Ծառայութեան մէջ հմտութիւնդ բարելաւէ. Խօսակցութիւնը ընդհատող հաւանական առարկութիւններու պատասխանել
Ինչո՛ւ կարեւոր է։ Երեւակայէ որ լսեցիր թէ մօտ օրէն բնական աղէտ մը պիտի հարուածէ։ Եթէ մարդիկ ապահով վայր չփախչին, անշո՛ւշտ պիտի մեռնին։ Դրացիիդ տունը կ’երթաս զինք զգուշացնելու համար, բայց ան խօսակցութիւնդ կ’ընդհատէ՝ ըսելով որ զբաղած է։ Վստահաբար, շուտով չես յանձնուիր։ Մեր թաղամասերուն մէջ շատեր մեզ կը մերժեն, չգիտակցելով թէ մեր պատգամը փրկարար արժէք ունի։ Կրնայ ըլլալ որ մեր այցելութեան ժամանակ անոնք բազմազբաղ ըլլան (Մատ. 24։37-39)։ Կամ, թերեւս սխալ տարաձայնութիւններ լսելով՝ մեզ կանխադատեն (Մատ. 11։18, 19)։ Հաւանաբար ենթադրեն թէ մենք չենք տարբերիր ուրիշ կրօնքներէ, որոնք գէշ պտուղ արտադրած են (Բ. Պետ. 2։1, 2)։ Եթէ տանտէրը սկիզբը հետաքրքրութիւն չցուցաբերէ, պէտք չէ շուտով յանձնուինք։
Ինչպէ՛ս պատասխանել։
• Տունէ տուն ծառայելէ առաջ, քանի մը վայրկեան մտածէ թէ ի՛նչ հաւանական առարկութիւններ կրնան խօսակցութիւնդ ընդհատել, եւ նկատի առ թէ ինչպէ՛ս կրնաս պատասխանել։
• Եթէ տանտէրը առարկէ, մեղմօրէն ջանա՛ զրոյցը շարունակել, թերեւս զինք գովելով։ Օրինակ, եթէ ան ըսէ թէ իր անձնական կրօնքը ունի, թերեւս պատասխանես. «Ես ալ կը յուսայի ձեզի պէս մէկը գտնել, որ հոգեւոր բաներով հետաքրքրուած է»։ Երբեմն, տանտէրին զգացումները կամ պարագաները հասկնալը քեզ կարող կը դարձնէ, որ շարունակես վկայել։ Օրինակի համար, եթէ ան ըսէ թէ զբաղած է, թերեւս ըսես. «Կը հասկնա՛մ։ Բայց մեկնելէ առաջ կ’ուզեմ ձեզի ասիկա տալ»։ Կամ, եթէ տանտէրը ըսէ թէ հետաքրքրուած չէ, կրնաս հետեւեալին նման հարցում մը ուղղել. «Ըսել կ’ուզէք թէ Աստուածաշունչո՞վ հետաքրքրուած չէք, կամ ընդհանուր առմամբ կրօնքը ձեզ չի հետաքրքրեր»։
• Լաւ դատողութիւն գործածէ։ Յիշէ թէ Եհովան մարդիկը չի ստիպեր որ իրեն մտիկ ընեն (Բ. Օր. 30։19)։ Վերջ ի վերջոյ, ամէն մարդ իր բեռը պիտի կրէ (Գաղ. 6։5)։ Եթէ տանտէրը յամառ է, մեկնիլը լաւագոյն լուծումն է։ Այսպէս, իր զգացումները յարգելով, կրնանք ճամբան հարթել, որ ապագային ուրիշ հրատարակիչ մը կարենայ իրեն վկայութիւն տալ (Ա. Պետ. 3։15)։
Այս ամսուան ընթացքին, հետեւեալը փորձէ.
• Եթէ տանտէրը առարկելով խօսակցութիւնդ ընդհատէ, իր քովէն մեկնելէ ետք, ծառայակիցիդ հետ քննարկէ թէ ինչպէ՛ս կրնայիր աւելի լաւ կերպով պատասխանել։