«Աշխարհի լոյս»ին վրայ ուշադրութիւն հրաւիրէ

1. Աստուծոյ Խօսքին մէջ ի՞նչ մեծ լոյսի մը մասին նախագուշակուած էր, եւ ո՞ր առիթը անոր վրայ մասնայատուկ ուշադրութիւն կը հրաւիրէ։

¹ Եսայի մարգարէին միջոցով, Եհովա նախագուշակեց. «Խաւարի մէջ պտըտող ժողովուրդը մեծ լոյս տեսաւ, մահուան ստուերին երկիրը բնակողներուն լոյս ծագեցաւ»։ (Եսայ. 9։2) Այդ «մեծ լոյս»ին աղբիւրը Աստուծոյ Որդիին՝ Յիսուս Քրիստոսի վարքն էր։ Անոր երկրային ծառայութիւնը եւ զոհագործութեան օրհնութիւնները խթանեցին հոգեւորապէս խաւարի մէջ եղողները։ Ներկայ խաւար ժամանակներուն, մարդիկ այս լոյսին կարիք ունին։ Տէրունական Ընթրիքը մասնայատուկ առիթ մըն է որ «աշխարհի լոյս»ին վրայ ուշադրութիւն հրաւիրենք։ (Յովհ. 8։12) Անցեալ տարի, միլիոնաւորներ որոշ հաւատք ցուցաբերեցին, մեզի հետ հնազանդելով Յիսուսի պատուէրին. «Ասիկա ըրէք զիս յիշելու համար»։ (Ղուկ. 22։19) Մինչ այս տարուան Յիշատակատօնը կը մօտենայ, ի՞նչպէս կրնանք Եհովայի փայլեցուցած մեծ լոյսը մարդոց ուշադրութեան յանձնելու մէջ մեր բաժինը բերել։—Փիլ. 2։15

2. Փրկանքի զոհին հանդէպ մեր սրտագին գնահատութիւնը ի՞նչպէս կրնանք աւելցնել, իսկ ասիկա ի՞նչ ազդեցութիւն պիտի ունենայ։

² Սրտագին գնահատութիւն կերտէ՛. Յիշատակատօնի շրջանը պատշաճ ժամանակ մըն է որ խոկանք Եհովայի ու Յիսուսի ցուցաբերած մեծ սիրոյն վրայ, մարդկութեան համար փրկանքի զոհը հայթայթելով։ (Յովհ. 3։16. Բ. Կորն. 5։14, 15) Ասիկա ընելը անկասկած մեր սրտագին գնահատութիւնը պիտի խորացնէ այս սրբազան առիթին հանդէպ։ Աստուծոյ բոլոր ծառաները պիտի ուզեն ժամանակ յատկացնել Աստուածաշունչը քննենք ամէն օր գրքոյկին մէջ ուրուագծուած Յիշատակատօնի վերաբերեալ Աստուածաշունչի ընթերցանութեան։ Եհովայի աննման յատկութիւններուն մասին խոկալով, որոնք սքանչելիօրէն յայտնուած են փրկանքի կարգադրութեամբ, կը պարծենանք որ ան մեր Աստուածն է։ Երբ նկատի կ’առնենք թէ փրկանքը ի՛նչ նշանակութիւն ունի մեզի համար, Աստուծոյ ու իր Որդիին հանդէպ մեր սրտաբուխ սէրը կ’աւելնայ ու կը մղուինք Աստուծոյ կամքը փութաջանօրէն կատարելու։—Գաղ. 2։20

3. Ի՞նչպէս կրնանք Յիշատակատօնին հանդէպ մեր գնահատութիւնը ցուցաբերել։

³ Եթէ Եհովայի փրկութեան կարգադրութեան հանդէպ մեր գնահատութիւնը խորացնենք, Յիշատակատօնին հանդէպ մեր խանդավառութիւնը պիտի փոխանցուի Աստուածաշունչի աշակերտներուն, վերայցելութիւններուն, ազգականներուն, դրացիներուն, դպրոցակիցներուն, գործընկերներուն եւ ուրիշներուն, որոնք այս մասնաւոր առիթին կը հրաւիրենք։ (Ղուկ. 6։45) Հետեւաբար այսպիսիները հրաւիրելու համար յատուկ ջանք թափէ, եւ առ ի յիշեցում՝ իրենց տուր Յիշատակատօնի տպուած հրաւէր մը։ Ոեւէ մէկը չմոռնալու համար, շատեր գործնական գտած են անուանացանկ մը պահել, թէ որո՛նք կանոնաւորաբար Յիշատակատօնի կը հրաւիրեն, եւ ամէն տարի նոր անուններ աւելցնել։ Կազմակերպուած ըլլալով եւ հետաքրքրուած անհատները հրաւիրելու համար ամէն ջանք թափելով, Եհովա Աստուծոյ «անպատում պարգեւին համար» մեր երախտագիտութիւնը կը յայտնենք։—Բ. Կորն. 9։15

4. Ի՞նչ բան կրնայ մեզի օգնել որ Մարտ ու Ապրիլ ամիսներուն ընթացքին ծառայութեան աւելի մասնակցինք։

⁴ Ծառայութեան մէջ յաւելեալ բաժին բերել. Մարտ ու Ապրիլ ամիսներուն ընթացքին կրնա՞ս ծառայութեան աւելի մասնակցիլ։ Անկասկած Աստուած կ’օրհնէ այն ջանքը որ կը թափուի ուրիշներու ներկայացնելու համար «Քրիստոսի աւետարանին փառքը»։ Ամէն հոգեւոր լուսաւորման Աղբիւրը՝ Եհովա, հրամայած է որ «խաւարէն լոյս ծագի»։ (Բ. Կորն. 4։4-6) Ի պահանջել հարկին, երէցները պիտի կարգադրեն որ դաշտի ծառայութեան ժողովներուն համար յաւելեալ ժամանակներ ու վայրեր ըլլան, քաջալերելով երկար ժամանակ քարոզելը։ Ասիկա կրնայ պարփակել առտու կանուխ փողոցի քարոզչութիւն, յետմիջօրէին կամ երեկոյեան կանուխ ժամերուն առեւտրական շրջաններ ծառայել եւ հեռախօսով վկայել։ Ծառայութեան մէջ աւելի բաժին բերելու համար, կրնաս ժամերու տրամաբանական նպատակակէտ մը դնել եւ ջանալ անոր հասնիլ։ Շատեր իրենց լաւագոյնը Եհովայի կու տան, որպէս օժանդակ ռահվիրայ ծառայելով։—Կող. 3։23, 24

5. Օժանդակ ռահվիրայութեան համար նուազ ժամեր պահանջուելով, շատեր ի՞նչպէս օգտուած են։

⁵ Կրնա՞ս որպէս օժանդակ ռահվիրայ ծառայել. Շուրջ եօթը տարի առաջ օժանդակ ռահվիրայութեան համար նուազ ժամեր պահանջուեցան։ Այս փոփոխութիւնը կարելի դարձուցած է որ բազմաթիւ անհատներ օժանդակ ռահվիրայութեան օրհնութիւնները վայելեն։ Փորձա՞ծ ես զայն։ Ոմանք սովորաբար ամէն տարի օժանդակ ռահվիրայ կ’ըլլան։ Կարգ մը ժողովքներու մէջ, տասնեակ հրատարակիչներ միասնաբար կը ձեռնարկեն այս ծառայութեան, տարուան ընթացքին ժողովքին գործունէութեան ուշագրաւ մէկ երեսակը դառնալով։ Կրնա՞ս յայտագիր ընել որ Յիշատակատօնի շրջանին օժանդակ ռահվիրայութեան ուրախ ամիս մը ունենաս։ Ոմանց համար յատկապէս Ապրիլը կրնայ լաւ ամիս մը ըլլալ, քանի որ հինգ լման շաբաթավերջեր ունի։

6. Ի՞նչ հետաքրքրաշարժ կարգադրութիւններ մատչելի են։

⁶ Շրջանային տեսուչը Մարտին կամ Ապրիլին ժողովքդ պիտի այցելէ՞։ Ուրեմն քեզի յաւելեալ օրհնութիւն մը մատչելի է։ Ինչպէս նախապէս ծանուցանուեցաւ, 2006–ի ծառայութեան տարուան ընթացքին, երբ շրջանային տեսուչը ժողովքը կ’այցելէ, այդ ամիս որպէս օժանդակ ռահվիրայ ծառայողները պիտի հրաւիրուին ներկայ գտնուելու ռահվիրաներուն հետ տեղի ունենալիք ժողովին առաջին կէսին։ Անկասկած, ներկայացուած հոգեւորապէս զօրացուցիչ տեղեկութիւնները բազմաթիւ օժանդակ ռահվիրաներու պիտի օգնեն կանոնաւոր ռահվիրայութեան ձգտելու։ Ասկէ զատ, Մարտ ամսուան ընթացքին ուրախութեամբ մարդոց պիտի օգնենք որ հոգեւոր լոյսին գան՝ Աստուածաշունչը իրապէս ի՞նչ կը սորվեցնէ նոր գիրքին միջոցով։ Ինչո՞ւ նպատակակէտ չդնես այս նոր գիրքով Աստուածաշունչի ուսումնասիրութիւն մը սկսիլ։

7, 8. (ա) Ի՞նչ բան կրնայ մեզի օգնել որ օժանդակ ռահվիրայութեան համար յայտագիր պատրաստենք։ (բ) Ընտանեկան համագործակցութիւնը ի՞նչպէս կրնայ օգնել, եւ ամբողջ ընտանիքը ի՞նչպէս կ’օգտուի։

⁷ Մինչ օժանդակ ռահվիրայութեան 50 ժամուան պահանջը նկատի կ’առնես, ընտրէ յայտագիր մը որ թոյլ կու տայ իւրաքանչիւր շաբաթ շուրջ 12 ժամ ճշմարտութեան լոյսը փայլեցնել։ Ասոր մասին խօսիր նախկին ռահվիրաներուն եւ ուրիշներու հետ, թերեւս քաջալերուին քեզի միանալու։ Մկրտուած հրատարակիչները, երիտասարդ թէ տարեց, լաւ ծրագիրներուն շնորհիւ նկատած են թէ այս գովելի նպատակակէտին հասնիլը դժուար չէ։ Անոր մասին աղօթէ, ծրագրէ, ապա ռահվիրայութիւնը վայելէ։—Մաղ. 3։10

⁸ Բազմաթիւ ընտանիքներ նկատած են թէ լաւ համագործակցութեամբ կարելի է որ առնուազն մէկ անդամ օժանդակ ռահվիրայ ըլլայ։ Ընտանիք մը որոշեց որ իր հինգ մկրտուած անդամները այս ծառայութեան ձեռնարկեն, իսկ միւս երկու չմկրտուած զաւակները իրենց գործունէութիւնը աւելցնեն։ Ընտանիքը ի՞նչպէս օգտուեցաւ։ Անոնք գրեցին. «Անիկա շա՜տ հաճելի ամիս մըն էր, եւ ընտանեկան կապերը իսկապէս զօրացան։ Եհովայի շնորհակալութիւն կը յայտնենք այս հոյակապ օրհնութեան համար»։

9. Ի՞նչպէս կրնանք այս Յիշատակատօնի շրջանին մեր լոյսը փայլեցնել։

⁹ Մարտ ու Ապրիլ ամիսներուն ընթացքին մեր մասնայատուկ գործունէութիւնը խթանիչ պիտի ըլլա՞յ, մեզ աւելի մօտեցնելով մեր երկնաւոր Հօր։ Շատ բան կախեալ պիտի ըլլայ մեր թափած ջանքէն՝ Աստուծոյ ու իր Որդիին հանդէպ մեր սէրը զօրացնելու եւ ծառայութեան մէջ մեր բերած բաժինը աւելցնելու։ Սաղմոսերգուին նման թող վճռենք. «Մեծապէս պիտի ներբողեմ Տէրը իմ բերանովս, ու բազմութեան մէջ պիտի գովաբանեմ զինք»։ (Սաղմ. 109։30, ԱՎ) Եհովա այս Յիշատակատօնի շրջանին մեր նախանձախնդիր գործունէութիւնը պիտի օրհնէ։ Ուստի թող աւելի մեծ լոյս փայլեցնենք, որպէսզի շատ անհատներ կարենան խաւարէն դուրս ելլել եւ ‘կենաց լոյսը ունենալ’։—Յովհ. 8։12