Baro a Programa iti Aldaw ti Espesial nga Asamblea
Ti tema ti programa iti aldaw ti espesial nga asamblea a mangrugi inton Pebrero 2001 ket “Agbalinkayo a Nataenganen iti Pannakabalin ti Pannakaawat.” (1 Cor. 14:20) Apay a napateg a tumabunotayo? Agbibiagtayo iti nakadakdakes a lubong. Tapno madaerantay daytoy, masapul a parang-ayentay ti naespirituan a pannakaawattayo ket iti kasta maparmektayo ti dakes babaen ti naimbag. Matulongannatayo ti programa iti aldaw ti espesial nga asamblea a mangaramid iti kasta.
Iti panglukat a sesion, ti manangaywan ti sirkito isalaysayna “Dagiti Katulongan Tapno Agmataengan iti Pannakaawat iti Biblia.” Ilawlawagna no kasanotay a makapagtalinaed a natibker iti Nakristianuan a pammati. Itampok ti bisita a naawis nga agpalawag no kasano kapateg ti aktual a panangipakat wenno panangyaplikar kadagiti prinsipio ti Biblia iti panangparang-ay iti natadem a pannakaawat, babaen ti palawagna a natemaan iti “Saluadan ti Espiritualidad Babaen ti Panangsanay iti Pannakabalin ti Pannakaawatyo.”
Masapul met a parang-ayen dagiti agtutubo ti pannakaawatda. Mailawlawag daytoy kadagiti paset a “No Apay nga Agbalinkay Koma nga Ubbing No iti Kinadakes” ken “Dagiti Agtutubo nga Addaan Pannakaawat Ita.” Denggenyo ti ibaga dagiti agtutubo nga ar-aramidenda tapno bumilegda iti naespirituan ket iti kasta mapengdanda ti aniaman a panagusioso kadagiti dakes nga aramid ti lubong ken maliklikanda ti parikut.
Kasanotay a matagiragsak a naan-anay ti panagbiagtayo? Ti bisita a naawis nga agpalawag ibinsabinsana daytoy iti maudi a palawag a “Magunggonaan iti Panangyaplikar Kadagiti Prinsipio ti Biblia Buyogen ti Pannakaawat.” Idatagna dagiti pagarigan a mangipakita a ti panangyaplikar iti Sao ti Dios tulongannatayo a mangtaming kadagiti parikut, agdesision, ken pudno a magunggonaan iti isursuro ni Jehova kadatayo.
Dagidiay agngayangay a mangisimbolo iti panagdedikarda iti Dios babaen ti bautismo inton asamblea rumbeng a pakaammuanda ti mamangulo a manangaywan iti kabiitan a tiempo. Markaanyo ti kalendarioyo apaman a mayanunsio ti petsa ti aldaw ti espesial nga asamblea, ken agplanokay a naimbag tapno magunggonaan iti daytoy nabaknang a programa. Dikay langanan ti aniaman a paset ti aldaw ti espesial nga asamblea! Pabilgennakay dayta nga agandur iti daytoy dakes a sistema ken agtalinaed a matalek ken Jehova.