Manipud Managbasatayo

Muscular Dystrophy Pagyamanan ti panangipablaakyo ti makaparegta a kapadasan nga “Ibturak ti Muscular Dystrophy.” (Enero 8, 1990) Maysaak a quadriplegic ket agpannurayak kadagiti dadduma iti inaldaw a panagbiagko. Ngem babaen iti tulong ti asawak ken dagiti dadduma iti kongregasion, makapagserbiak kas maysa a ministro nga auxialiary payunir. Babaen ti panangusarko iti direktory ti telepono a mangilista iti direksion dagiti tattao (isu a magun-odan iti libreria publiko), makakasabaak babaen iti telepono kadagiti tattao nga agnanaed kadagiti maguguardiaan nga apartment.

B. W., Estados Unidos

Karera a Panagmodelo Maaiwsak iti artikulo nga “Agimtuod dagiti Agtutubo . . . Ti Ngay Karera a Kinamodelo ken Salip iti Kinapintas?” (Enero 8, 1990) Babaen laeng iti bileg ni Jehova a naidianko ti kasta a karera. Iti sumagmamano laeng a bulan sakbay ti panagbautisarko, maysaak a modelo iti ladawan. Ngem nupay no pabpabassitek ti dakes a pannakikuyog, kasta unay ti panangpilit. Ti maysa a modelo marabrabak, di maikankano, ken mapilit pay nga agtaray a dandani lamolamo gapu ta kurang dagiti pagsukatan. Mainayon iti dayta ti kinaliday iti panagnaed iti adu a lawlawas iti otel. Natan-ok ti lubong ti uso, ngem napno iti kinabuklis, panagsasalisal, imoralidad, materialismo, ken droga.

J. Y. A. M., Pederal a Republika ti Alemania

Panangliklik iti Okulto Ti artikuloyo, “Agimtuod dagiti Agtutubo . . . Apay a Liklikak ti Okulto?” (Marso 8, 1990) ti ad-adda a nangipabigbig kaniak iti pannakabalin ni Satanas kadagiti tattao ken dagiti nasikap a taktika nga us-usarenna a manggargari iti panagusiuso. Idi mariknak a mabalin nga adda pagimbagan dagiti demonio no dadduma, ta anghel dagitoy idi. Nalawag nga impakita ti artikulo kaniak a dagitoy maikarida laeng iti umadanin a pannakadadaelda. Agyamanak manen.

R. S., Estados Unidos

Parparikut iti Prostate Ti artikuloyo maipapan iti parparikut iti prostate (Abril 8, 1990) ti nangpainteres kaniak, ta masapul a maoperaan iti prostate ni tatangko. Nupay no aduan impormasion ti artikulo, dagiti pangserra a komento ti nangriribuk kaniak. Kunaenyo nga adu a lallaki ti mangsapul iti pannakagargari iti sekso babaen kadagiti pornograpiko a literatura. Daytoy isingasingna nga amin a lallaki nga addaan iti parparikut iti prostate agbuybuyada kadagiti pelikula wenno agbasbasada kadagiti pornograpiko a literatura.

N, R., Pederal a Republika ti Alemania

Dikam kayat a sawen a dagiti parparikut iti prostate ket resulta ti di nakristianuan a kababalin. Dagiti parparikut iti prostate ket gagangay kadagiti lallakayen a lallaki—agraman dagiti matalek a Kristiano—gapu kadagiti adu a rason. Ngem agsipud ta ti di naibanag a seksual a pannakagargari agparang a nairaman iti mangpataud wenno mangpakaro ti parikut kadagiti dadduma a lallaki, maitutop ngarud a pagannadenmi dagiti managbasami iti silo ti pornograpia.—ED.

Babaen ti Panagkita ti Maysa nga Ubing Ti artikuloyo (Enero 22, 1990) ket naisurat a buyogen ti kasta unay a pannakaawat ta matignayak a mangipaima iti adu a kopia a kabaelak nga ipaima idiay eskuelaan ken ospital kadagiti amin nga inna nga am-ammok. Ti pangulo iti pages-eskuelaan dagiti annakko a lallaki inapresiarda unay ti artikulo, ket maysa kadagiti mannursuro dagiti annakko indayawna ti pamay-an ti pannakaisurat ti artikulo. Addaanak met ti uppat nga annak ket ammok no kasanot’ karigat ti agbalin a nagannak. Dagiti artikulo a kas itoy tulongannatay a mangtulong kadagiti annaktayo.

M. P. R., Italy

Ti Lapayag Yantangay kayatko dagiti artikulo maipapan iti bagi ti tao, maawisak iti artikuloyo maipapan iti lapayag. (Enero 22, 1990) Nabayagen nga ad-adalek dagiti magasinyo ta iramanda ti isuamin a kayat a maammuan ti tao—agpadpada dagiti gagangay a tattao ken dagidiay addaan doctorate.

H. V., Brazil