Dagiti Piramid iti Mexico
BABAEN TI KORESPONSAL TI AGRIINGKAYO! IDIAY MEXICO
AMMO ti kaaduan a tattao itatta dagiti piramid iti Egipto. Idiay America, nakasarak met dagiti arkeologo kadagiti estruktura a kaasping ti piramid, nangnangruna ditoy Mexico. Kas kadagiti piramid idiay Egipto, nagpauten ti adu a siglo dagiti piramid ditoy Mexico ken nakaad-adu ti misterioda.
Ti maysa a piramid idiay Egipto ket tanem a nakubong iti dakkel nga agpapada ti sikiganna a nakabite a batbato. Adda dagiti makin-uneg a dalan nga agturong iti tanem, ti kapatgan a paset ti piramid. Nupay kasta, ti piramid ti Mexico ket adu a nakabite a daga nga addaan iti templo iti tuktokna ken addaan makinruar nga agdan tapno makapanka iti tuktok. Malaksid iti sumagmamano, saan a tanem dagiti piramid a nasarakan idiay America.
Teotihuacán—“Ti Siudad Dagiti Didios”
Ti Teotihuacán ti maysa kadagiti naisangsangayan unay a lugar dagiti piramid ditoy Mexico. Masarakan dayta iti agarup 50 a kilometro iti amianan a daya ti Mexico City. Ti Teotihuacán ket misterio pay laeng kadagiti antropologo ken arkeologo. Daytoy a kadaanan a siudad ket binaybay-an dagiti nagibangon nasurok a 500 a tawenen ti napalabas sakbay a timmaud ti kultura dagiti Aztec. “Siudad Dagiti Didios” wenno “Lugar a Pagbalinan Dagiti Tattao a Didios” ti kaipapanan ti nagan a Teotihuacán, a naggapu iti lenguahe a Nahuatl. Naipagarup a pinanaganan dagiti Aztec ti siudad idi binisitada dayta.
Inlawlawag ti maysa kadagiti editor ti magasin a National Geographic a ni George Stuart a ti “Teotihuacan ti immuna nga agpaypayso a sentro ti siudad iti Western Hemisphere . . . Timmaud dayta idi agarup pangrugian ti panawen Kristiano, nagpaut iti pito a siglo, kalpasanna nagbalin laengen a paset iti pakasaritaan ti kultura. Idi kangitingitan ti irarang-ayna, idi agarup A.D. 500, napattapatta nga addaan iti populasion a nagbaetan ti 125,000 ken 200,000 a tattao.”
Iti dandani sentro ti siudad adda dakkel a Piramid ti Init. Agarup 220 a metro por 225 a metro ti pamuonna, ket ti lima a tukad agpangato agingga iti agarup 63 a metro. Tapno makapan ti maysa a tao iti tuktok ti piramid, masapul nga ulienna ti nasurok a 240 a tukad. Iti amianan ti kadaanan a siudad, adda Piramid ti Bulan a ti tuktokna ket 40 a metro ti kangatona. Adda idi dagiti templo iti tuktok dagitoy a dua a kangrunaan a piramid.
Kadagiti kallabes a dekada, adun ti naammuan maipapan kadagitoy a piramid. Nupay kasta, kas kuna ni Stuart, “awan pay laeng ti naammuantayo maipapan iti naggapuan dagiti Teotihuacano, no ania ti lenguaheda, no kasano a naorganisar ti kagimonganda, ken no ania ti nakaigapuan ti pannakarbekda.”
Dadduma a Lugar ti Piramid
Iti tengnga a mismo ti Siudad ti Mexico, masarungkaran ti maysa a tao ti Kangrunaan a Templo Dagiti Aztec. Nupay awan ti makita a piramid, makita pay laeng dagiti rebbek ti piramid a nagsaadan ti Kangrunaan a Templo. Natakuatan dagiti arkeologo ti dua nga altar a pakaidatdatonan idi dagiti tattao.
Ti Chichén Itzá ti maysa kadagiti kanayon a masarungkaran a lugar dagiti piramid ditoy Mexico. Adu dagiti kadaanan a rebbek idiay rehion dagiti Maya, ngem dagitoy ti nalaka a madanon agsipud ta asidegda iti siudad ti Mérida idiay Yucatán. Nupay naibangon iti teritoria dagiti Maya, ipakita dagiti patakder nga adda idi dakkel nga impluensia dagiti Toltec kadagitoy a rehion. Ipamatmat ti dadduma a patakder a dagiti nagibangon adda adelantado unay a pannakaammoda iti matematika ken astronomia.
Idiay Palenque, makita dagiti sangaili ti nakaskasdaaw a patakder dagiti Maya a napalawlawan iti kabakiran ti Chiapas. Karaman iti adu a piramid ken patakder ti Palasio ken ti Templo Dagiti Inskripsion. Ti Templo Dagiti Inskripsion “ti maysa kadagiti kalatakan a templo iti intero a Mesoamerica agsipud ta saan laeng a nagsaadan dayta ti maysa a templo a kas ti amin a sabsabali, no di ket maysa a monumento a tanem,” kuna ti libro a The Mayas—3000 Years of Civilization. “Iti uneg, adda agdan nga immarko ti linongna nga agturong iti kadaegan a siled a pagitaneman a masarakan iti lugar dagiti Maya.” Naibangon ti tanem para iti maysa a gobernador a nagbiag idi maikapito a siglo—ni Pacal, wenno Uoxoc Ahau.
Dagitoy ti sumagmamano laeng kadagiti piramid ti Mexico. Masarakan ti dadduma pay a rebbek ken piramid iti adu a lugar iti intero a pagilian. Addada met dadakkel a piramid idiay Guatemala ken Honduras. Ipakita amin dagitoy a kadaanan nga estruktura a kayat dagiti agnanaed idi idiay Mesoamerica dagiti nangatngato a lugar a pagibangonan kadagiti pagdaydayawanda. Insurat ni Walter Krickeberg, autor ti libro a Las Antiguas Culturas Mexicanas: “Ti kustombre a panagibangon kadagiti templo a natukadtukad ti pamuonna ket naibatay iti kadaanan a panagdayaw iti kangatuan.” Kunana pay: “Nupay ibilangtayo ti langit a kas ‘immarko a linong,’ iti dadduma a tattao irepresentarna ti maysa a bantay a leggakan ti init no agsapa ken lennekanna iti rabii; ngarud, adda tukad dagiti bakrasna a kas iti nagdakkel a patakder. Iti kasta, ti ‘artipisial a bantay’ . . . ket naaramid a natukadtukad a piramid ken, pinagbalin ti adu a tattao iti Mesoamerica a simbolo ti langit, sigun kadagiti sariugma ken kustombre.”
Mabalin nga ipalagip daytoy a kapanunotan kadagiti estudiante ti Biblia no ania ti salaysayen ti Biblia maipapan iti Torre ti Babel, a masarakan iti siudad a naammuan idi agangay a kas Babilonia. Kuna ti Genesis 11:4 (NW) maipapan kadagiti nangibangon iti daytoy a torre: “Kinunada ita: ‘Umaykayo! Ibangonantayo ti bagbagitayo ti maysa a siudad ken kasta met ti maysa a torre a ti tuktokna dumanon iti langlangit, ket mangaramidtayo iti agdindinamag a nagan maipaay iti bagbagitayo.’” Iti asideg ti rebbek ti Babilonia, nakasarak dagiti arkeologo kadagiti patakder a piramid a naawagan ziggurat.
Nagsaknap ti porma ti panagdayaw a naggapu idiay Babilonia iti adu a paset ti lubong, a mabalin a nakadanon iti rehion a naammuan a Mexico. Saan ngarud a nakaskasdaaw no dagiti ziggurat iti Babilonia agraman ti relihion a naannurot sadiay ket dagiti immun-una a modelo dagiti misterioso ken nakaskasdaaw a piramid ti Mexico.
[Ladawan iti panid 16]
Teotihuacán
[Credit Line]
CNCA.-INAH.-MEX Reproducción Autorizada por el Instituto Nacional de Antropología e Historia
[Ladawan iti panid 17]
Palenque