Otú E Si Eme Nkwusa n’Ógbè Azụmahịa

1. Olee ụfọdụ uru ndị a na-erite n’ịgba àmà n’ógbè azụmahịa?

¹ Ọ̀ ga-amasị gị ime nkwusa n’ókèala ebe ndị mmadụ na-anabatakarị ndị ọbịa na ebe a na-enwetakarị ndị mmadụ n’ụlọ? Ị pụrụ ime nke ahụ kpọmkwem n’ókèala ọgbakọ gị. N’ụzọ dị aṅaa? Ọ bụ site n’ịga n’ógbè azụmahịa ndị dị na ya. Ndị nkwusa bụ́ ndị na-agba àmà site n’ụlọ ahịa ruo n’ụlọ ahịa na-arụpụta ihe ndị dị mma.

2. Olee otú a pụrụ isi hazie maka ịgba àmà n’ógbè azụmahịa?

² Ụfọdụ ọgbakọ nwere ógbè azụmahịa (gụnyere ọma ahịa) dị ka akụkụ nke ókèala e kenyere ha. Nwanna na-elekọta ókèala pụrụ imepụta kaadị ókèala pụrụ iche nke ógbè ndị a e nwere ọtụtụ ụlọ ahịa na ha. Ọ bụrụ na e nwere kaadị ókèala nke ebe obibi ndị mmadụ na ógbè azụmahịa dịkọtara ọnụ na ya, e kwesịrị igosi n’ụzọ doro anya na a gaghị arụ ógbè azụmahịa ndị ahụ mgbe a na-arụ ókèala ndị mmadụ bi na ha. N’ókèala ndị ọzọ, a pụrụ ịrụkọta ógbè azụmahịa na ebe ndị mmadụ bi. Ọ bụrụ na ị gbatụbeghị àmà n’ógbè azụmahịa, malite ya site n’ime nkwusa n’obere ụlọ ahịa ole na ole.

3. Gịnị ga-enyere anyị aka ịrụpụta ihe mgbe anyị na-agba àmà site n’ụlọ ahịa ruo n’ụlọ ahịa?

³ Jiri Ụzọ Nkwurịta Okwu Dị Mfe Na-eme Ihe: Mgbe ị na-agba àmà site n’ụlọ ahịa ruo n’ụlọ ahịa, ọ dị mkpa ka i jie ejiji otú ị ga-esi eji ma ị gawa nzukọ n’Ụlọ Nzukọ Alaeze. Ọ dịkwa mma ịga mgbe ndị ahịa na-ejughị n’ụlọ ahịa ahụ. Ọ bụrụ na o kwere omume, banye ebe ahụ mgbe ọ na-adịghị onye bịara ịzụ ahịa. Gwa onye nọ na ya na ị chọrọ ịhụ manịja ma ọ bụ onye nwe ụlọ ahịa ahụ. Gbuo okwu gị nkenke ma kapịa okwu ọnụ. Gịnị ka ị pụrụ ikwu?

4-6. Gịnị ka anyị pụrụ ikwu mgbe anyị na-agbara onye na-ere ahịa ma ọ bụ manịja àmà?

⁴ Mgbe ị na-agwa onye na-ere ahịa ma ọ bụ manịja okwu, ị pụrụ ikwu ihe dị ka nke a: “Ndị ahịa na-eji nnọọ ọrụ n’aka nke na anyị adịghị ahụkebe ha n’ụlọ, n’ihi ya, anyị bịara ka anyị hụ gị n’ụlọ ahịa gị. Magazin anyị na-akọ banyere okwu ndị a kpụ n’ọnụ n’ụwa nile.” Mgbe ahụ, kwuo otu isi ihe dị mkpirikpi sitere n’otu magazin.

⁵ Ma ọ bụ, ị pụrụ ịnwale ụzọ iche ihe n’ihu a dị mfe: “Ọtụtụ mmadụ ga-enwe mmasị ịmatakwu banyere Bible ma ihe merenụ bụ na ha adịchaghị enwe oge. Traktị a na-akọ banyere usoro ọmụmụ ihe a na-enwe n’efu iji nyere gị aka ịchọta azịza nye ajụjụ gị ndị dabeere na Bible.” Mgbe ahụ, kwuo ihe dị na peeji nke 4-5 nke traktị bụ́ Ị̀ Ga-achọ Ịmatakwu Banyere Bible?

⁶ Ọ bụrụ na o yiri ka onye ụlọ ahịa ahụ dị n’aka ya ò ji ọrụ n’aka, ị pụrụ nanị inyefe ya traktị ma kwuo, sị: “Aga m abịaghachi mgbe ị na-ejighị nnọọ ọrụ n’aka. Aga m achọ ịma ihe i chere banyere traktị a.”

7. Olee otú anyị pụrụ isi wulite mmasị anyị chọtara n’ógbè azụmahịa?

⁷ Iwulite Mmasị E Gosipụtara: I nwedịrị ike iduzi ọmụmụ Bible n’ógbè azụmahịa. Otu ọsụ ụzọ pụrụ iche nọ na-ewegara otu onye ọchụnta ego magazin n’esepụghị aka. Mgbe nwoke ahụ kwupụtara ekele o nwere maka ihe ọ na-agụ, onye ọsụ ụzọ ahụ jiiri broshuọ Na-achọ gosi ya otú e si enwe ọmụmụ Bible. A malitere iduziri nwoke ahụ ọmụmụ Bible kpọmkwem n’ụlọ ọrụ ya. N’iburu ọnọdụ ya n’uche, onye ọsụ ụzọ ahụ mere ka ọmụmụ ihe ahụ ghara ịdị na-akarị minit 10 ma ọ bụ 15 n’oge nke ọ bụla. N’otu aka ahụ, ka anyị nọgide na-achọ ndị kwesịrị ekwesị site n’ịdị na-agba àmà n’ógbè azụmahịa.