«Թագաւորութեան Նախանձախնդիր Ծանուցանողներ» Բնաբանով Եհովայի Վկաներու 2002–ի Նահանգային Համաժողով

¹ «Կ’ուրախանայի երբ ինծի կ’ըսէին. ‘Տէրոջը տունը երթանք’»։ (Սաղմ. 122։1) Սաղմոսերգուին այս արտայայտութիւնը քննելով, նկատի առէք՝ (1) թէ ան ի՛նչպէս զգաց երբ հրաւիրուեցաւ Եհովան պաշտողներուն միանալու, (2) իր ունեցած լաւ ընկերակիցները, որոնք նոյնպէս հետաքրքրուած էին ճշմարիտ պաշտամունքով, եւ (3) այն ծրագիրները որոնց հարկը կար, այս հրաւէրը տալու, իրարու քով ժողվելու եւ Աստուծոյ տունը ճամբորդելու համար։

² Սաղմոսերգուին խօսքերը չե՞ն արձագանգեր մեր զգացումները, երբ կը լսենք թէ մեր յաջորդ նահանգային համաժողովին համար ծրագիրներ կ’ըլլան։ Ակնկալութեամբ կը լեցուինք, երբ մտաբերենք անցեալին տեղի ունեցած համաժողովներուն ուրախութիւնները, եւ Եհովան սիրող մեր հաւատակիցներուն հետ մասնայատուկ առիթով դարձեալ հաւաքուելու հեռանկարը։ Կարգադրութիւններ եղած են որ 2002–ի «Թագաւորութեան Նախանձախնդիր Ծանուցանողներ» բնաբանով եռօրեայ Նահանգային Համաժողովները, Միացեալ Նահանգներու մասնաճիւղի ամբողջ թաղամասին մէջ տեղի ունենան։ Հիմա է ժամանակը ծրագիրներ ընելու, որպէսզի ներկայ գտնուինք եւ մեզի սպասող հոգեւոր կոչունքէն լաւագոյնս օգտուինք։

³ «Հաւատարիմ ու իմաստուն տնտեսը» արդէն սկսաւ պատրաստել համաժողովին ներկայացուելիք այժմէական հոգեւոր սնունդը։ (Ղուկ. 12։42) Իւրաքանչիւր ժողովք որոշ համաժողովի մը նշանակուած է, իւրաքանչիւր համաժողովի վայրին ու շրջակայ պանդոկներուն մէջ խճողում ստեղծելէ խուսափելու համար։ Ասկէ զատ, եղբայրներէն շատեր սկսած են համաժողովի զանազան բաժինները կազմակերպել, որպէսզի «ամէն բան վայելչութեամբ եւ կարգաւ» ըլլայ։ (Ա. Կորն. 14։40) Քանի որ մեր օգտին եւ յարմարութեան համար ա՛յսքան շատ կարգադրութիւններ կ’ըլլան, անձնապէս ի՞նչ կրնանք ընել այս համաժողովին պատրաստուելու համար։

⁴ Հիմակուընէ Կարգադրութիւններ Ըրէք Երեք Օրերուն Ներկայ Գտնուելու Համար. Ձեզի նշանակուած համաժողովի լման յայտագրին ներկայ գտնուելու համար պէտք ունի՞ք ձեր գործատիրոջմէն արձակուրդ ուզելու։ Եհովա գիտէ թէ կարգ մը գործատէրեր «ժանտաբարոյ» են։ (Ա. Պետ. 2։18) Սակայն մեր համաժողովները շատ կարեւոր են, եւ կ’ուզենք լուրջ ջանք թափել լման յայտագրին ներկայ գտնուելու համար։ Եհովայի աղօթեցէք այսպիսի հարցերու մասին, լաւ արդիւնք մը ձեռք ձգելու համար իր առաջնորդութիւնը խնդրելով։—Նէեմ. 2։4

⁵ Պանդոկի Ձեր Կարգադրութիւնները Ընելու Համար, Յանձնարարուած Իջեւանի Ցանկը Գործածեցէք. Երբ այս տեղեկութիւնները Ծառայութեան Ժողովին մէջ նկատի առնուելու ժամանակը հասնի, ձեր ժողովքը արդէն ստացած պիտի ըլլայ՝ ձեր համաժողովին համար Յանձնարարուած Իջեւանի Ցանկը։ Այս ցանկին մէջ յիշուած պանդոկներուն հեռաձայնեցէք եւ վերապահումներ ըրէք, քայլ առ քայլ գործածելով էջ 4–ի վրայ գտնուած «Իջեւանի Ձեր Վերապահումները Ի՛նչպէս Ընել» խորագրով շրջագծին թելադրութիւնները։ Իւրաքանչիւր սենեակի մէջ առաւելագոյնը չորս չափահասներ արտօնուած են, բացի՝ եթէ ցանկը ուրիշ բան նշած է։ Ընդունեցէք միայն ցոյց տրուած սակերը, քանի որ պանդոկները համաձայնած են մեր պատուիրակներէն այդքան գանձել։ Եթէ պանդոկ մը փորձէ ցանկին մէջ գտնուած սակէն տարբեր սակ մը պահանջել, կամ նշէ թէ յաւելեալ վճարումներ պէտք է ընէք (սովորական տուրքերէն զատ), անոնց պահանջած բարձր սակը մի՛ ընդունիք։

⁶ Կարգ մը հրատարակիչներ, առանց Յանձնարարուած Իջեւանի ընթացիկ Ցանկին նայելու, թերեւս պանդոկի մը հեռաձայնեն եւ հարցնեն թէ մեր համաժողովին համար մասնաւոր սակեր ունի՞։ Պանդոկը կրնայ իրենց վստահեցնել թէ Եհովայի Վկաներուն համար մասնաւոր սակ մը ունի, թէեւ վաւերական պատճառի մը համար կրնայ ցանկին վրայ չգտնուիլ։ Փոխանակ պանդոկի մը հեռաձայնելու եւ հարցնելու թէ մասնաւոր սակեր ունի թէ ոչ, հաճեցէք նախ ցանկին նայիլ։ Եթէ կը ծրագրէք տարբեր քաղաքի մը մէջ համաժողովի յաճախել, այդ համաժողովին համար Յանձնարարուած Իջեւանի Ցանկը խնդրեցէք։ Ժողովքի քարտուղարը կրնայ ձեզի տալ համաժողովի կեդրոնատեղիին հասցէն, որ Մասնայատուկ Կարիքներու Համար Իջեւանի Խնդրագրի պատճենին ետեւի կողմը կը գտնուի։ Ձեր խնդրանքին հետ ներփակեցէք նամակադրոշմ մը ու ձեր անձնական հասցէն կրող նամակի պահարան մը։ Եթէ այդ քաղաքին մէջ մէկէ աւելի համաժողովներ կան, մի՛ մոռնաք ձեր յաճախելիք համաժողովին թուականները յիշելու։

⁷ Ձեր ժողովքի քարտուղարին միջոցաւ, հաճեցէք Իջեւանի Գրասենեակին տեղեկացնել ձեր հետ պատահած որեւէ խնդիր։ (Քարտուղարը տեղեակ պահելէ առաջ թէ մատչելի սենեակներ չկան, վստահ եղէք որ Յանձնարարուած Իջեւանի Ցանկին մէջ գտնուող բոլոր պանդոկներուն հեռաձայնած էք։) Ձեր համաժողովի Իջեւանի Գրասենեակին հասցէն ու հեռաձայնի թիւը կրնաք գտնել Յանձնարարուած Իջեւանի Ցանկին առաջին էջին վերեւը։

⁸ Ժողովքին Չորս Կողմը Նայեցէք. Եթէ տեղեակ ենք թէ եղբայր մը կամ քոյր մը ֆիզիքական կամ նիւթական կարիք մը ունի, որ կրնայ պատճառ ըլլալ որ համաժողովին ներկայ չգտնուի, կրնա՞նք մեր սիրոյն մէջ ‘լայննալ’ եւ որոշ աջակցութիւն մը հայթայթել։ (Բ. Կորն. 6։12, 13. Բ. Օր. 15։7) Այս հոգին է որ Պօղոս քաջալերեց Բ. Կորնթացիս 8։14–ին մէջ։ Ինչո՞ւ այսպիսիները չհրաւիրէք որ ձեր հետ ճամբորդեն դէպի համաժողով։ Եթէ ռահվիրաներ են, հաւանաբար ճամբու ընթացքին ձեր հետ բազմաթիւ հաճելի փորձառութիւններ բաժնեն։ Եթէ ժողովքին տարեց անդամներն են, թերեւս աստուածպետական հոյակապ պատմութիւն մը ունին, որ երբեք լսած չէք։ Այսպիսի եղբայրներու ու քոյրերու հետ ընկերակցիլը ձեր ու ձեր ընտանիքին վրայ լաւ ազդեցութիւն մը պիտի չո՞ւնենայ։ Ձեր առատաձեռն հոգին անոնց կողմէ պիտի գնահատուի եւ Եհովայի կողմէ պիտի վարձատրուի։—Առ. 28։27. Մատթ. 10։42

⁹ Թէեւ մասնայատուկ կարիքներ ունեցողներուն գլխաւորաբար հոգ տանողները Քրիստոնեայ ազգականներն են, սակայն երէցները եւ ժողովքի այլ անդամները որոնք տեղեակ են այսպիսի կարիքներէ, կարգադրութիւններ ընելու մէջ կրնան սիրալիրօրէն օժանդակութիւն բերել։ (Ա. Տիմ. 5։4) Երբ Մասնայատուկ Կարիքներու Համար Իջեւանի Խնդրագրի պատճենները Ժողովքի Ծառայութեան Յանձնախումբին կը ներկայացուին, յանձնախումբը պէտք է աչքէ անցընէ դիմումնագիր ներկայացնող իւրաքանչիւր անհատի որակումները, այս խնդրագիրները Իջեւանի Գրասենեակին ղրկելէ առաջ։ Ժողովքի քարտուղարը խնդրագրին վրայ պէտք է իր հեռաձայնի թիւը դնէ, որպէսզի Իջեւանի Գրասենեակը կարենայ իր հետ կապ պահել, եթէ որեւէ հարցում ծագի։ Ընդունուած խնդրագիրները պէտք է պատճենին ետեւը յիշուած համաժողովի հասցէին ղրկուին։

¹⁰ Որպէս Կամաւոր՝ Յօժարակամօրէն Ընդառաջեցէք. Համաժողովի ընթացքին, հարիւրաւոր կամաւորներ կ’աջակցին, որպէսզի զանազան բաժինները սահուն կերպով գործեն։ Լսարանին եւ կառատան մէջ գտնուող հիւրընկալները, նստարաններու վերաբերեալ ուղղութիւն կը հայթայթեն եւ օրուան ընթացքին մեր ինքնաշարժներուն վրայ կը հսկեն։ Մաքրութեան Բաժինը առանձնաշնորհումը ունի մաքրութեան համար մեր ունեցած ընտիր համբաւը բարձր պահելու, մեր ժամանակաւոր պաշտամունքի վայրը աւելի մաքուր վիճակի մէջ ձգելով։ Կրնա՞նք այս կամ այլ բաժիններուն օգնել, որոնք մեր աջակցութեան կարիքը կրնան ունենալ։ Յօժա՞ր էք ձեր օգնութիւնը ներկայացնելու, ձեր եղբայրներուն հետ «ուս ուսի» ծառայելու համար։—Սոփ. 3։9, ՆԱ

¹¹ Մարդիկ Իրապէս կը Նկատե՞ն Մեր Ըրածը. Անցեալ տարի, նահանգային համաժողովի մը ընթացքին, մարդ մը որ Եհովայի Վկաներուն հետ իր ուսումնասիրութիւնը դադրեցուցած էր 20 տարի առաջ, պանդոկի մը մէջ կ’աշխատէր։ Ան կարգ մը Վկաներու ըսաւ թէ այժմ կը մտածէր Աստուածաշունչի իր ուսումնասիրութիւնը վերսկսիլ եւ վերստին ժողովներու յաճախել։ Ինչո՞ւ։ Քանի որ Վկաները իր հետ սիրալիր կերպով վարուած էին, պանդոկին մէջ իրենց կեցութեան ընթացքին։

¹² Պանդոկի վաճառորդներէն մէկը մեր եղբայրներուն մասին ըսաւ. «Ձեր խումբը մեր պանդոկներուն մէջ իջեւանող լաւագոյն խումբն է։ Դուք շատ համբերատար եւ քաղաքավար մարդիկ էք»։ Մեր երկնաւոր Հայրը ասոր համար որքա՜ն հպարտ կը զգայ, տեսնելով որ Յիսուսի յորդորին կը հետեւինք. «Այնպէս թող լուսաւորուի ձեր լոյսը մարդոց առջեւ, որ տեսնեն ձեր բարի գործերը ու փառաւորեն ձեր Հայրը որ երկինքն է»։—Մատթ. 5։16

¹³ Թող որ Դաւիթ Թագաւորին մտավիճակը արտացոլացնենք, որ ուրախութեամբ կ’ակնկալէր Եհովայի պաշտամունքի տունը երթալ։ Մեր նահանգային համաժողովները հոգեւոր սնունդի կենսական աղբիւր մը եւ սիրալիր ընկերակցութեան անհամեմատելի պատեհութիւն մըն են։ Հետեւաբար, խանդավառօրէն կը հրաւիրենք ձեզ որ սկսիք ձեր կարգադրութիւնները ընել, այս տարուան «Թագաւորութեան Նախանձախնդիր Ծանուցանողներ» բնաբանով Նահանգային Համաժողովին երեք օրուան բոլոր նիստերուն ներկայ գտնուելու համար։

[Շրջանակ՝ էջ 3]

Յայտագրին Ժամերը

Ուրբաթ եւ Շաբաթ

կ.ա. 9:30 – կ.ե. 5։00

Կիրակի

կ.ա. 9:30 – կ.ե. 4։00

[Շրջանակ՝ էջ 4]

Իջեւանի Ձեր Վերապահումները Ի՛նչպէս Ընել

1. Պանդոկներուն հեռաձայնեցէք կարելի եղածին չափ շուտով, սովորական գործի ժամերուն։ Յանձնարարուած Իջեւանի Ցանկին մէջ յիշուած պանդոկներուն հեռաձայնի թիւերը գործածեցէք։

2. Պանդոկին տեղեկացուցէք որ Եհովայի Վկաներու համաժողովին ներկայ պիտի գտնուիք։

3. Պանդոկին մէջ ձեր կեցութեան թուականները տուէք։

4. Վստահ եղէք որ Յանձնարարուած Իջեւանի Ցանկին մէջ եղած սակը պիտի վճարէք։ Մերժեցէք աւելի բարձր սակ մը։

5. Եթէ մատչելի սենեակներ չկան, ցանկին վրայ յիշուած ուրիշ պանդոկի մը հեռաձայնեցէք։

6. Ձեր վերապահումը ըրէք եւ զայն վաւերացնող թիւ մը խնդրեցէք։

7. Ձեր կանխավճարը վարկաքարտով, դրամատոմսով կամ վճարագրով ըրէք։ Հաճեցէք թղթադրամ ՉՈՒՂԱՐԿԵԼ։ Եթէ կանխավճարը դրամատոմսով կամ վճարագրով կ’ընէք, վաւերացնող թիւը վրան գրելու մի՛ մոռնաք։ Տասը օրուան մէջ թղթատարութեամբ ուղարկեցէք զայն։

8. Եթէ որեւէ խնդիր ունենաք, խօսեցէք ձեր ժողովքի քարտուղարին։

Հաճեցէք՝

◼ Միայն Յանձնարարուած Իջեւանի Ցանկին մէջ յիշուած պանդոկներուն մէջ իջեւանիլ։

◼ Վերապահել միայն այն սենեակները, որոնք իրապէս պիտի գործածէք։

◼ Ձեր սկիզբի վերապահումը պահել։