Ձեր Ծառայութեամբ ‘Անխոնջօրէն Զբաղած’ Եղէք

¹ Երբ կը կարդանք թէ Պօղոս առաքեալ Կորնթոսի մէջ եղած ատեն վրանագործութեամբ կը զբաղէր, թերեւս եզրակացնենք թէ ասիկա իր քարոզելու պատեհութիւնը սահմանափակեց։ Սակայն, Գործք Առաքելոց 18։5 կ’ըսէ. «Պօղոսին հոգին եռանդով վառուած [«անխոնջօրէն խօսքով զբաղած», ՆԱ] ըլլալով, վկայութիւնով Հրեաները կը համոզէր թէ՝ Յիսուսը Քրիստոսն է»։ Պօղոս ինչո՞ւ այսքան զբաղած էր քարոզչութեան գործունէութեամբ։ Թէեւ Կորնթոսի մէջ շատեր արդէն հաւատացեալներ եղած էին, Տէրը հաստատեց թէ այդ քաղաքին մէջ տակաւին շատեր պիտի աշակերտուէին։ (Գործք 18։8-11) Մենք ալ նման պատճառ մը ունի՞նք մեր ծառայութեամբ անխոնջօրէն զբաղած ըլլալու։ Այո՛։ Տակաւին շատ անհատներ կրնանք գտնել եւ անոնց ճշմարտութիւնը սորվեցնել։

² Ապրիլ Ամսուն Ծառայութեան Համար Աւելի Ժամանակ Տրամադրեցէք. Հաւանաբար, ձեր նպատակակէտն է որ ամէն ամիս բարի լուրի քարոզչութեամբ զբաղած ըլլաք։ Սակայն, կարգ մը ամիսներ մեզի աւելի պատեհութիւն կու տան, որ «անխոնջօրէն զբաղած» ըլլանք այս գործունէութեամբ։ Ասոնց մէջ կ’իյնայ Ապրիլ ամիսը, Յիշատակատօնի ժամանակաշրջանի բարձրակէտը։ Ձեր պարագաները թոյլ տուա՞ծ են որ այս գարնան օժանդակ ռահվիրայ մը ըլլաք կամ ծառայութեան մէջ ձեր ջանքերը աւելցնէք։ Հրատարակիչներէն շատեր որ ասիկա կ’ընեն, մեծապէս օրհնուած են։ (Բ. Կորն. 9։6) Եթէ ձեր բոլոր կարելին կ’ընէք, յիշեցէք թէ Եհովա ձեր բոլորանուէր ծառայութեան կը հաճի։ (Ղուկ. 21։2-4) Ձեր պարագաները ի՛նչ որ ալ ըլլան, ձեր նպատակը ըրէք որ Ապրիլի ընթացքին ձեր ծառայութեամբ «անխոնջօրէն զբաղած» ըլլաք։ Իսկ մի՛ մոռնաք ամսուան վերջաւորութեան դաշտի ծառայութեան ձեր տեղեկագիրը ներկայացնելու, որպէսզի ձեր ջանքերը տեղեկագրուին Եհովայի մնացեալ ժողովուրդին ընդհանուր գործունէութեան հետ։

³ Յիշատակատօնին Ներկայ Գտնուող Նորեկներուն Այցելեցէք. Անցեալ տարի, Միացեալ Նահանգներու մէջ, Յիշատակատօնի ներկաներուն թիւն էր 2,153, 268։ Այս տարուան ներկաներուն ընդհանուր թիւը տակաւին չենք գիտեր։ Սակայն, տեղեկագրութիւնները ցոյց կու տան թէ աւելի մեծ «հունձք»ի մը հոյակապ հնարաւորութիւնը կայ։ (Մատթ. 9։37, 38) Հետեւաբար, կարելի եղածին չափ շուտով կարգադրութիւն ըրէք որ այցելէք Յիշատակատօնին ներկայ գտնուող հետաքրքրուած անհատներուն, անոնց հոգեւոր օգնութիւն տալու համար։ Այսպիսի այցելութիւններ յետաձգելը կրնայ թոյլ տալ որ ‘չարը գայ ու անոր սրտին մէջ ցանուածը յափշտակէ’։ (Մատթ. 13։19) Շուտով այցելելը ցոյց պիտի տայ թէ արդարեւ ձեր ծառայութեամբ ‘անխոնջօրէն զբաղած’ էք։

⁴ Շարունակեցէք Անգործունեայ Անհատներուն Աջակցիլ. Անգործունեայ անհատներուն աջակցելու համար, Փետրուար ամսուն մասնայատուկ ջանք մը թափուեցաւ։ Եթէ ոմանք տակաւին հովուական այցելութիւն մը չեն ստացած, երէցները պէտք է կարգադրեն անոնց այցելութիւն մը տալ Ապրիլ ամիսը չլրացած։ Երէցները պիտի ջանան բնորոշել անհատին խնդրին հիմնական պատճառը, նաեւ Եհովայի ծառայութեան մէջ դարձեալ գործունեայ ըլլալու համար, իրեն օգնելու լաւագոյն կերպը։ Այս սիրալիր օգնութիւնը ցոյց կու տայ թէ երէցները «Աստուծոյ հօտ»ին հովիւները ըլլալու պատասխանատուութիւնը լուրջի կ’առնեն։ (Ա. Պետ. 5։2. Գործք 20։28) Դիտարան 15 Սեպտեմբեր 1993 թիւը, էջ 22-23 (Անգլերէն), հոյակապ թելադրութիւններ կը հայթայթէ, որոնք կրնան երէցներուն կողմէ գործածուիլ, երբ նկատի առնեն անգործունեայ անհատներու ազդող հինգ սովորական խնդիրներէն մէկը։ Տակաւին կարելի է որ ոմանք Ապրիլ ամսուան ընթացքին դաշտի ծառայութեան մէջ վերստին գործունեայ դառնան։

⁵ Աւելի Մեծ Թիւով Անհատներու Օգնեցէք որ Չմկրտուած Հրատարակիչներ Ըլլան. Ձեր զաւակները բարի լուրի նոր հրատարակիչներ ըլլալու որակելի եղա՞ծ են։ Ի՞նչ կրնանք ըսել ձեր հետ Աստուածաշունչը ուսումնասիրող անհատներուն մասին։ Եթէ այսպիսիներ երէցներու հաւանութիւնը ստանան, Ապրիլը հոյակապ ժամանակ մը պիտի չըլլա՞յ որ անոնք սկսին ծառայել։ Եթէ անհատ մը կը յառաջդիմէ եւ Ի՛նչ կը Պահանջէ գրքոյկը ու Գիտութիւն գիրքը ուսումնասիրած է, կարելի է Աստուածաշունչի ուսումնասիրութիւնը շարունակել երկրորդ գիրք մը գործածելով, կա՛մ Աստուծոյ Խօսքը գիրքը, կա՛մ Իսկական Խաղաղութիւն գիրքը, եւ կամ՝ Պաշտամունք գիրքը։ Ձեր նպատակակէտն է աշակերտին օգնել որ ճշմարտութեան մասին աւելի խոր հասկացողութիւն ձեռք ձգէ, որպէս չմկրտուած հրատարակիչ որակելի ըլլայ, եւ Եհովայի նուիրուած ու մկրտուած Վկայ մը ըլլայ։—Եփ. 3։17-19. Ա. Տիմ. 1։12. Ա. Պետ. 3։21

⁶ Աստուածաշունչի ձեր աշակերտներուն հանդէպ ձեր հաստատ եւ անկեղծ հետաքրքրութիւնը կրնայ անոնց օգնել որ ի վերջոյ ճշմարտութիւնը իրենց անձնականը դարձնեն։ Վկայ մը տարեց զոյգի մը հանդիպեցաւ որ սրտանց ընդունեց Աստուածաշունչը ուսումնասիրել։ Սակայն այս զոյգը երեք յաջորդական շաբաթներ ուսումնասիրութիւնը յետաձգեց։ Ի վերջոյ ուսումնասիրութիւնը սկսաւ։ Ապա, գրեթէ շաբաթ մը այո շաբաթ մը ոչ, զոյգը ուսումնասիրութիւնը չեղեալ կը համարէր։ Սակայն, վերջապէս կինը յառաջդիմեց եւ մկրտուեցաւ։ Եղբայրը կը մտաբերէ. «Իր մկրտութենէն ետք, անոր աչքերը ուրախութեան արցունքներով լեցուած էին, որոնք թէ՛ իմ եւ թէ կնոջս աչքերը ուրախութեան արցունքով լեցուցին»։ Այո, բարի լուրով ‘անխոնջօրէն զբաղած’ ըլլալը, մեծ ուրախութիւն կը պատճառէ։

⁷ Աստուածաշունչի մարգարէութիւնները եւ աշխարհի իրադարձութիւնները ցոյց կու տան թէ վերջին ժամանակին մէջ շատ յառաջացած ենք։ Հիմա է ժամանակը երբ Աստուծոյ բոլոր ժողովուրդը պէտք է ‘անխոնջօրէն զբաղած’ ըլլայ բարի լուրը ուրիշներուն գիտցնելով։ Պօղոս առաքեալ երաշխիք կու տայ թէ այսպիսի աշխատանք վստահաբար «պարապ չէ Տէրոջմով»։—Ա. Կորն. 15։58