Ihe Ndị Anyị Na-atụ Anya Ha n’Ụbọchị Mgbakọ Pụrụ Iche nke Afọ 2009

Isiokwu nke ụbọchị mgbakọ pụrụ iche nke afọ 2009 bụ “Na-eche Ozi ahụ . . . Nche, Ka I Wee Jezuo Ya,” ọ dabekwaara ná Ndị Kọlọsi 4:17. Anyị bụ́ Ndị Kraịst ji agbamume ahụ akpọrọ ihe. Nzube anyị bụ ijezu ozi anyị, dị nnọọ ka Jizọs jezuru nke ya. (Jọn 17:4) Pọl onyeozi hapụkwaara anyị ihe nlereanya magburu onwe ya n’akụkụ a. O kpebisiri ike ijezu ozi ya.—Ọrụ 20:24.

Okwu onye nlekọta sekit ga-ekwu ga-egosi otú ndị nkwusa dị iche iche si na-emeri nsogbu ndị ha na-enwe n’ozi ha. Mgbe ahụzi, okwu bụ́ “Na-elekọta Mkpụrụ Ị Kụrụ Anya nke Ọma” ga-egosi anyị otú anyị nwere nnọọ ike isi nyere ndị “nwere ezi obi maka inweta ndụ ebighị ebi” aka. (Ọrụ 13:48) Ọkà okwu si esi bịa ga-ebu ụzọ tụlee 2 Ndị Kọrịnt 6:1-10, n’amaokwu n’amaokwu, n’okwu bụ́ “Otú Anyị Si Eme Ka A Mata Anyị Dị Ka Ndị Ozi.” N’ehihie, ọ ga-ekwu okwu n’isiokwu bụ́ “Jiri Ozi Gị Kpọrọ Ihe nke Ukwuu.” O doro anya na okwu abụọ bụ́ “Ozi Ọma Na-atọ Ma Ndị Ntorobịa Ma Ndị Torola Eto Ụtọ” na “Ndị Ntorobịa Ndị Na-ejezu Ozi Ha” ga-agba gị ume. Ndị chọrọ ka e mee ha baptizim n’ụbọchị mgbakọ pụrụ iche ma ọ bụ ná mgbakọ sekit ndị na-abịanụ iji gosi na ha ararala onwe ha nye Chineke kwesịrị ịgwa onyeisi oche ndị nlekọta ozugbo o kwere ha mee. Ọ dịghị mgbakọ anyị gara a na-anaghị atụle Ụlọ Nche. Jiri nke a ga-amụ n’izu ahụ bịa ụbọchị mgbakọ pụrụ iche.

Ka anyị na-eche nche iji hụ na anyị jezuru ozi anyị, anyị na-agba mbọ ịhụ na ihe ndị ọzọ adọpụghị uche anyị n’ihe Jehova nyefere anyị n’aka. Agbamume sitere n’Akwụkwọ Nsọ anyị ga-enweta n’ụbọchị mgbakọ pụrụ iche a kwesịrị inyere anyị niile aka ịghọta ihe ọ dị mkpa ka anyị mee iji nọgide na-ele ihe anya n’ụzọ ziri ezi ma lebara ozi anyị anya iji hụ na anyị jezuru ya nke ọma.