No Kasano a Maliklikanyo ti Agladingit no Agbakasionkayo

PANAGBABAKASION​—aniat’ mapanunotyo? Panagrelaks kadagiti nainar nga aplaya, nga aduan iti manglinong a puon ti niog? Wenno mapanunotyo ti makapabang-ar a pananglang-ab iti nalamiis, nadalus nga angin iti bantay?

Ngem, nalabit madanagankayo maipapan iti posible a dakes a paniempo, pannakaitantan ti biahe iti eroplano, panagulaw gapu iti biahe, ken dadduma pay. Aniaman ti pampanunotenyo, ania ti maaramidanyo tapno makaparagsak la ketdi ti panagbakasionyo?

Agsaganakay a Naimbag

Agplano a nasakbay dagiti masirib a bakasionista. Manggun-odda kadagiti dokumento maipapan iti panagbiahe ken salun-at tapno naurnosen dagitoy inton mangrugi ti panagbiaheda. Ti panagdamag maipapan kadagiti nalabit mapasaran a pagpeligruan ti salun-at ti tumulong kadakuada nga agdesision no ania a panglapped nga agas ti itugotda.

Kas panagsagana iti panagbiahe kadagiti lugar a nasaknap ti malaria, adu ti mangrugin nga agtomar iti kontra malaria sumagmamano nga aldaw sakbay ti ipapanawda. Ngem kas pangsaluad, masansan a maibalakad nga itultuloyda ti agtomar iti kasta iti unos ti panagbakasionda ken uray pay sumagmamano a lawas kalpasanna. Ngamin, agpessa dagiti parasito ti malaria iti bagi iti kasta a kapaut. Ngem nasken ti dadduma pay a pangsaluad.

Ibalakad ni Dr. Paul Clarke iti London School of Hygiene and Tropical Medicine: “Napateg amin dagiti insect repellant a mayapros iti kudil wenno pungupunguan, ken bedbed iti palaypalay nga addaan iti pangontra iti insekto, moskitero, ken ti de-koriente nga insecticide vapouriser.” Masansan a nasaysayaat no magatangen dagiti alikamen a kas kadagitoy sakbay nga agbakasionkayo.

Ti panagulaw gapu iti biahe pagbalinenna a di makaay-ayo ti panagdaliasat. Aniat’ pakaigapuanna? Kuna ti maysa a managsirarak a ti panagulaw gapu iti biahe ket rumsua no napno unay ti utek iti adu a kabbaro a senial nga aggapu iti di nakairuaman a lugar. No ti panaggaraw ti barko, panagdayyeg ti eroplano, wenno ti ungor ti makina ti kotseyo ti pakaigapuan daytoy a parikut, padasenyo nga iturong ti atensionyo iti natalna, nalabit iti pagtugmokan ti langit ken daga wenno iti unaan ti kalsada. Ti nasayaat a bentilasion ket mangipaayto iti kasapulan unay nga oksiheno. Kadagiti nakaro a kasasaad ti panagulaw iti panagbiahe, nalabit makatulong ti agas nga antihistamine tapno maep-ep dagiti sintoma. Ngem adtoy ti maysa a pakdaar: Agannadkayo kadagiti mabalin a pagdaksanna, kas iti panagtuglep, yantangay iti sidong ti sumagmamano a kasasaad, dagitoy ti mamagpeligro iti kinatalgedyo.

Dagiti napaut a biahe iti eroplano adda met pagdaksanna iti salun-at, kas iti pannakaugot. Para iti dadduma, ti di panagkutikuti ken makapabetted a panagtugaw iti napaut nga oras ti mangdegdeg iti peggad nga agbalay ti dara iti gurong. No sumalpot ti nagbalay ket makadanon iti bara wenno puso, nangnangruna a napeggad dagiti ibungana. Gapuna, kadagiti napaut a panagbiahe iti eroplano, dadduma ti agehersisio babaen ti pannagnada iti aisle, wenno babaen ti panangunnat kadagiti masel ti patong ken gurong bayat a nakatugaw. Ket tapno maksayan ti pannakaugot, uminumka iti adu a saan a de-alkohol.

Gapu kadi kadagiti nadakamat ket pagamkanyon ti ageroplano? No kasta, mabalin a mabang-arankay a makaammo a natalged ti ageroplano. Naipadamag a 500 a daras a nataltalged ngem iti panagmotorsiklo ken 20 a daras a nataltalged ngem iti panagbiahe babaen iti kotse! Ngem, dagiti dadduma, ibagadanto a dagita nga estadistika ket naibasar iti panangidilig iti milia ti panagbiahe ken saan nga iti oras a nabusbos kabayatan ti biahe iti man tangatang wenno takdang.

Ti panagbiahe a kaduayo dagiti ubbingyo ket espesial a karit. “Planuenyo a naimbag ti panagbiaheyo a kaslattay kampania ti militar,” isingasing ti brodkaster a ni Kathy Arnold. Ket uray no saanyo a mataming a kas iti dayta, mangitugotkayo kadagiti libro, ay-ayam, wenno dadduma a banag a mangallukoy iti atension ti ubbing. Daytoy ti mamagbalin nga ad-adda a makaay-ayo ti panagbakasion ti intero a pamilia.

Inton Sumangpetkayo

‘Uppat wenno lima nga aldawak nga agrelaks sakbay a mangrugin a matagiragsakko ti bakasionko,’ kuna ti adu a bakasionista. Wen, kasapulan ti tiempo a makibagay iti baro nga aglawlaw. Mabalin a nainsiriban ngarud a dikay agap-apura iti umuna wenno maikadua nga aldaw kalpasan a simmangpetkayo. Palubosanyo ti bagi ken panunotyo a makibagay iti naiduma nga iskediul. Ti saanyo a panangaramid iti daytoy ti mangpasikor ken mangdadael iti naimbag nga ibunga koma ti panagbakasionyo.

Sigun iti maysa a pattapatta, agsagsagaba iti sumagmamano a kita ti sakit wenno pannakadangran ti di kumurang a kagudua iti sumagmamano gasut a milion a tattao iti intero a lubong nga agbakasion iti ballasiw taaw iti kada tawen. Gapuna, kas ilawlawag ti editor iti Travellers’ Health a ni Dr. Richard Dawood, “ti pananglapped ket naannad a pamay-an iti salun-at a rumbeng a di liwayan ti amin a biahero.” Yantangay ti bagi ti biahero ket kasapulan a makibagay iti nadumaduma a kita ti bakteria iti atmospera, taraon, ken danum, nangnangruna a napateg nga annadanyo ti kanenyo kabayatan ti umuna a sumagmamano nga aldaw.

“Di rumbeng nga ipagarup a natalged ti taraon,” mamakdaar ni Dr. Dawood, “malaksid no ammoyo a kalluto ken naluto a naimbag (naipapudot a naimbag)​—no maipapan iti karne, agingga nga awanen ti makita a nalabaga a pasetna.” Kaskasdi, saanyo a masigurado a natalged uray ti napudot a taraon. Isu a “siertuenyo a ti pangngaldawyo ita ket saan a daydi pinangrabiiyo idi kalman, a saan a basta naipapudot, ken sabali laeng manen ti rekadona.”

No kasta, no agbakbakasionkayo iti lugar a talaga a naiduma iti pagnanaedanyo, mabalin a dikay kanayon a makapangan iti eksakto nga oras, lugar, ken ti kayatyo a taraon. Ngem sigurado a saanyo unay a pakaikapisan daytoy no idilig iti maliklikanyo a panagtakki a naipadamag a nangapektar iti dua a kakalima iti amin nga agbiahe iti ballasiw taaw.

No maipapan iti inumen, masansan a nataltalged ti naibotelia a danum ngem ti magun-odan iti lugar. Ngem tapno maliklikanyo dagiti problema, nainsiriban no malukatan iti imatangyo ti naibotelia ken de-lata nga inumen. Mabalin a nainsiriban met a dikay naynayonan iti yelo. Kanayon a matmatanyo a posible nga adda makadangran malaksid no ammoyo a natalged dayta.

Dagiti Napateg a Banag a Maitutop iti Makaparagsak a Bakasion

Kalpasan ti panangsurbeyna kadagiti agbasbasa iti isursuratna, impadamag ti maysa nga editor iti panagbiahe: “Sigun iti surbey, napateg ti paniempo iti naballigi wenno saan unay a naballigi a panagbakasionyo, ngem napatpateg nga amang dagiti kakaduayo nga agbakasion.” Kinapudnona, “dagiti nasayaat a kakadua” ti nadakamat a makatulong iti makaparagsak a bakasion “nga ad-adda ngem iti hotel a naannayas ti pannakaimaneharna, naballigi a biahe, naimas a taraon, ken dagiti makapainteres a buyaen.”

Ngem pakasarakanyo kadagiti nasayaat a baro a gagayyem no agbakasionkayo? Bueno, ti maysa a panangaramid iti dayta ket babaen ti panagsurat a nasaksakbay iti opisina ti Watch Tower Society a mangay-aywan iti pagilian a planoyo a pagbakasionan. Mangipaayda kadagiti direksion ti Kingdom Hall dagiti Saksi ni Jehova a kaasitgan iti lugar a papananyonto agraman ti oras dagiti gimong sadiay. Ti sumagmamano a direksion kadagitoy nga opisina ket masarakan iti panid 5 daytoy a magasin, ket ti at-atiddog a listaan ket masarakan iti kabaruan a Yearbook dagiti Saksi ni Jehova.

Ti napateg a paset ti panangtagiragsakyo iti bakasionyo ken maigiddato iti dayta ti panangliklik kadagiti pagbabbabawyanyonto ket ti panangipangag iti nainsiriban a balakad ti Biblia: “Dikay paiyaw-awan. Dagiti dakes a pannakitimpuyog dadaelenda dagiti makagunggona nga ug-ugali.” (1 Corinto 15:33) No agannayaskayo a di mangikankano kadagiti Nakristianuan a pagalagadan ken aramid bayat iti kaaddayo iti adayo a pagbakasionan, nainsiriban a matmatanyo dayta kas pagkapuyan ket kiddawenyo ti nadiosan a tulong tapno maparmekyo dayta a tarigagay. Kasapulan met nga asikasuen dagiti nagannak ti ar-aramiden dagiti annakda. Laglagipenyo a dagitoy “dagiti napeggad a tiempo a narigat a pakilangenan” sadinoman ti ayanyo.​—1 Timoteo 3:1.

No agbakasionkayo a sangapamiliaan, dikay ipagarup a ni Nanang ti mangaramidto iti normal nga ar-aramidenna iti pagtaenganyo. Situtulokkay koma a tumulong kadagiti inaldaw a trabaho. Makikooperarkayo. Ti kasta a kababalin dakkel unay ti maitulongna iti panangtagiragsak dagiti amin iti bakasion.

Naragsakto kadi ti bakasionyo? Sigurado a nagsayaatto a kapadasan ti ipalagip ti sumagmamano a siaannad ti pannakapilida a retrato, postcard, ken pakalaglagipan, nalabit uray ti sumagmamano a produkto iti lugar. Ngem sigurado a dagiti kabbaro a gagayyem ti nangnangrunanto a nakalalagip. Taginayonenyo ti pannakikomunikaryo kadakuada. Agsisinnuratkayo tapno makapagpipinnaregtakayo kadagiti makapainteres a kapadasan. Nagadu ti wagas a maaramidanyo tapno mapagbalinyo ti panagbakasionyo nga agpayso a makaparagsak.

[Kahon iti panid 17]

Sumagmamano a Palagip no Agbakasionkayo

Sakbay a pumanawkayo

• Gun-odenyo ti amin a kasapulan a dokumento iti panagbiahe ken salun-at

• Agabastokayo kadagiti pangsaluad nga agas

Kabayatan ti panagbiahe

• Uminumkayo iti adu a pluido a saan a de-alkohol, ken agehersisiokayo no napaut ti panageroplanoyo

• Mangitugotkayo iti makapainteres a babasaen dagiti ubbing nga annakyo

Inton sumangpetkayo

• Ikkanyo ti panawen a makibagay ti bagi ken panunotyo

• Siertuenyo a ti taraon ken inumenyo ket natalged

• Taginayonenyo ti nasayaat a kababalinyo

• Tumulongkayo iti inaldaw a trabaho a kadua ti dadduma a miembro ti pamilia

[Ladawan iti panid 16]

No agbakasionkayo, annadanyo dagiti pakilangenanyo