Anyị Pụrụ Ịrụ Ọrụ Ka Ukwuu
1 E ji ọrụ ndị dị ịrịba ama mara ozi Jisọs Kraịst. O nyere ọtụtụ puku mmadụ ihe oriri, gwọọ ọtụtụ ndị ọrịa, ma kpọlite ụfọdụ n’ọnwụ n’ụzọ ọrụ ebube. (Mat. 8:1-17; 14:14-21; Jọn 11:38-44) Ọrụ ya dọtara mmasị nke mba dum. Ma, n’uhuruchi ikpeazụ ahụ tupu ọ nwụọ, ọ gwara ụmụazụ ya na-ekwesị ntụkwasị obi, sị: “Onye na-ekwere na Mụ, ọrụ Mụ onwe m na-arụ ka onye ahụ ga-arụkwa; ọrụ ka ndị a ukwuu ka ọ ga-arụkwa.” (Jọn 14:12) Olee otú anyị pụrụ isi rụọ ọrụ ‘ka ukwuu’?
2 Site n’Ịrụzu Ókèala Ka Ukwuu: Jisọs rụrụ ọrụ nanị na Palestine, ma a gwara ndị na-eso ụzọ ya nke oge gboo ka ha gbaa àmà ‘ruo ebe ụwa sọtụrụ,’ karịa nnọọ ebe Jisọs n’onwe ya mere nkwusa. (Ọrụ 1:8) Ọrụ nkwusa ọ malitere agazuola ụwa nile ugbu a, na-eru ala 232. (Mat. 24:14) Ị̀ na-ekere òkè zuru ezu n’ịrụ ókèala e kenyere ọgbakọ unu?
3 Site n’Ijekwuru Ọtụtụ Ndị Karị: Jisọs hapụrụ mmadụ ole na ole bụ́ ndị na-eso ụzọ ịga n’ihu n’ọrụ ime nkwusa ahụ. Otú ọ dị, n’ihi àmà ha ji ịnụ n’ọkụ n’obi gbaa na Pentikọst 33 O.A., ihe dị ka puku mmadụ atọ natara eziokwu ahụ, e meekwa ha baptism. (Ọrụ 2:1-11, 37-41) Nchịkọta nke “ndị e doro ịnata ndụ ebighị ebi” agawo n’ihu ruo n’oge anyị, mgbe anyị na-eme nkezi nke ihe karịrị mmadụ 1,000 baptism n’otu ụbọchị. (Ọrụ 13:48) Ị̀ na-eme ihe nile i nwere ike ime iji jekwuru ndị nwere obi eziokwu n’ebe ọ bụla a pụrụ ịchọta ha na isochi mmasị a chọtara ozugbo o kwere mee?
4 Site n’ime Nkwusa Ruo Ogologo Oge Ka Ukwuu: Ozi elu ala Jisọs dịruru nanị afọ atọ na ọkara. Ihe ka n’ọnụ ọgụgụ n’ime anyị anọwo na-eme nkwusa ruo ogologo oge karịrị nke ahụ. N’agbanyeghị ogologo oge a ga-ekwe ka anyị gaa n’ihu n’ọrụ a, anyị nwere ekele inyere onye ọhụrụ ọ bụla na-eso ụzọ aka ịbanye n’ụzọ ahụ na-eduga ná ndụ. (Mat. 7:14) Ị̀ na-arụbiga ọrụ Onyenwe anyị ókè kwa ọnwa?—1 Kọr. 15:58.
5 Anyị pụrụ ịnọgide na-enwe obi ike na site ná nkwado Jisọs, anyị ka ga-arụ ọrụ ka ukwuu dị ka ezi ndị na-eso ụzọ ya.—Mat. 28:19, 20.