«Աստուծոյ Փառք Տանք» Բնաբանով Եհովայի Վկաներու 2003–ի Նահանգային Համաժողով

¹ Իր հաւատարիմ մարգարէին՝ Եսայիի միջոցաւ, Եհովա պատուէր տուաւ. «Ո՛վ իմ ժողովուրդս, ինծի մտի՛կ ըրէ, ո՛վ իմ ազգս, ինծի ունկնդրէ»։ (Եսայ. 51։4) Այս ճակատագրական վերջին ժամանակին մէջ, համաձայն չէ՞ք թէ Եհովայի պատուիրաններուն ուշադրութիւն ընծայելը ամէն ժամանակէ աւելի կարեւոր է։ Եհովայի ‘ունկնդրելու’ կերպերէն մէկն է՝ պաշտամունքի համար հաւաքուելու իր պատուիրանին հնազանդիլ։ Ակնկառոյց կը սպասենք այն իւրայատուկ պատեհութեան, որ մեր տարեկան նահանգային համաժողովները կը ներկայացնեն։ Եհովայի Վկաներու Կառավարիչ Մարմինը դարձեալ կարգադրութիւններ ըրած է որ 2003–ին բազմաթիւ նահանգային համաժողովներ տեղի ունենան Միացեալ Նահանգներու մասնաճիւղի թաղամասին մէջ։

² Ինչպէս որ Դիտարան 1 Յուլիս 2002 (Անգլ.) թիւին մէջ նշուած էր, միջազգային համաժողովներ ալ տեղի պիտի ունենան ընտրուած քաղաքներու մէջ, ուր աշխարհի չորս ծագերէն պատուիրակներ ներկայ պիտի գտնուին։ Քանի որ միջազգային համաժողովները հիւրընկալող քաղաքներուն թիւը սահմանափակ է, միայն այս համաժողովներուն նշանակուած ժողովքները կարող պիտի ըլլան ներկայ գտնուելու։ Սակայն բոլոր նահանգային համաժողովներուն մէջ միջազգային մթնոլորտը զգալի պիտի ըլլայ։ Միսիոնարներ շատ մը համաժողովներու ներկայ պիտի գտնուին, եւ առիթ պիտի տրուի որ անոնց կարգ մը փորձառութիւնները լսենք։ Ի՞նչ կրնանք ընել որ մեր ամառուան համաժողովներուն համար եղած կարգադրութիւններէն լիովին օգտուինք։

³ Ամէն Օր Ներկայ Գտնուեցէք. Հաւատարիմ ու իմաստուն ծառայ դասակարգին կողմէ հայթայթուած հրահանգներէն լիովին օգտուելու համար, կ’ուզենք վստահ ըլլալ թէ ամբողջ յայտագրին ներկայ պիտի գտնուինք։ (Մատթ. 24։45) Պէտք կա՞յ որ ձեր գործատէրէն արձակուրդ խնդրէք, համաժողովի բոլոր օրերուն ներկայ գտնուելու համար։ Նէեմիան Արտաշէս Թագաւորէն արտօնութիւն խնդրելէ առաջ, որ Երուսաղէմ երթայ պարիսպները վերաշինելու համար, «երկնքի Աստուծոյն աղօթք» ըրաւ։ (Նէեմ. 2։4) Դուք ալ Եհովայի պէտք է աղօթէք որ ձեզի քաջութիւն տայ ձեր գործատէրէն արձակուրդ խնդրելու համար, որպէսզի համաժողովի երեք օրերուն ներկայ գտնուիք։ Ի՞նչ պէտք է ընէք եթէ ձեր գործատէրը ձեզի արձակուրդ տալու վարանի։ Եթէ իրեն բացատրէք թէ համաժողովներուն մեր ստացած հրահանգները մեզի կ’օգնեն պարկեշտ, ժրաջան եւ վստահելի գործաւորներ ըլլալու, թերեւս ասիկա իրեն օգնէ որ նպաստաւոր կերպով ընդառաջէ։ Ասկէ զատ, եթէ անհաւատ ընտանիքի անդամներ ունինք, սէր ցուցաբերած կ’ըլլանք եթէ կարելի եղածին չափ շուտով տեղեկացնենք համաժողովի վերաբերեալ մեր ծրագիրները։

⁴ Պանդոկի Ձեր Կարգադրութիւնները Ընելու Համար, Յանձնարարուած Իջեւանի Ցանկը Գործածեցէք. Տեղական Իջեւանի Գրասենեակը վերջին քանի մը ամիսներուն համաժողովին համար բաւարար սենեակներ ապահովելով զբաղած էր։ Այժմ ձեր ժողովքը ստացած է Յանձնարարուած Իջեւանի Ցանկ մը, որ պիտի դրուի ցուցատախտակին վրայ, Ծառայութեան Ժողովին մէջ այս յաւելուածականը նկատի առնուելէ ետք։ Գրքի ուսումնասիրութեան տեսուչները կրնան ցանկին մէկ կրկնօրինակը ընել իրենց խումբին համար, միայն եթէ ժողովքը երկու օրուան շրջանային համաժողովը ունի այն շաբաթ, երբ համաժողովի նշանակումի նամակը պիտի կարդացուի։ Սակայն, նոյնիսկ այս պարագային, Յանձնարարուած Իջեւանի Ցանկը ոեւէ հրատարակիչի պէտք չէ տրուի։

⁵ 4–րդ էջին վրայ գտնուող շրջագծին մէջի ցուցմունքները գործածելով, ձեր վերապահումները ըրէք միայն ցանկին մէջ գտնուող պանդոկներէն։ Հաճեցէք ցանկին մէջ չեղող պանդոկներուն չհեռաձայնել եւ չհարցնել թէ Եհովայի Վկաներու համար մասնաւոր սակեր ունի՞ն։ Անցեալին, կարգ մը պանդոկներ ըսած են թէ Եհովայի Վկաներուն համար մասնաւոր սակ մը ունին, թէեւ այս պանդոկները ցանկին վրայ չէին։ «Չափահասներ» վերնագրին ներքեւ նշուած է թէ իւրաքանչիւր սենեակի մէջ քանի հոգի արտօնուած է, սովորաբար՝ առաւելագոյնը չորս անձ, ի ներառեալ երախաները։ Հաճեցէք այս պահանջը յարգել։

⁶ Սենեակի մը վերապահումը երաշխաւորելու համար, իւրաքանչիւր ապահովուած սենեակի համար կանխավճար մը պէտք է ղրկէք պանդոկին, վերապահումը ընելէն ետք տասը օրուան միջոցին։ Այլապէս, պանդոկը կրնայ ձեր սենեակը ուրիշ մէկու մը տալ։ Եթէ ձեր կանխավճարը դրամատոմսով կամ վճարագրով ղրկէք, վաւերացնող թիւը վրան գրելու մի՛ մոռնաք։

⁷ Եթէ ցանկին մէջ գտնուող բոլոր պանդոկներուն հեռաձայնելէ ետք, մատչելի սենեակներ չըլլան, կամ եթէ պանդոկի մը հետ խնդիր մը ունենաք, ձեր ժողովքի քարտուղարին տեղեկացուցէք։ Ան համաժողովի Իջեւանի Գրասենեակին հետ կապի մէջ պէտք է մտնէ, գործածելով Յանձնարարուած Իջեւանի Ցանկին վերը յիշուած հեռաձայնի թիւը։ Փոխանակ ցանկին վրայ չեղող պանդոկի մը հեռաձայն ընելու, սպասեցէք որ ձեր համաժողովին համար բարեճշդուած ցանկ մը ստանաք։

⁸ Մասնայատուկ Կարիքներ Ունեցողներուն Օգնել. Ժողովքին մէջ կա՞ն ոմանք, որոնք համաժողովին ներկայ գտնուելու համար թերեւս օգնութեան կարիքը ունին։ Տարեցներուն, անկարողներուն, կամ լիաժամ ծառայութեան մէջ եղողներուն մասնայատուկ կարիքներուն գլխաւորաբար հոգ կը տարուի իրենց Քրիստոնեայ ազգականներուն կողմէ, սակայն, այս անհատներուն պարագաներէն տեղեակ եղող երէցներ եւ ուրիշներ ալ կրնան սիրալիր աջակցութիւն տալ։

⁹ Ժողովքի Ծառայութեան Յանձնախումբը աչքէ պիտի անցընէ հրատարակիչներուն ներկայացուցած Մասնայատուկ Կարիքներու Համար Իջեւանի Խնդրագիրները։ Պատճենին մէջ յիշուած ուղեգծերը գործածելով, ծառայութեան յանձնախումբը պէտք է որոշէ թէ՝ իւրաքանչիւր խնդրագիր մասնայատուկ կարի՞ք մըն է, որուն կարելի չէ տեղականօրէն հոգ տանիլ։ Այս կարգադրութիւնը միայն լաւ կեցուածք ունեցող հրատարակիչներու համար է, մէջը ըլլալով իրենց լաւ վարք ունեցող զաւակները։ Իջեւանի Գրասենեակը ժողովքի քարտուղարին հետ կապ պիտի պահէ, եթէ մասնայատուկ կարիքներու խնդրագրի մը նկատմամբ որեւէ հարցում ունենայ։

¹⁰ Ուրիշ Համաժողովի մը Ներկայ Գտնուիլ. Եթէ պարագաները պահանջեն որ ձեզի նշանակուած համաժողովէն տարբեր համաժողովի մը ներկայ գտնուիք եւ պէտք ունիք պանդոկի սենեակ մը վերապահելու, հաճեցէք ձեր ժողովքի քարտուղարը տեսնել։ Ան կրնայ ձեզի տալ համաժողովի կեդրոնատեղիին հասցէն, որ Մասնայատուկ Կարիքներու Համար Իջեւանի Խնդրագրի պատճենին ետեւի կողմը տպուած է։ Ձեր խնդրագիրը պատշաճ հասցէին ղրկեցէք, պարփակելով նամակադրոշմ մը եւ ձեր անձնական հասցէն կրող նամակի պահարան մը։ Եթէ այդ քաղաքին մէջ մէկէ աւելի համաժողովներ կան, չմոռնաք ձեր խնդրագրին մէջ յիշելու ձեր յաճախելիք համաժողովին թուականը։ Այդ քաղաքին Իջեւանի Գրասենեակը ձեզի պիտի ղրկէ այդ համաժողովին համար ամենավերջին Յանձնարարուած Իջեւանի Ցանկը։

¹¹ Մենք Տեսարան Ենք. Մարդիկ Եհովայի Վկաներուն եւ այս աշխարհէն եղողներուն միջեւ եղած հակադրութիւնը կը տեսնե՞ն։ Անշուշտ։ Նկատի առէք քաղաքի մը պանդոկներու տնօրէններուն կարգ մը խօսքերը. «Համաժողովի պատուիրակներու հետ միշտ գործ ունեցած ենք, սակայն, դուք ամենէն համագործակցող եւ ազնիւ պատուիրակներն էք»։ «Անցեալ շաբաթ մեր քով կրօնական ուրիշ խումբ մը կար։ Ձեր եւ անոնց միջեւ տարբերութիւնը շատ բացայայտ է»։ «Գիտենք թէ միշտ կրնանք ձեր աջակցութեան ու համագործակցութեան վստահիլ»։ Այսպիսի խօսքեր մեզի չե՞ն օգներ գնահատելու թէ «վերին իմաստութիւնը» մեր անձնաւորութեան վրայ որքա՜ն դրական ազդեցութիւն ունի։ (Յակ. 3։17) Քանի որ ‘աշխարհին տեսարան ենք’, թող որ ամէն ատեն մեր վարքը մեր Եհովա Աստուծոյն վայելչութիւնը ու շքեղութիւնը արտացոլացնէ։—Ա. Կորն. 4։9

¹² Քանի որ «այս աշխարհի կերպարանքը կ’անցնի», մեր նահանգային համաժողովին կարիքը ունինք մեզի օգնելու որ մեր հոգեւոր կեդրոնացումը պահենք։ (Ա. Կորն. 7։31) Ամէն օր ներկայ գտնուելու համար կարգադրութիւններ ընելը ջանք պիտի պահանջէ, սակայն անիկա վարձահատոյց է։ Այս տարուան «Աստուծոյ Փառք Տանք» բնաբանով Նահանգային Համաժողովը պատրաստուած է մեզի օգնելու որ հաստատ մնանք, մինչ կը սպասենք Սատանայի աշխարհին վրայ Եհովայի դատաստանին գործադրութեան։ Թոյլ չտանք որ որեւէ բան մեզի արգելք հանդիսանայ Եհովայի պատրաստած հրահանգները ստանալու։—Եսայ. 51։4, 5

[Շրջանակ՝ էջ 3]

Յայտագրին Ժամերը

Ուրբաթ եւ Շաբաթ

կ.ա. 9։30 – կ.ե. 5։00

Կիրակի

կ.ա. 9։30 – կ.ե. 4։05

[Շրջանակ՝ էջ 4]

Իջեւանի Ձեր Վերապահումները Ի՛նչպէս Ընել

1. Պանդոկներուն հեռաձայնեցէք սովորական գործի ժամերուն, Յանձնարարուած Իջեւանի Ցանկին մէջ յիշուած պանդոկներուն հեռաձայնի թիւերը գործածելով։

2. Պանդոկին տեղեկացուցէք որ Եհովայի Վկաներու համաժողովին ներկայ պիտի գտնուիք։

3. Պանդոկին մէջ ձեր կեցութեան թուականները տուէք։

4. Վստահ եղէք որ Յանձնարարուած Իջեւանի Ցանկին մէջ եղած սակը կը վճարէք։ Մերժեցէք աւելի բարձր սակ մը։

5. Եթէ մատչելի սենեակներ չկան, ցանկին վրայ յիշուած ուրիշ պանդոկի մը հեռաձայնեցէք։

6. Ձեր վերապահումը ըրէք եւ զայն վաւերացնող թիւ մը խնդրեցէք։

7. Ձեր կանխավճարը վարկաքարտով, դրամատոմսով կամ վճարագրով ըրէք։ Հաճեցէք երբեք թղթադրամ չուղարկել։ Եթէ կանխավճարը դրամատոմսով կամ վճարագրով կ’ընէք, վաւերացնող թիւը վրան գրեցէք։ Տասը օրուան մէջ թղթատարութեամբ ուղարկեցէք զայն։

8. Եթէ որեւէ խնդիր ունենաք, խօսեցէք ձեր ժողովքի քարտուղարին հետ։

Հաճեցէք՝

◼ Միայն Յանձնարարուած Իջեւանի Ցանկին մէջ յիշուած պանդոկներուն մէջ իջեւանիլ։

◼ Վերապահել միայն այն սենեակները, որոնք իրապէս պիտի գործածէք։

◼ Ձեր սկիզբի վերապահումը պահել։