Ememe Ncheta—Ihe Omume Dị Oké Mkpa!

¹ Na Sunday, March 23, mgbe anyanwụ dasịrị, anyị ga-eme Ememe Ncheta nke ọnwụ Kraịst. (Luk 22:19) Nke a bụ n’ezie ihe omume dị oké mkpa! Site n’iguzosi ike n’ezi ihe ya nye Jehova ruo ọnwụ, Jisọs gosipụtara na ọ pụrụ ikwe mmadụ omume ijigide nsọpụrụ Chineke zuru okè ọbụna n’okpuru oké nrụgide, wee si otú a na-akwado izi ezi nke ọbụbụeze Jehova. (Hib. 5:8) Tụkwasị na nke a, ọnwụ Kraịst nyere àjà mmadụ ahụ zuru okè nke dị mkpa iji gbapụta ihe a kpọrọ mmadụ, na-eme ka o kwe omume ndị nwere okwukwe ịdị ndụ ebighị ebi. (Jọn 3:16) Site n’ịbịa Ememe Ncheta, anyị pụrụ igosipụta ekele sitere anyị n’obi maka ịhụnanya Jehova na maka àjà Jisọs chụrụ n’ihi anyị.

² A na-agba mmadụ nile ume ịgbaso usoro ọgụgụ Bible ahụ e dokwara maka March 18-23, dị ka e gosipụtara ya na 1997 Calendar of Jehovah’s Witnesses. Ọzọkwa, ntụle ezinụlọ nke isi nke 112-116 nke akwụkwọ bụ́ Nwoke Kasị Ukwuu nke Dịworo Ndụ ga-enye aka ịtụkwasị uche anyị n’izu ahụ kasị dị mkpa n’akụkọ ihe mere eme mmadụ.

³ Ị̀ pụrụ ịmụba oge ị na-etinye n’ozi ubi n’oge Ememe Ncheta? Ọtụtụ ndị nkwusa ga-eji ngwụsị izu ise e nwere na March mee ihe n’ụzọ zuru ezu ije ozi dị ka ndị ọsụ ụzọ inyeaka. Gịnị ma i sonyere ha? Anyị nile pụrụ ikere òkè zuru ezu n’imesi mkpa ọ dị ike ịbịa Ememe Ncheta ahụ. Ebe ọ dabanyere n’ụbọchị Sunday, ọ ga-adịrị ọtụtụ ndị mfe karị ịbịa. Hụ na ị kpọrọ ndị nile a na-amụrụ Bible na ndị ọzọ nwere mmasị òkù isonyere anyị. Soro ha kerịta ihe e kwuru n’akwụkwọ Ihe Ọmụma na peji nke 127, paragraf nke 18, banyere otu ụbọchị ahụ n’afọ bụ́ nke a ga-edebe n’ụzọ pụrụ iche.

⁴ Jiri ekele miri emi maka ihe nile ọnwụ Jisọs pụtaara anyị mesoo ihe omume a kasịnụ nke 1997. Bịa n’uhuruchi nke March 23, mgbe ezi ndị Kraịst n’ebe nile ga-eji ikwesị ntụkwasị obi mee Ememe Ncheta.