Մեր պարբերաթերթերը ինչպէ՞ս ծրագրուած են

1. Հաւատարիմ ու իմաստուն ծառայ դասակարգը ինչպէ՞ս Պօղոս առաքեալը կ’ընդօրինակէ։

¹ Ճիշդ ինչպէս որ Պօղոս առաքեալ բարի լուրի իր ներկայացումի կերպը յարմարցուց, որպէսզի ‘ամէն տեսակ մարդիկ’ շահի, նոյնպէս հաւատարիմ ու իմաստուն ծառայ դասակարգը մեր պարբերաթերթերը կը գործածէ, որպէսզի տարբեր ենթահող եւ տարբեր հաւատալիքներ ունեցողներու հասնի (Ա. Կոր. 9։22, 23, ՆԱ)։ Դիտարան եւ Զարթի՛ր պարբերաթերթերը լաւագոյնս գործածելու համար, լաւ է որ ի մտի ունենանք անոնց նախատեսուած ընթերցողները։

2. Զարթի՛ր–ը որո՞նց համար ծրագրուած է։

² Զարթի՛ր։ Այս պարբերաթերթին նպատակն է՝ հասնիլ այն տեսակի մարդոց, որոնք նման են ‘Աթենացի մարդոց’, որոնց Պօղոս առաքեալ ուղղեց իր խօսքերը (Գործք 17։22)։ Այդ մարդիկը ոչ–քրիստոնեայ ենթահող եւ Սուրբ Գրութիւններու չնչին հասկացողութիւն ունէին։ Նմանապէս, Զարթի՛ր–ի նախատեսուած ընթերցողները Աստուածաշունչի մասին քիչ կամ ոչինչ գիտեն։ Անոնք թերեւս քրիստոնէական ուսուցումները չեն գիտեր, եւ կրնայ ըլլալ որ որոշ չափով կրօնքին չեն վստահիր կամ թերեւս անտեղեակ են թէ Աստուածաշունչը գործնական արժէք ունի։ Զարթի՛ր–ին գլխաւոր նպատակն է՝ իր ընթերցողները համոզել, թէ ճշմարիտ Աստուածը գոյութիւն ունի։ Նաեւ, անոր նպատակն է՝ Աստուածաշունչին հանդէպ հաւատք կերտել եւ ընթերցողներուն օգնել հասկնալու, թէ Եհովայի վկաները ուրիշ կրօնական խումբերէ տարբեր են։

3. Դիտարան–ի իւրաքանչիւր հրատարակութեան նախատեսուած ընթերցողները որո՞նք են։

³ Դիտարան։ Այս պարբերաթերթին հանրամատչելի հրատարակութեան նախատեսուած ընթերցողները, Աստուծոյ եւ Սուրբ Գրութիւններուն հանդէպ որոշ յարգանք ունին։ Անոնք Աստուածաշունչի սահմանափակ գիտութիւն ունին, սակայն անոր ուսուցումները ճշգրտօրէն չեն հասկնար։ Անոնք նման են Պօղոսի ունկնդիրներուն, որոնց ըսաւ. «Դուք որ Աստուծմէ կը վախնաք» (Գործք 13։14-16)։ Դիտարան–ի ուսումնասիրական հրատարակութիւնը գլխաւորաբար գրուած է Եհովայի վկաներուն համար։ Պօղոս ենթադրեց թէ իր նամակները կարդացողները, Սուրբ Գրութիւններուն քաջածանօթ էին եւ ճշմարտութեան մասին ճշգրիտ գիտութիւն ունէին (Ա. Կոր. 1։1, 2)։ Նմանապէս, ուսումնասիրական հրատարակութեան յօդուածները գրուած են անոնց համար, որոնք ժողովներուն ներկայ կը գտնուին եւ Վկաներուն բառամթերքին ու գաղափարներուն քաջածանօթ են։

4. Դաշտին մէջ մեր գործածած իւրաքանչիւր պարբերաթերթին ինչո՞ւ պէտք է քաջածանօթ ըլլանք։

⁴ Թէեւ սովորաբար պարբերաթերթերը միասնաբար կը ներկայացնենք, սակայն յաճախ միայն անոնցմէ մէկը մեր ներկայացումին մէջ նկատի կ’առնենք։ Հետեւաբար, նպատակակէտ դիր ընտելանալ իւրաքանչիւր թիւին։ Այսպէս, ի վիճակի պիտի ըլլաս ներկայացնելու այն ինչ որ հանդիպած անհատներուդ ուշադրութիւնը պիտի գրաւէ։