Nwalee Ụzọ Ndị Dị Mfe Isi Na-enyefe Akwụkwọ — Ọ́bá Akwụkwọ Anyị NKE DỊ N'ỊNTANET

Nwalee Ụzọ Ndị Dị Mfe Isi Na-enyefe Akwụkwọ

Ezi mmasị anyị nwere n’ebe ndị mmadụ nọ ga-akpali anyị ịgbalị ịghọta ihe bụ́ mkpa ha ma gosi ha otú Alaeze ahụ ga-esi wepụ nsogbu ndị ha na-enwe kpamkpam. (Fil. 2:4) Ụzọ dị mfe ọtụtụ ndị nkwusa chọpụtara na ọ na-adị irè isi enyefe akwụkwọ bụ ịgwa onye nwe ụlọ ka ọ kọwaa ihe osise paradaịs ndị dị n’akwụkwọ anyị, dị ka ndị nke e depụtara na kọlụm aka nri nke peeji a. Ị pụrụ ime ya site n’iji otu n’ime okwu mmeghe ndị a mee ihe:

◼ “Ì chere na ọ dị mgbe anyị ga-ahụ ụmụ mmadụ ka ha nọ n’ụdị ọnọdụ e sere ebe a?”

◼ “Ọ ga-amasị anyị nile ka ụmụ anyị nwee ike ịnọ n’ụdị ụwa e sere ebe a. Gịnị ka i chere ọ ga-ewe iji mee ka ụwa dị otú a?”

◼ “Ihe a bụ ihe osise nke otú ụwa ga-adị mgbe e mewere uche Chineke n’ụwa dị ka e si eme ya n’eluigwe. Ị̀ chọpụtara ọdịiche ọ bụla n’etiti ihe osise a na ndụ a na-ebi taa?”

◼ “Ọ̀ ga-amasị gị ibi n’ụdị ọnọdụ e sere ebe a? [Chere ka ọ zaa.] Ì chere na a ga-enwe ụdị ọnọdụ a n’oge ndụ anyị?”

Gee ntị nke ọma n’ihe onye ahụ ga-aza ma jiri obiọma chọpụta ihe dị ya n’obi site n’ịjụ ya otu ajụjụ ma ọ bụ abụọ ọzọ. Ọ bụrụ na ụfọdụ zara na ha agaghị enwe mmasị ibi n’ụdị ọnọdụ e sere ebe ahụ ma ọ bụ na ha ekweghị na ihe dị otú ahụ ga-ekwe omume, ekwubila ozugbo na ha enweghị mmasị. Jiri akọ jụọ ha ihe mere ha ji nwee echiche dị otú ahụ. Azịza ha pụrụ igosi na ha na-enwe nchegbu dị ukwuu banyere ihe ndị yiri nsogbu a na-apụghị idozi edozi bụ́ ndị na-eche ihe a kpọrọ mmadụ ihu.—Ezik. 9:4.

Mgbe ị chọpụtara ihe na-enye onye nwe ụlọ nsogbu n’obi, mee ka okwu gị kwekọọ na ya. Mee ka ozi Alaeze ahụ nke kasị metụta ihe ndị na-akpa ya pụta ìhè. Gụọrọ ya otu akụkụ Akwụkwọ Nsọ ma ọ bụ abụọ bụ́ ndị kwuru banyere ihe ahụ na-enye ya nsogbu n’obi. (Lee aro ndị a tụrụ na kọlụm aka nri.) Kwe ka o jiri anya ya hụ ihe Okwu Chineke na-ekwu. Ọ bụrụ na o gosiri mmasị, nyefee ya akwụkwọ ahụ ma mee ndokwa ịbịaghachi na nke ya. Ị gaghachi, malite n’ebe unu kwụsịrị n’oge ikpeazụ ị gara.

[Igbe dị na peeji nke 5]

Ihe Atụ nke Ihe Osise Paradaịs

Akwụkwọ Onye Ozizi: peeji nke 251-254

Akwụkwọ Ihe Ọmụma: peeji nke 4-5, 188-189

Broshuọ Na-achọ: peeji nke 11, 13

Akwụkwọ Fee Chineke Ofufe: peeji nke 92-93

Akwụkwọ Ezi Udo: peeji nke 98

[[Igbe dị na peeji nke 5]

Ihe Ndị Na-emetụta Ndị Mmadụ

Agha, iyi ọha egwu

Abụ Ọma 46:8, 9;

Maịka 4:3, 4