Manipud Managbasatayo

Panagurot iti Buok Nagurayak iti nabayag maipaay iti artikulo nga “Alopecia—Panangibtur a Siulimek iti Panagurot ti Buok” (Abril 22, 1991) Agsagsagabaak manipud iti alopecia universalis iti sumagmamanon a tawen, ket napanakon kadagiti adu a doktor nga awan ti nalawag a resulta. Pinadasko nga ammuen ti ad-adu pay maipapan iti alopecia ngem bassit laeng ti balligik. Ti artikulo tinulongannak a mangawat iti kasasaad a buyogen iti kinaulimek, nga ur-urayen ti tiempo inton awanen ti agkuna: “Masakitak.”—Isaias 33:24.

R. C., Italy

Dagiti Niteklab Ti artikulo nga “Agimtuod dagiti Agtutubo . . . Dagiti Ngay Niteklab?” (Pebrero 8, 1991) pudno a sinairnak. Nangrugi nga agpababa ti panagbiagko kalpasan ti ipapanko iti maysa a niteklab idi agtawenak iti 15. Daytat’ di makadangran a pagraragsakan idi damo. Nakisalaak kadagiti gagayyem manipud iti eskuelaan. Naidasar dagiti di alkoholiko nga inumen iti bar ti soda. Di pagaammo dagiti Kristiano a dadakkelko a napanak—sililimed a rummuarak iti tawak tapno mapanak iti “klab.” Bueno, ti “di makadangran” a panagsala nangiturong iti panaginum, kalpasanna kadagiti droga, ken kalpasanna iti homoseksualidad. Kamaudiananna simminaakon iti lubong ti niteklab, ngem ita baybayadakon ti panagbiagko a doble-cara. Kayatko laeng nga iraman ti kapadasak iti pananginanama nalabit nga addanto maysa sadiay nga agpanunot a naimbag maipapan kadagiti niteklab.

L. E., Estados Unidos

Rap wenno Rock? Maragsakanak ta nadlawyo ti kinarugit a parikut iti nalatak a musika iti artikuloyo a “Kinarugit iti Musika.” (Marso 8, 1991) Nupay kasta nagbiddutkayo idi inlasinyo ti grupo a “2 Live Crew” kas maysa a grupo a rock. Kinapudnona, dagitoy ket maysa a grupo a rap, isu a mangisarita, imbes a mangikanta, kadagiti sasao ti kanta.

D. L., Estados Unidos

Agyamankami iti panangilawlawagyo. Siempre, daddumat’ mangibilang iti rap a basta sabali a porma iti rock a musika. Kasta man ti kasasaadna, dagiti Kristiano masapul a napilida maipapan iti panagpilida iti musika, aniaman a nagan ti mainaig iti dayta.—ED.

Agtalinaed dagiti Ospital Agyamanak iti ababa, nagsayaatan nga impormasion iti serie a “Dagiti Ospital—Kasanoyo a Sanguen?” (Marso 8, 1991) Kayatko nga inayon nga iti saan nga emerhensia a kasasaad, kalpasan iti umiso a pannakaresita, masapul nga ammuenyo ti amin a kabaelanyo nga ammuen maipapan iti sakityo ken dagiti pangagas iti dayta. Babaen laeng iti nasayaat a pannakaammo a makapagaramidkayo iti nasayaat a pangngeddeng. Ti lokal a libreria wenno ti libreria ti ospital masansan a naglaon iti adu a makatulong nga impormasion.

E. D., Estados Unidos

Narcolepsy Nagsuratak a mangiyebkas iti panangapresiarko iti artikulo a “Narcolepsy—Ti Sakit ti Pannaturog.” (Abril 8, 1991) Dikay ammo ti kaipapananna kaniak ti pannakakita iti daytoy a sakit a nabigbig iti maysa nga internasional a magasin! Nagsakitak iti narcolepsy idi agtawenak iti 15, ket addaanak pay laeng iti dayta iti edad a 77!

M. S., England

Naawisak iti kasta unay iti kinaumiso ti panangibutaktak dagiti mannurat ken ti pannakipagrikna iti panangtamingda iti tema. Tarigagayak a makapagpannuraytayo kadagiti amin a pagiwarnak a mangala iti kasta nga addang. Nakaipaaykayo iti kaasi kadagiti agsagsagaba, nangnangruna kadagidiay a kurang ti pannakaawatda iti sakitda.

P. J. H. S. Honorary Secretary, Narcolepsy Association [U.K.]

Di Pannakabigbig iti Kolor Iti nabayagen a tiempo, inur-urayko ti maysa nga artikulo kas ti maysa a napauluan “Di Pannakabigbig iti Kolor—Karkarna a Depekto.” (Pebrero 22, 1991) Kas maysa nga agsagsagaba iti di pannakabigbig iti kolor, kankanayon a pataudek iti panagkakatawa ken panagusiuso idi kinunak a ti darak ket berde wenno ti bulalayaw addaan laeng iti dua a kolor. Ngem pagyamanan iti artikuloyo, nasaysayaatton ti pannakaawatda kaniak. Agtalekak ken Jehova a dumtengto ti aldaw a makitakton ti bulalayaw iti intero a kolorna.

I. F. O., Brazil