Panangmatmat iti Lubong
“Dandani 50% kadagiti kanser a madaydayagnos idiay [United Kingdom] iti kada tawen—agdagup iti nasurok a 130,000—ket gapu kadagiti maliklikan nga aramid a pakairamanan ti panagsigarilio, iyiinum ken pannangan kadagiti di mayanatup.”—BBC NEWS, BRITAIN.
“Ti organisasion dagiti kriminal ket nakasaksaknap ti ilegal a pananginegosioda kadagiti paset ti bagi dagiti atap nga ayup ken sumiksikap dagiti pamay-anda. Gapu iti dayta, bimmassit unayen ti bilang dagiti kita ti parsua a maipatpateg unay iti lubong . . . iti kakaro nga awan pay kapadana.”—WILDLIFE CONSERVATION SOCIETY, U.S.A.
Dagidiay inaldaw nga agbuya iti TV iti average nga 6 nga oras ket mainanama nga 4.8 a tawen nga ab-ababa ti biagda ngem dagidiay saan nga agbuybuya iti TV. Iti sabali a pannao, iti kada oras a nakatugaw lattan ti maysa nga adulto nga agbuybuya iti TV, agarup 22 a minuto ti maikissay iti kapaut ti biagna.—BRITISH JOURNAL OF SPORTS MEDICINE, BRITAIN.
Idiay Germany, nasurok a 90% kadagiti babbai a nadayagnos nga adda Down syndrome ti sikogda ti mangiked-deng nga agparegreg.—DER TAGESSPIEGEL, GERMANY.
Ad-adda a Makapa-stress ti Agbiag iti Siudad
Ipakita dagiti panagsukimat a “dagiti agnanaed iti siudad ket narangranggas ti reaksionda iti stress ngem kadagiti agindeg kadagiti babassit nga ili,” kuna ti Polish a magasin a Przekrój. “Nakaad-adu ti pakaigapuan ti stress kadagiti siudad,” inlawlawag ni Mieczysław Jaskulski a psychotherapist iti Psychoeducation Laboratory idiay Warsaw. “No idilig kadagiti agnanaed iti babassit nga ili, 21% a dakdakkel ti posibilidad a makapasar dagiti taga-siudad iti anxiety disorder (nakaro a panagdanag nga agtultuloy uray no awanen ti makagapu), ken 39% iti mood disorder (nakaro a kinaliday ken kinaawan interes kadagiti inaldaw nga aktibidad).” Ania dagiti makatulong kadagiti agnanaed iti siudad? “Dimo pakaringgoran dagiti bambanag a dimo kontrolado,” “dimon pakasikoran ti trabahom no nakaawidkan,” “agpagnapagnaka,” ken “dika maamak nga agbakasion,” insingasing ti Przekrój.
Kasano Kaadu nga Impormasion ti Iduldulin ti Facebook?
Kayat a maammuan ti maysa a taga-Austria nga estudiante iti abogasia no kasano kaadu nga impormasion maipapan kenkuana ti nakadulin iti kadakkelan a social network iti lubong bayat ti tallo a tawen a pannakimiembrona, isu a nagkiddaw iti kopia. Pinatulodan ti Facebook iti CD a naglaon iti 1,222 a panid nga impormasion. Kas impadamag ti German a diario a Der Tagesspiegel, kinuna ti estudiante: “Nakadulin amin—tunggal message, tunggal chat, agraman dagiti sensitibo nga impormasion maipapan iti gagayyem.” Karaman kadagita ti impormasion a ti panagkunana ket sigurado nga inikkatnan!