Ì Nwere Ike Ịna-aga Ozi Ọma ná Mgbede?
1. Otu akwụkwọ kwuru na Pọl ji ole mgbe aga ozi ọma site n’ụlọ ruo n’ụlọ?
1 Otu akwụkwọ kwuru na Pọl onyeozi na-ejikarị mgbede aga ozi ọma site n’ụlọ ruo n’ụlọ. O kwukwara na ọ na-amalite n’elekere anọ ná mgbede zigide ndị mmadụ ozi ọma ruo n’ime abalị. Anyị amaghị ma Pọl ò ji oge ahụ aga ozi ọma n’eziokwu. Ma, ihe doro anyị anya bụ na o ji ịnụ ọkụ n’obi “eme ihe niile n’ihi ozi ọma.” (1 Kọr. 9:19-23) Otu n’ime ihe ndị ahụ ọ na-eme n’ihi ozi ọma bụ ịhazi onwe ya ka o nwee ike ịga ozi ọma n’ụlọ ndị mmadụ mgbe ọ ga-enweta ha n’ụlọ.
2. Gịnị mere mgbede ji bụrụ oge dị mma ịga ozi ọma?
2 N’ọtụtụ ebe, mgbe ndị nkwusa ji agakarị ozi ọma site n’ụlọ ruo n’ụlọ bụ n’ụtụtụ. N’ókèala unu, ùnu na-enweta ndị mmadụ n’ụlọ ma unu gaa ozi ọma n’ụtụtụ? Otu ọsụ ụzọ kwuru otú ihe si dịrị n’ókèala ha. Ọ sịrị: “Anyị anaghị ahụ ndị mmadụ n’ụlọ ma anyị gaa ozi ọma n’ụtụtụ. Ma, anyị na-enweta ọtụtụ ndị ná mgbede.” Mgbe kacha mma e nwere ike inweta ụmụ nwoke n’ụlọ bụ ná mgbede. Ihe ọzọ bụ na ndị mmadụ na-aka atụsara ahụ́ ná mgbede. Obi na-adịkwa ha ụtọ ịnụ ozi ọma n’oge ahụ. Ọ bụrụ na ndị okenye ekpebie na ndị nkwusa ga na-aga ozi ọma ná mgbede, ha kwesịrị ịhazi ka a na-enwe nzukọ ozi ubi ná mgbede.
3. Olee otú anyị ga-esi gosi na anyị dị akọ ma anyị nọrọ ozi ọma mgbede?
3 Anyị Kwesịrị Ịdị Akọ: Anyị kwesịrị ịdị akọ mgbe anyị na-aga ozi ọma ná mgbede. Ọ bụrụ na ị gara na nke mmadụ mgbe ọ ka ji ihe n’aka, dị ka mgbe ọ na-eri nri, gwa ya na ị ga-abịaghachi. Ọ dị mma ịga abụọ abụọ ma ọ bụkwanụ n’ìgwè. Agala na nke ndị mmadụ mgbe ha chọwarala ịlakpu. (2 Kọr. 6:3) Ọ bụrụ na ndị omekome na-anọkarị n’ókèala unu ma chi jie, ọ ka mma ịga ozi ọma mgbede mgbe chi na-ejibeghị.—Ilu 22:3.
4. Olee uru ndị dị n’ịga ozi ọma ná mgbede?
4 Ọ Bara Uru: Ozi ọma na-aka atọ ụtọ ma anyị nweta ndị mmadụ zie ha ozi ọma. Ọ bụrụ na anyị ana-agachikwu ozi ọma anya, ọtụtụ ndị anyị ziri ozi ọma ga-enweta “ezi ihe ọmụma nke eziokwu.” (1 Tim. 2:3, 4) Ì nwere ike ịhazi onwe gị ka ọ dịrị gị mfe ịna-aga ozi ọma ná mgbede?