Otú E Si Eji Traktị Amalite Mkparịta Ụka

Kemgbe ọnwa Jenụwarị afọ 2018, a na-enwe ihe anyị na ndị mmadụ nwere ike ikwurịta na peeji nke mbụ n’Usoro Ihe Omume Ozi Anyị na Otú Anyị Si Ebi Ndụ. A gbara anyị ume ka anyị lekwasị anya n’iso ndị mmadụ kwurịta okwu kama inye ha naanị akwụkwọ anyị. Iji nyere anyị aka ime ihe a, e nwere vidio mkparịta ụka ndị e jirila gosi anyị otú anyị nwere ike isi jiri naanị Baịbụl malite mkparịta ụka. Ma, ọ̀ pụtara na anyị agaghịzi na-enye ndị mmadụ akwụkwọ anyị ma anyị nọrọ n’ozi ụlọ n’ụlọ? Mba. Dị ka ihe atụ, iji traktị ezi ozi ọma bụ otu ụzọ magburu onwe ya e si amalite mkparịta ụka. Anyị nwere ike ime ihe ndị e dere n’okpuru ebe a ma anyị chọọ iji traktị amalite mkparịta ụka:

1. Jụọ onye ahụ ajụjụ dị n’ihu traktị ahụ ka o kwuo nke o chere bụ́ azịza ya.

2. Gosi ya ihe Baịbụl zara n’amaokwu Baịbụl dị n’elu elu peeji nke abụọ na traktị ahụ. Ọ bụrụ na oge dị, gị na ya tụlee ihe ụfọdụ dị na traktị ahụ.

3. Nyezie onye ahụ traktị ahụ ma gbaa ya ume ka ọ gụọ ihe ndị ọzọ dị na ya n’oge nke ya.

4. Tupu gị alawa, gosi ya ajụjụ dị n’ebe e dere “Ihe Ị Ga-echebara Echiche,” gwazie ya oge ọzọ ị ga-abịa ka unu jiri Baịbụl mata azịza ajụjụ ahụ.

Ị laghachi, gị na ya tụlee azịza ajụjụ ahụ, gwakwa ya ajụjụ unu ga-atụle n’oge ọzọ. I nwere ike ịhọrọ ajụjụ dị na jw.org, ma ọ bụkwanụ nke dị n’akwụkwọ e sere n’azụ traktị ahụ. N’oge i chere kwesịrị ekwesị, bidozienụ mụwa Ozi Ọma Si n’Aka Chineke! ma ọ bụ akwụkwọ ọzọ so n’Ihe Ndị Anyị Ji Akụziri Ndị Mmadụ Ihe.