Dagiti Nagturpos nga Estudiante iti Sao ti Dios
KAS panangtulad kadagiti Kristiano idi umuna a siglo, agdindinamag dagiti Saksi ni Jehova iti sangalubongan gapu iti panangasabada iti binalaybalay. Naipaganetget daytoy a trabaho iti panglukat a sasao iti programa ti panagturpos ti maika-102 a klase ti Watchtower Bible School of Gilead.
Idi Marso 1, 1997, ni Albert Schroeder, miembro ti Bagi a Manarawidwid dagiti Saksi ni Jehova, inturongna ti atension iti nabiit pay nga artikulo ti Pranses a pagiwarnak a Le Point. Dinakamat ti pagiwarnak ti plano ti [Iglesia] Romana Katolika nga irusat ti panangasaba iti binalaybalay idiay Italia. “Tapno saan a sumangpet nga ima-ima [dagiti misionero ti Vaticano] a makikompetensia iti teritoria dagiti Saksi ni Jehova,” kinuna ti artikulo, “nagpaimprenta pay ti Vaticano iti maysa a milion a kopia ti Ebanghelio ni San Marcos, tangay maipasango dagiti pannakabagida kadagiti eksperto [dagiti Saksi] iti ‘panangipaima’ iti naimbag a sao iti binalaybalay.”
Dagiti 48 a nagturpos karamanda kadagidiay nangtulad kadagiti nagsayaat a wagas ti panangasaba ni Jesus iti panangisaknap iti Sao ti Dios. Naggapuda iti walo a daga a nagturong iti Watchtower Educational Center idiay Patterson, New York. Bayat ti lima a bulan a panagadalda, inadalda ti intero a Biblia. Nairaman met iti kursoda ti pakasaritaan ti organisasion ti Dios, dagiti praktikal nga aspeto ti biag ti misionero, ken dagiti bunga ti espiritu ti Dios. Maymaysa ti panggep amin daytoy—tapno isagana ida nga agserbi kas misionero iti 17 a pagilian a pakaibaonanda. Iti panagturposda, adda 5,015 a timmabuno a naggapu iti nadumaduma a pagilian a nakipagrag-o iti daytoy nga okasion. Ania a maudi a praktikal a balakad ti inawat dagidiay nga estudiante ti Gilead?
Naintiempuan a Pammaregta Kadagiti Baro a Misionero
Kalpasan ti panglukat a sasao ti tserman, ni Ralph Walls, katulongan ti Personnel Committee ti Bagi a Manarawidwid, impaayna ti umuna nga ababa a palawag a naglaon iti praktikal a pammagbaga kadagiti baro a misionero. Ti temana ket “Diyo Liplipatan ti Agayat.” Impakitana nga impadto ti Biblia, iti 2 Timoteo kapitulo 3, a ti lubong kumaro ti kinaawan ayatna. Impaayna daytoy naintiempuan a pammalagip kadagiti baro a misionero, maitunos iti pannakailadawan ti ayat iti 1 Corinto 13:1-7: “Dakayo, kas misionero, mabalin a malab-awanyo ti makalikaguman nga orasyo. Mabalin nga adu ti naammuanyo iti panagsanayyo iti Gilead. Wenno mabalin a siaanep nga agtrabahotayo iti adu nga oras kadagiti annongentayo iti sanga. Ngem awan mamaay amin a panagbannog ken panagsakripisiotayo no lipatentayo ti agayat.”
Ti simmaruno iti programa isu ni Carey Barber, iti Bagi a Manarawidwid, a nangilawlawag iti tema a “Ni Jehova Iturturongnatayo iti Balligi.” Nanipud iti nanumo a panangrugida kalpasan ti Gubat Sangalubongan I, ni Jehova a Dios pinagballigina dagiti matalek nga adipenna a mangiwaragawag iti naimbag a damag ti Pagarianna, nupay maidaddadanesda. Idi 1931 dagiti Estudiante ti Biblia, kas awag kadakuada idi, inawatda ti nagan a Saksi ni Jehova, a nangpaluksaw iti klero ti Kakristianuan. “Ti maika-102 a klase dagiti misionero a nasanay iti Gilead addaanda itan iti nagsayaat a pribilehio a makiraman a naan-anay iti nadayag a trabaho a panangipaay iti adu a gundaway a mangammo iti dayta a sagrado a nagan,” kinuna ni Brother Barber. Nainayonda iti atiddog a listaan dagiti 7,131 a misionero a nasanay iti Eskuelaan ti Gilead ken nakatulong a nangisaknap iti panangikasaba iti Sao ti Dios manipud 54 a pagilian idi 1943 agingga iti 233 a pagilian itatta.
Ti simmaruno a nagpalawag, ni Lloyd Barry, miembro met ti Bagi a Manarawidwid, ket nagturpos iti maika-11 a klase ti Gilead ken nagserbi kas misionero idiay Japan iti nasurok a 25 a tawen. Nangipaay iti pammaregta iti temana nga “Agtalinaedkayo Kadagitoy a Bambanag.” “Dakkel a rag-o ti itden kadakayo ti panagibtur,” kinunana kadagiti estudiante. Ania ti magunggona iti panagibtur iti trabaho a panagmisionero wenno iti aniaman a teokratiko nga annongen? “Kangrunaan iti amin, ti panagibturtayo paragsakenna ti puso ni Jehova . . . Dakkel a pannakapnek ti itden ti panagtalinaed a natarnaw iti sidong ti pannubok . . . Pagbalinenyo a bokasion iti biagyo ti panagserbi kas misionero . . . Ti gunggonayonto, makaparagsak a ‘nasayaat unay.’” (Mateo 25:21; Proverbio 27:11) Iti konklusion ti palawagna, naimpusuan nga inrekomenda ni Brother Barry a dagiti baro a misionero ‘agtalinaedda koma kadagitoy a bambanag,’ a determinadoda a pagbalinen ti kinamisionero kas mismo a biagda.—1 Timoteo 4:16.
“Ania ti Makitayo?” ti saludsod nga indatag ni Karl Adams, a nangisursuro iti adu a klase iti Gilead. Dinakamatna a ti makitanto dagiti misionero iti pakaidestinuanda agdepende saan laeng nga iti pisikal a panagkitada no di pay ket iti mata ti pusoda. (Efeso 1:18) Nayilustrar daytoy iti nakita dagiti Israelita nga espia idi siniimda ti Naikari a Daga. Amin dagiti 12 nga espia parepareho ti nakitada iti pisikal a panangmatmat, ngem dua laeng ti nakakita iti Naikari a Daga manipud iti panangmatmat ti Dios. Dagiti misionero mabalin nga agduduma met ti panangmatmatda kadagiti bambanag. Iti dadduma a daga a pagserbianda, mabalin a makitada ti kinapanglaw, panagsagaba, ken kinaawan namnama. Ngem saanda koma a maupay ken panawan ti daga a pakaibaonanda. Dinakamat ni Brother Adams ti maysa a misionera iti napalabas a klase a nagkuna: “Dagitoy a kapadasan impabigbigda kaniak a masapul nga agtalinaedak ditoy. Dagitoy a tattao kasapulanda ti namnama iti masanguanan. Kayatko a sumayaat ti biagda.” Iti konklusionna, pinaregta ni Brother Adams dagiti baro a misionero a matmatanda dagiti daga a pakaitudinganda kas luglugar a kayat ni Jehova a pagbalinen a paset ti sangalubongan a Paraisona ken matmatanda dagiti tattao sadiay kas manamnama a miembro ti baro a lubong a kagimongan.
Ti maudi a diskurso iti daytoy a paset ti programa ket impaay ni Wallace Liverance, nga adu a tawen a nagserbi kas misionero sakbay a nagbalin nga instruktor iti Gilead. “Agtignay a Buyogen ti Nauneg a Pannakaawat Kadagiti Nakaskasdaaw nga Aramid ti Dios” ti temana. Ti panagtignay a buyogen ti nauneg a pannakaawat ramanenna ti panagtignay a buyogen ti kinasirib, kinaannad, ken sentido komon. Saan nga inaramid dayta ni Ari Saul ti Israel.—1 Samuel 13:9-13; 15:1-22.
Ti maysa a pamay-an tapno makapagtignay a buyogen ti nauneg a pannakaawat ket babaen ti panangawat kadagiti karit ti pannakibagay iti baro a wagas ti panagbiag, a pakairamanan ti panagsursuro iti baro a pagsasao ken panangammo kadagiti tattao. Ti kapkapadasan dagiti misionero iti panangsango kadagiti karit ken panangparmek kadagiti tubeng mapabilegna ida iti naespirituan kas iti pannakapabileg da Josue ken Caleb idi sinakupda ti daga nga intuding ti Dios kadakuada.
Dagiti Interbiu
Ti simmaruno a paset ti programa ket nagsasaganad nga interbiu. Ininterbiu ni Harold Jackson ti registrar ken nabayagen nga instruktor iti Eskuelaan ti Gilead a ni Ulysses Glass, nga agtawen itan iti 85. Malaglagip dagiti adu a misionero nga adda pay laeng iti tay-ak dagiti tawen ti matalek a panangisuro ken panangsanayna. Simmaruno ni Mark Noumair, instruktor iti Gilead nga adu a tawen a nagserbi idiay Africa sakbay a naayaban a mangisuro iti Eskuelaan ti Gilead. Ininterbiuna dagiti estudiante maipapan iti ministerioda bayat ti lima a bulan a panageskuelada. Silalawag nga impakita dagiti kapadasanda nga adda dagiti tattao nga interesado iti Sao ti Dios iti lokal a teritoria.
Kalpasanna, kinasarita da Robert Ciranko ken Charles Molohan dagiti aduan kapadasan a lallaki nga agad-adal idi iti maysa pay nga eskuelaan iti pasilidad, eskuelaan a para kadagiti branch personnel. Binagbagaanda ti nagturpos a klase a nasken nga agbalinda a napakumbaba ken tumulongda a mamagtalinaed iti panagkaykaysa ti kongregasion. Insingasingda a dagiti nagturpos saanda koma nga agpanunot iti posible a mapasamak iti panagmisioneroda, no di ket basta awatenda ti aniaman a kasasaad a pakaipasanguanda. Ti panangyaplikar iti daytoy a balakad sigurado a tulonganna dagiti baro a misionero a mangtungpal iti annongenda kas mannursuro iti Sao ti Dios.
Kamaudiananna, ni Theodore Jaracz, a miembro ti Bagi a Manarawidwid, impalawagna ti tema nga “Ania ti Mangim-impluensia Kadagiti Siasino?” Inlawlawagna a no datayo a Kristiano ipakitatayo dagiti bunga ti espiritu, mabalin nga agbalintayo a naimbag nga impluensia kadagiti sabsabali. “Dagiti misionero nga imbaon ti organisasion ni Jehova nakaaramidda iti makomendaran a rekord gapu iti naimbag, naespirituan nga impluensiada kadagiti tattao,” kinunana. Sana dinakamat ti komento dagiti dadduma a natulongan nga agserbi iti Dios gapu iti nasayaat nga ulidan nga impakita dagiti misionero. “Sapay koma ta mantenerenyo ti reputasion a nagun-od ti ili ni Jehova ken itultuloyyo ti mamalaybalay kadagiti ganggannaet a pagilian a pakaidestinuanyo tapno biroken dagiti maikari . . . Kasta met, babaen ti nalinteg, nadalus a konduktayo, sarangtenyo ti espiritu daytoy a lubong, ket agbalinkayo a naimbag nga impluensia a pakaidayawan ken pakaitan-okan ni Jehova,” inggibusna.
Iti panagngudo ti programa, imbasa ti tserman dagiti kablaaw a naggapu iti asideg ken adayo sana inyawat dagiti diploma ken inyanunsio ti pakaidestinuan dagiti misionero. Kalpasanna, imbasa ti maysa kadagiti nagturpos ti resolusion ti klase kas panagyaman iti naipaay a pannursuro. Nalawag, ti programa ti panagturpos ti maika-102 a klase pinaregtana dagiti amin a timmabuno nga ad-adda a determinado nga umabante a mangipakaammo iti Sao ti Dios.
[Ladawan iti panid 31]
Ti Maika-102 a Nagturpos a Klase ti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ket nailista dagiti nagan manipud kannigid nga agpakannawan iti kada intar.
(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.