Otú Anyị Ga-esi Na-emekwu Nke Ọma n’Ozi Ọma—Izi Ozi Ọma n’Ebe Ndị Mmadụ Na-akpa Afọ Ha

Ihe Mere O Ji Dị Mkpa: Anyị gaa ozi ọma, anyị anaghị enwetakarị ọtụtụ ndị n’ụlọ n’ihi na ha na-anọ n’ebe ndị ha na-akpa afọ ha. Ka anyị nwee ike izi ha ozi ọma, ọ ga-akacha mma ka anyị gakwuru ha n’ebe ndị ahụ. Ịga ozi ọma n’ụdị ebe ahụ na-atọ ụtọ n’ihi na anyị na-enweta ndị mmadụ. Ha na-anabatakwa anyị n’ihi na ha na-ewere onye ọ bụla bịara na nke ha ka onye wetaara ha ọrụ ma ọ bụkwanụ onye bịara ịgba ha aka ahịa. Ka anyị nwee ike izi ozi ọma n’ebe ndị ahụ, anyị kwesịrị ileru anya mara mgbe ọ ga-adaba ịgwa mmadụ okwu na mgbe ọ na-agaghị adabacha. Anyị kwesịkwara ịna-eji ejiji dị mma. (2 Kọr. 6:3) Anya onye nlekọta ije ozi kwesịrị ịna-eru n’ugboro ole a na-arụ ebe ndị ahụ nakwa ndị na-arụ ha.

Ihe Ị Ga-eme:

Gbuo okwu gị nkenke. Ọ bụrụ na i gbuo onye ị gara na nke ya oge, o nwere ike ime ka ọ ghara ige anyị ntị n’oge ọzọ.
Gaa mgbe ị ma ha ga-enwetụ ohere ige ntị.
Buru ụzọ zie ọga ha ozi ọma. Mesapụkwara ya ihu. I nwere ike ịsị ya: “Ihe mere anyị ji chọrọ unu bịa ebe a bụ na ọ naghịzi adị mfe inweta ndị mmadụ n’ụlọ.” Gbuo okwu gị nkenke, nyekwa ya traktị, magazin, ma ọ bụ akwụkwọ ọzọ. Anyị ekwesịghị ịgwa ya okwu inye onyinye, ọ́ gwụkwala ma ọ̀ jụrụ anyị otú anyị si enweta ego anyị ji akwado ọrụ anyị. Ọ ga-eme ka ọ ghara ichewe na anyị bịara ire akwụkwọ.
Ọ bụrụ na ọga ha anabata anyị, anyị nwere ike ịgwa ya na anyị ga-achọ iji nkeji ole na ole zie ndị ọrụ ya ozi ọma. N’ebe ụfọdụ ndị mmadụ na-arụ ọrụ, anyị nwere ike ịgwa ọga ha na anyị ga-achọ idebere ndị ọrụ ya akwụkwọ n’ebe ha nwere ike iwere ha gụọ ma ha rụchaa ọrụ.
Ọ bụrụ na onye ị chọrọ izi ozi ọma ji ihe n’aka, nwee ndidi ka o mechaa tupu gị eziwe ya ozi ọma.

Mee Ihe A n’Ọnwa A:

Unu nwewe ofufe ezinụlọ, mụọnụ otú unu nwere ike isi zie ndị mmadụ ozi ọma n’ebe ha na-akpa afọ ha.