Pakasaritaan Dagiti Saksi ni Jehova iti Moderno a Panawen

Curaçao

Iti mapa ti lubong, kasla nagbabassit dagiti isla ti Curaçao, Aruba, ken Bonaire no idilig kadagiti dadakkel a kontinente nga asideg kadagitoy. Kaskasdi adu kadagiti agnanaed kadagitoy nga isla ti naggapu iti adu a nasion ken kultura. Agragrag-o itan ti adu nga agnanaed kadagitoy tallo nga isla ti Caribe iti sidong ti nalinteg a panangituray ni Jehova. Basaenyo no kasano a pinarmek dagiti naregta a Saksi dagiti karit iti nadumaduma a kultura ken lenguahe tapno maisuro ti nadalus a lenguahe ti kinapudno iti Biblia.

Ukraine

Abril 8, 1951 idi. Nasinga ti kinaulimek ti bigbigat gapu iti ungor dagiti trak ti militar. Iti intero a makinlaud nga Ukraine, simmangpet dagiti soldado kadagiti pagtaengan dagiti Saksi ni Jehova ket dua nga oras laeng ti naited iti tunggal pamilia a mangyempake iti gargaretda para iti panagbiahe nga adu kadakuada ti saanen a pulos a nakasubli. Iti daydi nga aldaw, nasurok nga 6,100 a Saksi ti nailugan kadagiti bagon ket naidestieroda idiay Siberia. Dayta a plano ket paset ti napaut a kampania ti nabileg idi nga Union Soviet tapno mapaulimek ti siasinoman a natured a mangiwaragawag iti Pagarian ti Dios. Ti makaparagsak a pakasaritaan no kasano ti panagibtur dagiti Saksi a taga Ukraine iti panangipawil ken pannakaidadanes iti nasurok a 50 a tawen ket mangpabileg iti pammatiyo iti pannakabalin ni Jehova a mangandingay iti ilina.