Ծառայութեան մէջ հմտութիւնդ բարելաւէ. Զայրացած տանտիրոջ մը ինչպէ՛ս հակազդել
Ինչո՛ւ կարեւոր է։ Ծառայութեան մէջ մեր հանդիպած մարդոցմէն շատեր քաղաքավար են։ Բայց Յիսուս մարգարէացաւ, որ կարգ մը մարդիկ մեզ պիտի ատեն (Յովհ. 17։14)։ Ուրեմն, պէտք չէ զարմանանք երբ հանդիպինք զայրացած տանտիրոջ մը։ Երբ ասիկա պատահի, պէտք է հակազդենք այնպիսի կերպով մը՝ որ կը հաճեցնէ Եհովան,– զոր կը ներկայացնենք (Հռով. 12։17-21. Ա. Պետ. 3։15)։ Այսպէս վարուելով հաւանաբար թոյլ պիտի չտանք որ վիճակը վատթարանայ։ Նաեւ, լաւ վկայութիւն պիտի տանք տանտիրոջ եւ դիտորդներուն. այսպիսով, անոնք աւելի հակամէտ պիտի ըլլան մտիկ ընելու, երբ Եհովայի վկաները յաջորդ անգամ իրենց այցելեն (Բ. Կոր. 6։3)։
Ինչպէ՛ս հակազդել։
• Հանդարտ եւ բարեկամական եղիր։ Ասիկա լարուածութիւնը պիտի մեղմացնէ։ Տանտիրոջ հակազդեցութենէն վիրաւորուած մի՛ զգար (Ժող. 7։9)։ Կրնայ ըլլալ որ ան նեղացած է անձնական խնդիրներու պատճառաւ, կամ՝ քանի որ սխալ ժամանակ իր դուռը զարկիր։ Նոյնիսկ եթէ մեր պատգամը զինք զայրացնէ, յիշէ թէ կրնայ ըլլալ որ ուրիշներ սխալ գաղափարներ փոխանցած են իրեն մեր մասին (Բ. Կոր. 4։4)։
• Հեզութեամբ եւ շնորհալի խօսքերով պատասխանէ (Առ. 15։1)։ Զինք արթնցուցի՞ր կամ գործէն ե՞տ ըրիր։ Թէեւ մեր գործունէութեան համար ներողութիւն չենք խնդրեր, բայց կրնաս խոնարհաբար ներողութիւն խնդրել, որ անյարմար ժամու մը հանդիպեցար։ Արդեօք ան բարկացաւ քանի որ սխալ տարաձայնութի՞ւն լսած է մեր մասին։ Եթէ այո՛, կրնաս ըսել. «Կը հասկնամ թէ ինչո՛ւ նեղացած ես։ Բայց այնպէս կը թուի թէ այն ինչ որ մեր մասին լսած ես ճշգրիտ չէ։ Կրնա՞մ բացատրել»։ Արդեօք ան կ’առարկէ մեր հաւատալիքներէն մէկո՞ւն, թերեւս վտարումին կամ արեան ներարկում մերժելուն։ Կրնաս ըսել. «Կը հասկնամ։ Ուրիշներ ալ նոյն մտահոգութիւնը յայտնած են։ Կրնա՞մ Աստուածաշունչէն ցոյց տալ թէ այդ ուսուցումը որդեգրելու ի՛նչ հիմ մը ունինք»։
• Եթէ տանտէրը չափազանց զայրացած է, թերեւս լաւագոյն բանն է երթալ, առանց նոյնիսկ պատասխանելու։ Եթէ ան խնդրէ որ Եհովայի վկաները դարձեալ իր դուռը չզարնեն, վստահեցուր իրեն որ իր փափաքը պիտի գոհացուի։
Այս ամսուան ընթացքին, հետեւեալը փորձէ.
• Ընտանեկան պաշտամունքի ընթացքին, փորձի նիստեր ունեցիր։
• Զայրացած տանտիրոջ մը տունէն հեռանալէ ետք ծառայակիցիդ հետ քննարկէ, թէ ինչպէ՛ս կրնայիր պարագան աւելի լաւ կերպով ձեռք առնել։