Ị̀ Bụbu Onye Ọsụ Ụzọ Oge Niile?
1. Olee ihe ùgwù ọtụtụ ụmụnna anyị nwerela, ma olee ihe ụfọdụ n’ime ha merela?
1 Kemgbe ọtụtụ afọ, ọtụtụ puku ụmụnna anyị enweela ihe ùgwù ịbụ ndị ozi oge niile, ndị ‘na-akụzi ihe ma na-ezisa ozi ọma.’ (Ọrụ 5:42) Ma ụfọdụ n’ime ha akwụsịla n’ihi otu ihe ma ọ bụ ihe ọzọ. Ọ bụrụ na e nweela mgbe ị bụ onye ọsụ ụzọ oge niile, ì chebarala ihe ndị ị na-eme ugbu a echiche ka ị mara ma ị̀ ka nwere ike ibidoghachi ozi oge niile?
2. Gịnị mere o ji kwesị ekwesị ka ndị bụ́bu ọsụ ụzọ oge niile lee ma ihe ndị ha na-arụ ugbu a ọ̀ ga-ekwe ha bidoghachi ịsụ ụzọ oge niile?
2 Ọnọdụ Na-agbanwe Agbanwe: O nwere ike, nsogbu mere i ji kwụsị ozi oge niile adịghịzi. Dị ka ihe atụ, ọ bụrụ na ihe mere i ji kwụsị ozi oge niile bụ n’ihi na ị naghị arụzu awa iri itoolu a chọrọ n’aka ndị ọsụ ụzọ oge niile n’oge ahụ, ì nwere ike ịmaliteghachi ugbu a awa a chọziri ha n’aka bụ awa iri asaa? Ọ bụrụ na ihe mere i ji kwụsị bụ ọrụ gị ma ọ bụkwanụ ibu ezinụlọ, ì nwere ike ile ma ihe ndị ahụ hà ebelatala ka i nwee ike maliteghachi? Otu nwanna nwaanyị onye kwụsịrị ịsụ ụzọ oge niile n’ihi ọrịa maliteghachiri ya mgbe ọ dị iri afọ asatọ na itoolu. Ebe ọ bụ na ọ gafeela otu afọ ọ na-agabeghị ụlọ ọgwụ, o chere na ahụ́ ya ga-ekwe ya ịmaliteghachi ozi oge niile!
3. Olee otú ndị niile nọ n’ezinụlọ ga-esi nyere otu onye n’ezinụlọ ha aka ka ọ bụrụ ọsụ ụzọ?
3 O nwere ike gịnwa abụtụbeghị onye ọsụ ụzọ oge niile, ma e nwere otu onye n’ezinụlọ unu bụ́bu ya ma mechaa kwụsị n’ihi na ọ na-elekọta otu onye ezinụlọ unu, o nwere ike bụrụ nne ma ọ bụ nna merela agadi. (1 Tim. 5:4, 8) Ọ bụrụ na ọ dị otú ahụ, gịnwa ma ọ bụ ndị ọzọ n’ezinụlọ unu, ùnu nwere ike inyere onye ahụ bụ́bu ọsụ ụzọ aka ka o bidoghachi ịsụ ụzọ? Í cheghị na ọ ga-adị mma ma unu niile n’ezinụlọ unu kwurịta ya? (Ilu 15:22) Ọ bụrụ na mmadụ niile n’ezinụlọ enyere otu onye aka ịghọ onye ọsụ ụzọ oge niile, obi ga-adị ndị niile nọ n’ezinụlọ ahụ ụtọ.
4. Ọ bụrụ na ị gaghị enweli ike ịmaliteghachi ọrụ ịsụ ụzọ ugbu a, gịnị ka ị ga-eme?
4 Ọ bụrụgodị na ihe ndị ị na-eme ugbu a agaghị ekwe gị bidoghachi ịsụ ụzọ, ekwela ka nke ahụ kụda gị mmụọ. Obi dị Jehova ụtọ na ọ na-agụ gị agụụ ịsụ ụzọ oge niile. (2 Kọr. 8:12) Ị gaa ozi ọma, jiri ihe ndị ị mụtara mgbe ị bụ ọsụ ụzọ oge niile na-ezi ozi ọma. Na-agwa Jehova n’ekpere na ị chọrọ ibidoghachi ọrụ ịsụ ụzọ oge niile, ị nọtụkwa gị eleba anya n’ihe ndị ị na-eme ka ị mara mgbe ị ga-enwe ike ibido. (1 Jọn 5:14) Ikekwe, ka oge na-aga, Jehova ga-emeghere gị “ọnụ ụzọ buru ibu nke na-eduga n’ịrụ ọrụ” ka i nwee ike ịmaliteghachi ọrụ ịsụ ụzọ oge niile ma nwee obi ụtọ na-adị na ya!—1 Kọr. 16:9.