«Աստուծոյ Հետ Քալեցէք» Բնաբանով Եհովայի Վկաներու 2004–ի Նահանգային Համաժողով

¹ Ի՞նչ բան ձեզ կը հրապուրէ մեր տարեկան նահանգային համաժողովին։ «Հաւատարիմ ու իմաստուն ծառայ»ին կողմէ մեզի համար պատրաստուած շինիչ դասախօսութիւններն ու թատերախա՞ղը։ (Մատթ. 24։45-47) Այժմէական հոգեւոր սնունդ պարունակող նոր գրականութիւննե՞րը։ Այն եղբայրներն ու քոյրե՞րը, որոնք իրենց փորձառութիւնները կը պատմեն թէ ի՛նչպէս Աստուածաշունչը իրենց կեանքը բարեփոխեց։ Ուրիշ երկիրներու մէջ Թագաւորութեան քարոզչութեան յառաջդիմութեան մասին տեղեկագրութիւննե՞րը։ Ամէն տարիքի պատկանող հաւատակիցներու հետ ընկերակցութի՞ւնը։ Այս եւ բազմաթիւ այլ պատճառներու համար, սուր ակնկալութեամբ կը սպասենք մեր նահանգային համաժողովներուն։

² Երեք Օրերուն Ալ Ներկայ Գտնուեցէք. Մովսէսի միջոցով, Եհովա պատուիրեց. ‘Հաւաքեցէք ժողովուրդը, որպէս զի լսեն ու սորվին’։ (Բ. Օր. 31։12) Հաւատարիմ ու իմաստուն ծառայ դասակարգին միջոցով, Եհովա մեզ դաստիարակելու համար մասնայատուկ յայտագիր պատրաստած է համաժողովին իւրաքանչիւր օրը։ Որովհետեւ ան ‘մեզի օգտակար եղածը’ կը սորվեցնէ, կ’ուզենք ներկայ գտնուիլ որ իր բոլոր հրահանգները մտիկ ընենք։ (Եսայ. 48։17) Եթէ ստիպուած էք ձեր գործատէրէն արձակուրդ խնդրել, Եհովայի աղօթեցէք եւ ապա խնդրանքը ներկայացուցէք, Նէեմիայի խիզախութիւնը ընդօրինակելով։ (Նէեմ. 1։11. 2։4) Նաեւ նկատառութիւն պիտի սեպուի եթէ համաժողովի վերաբերեալ ձեր ծրագիրներուն մասին տեղեակ պահէք ձեր ընտանիքի անհաւատ անդամները, կարելի եղածին չափ շուտ։

³ Իջեւանի Կարգադրութիւններ. Ձեր հանգստաւէտութեան համար, արդէն իսկ իւրաքանչիւր համաժողովի քաղաքին մէջ իջեւանի կարգադրութիւններ եղած են։ Ծառայութեան Ժողովին մէջ այս յաւելուածականը նկատի առնուելէ ետք, մատչելի եղած պանդոկներուն վերաբերեալ Յանձնարարուած Իջեւանի Ցանկը պիտի դրուի ձեր ժողովքի տեղեկութիւններու ցուցատախտակին վրայ։ Մասնաճիւղի գրասենեակին աջակցող տեղական եղբայրները կարող են այս զեղչուած սակերը ապահովել, ձեր ընտիր համագործակցութեան շնորհիւ։ Հետեւաբար, հաճեցէք սենեակներ վերապահել միայն ցանկին յիշած պանդոկներուն մէջ եւ վճարել միայն նշուած սակերը։ Ասիկա պիտի նպաստէ որ ամէն տարի, համաժողովի վայրին մօտ, կարենանք լաւագոյն սակերով բարձրորակ պանդոկներ ապահովել։ Համաժողովի վայրէն քիչ մը հեռու գտնուող պանդոկներն ալ շատ լաւ են։ Ձեր վերապահումները ընելու համար հեռաձայնելէ առաջ, աչքէ անցուցէք «Ի՛նչպէս Կրնաք Իջեւանի Կարգադրութիւններուն Թիկունք Կանգնիլ» շրջագիծը, էջ 4։ Երբ հեռաձայնէք, «Պանդոկի Սենեակ մը Վերապահելու Լաւագոյն Կերպը Ի՞նչ Է» շրջագծին նշած կէտերուն հետեւեցէք։

⁴ Մասնայատուկ Կարիքներ. Պօղոս առաքեալ Գաղատիայի մէջ գտնուած ժողովքներուն յիշեցուց որ ‘բարիք ընեն ամենուն, մանաւանդ հաւատքի ընտանիներուն’։ (Գաղ. 6։10) Տարեց եղբայրներն ու քոյրերը, անկարողները, առանձին ծնողները կամ լիաժամ ծառայութեան մէջ եղողները, թերեւս օգնութիւն չխնդրեն, բայց համաժողովին ներկայ գտնուելու համար կրնան դժուարութիւններ ունենալ։ Ի վիճակի՞ էք անոնց ‘բարիք ընելու’ եւ օգնութեան ձեռք երկարելու։ Գլխաւորաբար Քրիստոնեայ ազգականները եւ երէցները այսպիսի անհատներու պարագաներուն քաջատեղեակ պէտք է ըլլան։

⁵ Եթէ հրատարակիչ մը Մասնայատուկ Կարիքներու Համար Իջեւանի Խնդրագիր ներկայացնէ, Ժողովքի Ծառայութեան Յանձնախումբը զայն աչքէ պիտի անցընէ, գործածելով խնդրագրին նշած ուղեգծերը։ Անոնք պէտք է նկատի առնեն թէ տեղական ժողովք կրնա՞յ այս կարիքին հոգ տանիլ։ Այս կարգադրութիւնը միմիայն լաւ կեցուածք ունեցող հրատարակիչներուն եւ անոնց լաւ վարք ունեցող զաւակներուն համար է։ Եթէ Իջեւանի Գրասենեակը մասնայատուկ կարիքներու խնդրագրի մը նկատմամբ որեւէ հարցում ունի, ժողովքի քարտուղարին հետ պիտի խօսի։

⁶ Ուրիշ Համաժողովի մը Ներկայ Գտնուիլ. Թերեւս ձեր պարագաները պահանջեն որ ձեր ժողովքին նշանակուած համաժողովէն տարբեր համաժողովի մը ներկայ գտնուիք։ Եթէ ուրիշ համաժողովի մը մասին տեղեկութիւններ կ’ուզէք, հաճեցէք խօսիլ ձեր ժողովքի քարտուղարին հետ։ Մասնայատուկ Կարիքներու Համար Իջեւանի Խնդրագրին ետեւի կողմը, այս տարի Միացեալ Նահանգներուն եւ Գանատայի մէջ տեղի ունենալիք համաժողովներուն ցանկը կայ, թուականի շարքաւորումով, եւ իւրաքանչիւր համաժողովի կեդրոնատեղիին հասցէն հայթայթուած է։ Ձեր խնդրագիրը ուղարկեցէք պատշաճ հասցէին, ներփակելով՝ նամակադրոշմ մը եւ ձեր անձնական հասցէն կրող նամակի պահարան մը։ Եթէ միեւնոյն քաղաքին մէջ երկու կամ աւելի համաժողովներ տեղի պիտի ունենան, վստահ եղէք թէ ձեր խնդրագիրը կը նշէ ձեր ընտրած համաժողովին թուականը։ Այդ համաժողովին հոգ տանող Իջեւանի Գրասենեակը ձեզի պիտի ղրկէ իրենց վերջին Յանձնարարուած Իջեւանի Ցանկը։

⁷ Շուրջ 2,500 տարի առաջ, Եհովայի ժողովուրդին ունեցած մէկ համաժողովին ընթացքին, Եզրաս ու իրեն ընկերակցող Ղեւտացիները, Աստուծոյ Խօսքէն կարդացին եւ զայն բացատրեցին հաւաքուած ժողովուրդին։ Արդի՞ւնքը։ Նէեմեայ 8։12 մեզի կ’ըսէ թէ «բոլոր ժողովուրդը . . . մեծ ուրախութիւն ընելու գացին, վասն զի իրենց բացատրուած խօսքերը հասկցան»։ Երախտապարտ չե՞նք որ օծեալ ծառայ դասակարգը, Եզրասի ու Ղեւտացիներուն նման, Աստուծոյ Խօսքը կը գործածէ, զայն կը բացատրէ եւ ցոյց կու տայ մեր կեանքին մէջ զայն կիրարկելու կերպը։ Ասիկա ընելով, այս ծառան Եհովայի հարազատ սէրը եւ Իր բոլոր ժողովուրդին հանդէպ Իր հետաքրքրութիւնը կ’արտացոլացնէ։ Վճռեցէք «Աստուծոյ Հետ Քալեցէք» բնաբանով Նահանգային Համաժողովի բոլոր օրերուն ներկայ գտնուիլ։

[Շրջանակ՝ էջ 3]

Յայտագրին Ժամերը

Ուրբաթ եւ Շաբաթ

9։30 կ.ա. – շուրջ 5։10 կ.ե.

Կիրակի

9։30 կ.ա. – շուրջ 4։05 կ.ե.

[Շրջանակ՝ էջ 4]

Ի՛նչպէս Կրնաք Իջեւանի Կարգադրութիւններուն Թիկունք Կանգնիլ

◼ Միայն այս տարուան Յանձնարարուած Իջեւանի Ցանկին նշած պանդոկներուն մէջ իջեւանեցէք։ Ցանկին մէջ չեղող պանդոկներուն մի՛ հեռաձայնէք եւ մի՛ հարցնէք թէ մեր համաժողովին համար յատուկ սակ ունին կամ ոչ։ Ցանկին մէջ չեղող պանդոկները յաճախ պիտի ըսեն թէ Եհովայի Վկաներուն համար յատուկ սակ ունի՛ն։

◼ Հրդեհի վերաբերեալ օրէնքներուն համակերպելու համար, իւրաքանչիւր սենեակի մէջ առաւելագոյնը չորս հոգի թող ըլլայ, ի ներառեալ երախաներ, բացի եթէ ցանկին մէջ «Չափահասներ» ենթագլուխին ներքեւ այլ բան նշուած է։

◼ Եթէ ցանկին մէջ յիշուած բոլոր պանդոկներուն հեռաձայնելէ ետք մատչելի սենեակներ չգտնէք կամ եթէ պանդոկի մը հետ խնդիր ունենաք, ձեր ժողովքի քարտուղարին իմացուցէք։ Ան ձեր համաժողովի Իջեւանի Գրասենեակին հետ կապ պիտի պահէ, գործածելով ցանկին վերը գտնուող տեղեկութիւնները։ Փոխանակ ցանկին վրայ չեղող պանդոկի մը հեռաձայնելու, հաճեցէք սպասել մինչեւ որ ձեր ժողովքը վերանայուած ցանկ մը ստանայ։

◼ Վերապահեցէք միայն այն սենեակները որ իրապէս պիտի գործածէք։

◼ Սենեակի մը վերապահումը երաշխաւորելու համար, իւրաքանչիւր վերապահուած սենեակի համար կանխավճար մը պէտք է ղրկէք։ Այլապէս, պանդոկը կրնայ ձեր սենեակը ուրիշ մէկու մը տալ։

◼ Ձեր սկիզբի վերապահումը պահեցէք։

◼ Միայն եթէ ժողովքը իր երկօրեայ շրջանային համաժողովը ունի այն շաբաթը, երբ նահանգային համաժողովի նշանակումին նամակը պիտի կարդացուի, ժողովքի քարտուղարը կրնայ Յանձնարարուած Իջեւանի Ցանկէն օրինակ մը տալ իւրաքանչիւր գիրքի ուսումնասիրութեան տեսուչին, որպէսզի զայն իր խումբին հետ նկատի առնէ։ Ցանկին պատճենը ո՛չ մէկ հրատարակիչի պէտք է տրուի։

[Շրջանակ՝ էջ 4]

Պանդոկի Սենեակ մը Վերապահելու Լաւագոյն Կերպը Ի՞նչ Է

1. Պանդոկներուն հեռաձայնեցէք սովորական գործի ժամերուն, Յանձնարարուած Իջեւանի Ցանկին մէջ յիշուած հեռաձայնի թիւերը գործածելով։

2. Պանդոկին տեղեկացուցէք որ Եհովայի Վկաներու համաժողովին ներկայ պիտի գտնուիք։

3. Պանդոկին մէջ ձեր կեցութեան թուականները տուէք։

4. Եթէ մատչելի սենեակներ չկան, ցանկին մէջ յիշուած ուրիշ պանդոկի մը հեռաձայնեցէք։

5. Վստահ եղէք որ ցանկին նշած սակը կը վճարէք։ Մի՛ ընդունիք աւելի բարձր սակ վճարել։

6. Ձեր վերապահումը ըրէք եւ զայն վաւերացնող թիւ մը խնդրեցէք։

7. Ձեր կանխավճարը վարկաքարտով, դրամատոմսով կամ վճարագրով ըրէք։ Պատրաստ դրամ երբեք մի՛ ղրկէք։ Եթէ կանխավճարը դրամատոմսով կամ վճարագրով ըրիք, վաւերացնող թիւը վրան գրեցէք։ Տասը օրուան մէջ թղթատարութեամբ ուղարկեցէք զայն։