Otú Ị Ga-esi Enweta Akwụkwọ Anyị n’Asụsụ Ọzọ n’Egbughị Oge

Mgbe ụfọdụ anyị nọ ozi ọma, anyị na-ahụ ndị chọrọ ịgụ akwụkwọ anyị n’asụsụ ala ọzọ ma ya abụrụ na e nweghị akwụkwọ dị n’asụsụ ahụ n’ọgbakọ anyị. Ị̀ ma na ị gaa n’Ịntanet, nweekwa ebe i nwere ike ibipụta akwụkwọ, i nwere ike ibipụta akwụkwọ anyị n’ihe ruru narị asụsụ anọ ọ bụla ị chọrọ ya? Lee otú ị ga-esi eme ya:

• Gaa na www.watchtower.org bụ́ adres Ịntanet anyị.

• I mepee ya, n’akụkụ aka nri n’ihu ebe mbụ ga-emepe, e depụtara ụfọdụ n’ime asụsụ ndị akwụkwọ anyị dị na ha. Pịa ebe ahụ e sere ụwa ka o bupụtara gị asụsụ niile e nwere ha.

• Pịa asụsụ nke ị chọrọ. Ị ga-ahụ peeji ga-egosi gị akwụkwọ ndị i nwere ike ibipụta, ndị dị ka traktị, broshuọ, na isiokwu dị iche iche. Ebe ọ bụ na e dere ihe ndị ị ga-ahụ ebe ahụ n’asụsụ ị na-amaghị, enyela onwe gị nsogbu ma ọ bụrụ na ị ghọtaghị ihe e dere.

• Pịa nke ọ bụla n’ime ha. Ihe ahụ ị pịrị ga-apụta n’ihu kọmputa gị, i nweziri ike ịpị ebe e sere ihe e ji agwa kọmputa ka o bipụta akwụkwọ, ọ ga-ebipụtaziri gị ya.

Akwụkwọ ndị e nwere ike isi n’adres Ịntanet anyị bipụta bụ naanị ole na ole n’ime akwụkwọ ndị anyị nwere; i nwere ike isi n’ọgbakọ nweta ọtụtụ akwụkwọ anyị ndị ọzọ. Ị hụhaala onye nwere mmasị ịgụ akwụkwọ anyị, ọ kacha mma isi n’aka ọgbakọ tụọ ọda akwụkwọ ị ga-enye ya.