Notaðu blöðin til að útbreiða sannleikann
1 Í nútímasamfélagi er gildi áreiðanlegra og sannra upplýsinga stórlega skert vegna ýktra auglýsinga, villandi pólitískra fyrirheita og blekkjandi staðhæfinga á alþjóðavettvangi. Varðturninn og Vaknið! eru einu tímaritin sem kunngera sannleikann um Guðsríki og útskýra hvað allir verða að gera til að njóta hinnar eilífu blessunar sem það mun færa.
2 Embættismaður í upplýsingamálaráðuneyti í landi einu mat mikils gildi þessara tveggja tímarita og aðstoðaði fúslega við að fá leyfi til að dreifa þeim. Hann sagði: „Ég álít Varðturninn eitt besta blaðið sem til er. Mér er það sönn ánægja að hjálpa.“ Það eru sérréttindi okkar að hjálpa öðrum með því að dreifa þessum tímaritum sem geta veitt lífgefandi fræðslu. (Jóh. 17:3) Eftirfarandi tillögur hjálpa þér ef til vill að kynna þessi verðmætu blöð í maí.
3 Þú gætir reynt að nota greinarnar um spádóma Daníelsbókar í maíblaði „Varðturnsins“ og sagt eitthvað á þessa leið:
◼ „Við viljum vekja athygli á spádómi í Biblíunni um tvo konunga sem hafa átt í deilum í meira en tvö þúsund ár. Barátta þeirra hefur haft mikil áhrif á mannkynið en núna er hún brátt á enda. Þetta tölublað Varðturnsins fjallar um þessa baráttu á okkar öld og sýnir hvers vegna hún skiptir okkur miklu máli.“ Þú gætir síðan sýnt fyrirsögnina á blaðsíðu 18 og myndina þar til hægri.
4 Þú gætir, eftir að hafa kynnt þig, sagt eitthvað þessu líkt:
◼ „Fjölmiðlar segja okkur daglega frá alls konar ofbeldisverkum og oft á ungt fólk þar hlut að máli. Sagt er að það læri börnin sem fyrir þeim er haft. Hefur þú tekið eftir hversu ofbeldi er algengt í teiknimyndum fyrir börn?“ Gefðu kost á svari og vektu síðan athygli á greininni „Er ofbeldi í teiknimyndum skaðlegt?“ í nýjasta tölublaðinu af Vaknið!
5 Á endurheimsóknaskrá þinni er líklega listi yfir þá sem sýndu lítils háttar áhuga í fyrstu en síðan varð ekkert úr honum. Þar sem undirtökurnar voru svona dræmar finnst þér ef til vill engin þörf á að halda áfram að fara í endurheimsóknir. En þú getur kannski notað þennan lista til að búa til blaðaleið. Þegar þú sérð grein sem höfðar kannski til ákveðins einstaklings skaltu gera þér far um að heimsækja hann og bjóða honum blaðið.
6 Óformlegur vitnisburður: Hann er góð leið til að skapa áhuga á blöðunum. Ef blöðin eru látin sjást án þess að ota þeim fram getur áberandi forsíða verið nóg til að koma af stað samræðum. Systir lagði nokkur blöð á skrifborðið sitt þannig að vinnufélagar gætu séð þau er þeir gengu fram hjá. Hún dreifði allnokkrum blöðum. Gerðu þér far um að hafa með þér fáein blöð og taktu frumkvæðið í að bjóða þau í þessum mánuði þegar þú ferð að versla, í skólann eða hittir fólk annars staðar.
7 Með hjálp Varðturnsins og Vaknið! höfum við fundið svör við mikilvægum spurningum um Jehóva og tilbeiðsluna á honum. Við viljum nota þessi blöð á allan mögulegan hátt til að hjálpa öðrum að kynnast Jehóva, Guði sannleikans. — Sálm. 31:6.