Chọpụta Ndị Kwesịrị Ekwesị
1. Olee otú anyị si egosi na anyị ji ihe ùgwù ikwusa ozi ọma kpọrọ ihe?
1 Mgbe Jizọs na-ekwusa ozi ọma, ọ gbara ezigbo mbọ zie ndị dị umeala n’obi ozi ọma ga-akasi ha obi. (Aịza. 61:1, 2) Ebe anyị bụ ndị nnọchiteanya nọ n’ọnọdụ Kraịst, anyịnwa taa nwere ihe ùgwù iṅomi Kraịst ka anyị na-agba ezigbo mbọ ma jiri nlezianya na-achọpụta ndị kwesịrị ekwesị nọ n’ókèala anyị.—Mat. 10:11; 2 Kọr. 5:20.
2. Olee otú Pọl si gosi na ọ dị mkpa ịga ebe a ga-ahụ ndị mmadụ, gịnịkwa ka nke a rụpụtara?
2 Gaa Ebe A Ga-enweta Ndị Mmadụ: Ebe Pọl onyeozi na-agakarị ekwusara ndị Juu na ndị na-eso ụzọ ndị Juu ozi ọma bụ n’ụlọ nzukọ ha. (Ọrụ 14:1) Na Filipaị, ya na Saịlas gara chọọ ndị ha ga-ezi ozi ọma ‘n’ebe ha chere na e nwere ebe a na-ekpe ekpere.’ Ha ziri ụmụ nwaanyị gbakọrọ n’ebe ahụ ozi ọma, otu onye n’ime ha bụ́ Lidia nabatakwara eziokwu ahụ n’egbughị oge.—Ọrụ 16:12-15.
3. Olee ebe ndị ọzọ anyị nwere ike ịga kwusaa ozi ọma ma e wezụga ịga ozi ụlọ n’ụlọ?
3 E wezụga ịga ozi ọma ụlọ n’ụlọ, ì nwere ike zie ndị mmadụ ozi ọma n’ọdụ ụgbọala, n’ebe a na-anọ atụrụ ndụ, n’ebe a na-ewe ndị mmadụ n’ọrụ, n’okporo ámá ndị na-ekwo ekwo, nakwa n’ụlọ ahịa ndị dị n’ókèala unu? I nwedịrị ike isi na telefon ma ọ bụ jiri akwụkwọ ozi zie ndị bi n’ụlọ ndị e nwere ndị nche na ụlọ ndị a na-adịghị ekwekarị ka ndị mmadụ bata ozi ọma. Ọ bụrụ na anya na-eru anyị ala, anyị ana-agakwa n’ebe a ga-enweta ndị mmadụ n’ókèala anyị, anyị ga-enwe ‘ọtụtụ ihe anyị na-arụ mgbe niile n’ọrụ Onyenwe anyị.’—1 Kọr. 15:58.
4. Olee ohere ndị ọzọ anyị nwere ma ọ bụrụ na ókèala ọgbakọ anyị ebughị ibu?
4 Ọtụtụ ndị nkwusa agafeela ọgbakọ ọzọ dị n’obodo ha ma ọ bụ n’obodo ọzọ iji nwetakwuo ndị ha ga-ekwusara ozi ọma. Ndị ọzọ amụọla asụsụ ọhụrụ iji nwee ike ikwusara ndị si obodo ọzọ kwabata n’obodo ha ozi ọma.
5. Olee otú anyị kwesịrị isi na-ele oge anyị a anya, oleekwa ihe anyị kwesịrị ikpebi ime?
5 Anyị niile kwesịrị iburu n’obi na “ubi ahụ bụ ụwa.” (Mat. 9:37; 13:38) N’ihi otú ọgwụgwụ ụwa ọjọọ a si jiri ọsọ na-abịa, onye ọ bụla n’ime anyị kwesịrị ichebara ọnọdụ ya echiche nke ọma, mara ihe ọ ga-emeli, ohere o nwere na otú o nwere ike isi wepụtakwuo oge maka ozi ọma. Jehova na-ekwe anyị nkwa na ọ bụrụ na anyị ebute ihe ndị metụtara Alaeze ya ụzọ ná ndụ anyị, na ya ga-agọzi mgbalị niile anyị ji ezi obi na-eme iji hụ na anyị tinyekwuru oge n’ije ozi ọma.—Mat. 6:33.