Եհովայի Վկաներու 2008–ի Նահանգային Համաժողով

1. (ա) Եբրայեցիներուն ուղղուած Պօղոսի խրատը ինչո՞ւ յատկապէս ներկայիս ստիպողական է։ (Կարդա՛ Եբրայեցիս 10։24, 25) (բ) Պօղոսի խրատը կիրարկելու համար ի՞նչ պատեհութիւն մը ունինք։

¹ Պօղոս առաքեալ Եբրայեցի Քրիստոնեաները յորդորեց որ իրարու քով հաւաքուին եւ զիրար քաջալերեն «այնչափ աւելի»՝ որչափ կը տեսնեն այն օրուան մօտենալը։ (Եբր. 10։24, 25) Յաւելեալ ապացոյցներ կան թէ Պօղոսի նշած ‘օրը’ շատ մօտ է։ Հետեւաբար, անձկագին կը սպասենք մեր եղբայրներուն ու քոյրերուն հետ հաւաքուելու պատեհութիւններուն։ Ասոնք մեզի հոգեւոր ուսուցում կը հաղորդեն, որ կրնայ մեզ առաջնորդել օրըստօրէ աւելի վտանգաւոր եղող «վերջին օրեր»ուն ընթացքին։ (Բ. Տիմ. 3։1) Այսպիսի պատեհութիւն մը պիտի ներկայանայ 2008–ի նահանգային համաժողովներուն։

2. (ա) Ինչո՞ւ կենսական է որ համաժողովի երեք օրերուն ալ ներկայ գտնուիս։ (բ) Ի՞նչպէս պէտք է սկսինք ներկայ գտնուելու համար նախապատրաստուիլ։

² Երեք օրերուն ալ ներկայ եղիր. Քեզ կը քաջալերենք որ երեք օրերուն ալ ներկայ գտնուիս։ ‘Մէկտեղ հաւաքուիլը չթողելով’, կենսական հոգեւոր սնունդէն պիտի օգտուինք։ (Եբր. 10։25) Կարելի եղածին չափ կանուխ նախապատրաստուէ։ Պիտի ուզես գործատիրոջդ կանուխէն իմացնել, որպէսզի կարենայ հարկ եղած որեւէ կարգադրութիւն ընել։ Եթէ համաժողովի շրջանին զաւակներդ դպրոց ունին, անոնց ուսուցիչներուն իմացուր ձեր ծրագիրներուն մասին։ Անոնց նշէ թէ համաժողովը ձեր պաշտամունքին կանոնաւոր մէկ մասն է։ Վստահ կրնաս ըլլալ որ Եհովա պիտի օրհնէ Թագաւորութեան շահերը առաջին տեղը դնելու ջանքերդ։—Մատթ. 6։33

3. Ի՞նչ կերպերով կրնանք ուրիշներուն հանդէպ նկատառութիւն ցուցաբերել։

³ Ուրիշներուն օգնէ ներկայ գտնուելու. Պօղոս նաեւ իր եղբայրներուն կոչ ըրաւ որ «իրարու հոգ տանին»։ (Եբր. 10։24) Ժողովքի Գիրքի Ուսումնասիրութեան խումբիդ եղբայրներն ու քոյրերը համաժողովին ներկայ գտնուելու համար աջակցութեան կարիք ունի՞ն։ Աստուածաշունչի աշակերտներուդ կրնա՞ս օգնել որ քեզի հետ համաժողովին ներկայ ըլլան, նոյնիսկ մէկ օր։ Երբ ընտանիքիդ անհաւատ անդամներուն կ’իմացնես համաժողովի կարգադրութիւններուն մասին, զիրենք համաժողովի հրաւիրէ։ Սիրալիր ջանքերդ կրնան անսպասելի օրհնութիւններ բերել։

4. Նահանգային համաժողովի թուականներուն եւ վայրերուն մասին ի՞նչպէս կրնանք տեղեկութիւններ ձեռք ձգել։

⁴ Տեղեկութիւններ ձեռք ձգել. Ամէն տարի հարիւրաւոր անհատներ մասնաճիւղ կը հեռաձայնեն, հարցնելու համար թէ համաժողովները ե՛րբ եւ ո՛ւր տեղի պիտի ունենան։ Գրեթէ բոլոր հեռաձայն ընողները եղբայրներ ու քոյրեր են, որոնք այս մասին արդէն տեղեկութիւններ ստացած են։ Մասնաճիւղ հեռաձայնելէ առաջ, կը թելադրենք աչքէ անցընել Դիտարան 1 Մարտ 2008 թիւը (Անգլ.)։

5. Ի՞նչ պէտք է ընենք եթէ մեր ժողովքին նշանակուածէն տարբեր համաժողովի մը իջեւանի կարգադրութեանց մասին տեղեկութիւններ կ’ուզենք ստանալ։

⁵ Եթէ ժողովքիդ նշանակուածէն տարբեր համաժողովի մը ներկայ պիտի գտնուիս, իջեւանի մասին տեղեկութիւններ կրնաս ստանալ, գրելով համաժողովի կեդրոնատեղիի հասցէին, որ նշուած է Մասնայատուկ կարիք ունեցողներու իջեւանի խնդրագիր պատճենին ետեւը։ Այս պատճենները շուտով պիտի ուղարկուին ժողովքի քարտուղարին։ Խնդրանքիդ պատասխանը ստանալու համար, ներփակէ նամակադրոշմ ու հասցէդ կրող նամակի պահարան մը։

6. Մասնայատուկ կարիք ունեցողներու իջեւանի խնդրագիր պատճենին շուրջ ի՞նչ կարգ մը յիշեցումներ կան։

⁶ Մասնայատուկ կարիքներ. Եթէ հրատարակիչ մը իջեւանի համար օգնութիւն խնդրէ, Ժողովքի Ծառայութեան Յանձնախումբը պէտք է որոշէ թէ հրատարակիչը Մասնայատուկ կարիք ունեցողներու իջեւանի խնդրագիր մը ներկայացնելու որակեա՛լ է կամ ոչ։ Ժողովքի քարտուղարը խնդրագիրը համաժողովի Իջեւանի Բաժանմունքին ուղարկելէ առաջ, պէտք է նկատի առնուին տրուած ուղեգծերը՝ թէ՛ պատճենին մէջ եւ թէ բոլոր երէցներուն ուղղուած 14 Դեկտեմբեր 2007 թուակիր նամակին մէջ։

7. Ի՞նչպէս կրնանք իջեւանի կարգադրութիւններուն հետ համագործակցիլ։ (Տես՝ «Իջեւանի վերաբերեալ ուղեգծեր» շրջանակը։)

⁷ Սենեակ մը վերապահել. Մատչելի պանդոկներուն վերաբերեալ «Յանձնարարուած իջեւանի ցանկ» մը պիտի դրուի տեղեկութիւններու ցուցատախտակին վրայ, Յունուար 7–ով սկսող շաբթուան Ծառայութեան Ժողովէն ետք։ Իջեւանի վերապահում մը ընելէ առաջ, աչքէ անցուր «Իջեւանի վերաբերեալ ուղեգծեր» եւ «Իջեւանի վերապահումները ի՛նչպէս ընել» շրջանակները։ Փոխանակ ցանկին մէջ նշուած պանդոկի մը խնդրած աւելի բարձր սակը ընդունելու կամ ցանկին վրայ չեղող պանդոկի մը հեռաձայնելու, հաճիս սպասէ մինչեւ որ ժողովքը վերստուգուած ցանկ մը ստանայ։

8. (ա) Մեր համաժողովներուն ներկայ գտնուելով, ի՞նչպէս կրնանք Եհովան փառաւորել։ (բ) Մեր եղբայրներուն ընտիր վարքին շնորհիւ, պանդոկի տնօրէններ ի՞նչ ըսած են։

⁸ Բարի գործեր. Պաշտամունքի համար իրարու քով հաւաքուելու Եհովայի պատուէրին հնազանդիլը մեզի ‘օգտակար է’։ Աւելի կարեւորը, անիկա Եհովայի անունը փառաւորելու պատեհութիւններ կը հայթայթէ։ (Եսա. 48։17) Մեր «բարի գործերը յայտնի են» նահանգային համաժողովներուն ընթացքին մեզ տեսնող բազմաթիւ անհատներու։ Անոնցմէ ոմանք մղուած են իրենց զգացումները յայտնելու։ (Ա. Տիմ. 5։25) Քաղաքի մը մէջ, ուր տարիներէ ի վեր մեր համաժողովները կը գումարուին, պանդոկի մը տնօրէնը ըսաւ. «Քաղաքին մէջ շատեր կը խօսին Եհովայի Վկաներուն եւ մեր վրայ ձեր համաժողովներուն ունեցած ազդեցութեան մասին։ Գիտենք թէ համայնքային կեդրոնը ի՛նչպէս կը մաքրէք, նաեւ կը տեսնենք ձեզ երբ կառավայրերը կը մաքրէք։ Ամառուան շրջանին ձեզ մեր քաղաքին մէջ ընդունիլը մեզի հաճոյք կը պատճառէ։ Կը յուսանք որ կարենանք մեր փոխյարաբերութիւնը շարունակել յառաջիկայ տարիներուն»։ Այլ խումբերու եւ ժամանցի աստղերու հետ ծագած խնդիրներուն մասին խօսելէ յետոյ, պանդոկի մը տնօրէնը խօսեցաւ մեր եղբայրներուն կեցութեան ընթացքին անոնց ցուցաբերած համագործակցող հոգիին ու համբերութեան մասին։ Ան նշեց. «Կը փափաքինք որ մեր բոլոր հիւրերը Եհովայի Վկաներուն նման ըլլան»։ Մեր եղբայրներուն վարքը, որ առաջնորդեց վերոյիշեալ եւ նոյնանման բազմաթիւ դիտողութիւններու, մեր Եհովա Աստուծոյն սիրտը պէտք է ուրախացնէ։

9. Մատթէոս 4։4–ը ի՞նչպէս կ’ընդգծէ յայտագրին իւրաքանչիւր բաժնին ուշադրութիւն ընծայելու կարեւորութիւնը։

⁹ Յիսուս ըսաւ որ մեր կեանքը կախեալ է ‘Աստուծոյ բերնէն ելլող ամէն մէկ խօսքը’ մտիկ ընելէն։ (Մատթ. 4։4) Մեր տարեկան նահանգային համաժողովներուն, Եհովա ‘ատենին տրուած [հոգեւոր] կերակուր’ կը հայթայթէ, որ պատրաստուած է «հաւատարիմ ու իմաստուն ծառայ»ին միջոցաւ։ (Մատթ. 24։45) Այս հոգեւոր կոչունքը պատրաստելու եւ հրամցնելու համար շատ աշխատանք տարուած է։ Եհովայի սիրալիր հոգատարութեան հանդէպ մեր երախտագիտութիւնը ցոյց տանք, ներկայ գտնուելով եւ յայտագրին իւրաքանչիւր բաժնին ուշադրութիւն ընծայելով։

[Շրջանակ՝ էջ 3]

Յայտագրին ժամերը՝

Ուրբաթ ու Շաբաթ

9:20 կ.ա. – 4:55 կ.ե.

Կիրակի

9:20 կ.ա. – 4:00 կ.ե.

[Շրջանակ՝ էջ 4]

Իջեւանի վերաբերեալ ուղեգծեր

◼ Յունուար 7–ով սկսող շաբթուան Ծառայութեան Ժողովէն առաջ՝ պանդոկի վերապահումներ մի՛ ըներ։

◼ Եթէ կարելի է, պանդոկի վերապահումներդ ըրէ Յունուար ամսուան ընթացքին։ Պանդոկի վերապահումը համացանցով մի՛ ըներ, քանի որ այս մեթոտը չենք գործածեր։

◼ Միայն «Յանձնարարուած իջեւանի ցանկ»ին նշած պանդոկներուն մէջ իջեւանէ։

◼ Միայն ցանկին նշած սակերը ընդունէ։

◼ Իւրաքանչիւր սենեակ որ կը վերապահուի, զայն գործածող անհատին անունով պէտք է ըլլայ։

◼ Հրդեհի վերաբերեալ օրէնքներուն ենթարկուելու համար, յարգէ պանդոկի սենեակին մէջ չափահասներուն արտօնուած առաւելագոյն թիւը, որ նշուած է ցանկին մէջ։

◼ Առաջին վերապահումդ պահէ։—Մատթ. 5։37

◼ Ցանկին մէջ չեղող պանդոկներուն մի՛ հեռաձայներ, հարցնելով թէ մեր համաժողովին համար յատուկ սակ ունի՛ն կամ ոչ։

◼ Եթէ ցանկին մէջ եղող ԲՈԼՈՐ պանդոկներուն հեռաձայնելէ յետոյ մատչելի սենեակներ չգտար կամ որոշ պանդոկի մը հետ խնդիր ունեցար, ժողովքիդ քարտուղարը տեղեակ պահէ։ Ան Իջեւանի Բաժանմունքին հետ շփման մէջ պէտք է գայ, ցանկին վերեւը գտնուող տեղեկութիւնները գործածելով։

◼ Եթէ վերապահում մը չեղեալ պիտի սեպես, ասիկա կարելի եղածին չափ կանուխ ըրէ եւ ջնջումի թիւը ձեռք ձգէ։

Իջեւանի վերապահումները ի՛նչպէս ընել

1. Պանդոկներուն հեռաձայնէ գործի սովորական ժամերուն, ցանկին մէջ նշուած թիւերը գործածելով, որպէսզի զեղչուած սակը ստանաս։

2. Պանդոկին իմացուր թէ Եհովայի Վկաներու համաժողովին ներկայ պիտի գտնուիս։

3. Պանդոկին մէջ կեցութեան թուականը նշէ։

4. Եթէ մատչելի սենեակներ չկան, ցանկին մէջ նշուած ուրիշ պանդոկի մը հեռաձայնէ։

5. Վերապահումը ըրէ եւ զայն վաւերացնող թիւ մը խնդրէ։

6. Կանխավճարդ տասը օրուան մէջ ըրէ՝ վարկաքարտով կամ վճարագրով։ Կանխիկ դրամ երբեք մի՛ ուղարկեր։ Եթէ կանխավճարը վճարագրով պիտի ընես, վաւերացնող թիւը վրան գրէ։