Եհովայի Վկաներու՝ «Ազատումը մօտ է» բնաբանով 2006–ի նահանգային համաժողով

1. Վաղեմի ժամանակներուն, Աստուծոյ ժողովուրդը ի՞նչպէս իր գնահատանքը ցոյց տուաւ ճշմարիտ պաշտամունքին հանդէպ, իսկ ներկայիս ի՞նչ նման պատեհութիւն մը ունինք։

¹ Վաղեմի Յուդայի Եզեկիա թագաւորը սուրհանդակներու միջոցով նամակներ ղրկեց, ժողովուրդը հրաւիրելով որ Երուսաղէմի մէջ հաւաքուին։ (Բ. Մնաց. 30։6, 13) Անհատներուն ընդառաջումը յայտնեց ճշմարիտ պաշտամունքին հանդէպ անոնց կեցուածքը։ (Բ. Մնաց. 30։10-12) Յառաջիկայ ամիսներուն, Եհովայի ծառաները նման պատեհութիւն պիտի ունենան որ զինք պաշտելու համար միասնաբար հաւաքուելու առանձնաշնորհումին հանդէպ իրենց սրտագին գնահատանքը ցոյց տան։ Ժողովքդ նամակ մը ստացած է, որ քեզ կը հրաւիրէ «Ազատումը մօտ է» խորագրով նահանգային համաժողովին ներկայ գտնուելու։ Այս հրաւէրին ի՞նչպէս պիտի ընդառաջես։

2. Հիմա ի՞նչ կրնանք ընել, համաժողովէն լիովին օգտուելու համար։

² Հիմա՛ կարգադրութիւններ ըրէ. Պատրաստուած հոգեւոր յայտագրէն լիովին օգտուելու համար, ամբողջ յայտագրին պէտք է ներկայ գտնուինք։ Խոհեմութիւն է որ հիմա սկսիս հարկ եղած կարգադրութիւնները ընել, որպէսզի դուն եւ ընտանիքդ երեք օրերուն ալ ներկայ գտնուիք։ (Առ. 21։5) Նախապատրաստութիւնները կրնան պարփակել՝ գործատիրոջմէն խնդրել արձակուրդ, Վկայ չեղող կողակիցիդ հետ խօսիլ ծրագիրներուդ մասին, պանդոկի վերապահութիւնները ընել եւ Աստուածաշունչի աշակերտներուն օգնել որ ամէն օր համաժողովին ներկայ գտնուին։ Այս կարեւոր հարցերը մի՛ ձգձգեր մինչեւ վերջին վայրկեան։ Անոնց մասին Եհովայի աղօթէ, վստահ ըլլալով որ ան «պիտի կատարէ»։—Սաղմ. 37։5

3. Յարմարութիւններ ապահովելու կարգադրութիւններուն հետ ինչո՞ւ պէտք է համագործակցինք։

³ Եհովայի կազմակերպութիւնը ծանր աշխատած է որ իւրաքանչիւր համաժողովի քաղաքին մէջ բաւականաչափ յարմարութիւններ մատչելի ըլլան։ Այս կարգադրութիւնները ընող ջանասէր եղբայրներուն անձնուրաց ճիգը գնահատելը, պատուիրակներուն հանդէպ նկատառու ըլլալը եւ աստուածպետական կարգուկանոնը յարգելը, մեզ պէտք է մղեն որ այս յօդուածին ներկայացուցած ուղեգծերուն հետ լիովին համագործակցինք։—Ա. Կորն. 13։5. Ա. Թես. 5։12, 13. Եբր. 13։17

4-6. Ի՞նչ կարեւոր կէտեր ի մտի պէտք է ունենանք, երբ պանդոկի վերապահումներ կ’ընենք, եւ ինչո՞ւ։ (Պարփակել 4–րդ էջի շրջանակը։)

⁴ Պանդոկի վերապահումներ. Այս յօդուածը Ծառայութեան Ժողովին մէջ նկատի առնուելէ ետք, մատչելի պանդոկներուն վերաբերեալ «Յանձնարարուած իջեւանի ցանկ» մը պիտի դրուի տեղեկութիւններու ցուցատախտակին վրայ։ Էջ 4–ի շրջանակին նշած ցուցմունքները գործածելով, սենեակներ վերապահէ միայն ցանկին յիշած պանդոկներուն մէջ եւ վճարէ միայն նշուած սակերը։ Ցանկին մէջ չեղող պանդոկներուն մի՛ հեռախօսեր, հարցնելով թէ համաժողովին համար յատուկ սակ ունի՞ն կամ ոչ։ Անոնք յաճախ պիտի ըսեն թէ Եհովայի Վկաներուն համար յատուկ սակ ունի՛ն։ Համագործակցութիւնդ պիտի նպաստէ որ ամէն տարի, համաժողովի վայրին մօտ, կարենանք լաւագոյն սակերով բարձրորակ պանդոկներ ապահովել։—Ա. Կորն. 14։40

⁵ Կարեւոր է որ վերապահես միայն այն սենեակները որ պիտի գործածե՛ս համաժողովի ընթացքին։ Ուրիշ պատուիրակի համար սենեակ մի՛ վերապահեր, բացի եթէ նախապէս անհատին հետ համաձայնած ես եւ անոր անունը պիտի ներկայացնես։ Այլապէս, հարկ եղածէն աւելի սենեակներ պիտի վերապահուին, դժուարացնելով վերապահում ընելը միւս պատուիրակներուն համար։ Իւրաքանչիւր սենեակ պէտք է վերապահուի զայն գործածող անհատներէն մէկուն անունով։

⁶ Վերապահումդ երաշխաւորելու համար, իւրաքանչիւր վերապահուած սենեակի համար կանխավճար մը պէտք է ընես։ Այլապէս, պանդոկը կրնայ սենեակդ ուրիշ մէկու մը տալ։ Եթէ ցանկին մէջ յիշուած բոլոր պանդոկներուն հեռախօսելով մատչելի սենեակներ չգտնես կամ եթէ պանդոկի մը հետ խնդիր ունենաս, ժողովքիդ քարտուղարին իմացուր։ Ան կապ պիտի պահէ համաժողովիդ Իջեւանի Բաժանմունքին հետ, եւ ո՛չ թէ մասնաճիւղին հետ, գործածելով ցանկին վերը նշուած տեղեկութիւնները։ Փոխանակ ցանկին վրայ չեղող պանդոկի մը հեռախօսելու, սպասէ մինչեւ որ ժողովքդ վերանայուած ու վերափոխուած ցանկ մը ստանայ։

7, 8. Մասնայատուկ կարիք ունեցողներուն ի՞նչպէս կարելի է հոգ տանիլ։

⁷ Մասնայատուկ կարիքներ. Առակաց 3։27–ն կ’ըսէ. «Երբ ձեռքէդ աղէկութիւն ընել կու գայ, կարօտ եղողէն մի՛ խնայեր զանիկա»։ Համաժողովին կապակցաբար ի՞նչպէս կրնաս ուրիշներուն բարիք ընել։ Տարեց հրատարակիչներ, անկարողներ, լիաժամ ծառաներ եւ ուրիշներ կրնան փոխադրութեան կամ իջեւանելու առնչութեամբ գործնական օգնութեան պէտք ունենալ։ Այսպիսիներուն հոգ տանիլը գլխաւորաբար ազգականներուն պատասխանատուութիւնն է։ (Ա. Տիմ. 5։4) Եթէ անոնք ասիկա ընելու կարող չեն, հաւատակիցները կը ջանան ձեռք տալ։ (Գաղ. 6։10) Գիրքի ուսումնասիրութեան տեսուչները վստահ պէտք է ըլլան թէ իրենց խումբին մէջ մասնայատուկ կարիքներ ունեցողները, համաժողովէն բաւական առաջ իրենց կարգադրութիւնները կատարած են։

⁸ Մասնայատուկ կարիք ունեցողներու իջեւանի խնդրագիր պատճենները մատչելի են միայն այն հրատարակիչներուն, որոնց ընտանիքի անդամները կամ ժողովքը կարող չեն իջեւանելու կարիքներուն հոգ տանիլ։ Ժողովքի Ծառայութեան Յանձնախումբը հրատարակիչին որակումները պէտք է աչքէ անցընէ, գործածելով պատճենին նշած ուղեգծերը եւ երէցներու մարմինին յղուած 14 Դեկտեմբեր 2005 թուակիր նամակը։ Այս կարգադրութիւնը միմիայն լաւ կեցուածք ունեցող հրատարակիչներուն եւ անոնց բարեկիրթ զաւակներուն համար է։

9. (ա) Ինչո՞ւ պէտք է ներկայ գտնուինք մե՛ր ժողովքին նշանակուած համաժողովին։ (բ) Եթէ պատճառի մը համար տարբեր համաժողովի մը ներկայ պիտի գտնուիս, ի՞նչ քայլեր պէտք է առնես։

⁹ Ուրիշ համաժողովի մը ներկայ գտնուիլ. Վստահ ըլլալու համար թէ բաւարար նստարաններ, հրատարակութիւններ, իջեւաններ եւ այլ բաներ մատչելի պիտի ըլլան, քեզ կը քաջալերենք որ ժողովքիդ նշանակուած համաժողովին ներկայ գտնուիս։ Եթէ պատճառի մը համար տարբեր համաժողովի մը ներկայ պիտի գտնուիս, ժողովքիդ քարտուղարէն համաժողովին հասցէն առ, որ տպուած է Մասնայատուկ կարիք ունեցողներու իջեւանի խնդրագիր պատճենին ետեւը։ Երբ «Յանձնարարուած իջեւանի ցանկ»ը կամ որեւէ յաւելեալ տեղեկութիւն խնդրես, ներփակէ նամակադրոշմ մը եւ հասցէդ կրող նամակի պահարան մը։ Եթէ քաղաքին մէջ երկու կամ աւելի համաժողովներ տեղի պիտի ունենան, ընտրած համաժողովիդ թուականը նշէ։

10. Մօտալուտ համաժողովին ուրախութեան նպաստելու կերպերէն մէկը ի՞նչ է։

¹⁰ Յօժար կամաւորներ. Կասկած չկայ թէ համաժողովին ներկայ եղող եւ հոգեւոր սնունդէն ու շինիչ ընկերակցութենէն օգտուող բոլոր անհատները մեծապէս պիտի ուրախանան։ Մեր ուրախութիւնը աւելի մեծ պիտի ըլլայ եթէ կամաւորաբար աջակցինք համաժողովին յաջողութեան նպաստող գործունէութիւններուն։ (Գործք 20։35) Տեղական Համաժողովի Յանձնախումբը մօտ ատենէն անհատներ պիտի հրաւիրէ որ այս աշխատանքին մէջ բաժին բերեն։ Կրնա՞ս մատչելի ըլլալ։—Սաղմ. 110։3

11. Տարեկան նահանգային համաժողովին ո՞ր երեսակը կ’արժեւորես, եւ ի՞նչ ընել պէտք է վճռես։

¹¹ Նահանգային համաժողովի մը ներկայ գտնուող հինգ տարեկան տղեկ մը ըսաւ. «Նահանգային համաժողովը Եհովայի պաշտամունքին մաս կազմող իմ նախասիրած բանս է»։ Այս սրտագին մեկնաբանութիւնը ցոյց կու տայ թէ որքա՜ն հաճոյք կը ստանանք մեր տարեկան նահանգային համաժողովին ներկայ գտնուելով։ Արդարեւ, սաղմոսերգուին խօսքը կ’երկրորդենք. «Քու սրահներուդ մէջ մէկ օրը ուրիշ տեղի հազարէն աղէկ է»։ (Սաղմ. 84։10) Դաւիթ երգի մը մէջ իր փափաքը արտայայտեց որ ‘իր կեանքին բոլոր օրերը Տէրոջ տան մէջ բնակի ու անոր տաճարին մէջ զինք խնդրէ’։ (Սաղմ. 27։4) Եհովայի երկրպագուներուն մէջ գտնուիլը մեծ հաճոյք կը պատճառէր Դաւիթի։ Թող ընդօրինակենք ճշմարիտ պաշտամունքին հանդէպ անոր գնահատութիւնը, «Ազատումը մօտ է» խորագրով նահանգային համաժողովի երեք օրերուն ալ ներկայ գտնուելով։

[Շրջանակ՝ էջ 3]

Յայտագրին ժամերը

Ուրբաթ եւ Շաբաթ

9:30 կ.ա. – 5։05 կ.ե.

Կիրակի

9:30 կ.ա. – 4։10 կ.ե.

[Շրջանակ՝ էջ 4]

Ի՛նչպէս պանդոկի վերապահումները ընել

1. Պանդոկներուն հեռախօսէ գործի սովորական ժամերուն, «Յանձնարարուած իջեւանի ցանկ»ին մէջ նշուած թիւերը գործածելով։

2. Պանդոկին իմացուր թէ Եհովայի Վկաներու համաժողովին ներկայ պիտի գտնուիս։

3. Պանդոկին մէջ կեցութեանդ թուականները նշէ։

4. Եթէ մատչելի սենեակներ չկան, ցանկին մէջ յիշուած ուրիշ պանդոկի մը հեռախօսէ։

5. Ցանկին նշած սակէն աւելի բարձր սակ մը մի՛ վճարեր։

6. Վերապահումդ ըրէ եւ զայն վաւերացնող թիւ մը խնդրէ։

7. Կանխավճարդ վարկաքարտով կամ վճարագրով ըրէ, տասը օրուան մէջ։ Պատրաստ դրամ երբեք մի՛ ուղարկեր։ Եթէ կանխավճարը վճարագրով պիտի ընես, վաւերացնող թիւը վրան գրէ։

Հաճեցէք

◼ Միայն «Յանձնարարուած իջեւանի ցանկ»ին նշած պանդոկներուն մէջ իջեւանիլ։

◼ Վերապահել միայն այն սենեակները որ պիտի գործածէք։

◼ Ձեր առաջին վերապահումը պահել։—Մատթ. 5։37

◼ Իւրաքանչիւր սենեակի մէջ առաւելագոյնը չորս հոգի ունենալ, ի ներառեալ երախաներ, բացի եթէ ցանկին մէջ այլ բան մը նշուած է։