«Աստուծոյ Խօսքը Կատարողներ» Եհովայի Վկաներու 2000–ի Նահանգային Համաժողով

¹ «Մեծ ժողովին մէջ քեզ պիտի գովեմ, մեծ բազմութեան մէջ քեզ պիտի օրհնեմ»։ (Սաղմ. 35։18) Երեւակայեցէք որ Դաւիթ որքա՜ն պիտի ոգեւորուէր ներկայիս, տեսնելով հազարաւորներ, որոնք խաղաղութեամբ միասնաբար կը հաւաքուին աստուածային ուսուցում ստանալու համար, մեր համաժողովներուն մէջ։ Դուք ալ «Աստուծոյ Մարգարէական Խօսքը» Նահանգային Համաժողովներուն ներկայ գտնուող 1,414,534–էն մէ՞կն էիք։ 1999–ին Մայիսի վերջաւորութենէն մինչեւ Սեպտեմբերի սկիզբը, Ամերիկայի սահմանակից նահանգներուն մէջ, ընդամէնը 201 համաժողովներ տեղի ունեցան 71 քաղաքներու մէջ։ 2000–ի մեր նահանգային համաժողովները, մեզի նոր պատեհութիւն պիտի տան, հաւաքուելու Եհովան փառաբանող մեր ընկերակիցներուն հետ, որոնք «գիտակից են իրենց հոգեւոր պէտքերուն», եւ ուրախ ու անհամբեր լսելու՝ թէ ‘Հոգին ի՛նչ կ’ըսէ եկեղեցիներուն’։—Մատթ. 5։3, ՆԱ. Յայտ. 2։29

² Իջեւան Ապահովել. Ամէն տարի, ուրախութեամբ ձեզի տեղեկութիւն կը հայթայթենք համաժողովի նկատմամբ իջեւանի կարգադրութեանց մասին, եւ մեծապէս կը գնահատենք այս հրահանգներուն նկատմամբ ձեր համագործակցութիւնը։ Տեղական Իջեւանի Գրասենեակը՝ Յանձնարարուած Իջեւանի Ցանկ մը պատրաստած է, որ պատրաստ պիտի ըլլայ վերապահումներ ընդունելու՝ Յունուարին։ Հաճեցէք այս յաւելուածականին «Իջեւանի Վերապահումներ Ընել» խորագրով շրջագծին մէջ յիշուած ուղղութիւններուն հետեւիլ։ Հրդեհի եւ ապահովութեան օրէնքներուն պատճառաւ, պէտք է ծրագրէք որ առաւելագոյնը չորս անհատներ ըլլան իւրաքանչիւր սենեակի մէջ։ Եթէ որոշ պանդոկ մը մէկ սենեակի մէջ չորս անհատներէ աւելի կը թոյլատրէ, ասիկա յստակօրէն պիտի յիշուի Յանձնարարուած Իջեւանի Ցանկին մէջ, «Չափահասներ» ենթագլուխին ներքեւ։

³ Ձեր համաժողովին համար մատչելի պանդոկները առաջին Յանձնարարուած Իջեւանի Ցանկին վրայ դրուած են։ Երբ այս պանդոկները լեցուին, վերստուգուած ցանկ մը պիտի ղրկուի ձեր ժողովքին։ Եթէ ցանկին վրայ գտնուած բոլոր պանդոկներուն հեռաձայնելէ ետք մատչելի սենեակներ չգտնուին, ձեր ժողովքի քարտուղարը տեղեակ պահեցէք։ Ան ցանկին վերը յիշուած հասցէն կամ հեռաձայնի թիւը գործածելով Իջեւանի Գրասենեակին հետ կապ պիտի պահէ, պարագան բացատրելու համար։ Փոխանակ ձեր ցանկին վրայ չեղող պանդոկներէն վերապահումներ ընելու, հաճեցէք նոր ցանկը սպասել։

⁴ Կը խնդրենք որ ձեր վերապահումը ընելէն ետք, զայն չփոխէք։ Ցանկին վրայ յաւելեալ պանդոկներ կ’աւելնան, ոչ թէ արդէն վերապահումներ ունեցողներուն յաւելեալ ընտրութիւն մը տալու համար, այլ՝ որովհետեւ կան եղբայրներ ու քոյրեր որոնք տակաւին սենեակներու կարիքը ունին։ Այս ուղղութիւններուն հետեւիլը, մեր Քրիստոնեայ եղբայրներուն հանդէպ սէր ցուցաբերելու եւ աշխարհի մէջ շատ տիրական եղող «առաջ ես»ի կեցուածքէն խուսափելու պատեհութիւն կու տայ մեզի։—Ա. Կորն. 10։24

⁵ Պանդոկներուն Կանխավճարներ Ղրկել եւ Պանդոկի Մէջ Ծագած Խնդիրները Ձեռք Առնել. Սենեակի մը վերապահումը երաշխաւորելու համար, իւրաքանչիւր ապահովուած սենեակի համար մէկ գիշերուան կանխավճար պէտք է տրուի, վերապահումը ընելէն ետք տասը օրուան միջոցին։ Առանց կանխավճարի, պանդոկը իրաւունք ունի ձեր սենեակը ուրիշի մը տալու։ Համաժողովէն առաջ կամ վերջ եթէ որեւէ դժուարութեան հանդիպիք, կրնաք Իջեւանի Գրասենեակին գրել կամ հեռաձայնել, գործածելով Յանձնարարուած Իջեւանի Ցանկին վերը յիշուած հասցէն կամ հեռաձայնի թիւը։ Եթէ խնդիր մը ծագի համաժողովի միջոցին, պէտք է կարելի եղածին չափ շուտով համաժողովի Իջեւանի Գրասենեակը երթաք, որպէսզի եղբայրները կարենան ձեզի օգնել, պանդոկը ձգելէ առաջ։

⁶ Մասնայատուկ Կարիքներ Ունեցողներուն Հոգատարութիւնը. Ազգականներ, երէցներ ու ժողովքին մէջ ուրիշներ, որոնք տեղեակ են տարեցներուն, ֆիզիքապէս անկարողներուն, լման ժամանակով ծառայողներուն կամ մասնայատուկ կարիքներ ունեցող այլ անհատներու յատուկ պարագաներէն, իրենց սիրալիր հետաքրքրութիւնն ու հոգատարութիւնը կրնան ցուցաբերել, անոնց օգնելով որ համաժողովի ներկայ գտնուին։ (Բաղդատել՝ Ա. Տիմոթէոս 5։4) Ընկերութեան՝ Մասնայատուկ Կարիքներու Համար Իջեւանի Խնդրագիրը, կը յիշէ թէ ի՛նչ պայմաններ պէտք է լեցուին այս խնդրագիրը ներկայացնելու համար։ Այս կարգադրութիւնը միայն օրինակելի հրատարակիչներու համար է, լաւ վարք ունեցող զաւակի տէր անհատներն ալ ներառեալ, որոնք Ժողովքի Ծառայութեան Յանձնախումբին հաւանութիւնը ունին։ Այս խնդրագիրները Իջեւանի Գրասենեակին պէտք է ղրկուին կարելի եղածին չափ շուտ, գործածելով պատճենին ետեւը յիշուած համաժողովի հասցէն։

⁷ Ուրիշ Համաժողովի մը Երթալ. Եթէ Յանձնարարուած Իջեւանի Ցանկ մը, կամ տարբեր համաժողովի մը մասին տեղեկութիւն կ’ուզէք, ժողովքի քարտուղարը կրնայ ձեզի տալ համաժողովի կեդրոնատեղիին հասցէն, որ Մասնայատուկ Կարիքներու Համար Իջեւանի Խնդրագրի պատճենին ետեւի կողմը կը գտնուի։ Ձեր խնդրանքին հետ միշտ պարփակեցէք նամակադրոշմ մը ու ձեր անձնական հասցէն կրող նամակի պահարան մը։ Եթէ այդ քաղաքին մէջ մէկէ աւելի համաժողովներ կան, չմոռնաք ձեր յաճախելիք համաժողովին թուականը յիշելու։

⁸ Կարգադրութիւն Ըրէք որ Երե՛ք Օրերն ալ Ներկայ Գտնուիք. Արդեօք Սատանան փորձա՞ծ է ձեր ուշադրութիւնը շեղել հոգեւոր բաներու ուշադրութիւն տալէ։ Դժբախտաբար, մեր եղբայրներէն ու քոյրերէն շատեր, եւ անոնց ընտանիքները, հոգեւոր կենսական ուտելիք ստանալու առիթը կը կորսնցնեն։ Ի՞նչպէս։ Նահանգային համաժողովի Ուրբաթ օրուան նիստին ներկայ չգտնուելով։ Կարգ մը պարագաներու, նկատի առնուած է թէ մեր եղբայրներուն հսկայ համեմատութիւնը Ուրբաթ օրուան նիստերուն հայթայթած հոգեւոր ուսուցումը եւ ընկերակցութիւնը կը կորսնցնեն։

⁹ Կրնա՞յ ըլլալ որ մեր եղբայրներէն ոմանք կը վարանին համաժողովի ներկայ գտնուելու համար իրենց գործատէրերէն արձակուրդ խնդրելու։ Ձեր պարագան ալ ա՞յս է։ Ինչո՞ւ այս հարցին համար Եհովայի չաղօթէք, եւ քաջութիւն հաւաքելով ձեր պարագան չբացատրէք գործատիրոջ։ Յիշեցէք Նէեմիայի ձեռք ձգած արդիւնքը, որ նոյնանման պարագայի մը մէջ կը գտնուէր։ (Նէեմ. 2։1-6) Մեր երկնաւոր Հօր ձեզի օգնելու պատրաստակամութեան վստահեցէք, գիտնալով որ եթէ Թագաւորութեան շահերը առաջին տեղը դնէք, ան կեանքի անհրաժեշտութիւնները պիտի հայթայթէ։—Մատթ. 6։32բ, 33

¹⁰ Մեր Համաժողովները Ի՞նչ Ազդեցութիւն Ունին Ձեր Վրայ. Միացեալ Նահանգներու արեւելեան մասէն քոյր մը գրեց. «Շատ շնորհակալ եմ ձեզի 1999–ի նահանգային համաժողովներուն համար։ Ինծի համար մեծ ուրախութիւն է ընկերակցիլ եղբայրներու հետ, որոնց տարին անգամ մը կը տեսնեմ։ Ճշմարտութեան հետ շփման մէջ եկայ երբ յղի պատանուհի մըն էի, եւ տակաւին մեծ խանդաղատանքով կը յիշեմ, երբ ինծի հետ Աստուածաշունչ ուսումնասիրողը առաջին անգամ ըլլալով համաժողովի տարաւ զիս։ Այդ բացօթեայ մարզադաշտին մէջ գլխուս վերեւ եղող ամպերուն նայեցայ եւ մինչ ‘Հազարաւոր Եղբայրներ’ խորագրով Թագաւորութեան երգեցողութիւնը կ’երգէինք՝ արտասուեցի։ Ինքզինքիս հարց տուի. ‘Շուրջիններս հոյակապ անհատներ են. Եհովա ի՞նչպէս պիտի ընդունի զի՛ս’։ Այդ օրը որոշեցի բոլորանուէր կերպով Եհովայի ծառայել»։ Ի՜նչ սիրտ տոգորող փորձառութիւն մը։ Վստահաբար հաճոյք է Եհովայի մաքուր ժողովուրդին հետ ընկերակցիլ, այնպէս չէ՞։

¹¹ Վերջին օրերու վերջին մասին ընթացքին, որեւէ ժամանակէ աւելի կարիքը ունինք մեր տարեկան նահանգային համաժողովներուն։ Անիկա մեր հոգեւոր առողջութիւնը եւ հաւասարակշռութիւնը պահելու համար Եհովայի մէկ կարգադրութիւնն է։ Հետեւաբար, վճռեցէք այս տարուան «Աստուծոյ Խօսքը Կատարողներ» խորագրով Նահանգային Համաժողովի երեք օրերուն ալ ներկայ գտնուիլ։ Ի՞նչպէս կրնաք ձեր որոշումը իրագործել։ Ձեր գործատէրէն նախապէս արձակուրդ խնդրեցէք, որպէսզի համաժողովի բոլոր նիստերուն ներկայ գտնուիք։ Եթէ սահմանափակ եկամուտ ունիք, հիմակուընէ սկսեցէք համաժողովին համար հարկ եղած գումարը մէկ կողմ դնել։ Եհովայէ օգնութիւն խնդրեցէք որեւէ արգելքներ յաղթահարելու համար։ Մինչ ասիկա կ’ընէք, կրնաք ձեր եղբայրներուն ու քոյրերուն ջերմ ընկերակցութիւնը վայելելու եւ մեր սիրալիր երկնաւոր Հօր՝ Եհովայի՝ յաւիտենական կեանքի խօսքերը լսելու, ակնկալութիւնը ունենալ։—Համեմատել՝ Յովհաննու 6։68

[Շրջանակ՝ էջ 3]

Յայտագրի Ժամանակները

Ուրբաթ եւ Շաբաթ

9։30 կ.ա. 5։00 կ.ե.

Կիրակի

9։30 կ.ա. 4։00 կ.ե.

[Շրջանակ՝ էջ 4]

Իջեւանի Վերապահումները Ընելու Համար Առնուելիք Քայլեր

1. Պանդոկներուն հեռաձայնեցէք գործի սովորական ժամերուն (եթէ կարելի է՝ Յունուարին)։ Յանձնարարուած Իջեւանի Ցանկին մէջ յիշուած պանդոկներու հեռաձայնի թիւերը գործածեցէք։

2. Պանդոկին տեղեկացուցէք որ դուք Եհովայի Վկայ մըն էք, որ Դիտարանի համաժողովին ներկայ պիտի ըլլաք։

3. Պանդոկին մէջ ձեր կեցութեան թուականները տուէք։

4. Վստահ եղէք որ Յանձնարարուած Իջեւանի Ցանկին վրայ եղած սակը պիտի վճարէք։ Մերժեցէք աւելի բարձր սակ մը։

5. Եթէ մատչելի սենեակներ չկան, ցանկին վրայ յիշուած ուրիշ պանդոկի մը հեռաձայնեցէք։

6. Ձեր վերապահումները ըրէք եւ զայն վաւերացնող թիւ մը խնդրեցէք։

7. Ձեր կանխավճարը վարկաքարտով, դրամատոմսով կամ վճարագրով ըրէք։ Հաճեցէք թղթադրամ ՉՈՒՂԱՐԿԵԼ։ Եթէ ձեր կանխավճարը ընէք

Վարկաքարտով. Պանդոկին պատուիրեցէք որ ձեր կանխավճարը անմիջապէս գանձէ վարկաքարտէն։

Դրամատոմսով կամ վճարագրով. Վաւերացնող թիւը վրան գրեցէք եւ տասը օրուան մէջ թղթատարութեամբ զայն ուղարկեցէք։

Հաճեցէք Նաեւ Նկատի Առնել.

◼ Միայն Յանձնարարուած Իջեւանի Ցանկին մէջ յիշուած պանդոկներուն մէջ իջեւանեցէք։

◼ Միայն ձեր եւ ձեր հետ մասնայատուկ կարգադրութիւններ ընող անհատներուն համար սենեակ/սենեակներ վերապահեցէք։

◼ Ձեր սկիզբի վերապահումը պահեցէք։