Otú Anyị Ga-esi Na-emekwu nke Ọma n’Ozi Ọma—Inwe Ndị Anyị Na-ewegara Magazin Ọ Bụla E Bipụtara

Ihe Mere O Ji Dị Mkpa: Ọtụtụ ndị na-agụ magazin anyị anaghị achọ ka anyị na ha na-amụ ihe. O nwere ike ịbụ n’ihi na ha achọghị ịgbanwe chọọchị ha na-aga ma ọ bụkwanụ ya abụrụ na ha chere na ha enweghị ohere ka anyị na ha na-amụ Baịbụl. Ma, ka ha na-agụ magazin anyị na-aga, ịmụ Okwu Chineke nwere ike ịgụwa ha agụụ. (1 Pita 2:2) Otu isiokwu ha gụrụ nwere ike imetụ ha n’obi. Otú ihe si dịrị ha nwekwara ike ịgbanwe. Ọ bụrụ na anyị ana-agachi na nke ha anya, gharakwa ịnọte aka ma anyị gaa, ha ga-achọ ka anyị na-abịa. Ọ ga-enyekwara anyị aka ịmata ihe ndị ha ga-achọ ka anyị na ha kparịta, anyị amarakwa ihe ndị bụ́ mkpa ha. Ka oge na-aga, anyị na ha nwere ike malite ịmụ Baịbụl.

Ihe Anyị Ga-eme:

N’ọnwa ọ bụla, wepụta oge wegara ha Ụlọ Nche na Teta! ndị ọhụrụ. I nweziri ike ịgaghachi na nke ha n’oge ọzọ n’ọnwa ahụ ka i nwee ike ime ka ha nwee mmasị ịgụ otu n’ime isiokwu ndị dị na magazin ndị ahụ ma ọ bụkwanụ gị enye onye ọ bụla n’ime ha akwụkwọ a na-enye ndị mmadụ n’ọnwa ahụ. Ọ ga-adị mma ka i dee ụbọchị ọ bụla ị gara na nke ha n’akwụkwọ, akwụkwọ i nyere ha, ihe unu kwurịtara, na amaokwu Baịbụl ndị unu gụrụ.—Gụọ Ozi Alaeze Anyị nke ọnwa Jenụwarị afọ 2014, peeji nke 3.
Kwado akwado tupu gị agawa na nke ha. Kama inye ha magazin lawa, gị na ha kwurịta ihe ụfọdụ. Gbaakwa mbọ ka gị na ha bụrụ enyi n’ihi na ọ ga-eme ka ọ dịrị gị mfe ịmụwara ha ihe.
Jiri ohere ọ bụla pụtaranụ mụwara ha Baịbụl. Ọ bụrụ na onye ị na-adị ewegara magazin ajụọ gị ajụjụ, nye ya akwụkwọ anyị zara ajụjụ ahụ, gị na ya kwurịtakwa ihe dị na ya. Tupu gị alawa, tọgbọ ajụjụ gbasara ihe ahụ unu kwurịtara. Ị bịaghachi, gị na ya tụlee ya. Ọ bụrụ na ị na-agachi na nke ya anya ma jiri nkeji ole na ole na-atụle ihe dị na Baịbụl ma ọ bụ n’akwụkwọ anyị, ọ bụ Baịbụl ka gị na ya na-amụ. È nwetụla mgbe i nyere onye ị na-ewegara magazin akwụkwọ bụ́ Ozi Ọma Si n’Aka Chineke! ma gosi ya otú anyị na ndị mmadụ si eji ya amụ Baịbụl? Ì gositụla ya vidio bụ́ Olee Uru Ịmụ Baịbụl Ga-abara Gị? na Olee Otú Anyị na Ndị Mmadụ Si Amụ Baịbụl? Ọ bụrụgodị na onye ahụ anaghị ekwe ka gị na ya mụọ Baịbụl n’oge gara aga, ihe nwere ike gbanwee. Ọ ga-adị mma ka ị gwa ya ọzọ ka gị na ya mụwa Baịbụl.

Mee Ihe A n’Ọnwa A:

Dee aha ndị ị chọrọ ịna-ewegara magazin n’ọnwa ọ bụla n’akwụkwọ ma gbalịa wegara ha ndị nke ọhụrụ. I nyechaa ha ya, gwa ha na ị ga-ewetara ha nke ọnwa ọzọ.