Iji Echiche nke Ịdị Ngwa Na-eche Ozi Ọma ahụ n’Ihu Mmadụ

¹ Anyị na-egosi ekele anyị miri emi maka nkwa Alaeze Chineke site n’iji obi dum na-ekere òkè n’ozi ndị Kraịst. Ọ dị anyị mkpa iji echiche nke ịdị ngwa na-ekere òkè n’ọrụ a. N’ihi gịnị? N’ihi na ndị ọrụ dị ole na ole, ọgwụgwụ nke ajọ usoro ihe a na-akpụdewe nso, ndụ nke ndị nọ n’ókèala anyị nọkwa n’ihe ize ndụ. (Ezik. 3:19; Mat. 9:37, 38) Ibu ọrụ dị arọ dị otú ahụ na-achọ mgbalị anyị kasị mma n’ozi. Olee otú anyị pụrụ isi gosi echiche nke ịdị ngwa n’ihe banyere ọrụ ije ozi ubi anyị? Site n’ibu ụzọ kwadebe ụzọ ndị dị mma isi chee ihe n’ihu mmadụ, site n’ịdị uchu n’ịchọta ndị mmadụ ebe ọ bụla a pụrụ ịhụ ha, site n’inwe ihe ndekọ ziri ezi nke ndị nile gosiri mmasị na ịlaghachi n’egbughị oge iji sochie mmasị ahụ, na site n’icheta na ebe ọ bụ na o metụtara ndụ, anyị kwesịrị iji ozi anyị kpọrọ ihe. Aro ndị na-esonụ pụrụ inye aka ka anyị na-akwadebe iji echiche nke ịdị ngwa chee ozi ọma ahụ n’ihu mmadụ na February. Akwụkwọ a ga-enyefe ga-abụ Ị Pụrụ Ịdị Ndụ Ebighị Ebi n’ime Paradaịs n’Elu Ala.

² Ị pụrụ inwe ike ịmalite mkparịta ụka site n’ikwu ná mkpirikpi ụfọdụ nsogbu ndị a na-eche ihu n’ógbè unu, mgbe ahụkwa ị pụrụ ịsị:

◼ “Ọtụtụ ndị mmadụ kwetara na Chineke dị, ma ha na-eche, sị: ‘Ụdị ọdịnihu dị aṅaa ka ọ chọrọ maka anyị?’ Olee otú ị ga-esi zaa nke ahụ? [Nye ohere maka nzaghachi.] Ị̀ maara na Bible n’ụzọ doro anya na-akọwa uche Chineke maka ihe a kpọrọ mmadụ na nzọụkwụ ndị ọ na-ewere iji rụzuo ya?” Sapeta peji nke 8 n’akwụkwọ Ịdị Ndụ Ebighị Ebi. Gụpụta Aịsaịa 45:18 dị na paragraf nke 5 na nkọwa e nyere maka ya na paragraf nke 6. Sapeta ihe osise dị na peji nke 12 na 13 iji kọwaa ihe nke a pụtara maka ọdịnihu anyị. Gụpụta Aịsaịa 11:6-9 dị na paragraf nke 12. Nyefee akwụkwọ ahụ n’ụtụ ₦80 ma dokwaa oge dị mma ịlaghachi iji gaa n’ihu ná mkparịta ụka ahụ.

³ Ị pụrụ iji ụzọ iche ihe n’ihu mmadụ nke a dị nkenke sochie nkwurịta okwu mbụ e nwere n’Aịsaịa 45:18:

◼ “N’ọbịbịa m nke ikpeazụ, anyị kwurịtara banyere nkwa Chineke ịkwadebe òtù ụwa ọhụrụ maka ihe a kpọrọ mmadụ. [Dọrọ uche ọzọ gaa n’ihe osise dị na peji nke 12 na 13 n’akwụkwọ Ịdị Ndụ Ebighị Ebi.] Ị̀ ga-achọ ịhụ ka ezinụlọ gị nwetara ọnọdụ obi ụtọ dị otú ahụ? [Nye ohere maka nzaghachi.] Ajụjụ bụ, Ruo ókè hà aṅaa ka a pụrụ ịtụkwasị nkwa Chineke obi? Biko rịba ama ihe ya onwe ya na-ekwu.” Gụpụta Aịsaịa 55:11 dị na paragraf nke 8 na peji nke 9. Jụọ ajụjụ ndị e depụtara n’akwụkwọ maka paragraf nke 8 dị na peji nke 9, ma gụpụta azịza ha, na-agụnye ahịrịokwu ikpeazụ nke paragraf ahụ. Kwuo okwu banyere inwe ọmụmụ Bible n’efu. Mee ndokwa igosi otú e si eme ya mgbe e mesịrị.

⁴ Ebe ọtụtụ ndị na-echegbu onwe ha banyere nsogbu ndị na-arị elu na-eche ihe a kpọrọ mmadụ ihu, ị pụrụ ikwu ihe yiri nke a n’ọbịbịa mbụ:

◼ “Onye ọ bụla m zutere na-echegbu onwe ya banyere nsogbu ndị anyị na-eche ihu n’ógbè anyị. [Kpọtụ uche n’ole na ole.] Ruo ọtụtụ iri afọ ndị ndọrọ ndọrọ ọchịchị ekwewo nkwa iweta ihe ngwọta na-adịgide adịgide, ụfọdụ agbalịwokwa ime otú ahụ. Gịnị ka i chere na-akpata ọnọdụ ịnọgide na-aka njọ? [Nye ohere maka nzaghachi.] Bible na-enye nkọwa nke ihe ka ọtụtụ ná ndị mmadụ na-atụletụbeghị. Akwụkwọ Mkpughe na-akọwa otu agha nke weere ọnọdụ n’eluigwe. Rịba ama ihe si na ya pụta, dị ka e kwuru ná Mkpughe 12:9.” Gụpụta amaokwu ahụ, mgbe ahụ sapeta peji nke 20 na 21 n’akwụkwọ Ịdị Ndụ Ebighị Ebi. Jiri ihe osise ahụ kọwaa aka Setan na-etinye n’ihe omume nke ụwa. Nyefee akwụkwọ ahụ n’ụtụ ₦80 ma mee atụmatụ ịlaghachi na ịtụle ụzọ Chineke ga-esi gwọta nsogbu ihe a kpọrọ mmadụ.

⁵ Ọ bụrụ na i kwere nkwa ịlaghachi ịkọwa ihe ngwọta Chineke maka nsogbu nke taa, ị pụrụ ịnwale ụzọ nke a:

◼ “Emere m mgbalị pụrụ iche iji lọghachi ka anyị nwee ike ịga n’ihu ná nkwurịta okwu anyị n’ihe ngwọta bụ ezie maka nsogbu ndị na-eche ihe a kpọrọ mmadụ ihu. N’ọbịbịa m nke ikpeazụ, anyị hụrụ na Bible na-akọwa Setan bụ́ Ekwensu dị ka onye na-eduhie elu ụwa dum mmadụ bi. Ebe ọ bụ mmụọ e kere eke ka mmadụ elu, ì chere na e nwere ụzọ a pụrụ isi wepụ mmetụta ya? [Nye ohere maka nzaghachi.] Biko rịba ama ihe Bible na-ekwu.” Gụọ ma kọwaa Mkpughe 20:1-3. Site n’iji ihe osise dị na peji nke 4-5 nke akwụkwọ Ihe Ọmụma eme ihe, gosi ihe ọnọdụ ga-adị ka ya n’enweghị mmetụta Setan. Kwuo ka e nwee ọmụmụ Bible ma gbalịa ịmalite ya ozugbo.

⁶ Ebe e nwere ọtụtụ ndị mmadụ nwere mmasị na gburugburu ebe obibi, ị pụrụ ikwu ihe yiri nke a iji malite mkparịta ụka:

◼ “Anyị achọpụtawo na ihe fọrọ nke nta ka ọ bụrụ mmadụ nile na-enwe nchegbu banyere mmetọ nke ikuku, mmiri, na ihe oriri anyị. Ná mba ụfọdụ ọnọdụ nke gburugburu ebe obibi amaliteworị iyi ndụ egwu. Ebe Chineke bụ Onye Okike nke ụwa, gịnị ka i chere ọ ga-eme banyere nke a? [Nye ohere maka nzaghachi.] Bible na-ekwu na Chineke gaje ime mpịazi banyere ụzọ anyị si eji mbara ụwa eme ihe. [Gụọ Mkpughe 11:18b.] Cheedị banyere ibi n’ụwa nke mmetọ nile na-adịghị!” Mee ka nkwa Chineke banyere paradaịs pụta ìhè, dị ka e gosiri ná Mkpughe 21:3, 4. Gosi ihe osise ahụ dị na peji nke 12 na 13 n’akwụkwọ Ịdị Ndụ Ebighị Ebi. Nyefee akwụkwọ ahụ n’ụtụ ₦80 ma mee ndokwa ịlaghachi.

⁷ Mgbe ị na-alaghachi na nke onye gosiri mmasị n’ụwa Paradaịs, ị pụrụ ikwu, sị:

◼ “N’ọbịbịa m nke ikpeazụ, anyị kwekọrịtara na iji gwọta nsogbu nke ụwa e metọrọ emetọ, Chineke gaje itinye aka n’ihe omume mmadụ. Ma ajụjụ bụ, Gịnị ka anyị na-aghaghị ime iji wee lanarị baa n’ime ụwa ọhụrụ ezi omume nke Chineke na-eme?” Gụọ Jọn 17:3. Kpọọ onye nwe ụlọ òkù ka o rite uru n’usoro ọmụmụ Bible n’efu anyị iji nweta ihe ọmụma a pụrụ iche.

⁸ Lee ihe ùgwù ọ bụ ịbụ ndị e ji eme ihe dị ka ndị na-arụ ọrụ iwe ihe ubi nke oge a na ịrụ ọrụ nkwusa na-azọpụta ndụ! Ka anyị nile jide ọrụ n’aka n’iji echiche nke ịdị ngwa na-eche ozi ọma ahụ n’ihu mmadụ, ‘na-amata na ndọgbu anyị na-adọgbu onwe anyị n’ọrụ abụghị ihe efu.’—1 Kọr. 15:58.