Ճշմարտութիւնը հեռաձայնով ներկայացնելը, բարի լուրը քարոզելու յաջող մեթոտ մը դարձած է։ Լա՛ւ պատրաստուեցէք, եւ լմա՛ն սրտով մասնակցեցէք։ Մի՛ վհատիք եթէ առաջին քանի մը փորձերուն նպաստաւոր ընդառաջում մը չստանաք։ Եհովայի առաջնորդութիւնը խնդրեցէք, եւ ձեր նոթերը բաղդատեցէք ուրիշներու նոթերուն հետ, որոնք այս ոգեւորիչ կերպով կը քարոզեն։ Մեր թաղամասին մէջ մէկը չմոռնալու փափաքով, թող որ մեր ծառայութիւնը ստիպողականութեան զգացումով եւ լիովին կատարենք։—Հռովմ. 10։13, 14