Maep-epen ti Bisin!
‘ANIA a bisin?’ nalabit maisaludsodyo. Panagbisin iti naespirituan a taraon! Maipapan iti daytoy a bisin, impadto ti maysa a Hebreo a propeta idi ugma: “‘Adtoy! Adda um-umayen nga al-aldaw,’ kuna ti Soberano nga Apo Jehova, ‘ket mangipagtengakto iti nakaro a bisin iti daga, maysa a nakaro a bisin, saan nga iti tinapay, ken waw, saan nga iti danum, no di ket iti panagdengngeg iti sasao ni Jehova.’” (Amos 8:11) Tapno makatulongda a mangep-ep iti naespirituan a bisin, dagiti 48 a kameng ti maika-112 a klase ti Watchtower Bible School of Gilead, a masarakan idiay Patterson, New York, ket maibaon iti 19 a nagduduma a pagilian iti 5 a kontinente ken kadagiti isla.
Saan a literal a karne wenno bukbukel ti idanonda no di ket ti pannakaammo, kapkapadasan, ken dagiti nasursuroda. Lima a bulan nga inadalda a naimbag ti Biblia tapno bumileg ti pammatida iti panagserbida kas misionero kadagiti sabali a pagilian. Idi Marso 9, 2002, naragsakan a dimngeg ti 5,554 a timmabuno iti programa ti panagturpos.
Ni Stephen Lett, nga agserserbi kas kameng ti Bagi a Manarawidwid dagiti Saksi ni Jehova, sigagagar a linuktanna ti programa. Inabrasana a nangnangruna dagiti adu a sangaili a naggapu iti nadumaduma a paset ti lubong. Kalpasanna, inyaplikarna ti sasao ni Jesus a, “Dakayo ti silaw ti lubong,” iti trabaho dagiti agbalin a misionero. (Mateo 5:14) Inlawlawagna: ‘Iti pakaibaonanyo, “pagsilnagenyo” ti nadumaduma nga aspeto dagiti nakaskasdaaw nga aramid ni Jehova tapno makita dagiti nasingpet panagpuspusoda a tattao ti kinaimnas ni Jehova ken dagiti panggepna.’ Indagadag ni Kabsat Lett kadagiti misionero nga usarenda ti silaw ti Sao ti Dios a mangibutaktak iti kinasipnget dagiti di umiso a doktrina ken mangiwanwan kadagiti agbirbirok iti kinapudno.
Nasken ti Umiso a Kababalin Tapno Agballigi
Kalpasan ti panglukat a sasao ti tserman, ni Baltasar Perla, a kameng ti Branch Committee iti Estados Unidos, ti nangipaay iti umuna kadagiti agsasaruno a palawag a nairanta a tumulong kadagiti nagturpos tapno naballigida a misionero. Impalawagna ti tema a “Bumileg ken Pumigsa ken Agtignaykayo.” (1 Cronicas 28:20) Ni Solomon nga ari ti nagkauna nga Israel ket naikkan iti narigat nga annongen a mangaramid iti banag a pulos a dina pay idi napadasan—mangbangon iti templo idiay Jerusalem. Nagtignay ni Solomon, ket iti tulong ni Jehova naileppas ti templo. No kasano nga agaplikar dayta kadagiti nagturpos, kinuna ni Kabsat Perla: ‘Nakaawatkayo iti baro nga annongen, ti panagbalinyo a misionero, ket masapul a bumilegkayo ken papigsaenyo ti nakemyo.’ Sigurado a naliwliwa dagiti estudiante iti pammatalged a saan ida a baybay-an ni Jehova no la ket ta agtalinaedda a nasinged kenkuana. Iti konklusionna, tinukay ni Kabsat Perla ti rikna dagiti timmabuno idi kinunana: ‘Adu ti nasayaat a maaramidanyo kas misionero. Dagiti misionero ti nangyeg iti kinapudno iti pamiliak!’
“Agpannuraykayo ken Jehova Tapno Agballigikayo.” Dayta ti tema ti palawag ni Samuel Herd, maysa pay a kameng ti Bagi a Manarawidwid. Agserbi dagiti estudiante kas misionero, ket ti panagballigida agpannuray unay iti relasionda ken Jehova. Binagbagaan ida ni Kabsat Herd: ‘Adu ti nasursuroyo iti Biblia babaen ti panagadalyo iti Gilead. Siraragsak nga umaw-awatkayo. Ngem ita, tapno pudpudno nga agballigikayo, masapul a rugianyo nga iburay dagiti nasursuroyo.’ (Aramid 20:35) Adu ti gundaway dagiti misionero a mangaramid iti daytoy bayat nga ‘iparukpokda ti bagbagida’ maigapu kadagiti sabsabali.—Filipos 2:17.
Ania a pammakada a balakad ti impaay dagiti instruktor kadagiti estudiante? Ni Mark Noumair imbatayna ti temana iti Ruth 3:18, “Agtugawka a Sitatalna Agingga a Maammuam No Anianto ti Pagbanagan ti Bambanag.” Babaen ti panangusarna iti pakasaritaan da Noemi ken Ruth, pinaregta ti ispiker dagiti nagturpos nga agtalekda a naan-anay kadagiti urnos nga impasdek ti organisasion ti Dios ditoy daga ken raemenda ti teokratiko nga autoridad. Tinukay ni Kabsat Noumair ti puso dagiti estudiante idi kinunana: ‘Nalabit adda dagiti tiempo a diyo maawatan no apay a naaramid ti maysa a pangngeddeng a mangapektar kadakayo wenno iti panagriknayo ket kastoy ken kasdiay ti pannakataming koma ti maysa a banag. Ania ngay ti aramidenyo? Tamingenyo kadi dagiti bambanag iti bukodyo a pamay-an wenno ‘agtugawkayo a sitatalna,’ nga agpannuraykayo iti panangiturong ti Dios, ket agtalekkayo nga iti naikeddeng a tiempo, agbanagto ti amin nga agpaay iti pagimbaganyo’? (Roma 8:28) Imbalakadna nga ‘ipamaysada ti panunotda iti panangidur-as iti intereses ti Pagarian, nga iturongda ti matada iti ar-aramiden ti organisasion ni Jehova imbes a kadagiti tattao.’ Awan duadua a napateg dayta a pammagbaga kadagiti misionero a maibaon kadagiti sabali a pagilian.
Ni Wallace Liverance, dati a misionero a mismo ken agserserbi itan kas instruktor iti Gilead, ti nangipaay iti maudi a diskurso iti umuna a serye dagiti palawag. Ti tema ti palawagna ket “Ipamaysayo ti Panunotyo, Itultuloyyo ti Panagserbiyo iti Dios.” Inlawlawagna nga ammo ni propeta Daniel nga asideg idin a mawayawayaan dagiti nakautibo nga Israelita idi naimatanganna ti pannakaparmek ti Babilonia ken kas impadto ni Jeremias. (Jeremias 25:11; Daniel 9:2) Ammo ni Daniel nga adda inkeddeng ni Jehova a panawen a pannakapasamak dagiti bambanag, ket nakatulong dayta kenkuana a mangipamaysa iti panunotna iti pannakatungpal ti panggep ti Dios. Iti kasumbangirna, kastoy ti ibagbaga dagiti Israelita idi kaaldawan ni propeta Haggeo: “Ti tiempo saan pay a dimteng.” (Haggeo 1:2) Inyaleng-alengda ti tiempo a pagbibiaganda, dagiti bukodda a pagnam-ayan ken pagragsakan ti pinanunotda, ken binaybay-anda ti trabaho a nakaigapuan ti pannakawayawayada idiay Babilonia, ti panangbangon manen iti templo. Ingngudo ni Kabsat Liverance: “Ngarud, ipamaysayo ti panunotyo babaen ti pananglaglagipyo a kankanayon iti panggep ni Jehova.”
Ti instruktor iti Gilead a ni Lawrence Bowen ti nagiwardas iti paset a natemaan iti “Bendisionan ni Jehova Dagidiay Agusar iti Nabiag a Saona.” (Hebreo 4:12) Daytoy a paset ket maipapan kadagiti kapadasan dagiti estudiante iti tay-ak, a nangitampok no kasano a bendisionan ni Jehova dagidiay mangusar iti Biblia iti panangasaba ken panangisuroda. Inlawlawag ni Kabsat Lawrence a nangipaay ni Jesu-Kristo iti nasayaat a pagwadan para kadagiti amin a ministro ti Dios: ‘Sipupudno a maikuna ni Jesus a saan a nagtaud kenkuana dagiti insurona, no di ket nagtaud iti Sao ti Dios.’ Dagiti nasingpet panagpuspusoda a tattao nailasinda ti kinapudno ket impangagda dayta. (Juan 7:16, 17) Pudno met dayta ita.
Ti Panagsanay iti Gilead Kabalanna ti Maysa nga Agaramid iti Naimbag
Kalpasanna, da Richard Abrahamson ken Patrick LaFranca, agpada a nabayagen a kameng ti pamilia ti Bethel, ininterbiuda ti innem a nagturpos iti Gilead nga agserserbi itan iti nadumaduma a benneg ti naisangsangayan nga amin-tiempo a serbisio. Naparegta dagiti nagturpos iti maika-112 a klase idi mangngegda a kalpasan ti adu a tawen, dagidiay nga innem, aniaman ti agdama nga annongenda, ket agtultuloy nga ipakpakatda ti nasursuroda iti Gilead mainaig iti panagadal iti Biblia, panagsukimat, ken pannakilangen kadagiti tattao.
Ni Theodore Jaracz, a kameng ti Bagi a Manarawidwid, ti nangipaay iti kangrunaan a diskurso iti programa. Napauluan dayta iti “No Ania ti Maibanag ti Panangibtur iti Ibubusor ni Satanas.” Iti lima a bulan a panagadalda, adda dagiti estudiante iti natalged ken teokratiko nga aglawlaw. Ngem kas nadakamat iti panagadalda, agbibiagtayo iti naranggas a lubong. Mabusbusor ti ili ni Jehova iti intero a lubong. (Mateo 24:9) Babaen ti panangusarna iti sumagmamano a salaysay iti Biblia, imbatad ni Kabsat Jaracz a ‘datayo ti kangrunaan a puntiria ti Diablo. Masapul a patibkerentayo ti relasiontayo ken ni Jehova ken bumilegtayo tapno madaerantayo dagiti pannubok.’ (Job 1:8; Daniel 6:4; Juan 15:20; Apocalipsis 12:12, 17) Iti konklusionna, kinuna ni Kabsat Jaracz nga iti baet ti agtultuloy nga ibubusor iti ili ti Dios, ‘saan nga agballigi ti aniaman nga igam a mabukel maibusor kadatayo, kas kuna ti Isaias 54:17. Siguraduen ni Jehova a maispaltayo iti bukodna a tiempo ken pamay-an.’
Yantangay ‘naan-anay a nakabalanda,’ di pagduaduaan nga adu ti maaramidan dagiti nagturpos iti maika-112 a klase ti Gilead a mangep-ep iti panagbisin iti naespirituan a taraon kadagiti pagilian a pagserbianda. (2 Timoteo 3:16, 17) Sigagagar a seggaantayo dagiti damag no kasano ti panangidanonda iti makapasalun-at a mensahe kadagiti tattao kadagitoy a pagilian.
[Kahon iti panid 23]
ESTADISTIKA TI KLASE
Bilang dagiti pagilian a nairepresentar: 6
Bilang dagiti pagilian a pakaibaonanda: 19
Bilang dagiti estudiante: 48
Promedio nga edad: 33.2
Promedio a tawen iti kinapudno: 15.7
Promedio a tawen iti amin-tiempo a ministerio: 12:2
[Ladawan iti panid 24]
Ti Maika-112 a Nagturpos a Klase ti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.
(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.