Օգնել անոնց՝ որոնք տակաւին պատրաստ չեն Աստուածաշունչը կը սորվեցնէ գիրքը սերտելու

1. Սկիզբը բոլորը պիտի հետաքրքրուի՞ն Աստուածաշունչը կը սորվեցնէ գիրքով. բացատրէ՛։

¹ Որպէսզի անհատ մը Եհովայի երկրպագուն ըլլայ, պէտք է սորվի ինչ որ Աստուածաշունչը կը սորվեցնէ։ Սակայն, ոմանք ոչ-քրիստոնէական կրօնքի կը պատկանին եւ Աստուածաշունչը Աստուծոյ խօսքը չեն նկատեր։ Իսկ ուրիշներ, երբեք Աստուծոյ չեն հաւատար եւ Աստուածաշունչին հանդէպ յարգանք ալ չունին։ Ի՞նչ գործիքներ օգտակար եղած են անոնց, որոնք սկիզբը պատրաստ չեն Աստուածաշունչը կը սորվեցնէ գիրքը ընդունելու։ Հետեւեալ թելադրանքները հիմնուած են շուրջ 20 երկիրներու պատկանող հրատարակիչներու մեկնաբանութիւններուն վրայ։

2. Եթէ անձ մը մեզի ըսէ թէ Աստուծոյ չի հաւատար, ի՞նչ բան պէտք է փորձենք գիտնալ եւ ինչո՞ւ։

² Անոնք՝ որոնք Աստուծոյ չեն հաւատար։ Եթէ մէկը ըսէ թէ Աստուծոյ չի հաւատար, օգտաւէտ պիտի ըլլայ գիտնալ անոր պատճառը։ Արդեօք անհատը բարեշրջութեա՞ն կը հաւատայ։ Կրնա՞յ ըլլալ որ ան Աստուծոյ հանդէպ հաւատքը կորսնցուցած է աշխարհի մէջ եղած անարդարութեան կամ կրօնքի մէջ կեղծաւորութեան պատճառով։ Ան կը պատկանի՞ երկրի մը, որ Աստուծոյ հաւատալը արգիլած է։ Թերեւս ան յամառօրէն Աստուծոյ գոյութիւնը չի մերժեր, բայց երբե՛ք Աստուծոյ հաւատալու կարիքը չէ զգացած։ Շատ մը հրատարակիչներ կը նկատեն որ «մի՞շտ այդպէս զգացած ես» հարցնելը, կը մղէ անհատը որ բացատրութիւն մը տայ։ Մտի՛կ ըրէ ու մի՛ ընդհատեր։ Եթէ հասկնանք թէ անհատը ինչո՞ւ Աստուծոյ չի հաւատար, պիտի գիտնանք ինչպէ՞ս պատասխանել եւ ի՞նչ հրատարակութիւն առաջարկել (Առ. 18։13)։

3. Ինչպէ՞ս կրնանք յարգանք ցոյց տալ անհատին եւ իր հաւատալիքներուն հանդէպ։

³ Երբ կը պատասխանես, կարելիդ ըրէ որ անհատը չզգայ թէ իր տեսակէտին կ’ընդդիմանաս։ Հետեւեալ թելադրութիւնը կու գայ Միացեալ Նահանգներէն. «Շատ կարեւոր է որ յարգենք մարդոց ազատութիւնը որոշելու թէ ինչի՛ պիտի հաւատան։ Փոխանակ ջանալու բանավէճերու մէջ յաղթական դուրս գալ, լաւագոյն բանը պիտի ըլլայ ուղղել հարցումներ, որոնք մարդիկը կը մղեն որ մտածեն եւ անձնական եզրակացութիւններու յանգին»։ Շրջագայող տեսուչ մը, տանտիրոջ մտիկ ընելէ ետք, յաճախ անոր կ’ուղղէ հետեւեալ հարցումը. «Երբեք այս հաւանականութեան մասին մտածա՞ծ էք»։

4. Ինչպէ՞ս կրնանք պուտտայականներուն օգնել։

⁴ Շատ մը պուտտայականներու համար, Աստուծոյ գոյութեան գաղափարը անծանօթ է։ Բրիտանիոյ մէջ, կարգ մը հրատարակիչներ յարմար կը տեսնեն Ինչպէ՛ս գտնել մնայուն խաղաղութիւն եւ երջանկութիւն գրքոյկը, երբ այդպիսիներու կը վկայեն։ Բացումը նկատի առնելէ ետք, անոնք կը քննարկեն «Իրապէս բարձրեալ Ստեղծիչ մը գոյութիւն ունի՞» բաժինը, եւ ապա «Ուղեգիրք մը՝ ամբողջ մարդկութեան օրհնութիւն բերելու համար» բաժինը։ Յետոյ անոնք թերեւս կարենան ներկայացնել Աստուածաշունչը կը սորվեցնէ գիրքը եւ տանտիրոջ ըսել. «Նոյնիսկ եթէ Աստուծոյ չես հաւատար, Աստուածաշունչը սերտելը օգտակար է, քանի որ անիկա գործնական առաջնորդութիւն կը պարունակէ»։ Միացեալ Նահանգներու մէջ ռահվիրայ մը, որ կը ծառայէ թաղամասի մը մէջ, ուր չինարէն լեզուն կը գործածուի, ըսաւ. «Մեր թաղամասին մէջ շատեր կը սիրեն կարդալ, ուստի յաճախ ամբողջ հրատարակութիւնը կը կարդան առաջ որ վերադառնանք։ Բայց անոնք թերեւս չհասկնան Աստուածաշունչը սերտելու գաղափարը։ Այդ պատճառով կը միտիմ Ուրախ լուրեր գրքոյկը առաջարկել առաջին վերայցելութեան, քանի որ անիկա այնպէս մը գրուած է որ քննարկութեան դուռ կը բանայ»։ Շրջանային տեսուչ մը, որ Միացեալ Նահանգներու չինարէն խօսողներուն կը ծառայէ, կը տեղեկագրէ թէ կարելի է Աստուածաշունչը կը սորվեցնէ գիրքը առաջարկել առաջին վերայցելութեան, եւ թերեւս աւելի լաւ ըլլայ ուսումնասիրութիւնը սկսիլ երկրորդ գլուխէն, որ նախաբան մը կու տայ Աստուածաշունչին մասին, փոխանակ սկսելու առաջին գլուխէն, որ Աստուծոյ մասին կը քննարկէ։

5. Ինչո՞ւ համբերութիւնը կարեւոր է։

⁵ Աստուծոյ հանդէպ անհատի մը հաւատք կերտելը ժամանակի կը կարօտի. ուստի անհրաժեշտ է որ համբերատար անձեր ըլլանք։ Սկիզբը մեր խօսակցութիւնը հաւանաբար անհատը չհամոզէ որ Աստուած գոյութիւն ունի, բայց թերեւս ժամանակի ընթացքին ան գիտակցի թէ այդ մէկը կարելի է, կամ թերեւս ըսէ որ կը հասկնայ թէ ինչո՛ւ անհատ մը կրնայ այդ եզրակացութեան յանգիլ։

6. Ինչո՞ւ ոմանք Աստուածաշունչին հանդէպ հետաքրքրութիւն չունին։

⁶ Անոնք՝ որոնք Աստուածաշունչին հանդէպ հետաքրքրութիւն կամ վստահութիւն չունին։ Յաճախ Աստուծոյ գոյութիւնը ընդունող անհատ մը կրնայ հետաքրքրուած չըլլալ Աստուածաշունչի ուսուցումներով, քանի որ ան չի հաւատար որ անիկա Աստուծոյ խօսքն է։ Ան թերեւս կ’ապրի ոչ-քրիստոնեայ երկրի մը մէջ եւ Աստուածաշունչը կը կապէ քրիստոնէութեան հետ։ Կամ թերեւս կ’ապրի այդպէս կոչուած քրիստոնէական երկրի մը մէջ, ուր շատ աշխարհային կեանք կը վարուի, եւ թերեւս չխորհի թէ Աստուածաշունչը օգտակար պիտի ըլլայ իրեն։ Ինչպէ՞ս կրնանք այսպիսի անհատներու օգնել, որ Աստուածաշունչին հանդէպ հետաքրքրութիւն մշակեն եւ ի վերջոյ ընդունին Աստուածաշունչը կը սորվեցնէ գիրքը սերտել։

7. Աստուածաշունչին հանդէպ հետաքրքրութիւն արթնցնելու լաւ կերպ մը ի՞նչ է։

⁷ Յունաստանի մասնաճիւղը գրեց. «Աստուածաշունչին հանդէպ հետաքրքրութիւն չունեցողներուն օգնելու լաւագոյն կերպն է՝ պարզապէս Աստուածաշունչը բանալ եւ իրենց ցոյց տալ թէ անիկա ի՛նչ կը բովանդակէ։ Շատ մը հրատարակիչներ նկատած են, թէ Աստուածաշունչին պատգամը շա՛տ աւելի զօրաւոր կերպով կ’ազդէ անհատներու սրտին, քան որեւէ բան որ իրե՛նք կ’ըսեն (Եբ. 4։12)։ Աստուածաշունչին մէջ Աստուծոյ անունը տեսնելը շատերու օգնած է որ Աստուածաշունչով հետաքրքրուին»։ Հնդկաստանի մասնաճիւղը գրեց. «Շատ մը հինտուներ կը հրապուրուին կեանքի ու մահուան մասին ճշմարտութիւնները լսելով, ինչպէս նաեւ՝ դասակարգային խտրականութենէ զերծ աշխարհի նկատմամբ Աստուածաշունչին խոստումով»։ Մտահոգութիւն պատճառող տեղական խնդիրներուն ակնարկելը, յաճախ հրատարակիչներուն պատեհութիւն կու տայ ցոյց տալու Աստուածաշունչին այն խօսքերը, թէ Աստուծոյ Թագաւորութիւնը ի՛նչ պիտի իրագործէ հարցերը շտկելու համար։

8. Ի՞նչ կրնանք ըսել անոնց, որոնք քրիստոնէական աշխարհին պատճառով Աստուածաշունչին նկատմամբ ժխտական գաղափար ունին։

⁸ Եթէ անհատ մը քրիստոնէական աշխարհին պատճառով Աստուածաշունչին նկատմամբ ժխտական տեսակէտ ունի, ան պէտք է գիտնայ որ քրիստոնէական աշխարհը Աստուածաշունչն ու անոր ուսուցումները սխալ կերպով ներկայացուցած է։ Հնդկաստանի մասնաճիւղը գրեց, «Երբեմն պէտք է մարդոց օգնենք տեսնելու, որ եկեղեցիները Աստուածաշունչին ներկայացուցիչները չեն»։ Անիկա տեղեկագրեց թէ հինտուները յաճախ կը տպաւորուին Ի՞նչ է կեանքին նպատակը. ինչպէ՞ս կրնաք գտնել զայն գրքոյկին չորրորդ բաժինով, որ կը բացատրէ թէ եկեղեցիները ինչպէ՛ս փորձած են ապականել եւ կործանել Աստուծոյ խօսքը։ Պրազիլի մէջ ռահվիրայ մը մարդոց կ’ըսէ. «Ինչո՞ւ Աստուածաշունչի բովանդակութեան մասին աւելին չգիտնաք։ Շատեր այս բանը կ’ընեն լայնամտութեամբ, առանց որեւէ մէկ կրօնքի անդամը ըլլալու պարտաւոր զգալու։ Թերեւս սորված բաներդ քեզ զարմացնեն»։

9. Ինչո՞ւ պէտք չէ յանձնուինք, եթէ անձ մը սկիզբը Աստուածաշունչի ուսուցումով հետաքրքրուած չըլլայ։

⁹ Եհովան իւրաքանչիւր անհատի սրտին կը նայի (Ա. Թագ. 16։7. Առ. 21։2)։ Ան սրտի շիտակ վիճակ ունեցողները ճշմարիտ պաշտամունքին կը քաշէ (Յովհ. 6։44)։ Այսպիսիներէն շատեր Աստուծոյ մասին երբեք չեն սորված կամ Աստուածաշունչին մասին չնչին տեղեկութիւն ունին։ Մեր ծառայութիւնը իրենց պատեհութիւն կու տայ որ «փրկուին ու ճշմարտութիւնը ճանչնան» (Ա. Տիմ. 2։4)։ Ուստի, եթէ ոմանք սկիզբը չհետաքրքրուին Աստուածաշունչի ուսուցումով, մի՛ յանձնուիր։ Քու լեզուովդ մատչելի եղող հրատարակութիւն մը գործածէ, որպէսզի իրենց հետաքրքրութիւնը արթնցնես։ Ի վերջոյ, կրնաս անցնիլ Աստուածաշունչը իրապէս ի՞նչ կը սորվեցնէ գրքին՝ Աստուածաշունչի ուսումնասիրութիւններ վարելու մեր հիմնական գործիքին։

[Շրջանակ՝ էջ 4]

Եթէ տանտէրը ըսէ թէ Աստուծոյ գոյութեան չի հաւատար, հետեւեալը փորձէ։

• Հարց տուր. «Մի՞շտ այդպէս զգացած ես», գիտնալու համար թէ ինչո՞ւ այդպէս կը խորհի։

• Եթէ ան պուտտայական է, գործածէ Ինչպէ՛ս գտնել մնայուն խաղաղութիւն եւ երջանկութիւն գրքոյկը, էջ 9-12։

• Եթէ ան բարեշրջութեան կը հաւատայ, հետեւեալ աղբիւրները կրնան օգտակար ըլլալ.

Զարթի՛ր–ի «Արդեօք պատահականութի՞ւն է» յօդուածաշարքը

Ստեղծագործութեան սքանչելիքները Աստուծոյ փառքը կը յայտնեն տեսաերիզը

Հետեւեալ գրքոյկները՝ Գոհացուցիչ կեանք՝ ի՛նչպէս ձեռք ձգել, բաժին 4. Կեանքը ստեղծագործութեա՞մբ գոյացաւ եւ Կեանքին ծագումը. հինգ հարցումներ, որոնք կ’արժէ քննել

• Եթէ ան անարդարութեան եւ տառապանքի պատճառով Աստուծոյ հանդէպ հաւատքը կորսնցուցած է, հետեւեալ աղբիւրները կրնան օգտակար ըլլալ իրեն.

Հոգատար Ստեղծիչ մը գոյութիւն ունի՞ գիրքը, գլուխ 10

Հետեւեալ գրքոյկները՝ Աստուած իրապէս հոգ կը տանի՞ մեզի, մաս 6 եւ Ի՞նչ է կեանքին նպատակը, բաժին 6

• Եթէ Աստուծոյ գոյութեան գաղափարը ա՛լ տանտիրոջ օտար չթուի, անմիջապէս անցիր Աստուածաշունչը կը սորվեցնէ գրքին։ Թերեւս լաւ կ’ըլլայ որ երկրորդ գլուխով սկսիս, կամ ալ կրնաս իրեն յարմար եղող ուրիշ նիւթ մը զատել։

[Շրջանակ՝ էջ 5]

Եթէ տանտէրը Աստուածաշունչին չի հաւատար, հետեւեալը փորձէ։

• Նկատի առ Կեանքը ինչպէ՞ս գոյացաւ՝ բարեշրջութեա՞մբ թէ ստեղծագործութեամբ գրքին 17–րդ եւ 18–րդ գլուխները։

• Հինտուներուն համար գործածէ Ինչո՞ւ պէտք է սիրով ու ճշմարտութեամբ Աստուած պաշտենք գրքոյկը

• Հրեաներուն համար գործածէ Պատերազմէ զերծ աշխարհ մը պիտի ըլլա՞յ գրքոյկը, էջ 3–11

• Քննարկէ Աստուածաշունչի սկզբունքներուն հետեւելուն օգուտները։ Աստուածաշունչին գործնական արժէքը անհատի մը ցոյց տալու համար, կրնաս գործածել հետեւեալ հրատարակութիւնները.

Զարթի՛ր–ի «Աջակցութիւն ընտանիքին» յօդուածաշարքը

Աստուածաշունչի զօրութիւնը ձեր կեանքին մէջ տեսաերիզը

Հետեւեալ գրքոյկները՝ Աստուծոյ կողմէ ուրախ լուրեր, 9–րդ եւ 11–րդ դասերը, Գիրք մը՝ բոլոր մարդոց համար, էջ 22-26 եւ Գոհացուցիչ կեանք՝ ի՛նչպէս ձեռք ձգել, բաժին 2

Պուտտայականներուն համար գործածէ Խաղաղութեան ու երջանկութեան ճանապարհը գրքոյկը, էջ 3–7

Իսլամներուն համար գործածէ Իսկական հաւատքը երջանկութեան կ’առաջնորդէ գրքոյկը, բաժին 3

Եթէ կը քարոզես շրջանի մը մէջ ուր Աստուածաշունչին հանդէպ նախապաշարում կայ, լաւ կ’ըլլայ որ իմաստուն խօսքերուդ աղբիւրը սկիզբը չնշես, այլ անիկա նշես քանի մը այցելութիւն տալէդ ետք։

• Բացատրէ թէ ինչպէ՛ս աստուածաշնչական մարգարէութիւններ կատարուած են։ Կրնաս գործածել հետեւեալ հրատարակութիւնները.

Աստուածաշունչը. ճշգրիտ պատմութիւն, վստահելի մարգարէութիւն տեսաերիզը

Գիրք մը՝ բոլոր մարդոց համար գրքոյկը, էջ 27–29

• Երբ անհատը հարցնէ թէ որոշ նիւթերու շուրջ Աստուածաշունչը ի՛նչ կը սորվեցնէ, անմի՛ջապէս անցիր Աստուածաշունչը կը սորվեցնէ գրքին։

[Շրջանակ՝ էջ 6]

Եթէ տանտէրը ըսէ. «Աստուծոյ չեմ հաւատար», կրնաս ըսել.

• «Կրնա՞մ հակիրճ կերպով բացատրել, թէ ի՛նչ բան զիս համոզած է որ Ստեղծիչի մը գոյութեան հաւատամ»։ Ապա Պատճառաբանել գրքին 84-86–ի էջերէն կարգ մը կէտեր նշէ, կամ կարգադրութիւններ ըրէ որ անհատին բերես հրատարակութիւն մը, որ զայն կարդալը հաճելի գտած ես։

• «Բայց եթէ Աստուած մը գոյութիւն ունենար, ինչպիսի՛ անձ մը պիտի ուզէիր որ ըլլայ»։ Տանտէրերուն մեծ մասը կ’ըսէ թէ կը հրապուրուի Աստուծմով մը, որ սիրալիր, արդար, ողորմած եւ անաչառ է։ Աստուածաշունչէն ցոյց տուր, որ Աստուած այսպիսի յատկութիւններ ունի (նոյնիսկ կարելի է Աստուածաշունչը կը սորվեցնէ գրքին առաջին գլուխը գործածել, սկսելով պարբերութիւն 6–էն)։

Եթէ տանտէրը ըսէ. «Ես Աստուածաշունչին չեմ հաւատար», կրնաս ըսել.

• «Շատեր այդպէս կ’ըսեն։ Ոմանք այն տպաւորութիւնը ունին թէ Աստուածաշունչը գիտութեան հետ համաձայն չէ, կամ թէ Աստուածաշունչին չափանիշները գործնական չեն։ Կ’ուզեմ գիտնալ. երբեք Աստուածաշունչը կարդացա՞ծ էք։ [Թոյլ տուր որ պատասխանէ։ Ապա Գիրք մը՝ բոլոր մարդոց համար գրքոյկին էջ 3–ի վրայի նախաբանը ցոյց տուր եւ գրքոյկը առաջարկէ։] Շատեր Աստուածաշունչին չեն վստահիր, որովհետեւ կրօնքը անոր ուսուցումները սխալ կերպով ներկայացուցած է։ Յաջորդին կը փափաքիմ քննարկել օրինակ մը էջ 4–էն եւ 5–էն»։

• «Շատեր ձեր տեսակէտը ունին։ Կրնա՞մ ձեզի ցոյց տալ Աստուածաշունչին մասին բան մը որ զիս կը տպաւորէ։ [Կարդա՛ Յոբ 26։7 եւ Եսայի 40։22, որոնք ցոյց կու տան թէ Աստուածաշունչը գիտական գետնի վրայ ճշգրիտ է։] Աստուածաշունչը նաեւ կը պարունակէ իմաստուն խօսքեր՝ ընտանիքներուն օգնելու համար։ Յաջորդ անգամ կը փափաքիմ ձեզի օրինակ մը ցոյց տալ։»

• «Շնորհակալ եմ որ ինծի արտայայտուեցաք։ Եթէ Աստուած մարդկութեան համար գիրք մը գրէր, ինչ կը կարծէք, այդ գիրքը ի՞նչ պիտի բովանդակէր»։ Ապա անհատին ցոյց տուր Աստուածաշունչէն բան մը, որ իր մեկնաբանութեան համապատասխան է։