Förum aftur til þeirra sem sýndu áhuga
1 Þegar ræðumaðurinn á landsmótinu tilkynnti útkomu nýju bókarinnar, Þekking sem leiðir til eilífs lífs, tók hann fram að „hreinhjartaðir nemendur [ættu] að geta lært nægilega mikið af námi í henni til að taka afstöðu með Jehóva og láta skírast.“ Bókin er samin til að kenna sannleikann á skömmum tíma. Hún kemur með tilteknar upplýsingar í samþjappaðri mynd sem geta elft hjá nemendunum löngun til að taka andlegum framförum. Hún setur sannleikann fram á jákvæðan hátt, án þess að dvelja við falskenningar. Til þess að nota þetta nýja verkfæri með góðum árangri verðum við að fara í endurheimsóknir til þeirra sem sýndu áhuga.
2 Ef þú talaðir við einhvern sem skorti trú á Guð en sýndi samt dálítinn áhuga gætir þú byrjað með því að fletta upp á myndinni á blaðsíðu 4 og 5 og segja:
◼ „Þegar ég var hér á ferð um daginn litum við á þessa mynd. Í myndatextanum segir: ‚Þú getur fengið að búa að eilífu í fögru umhverfi sem þessu!‘ og síðan er spurt: ‚Hvað þarft þú að gera til að svo megi verða?‘ Hvernig myndir þú svara því? [Gefðu kost á svari.] Biblían bendir greinilega á eitt af helstu skilyrðunum. [Lestu Jóhannes 17:3.] Til þess að geta trúað á Guð verðum við að hafa þekkingu. Frábær leið til að læra það sem við þurfum að vita er að nema Biblíuna á kerfisbundinn hátt.“ Flettu upp á fyrsta kafla og bentu á nokkur þeirra uppörvandi atriða sem koma fram í tölugrein 1 til 5. Þú skalt útskýra hvernig biblíunám fer fram og bjóðast til að koma aftur til að ræða málin frekar.
3 Ef þú kemur aftur til að halda áfram samræðum um hvers vegna Guð leyfi þjáningar gætir þú sagt:
◼„Síðast þegar ég var hér ræddum við um [nefndu atburðinn]. Sú spurning kom upp hvers vegna Guð leyfir svona miklar þjáningar í heiminum. Að hvaða niðurstöðu komst þú? [Gefðu kost á svari.] Er ekki uppörvandi að vita að Guð sé ekki ábyrgur fyrir því ömurlega ástandi sem víða má finna?“ Flettu upp á blaðsíðu 71-2 í bókinni Þekking sem leiðir til eilífs lífs og ræddu um nokkrar af þeim biblíulegu hugmyndum sem fjallað er um í tölugrein 3 til 5. Síðan skaltu bjóðast til að koma aftur til að útskýra hvers vegna við getum verið viss um að Guð muni ekki leyfa þjáningar lengi enn.
4 Ef þú ert að fara aftur til að heimsækja foreldri sem hefur áhyggjur af fjölskylduvandamálum gætir þú sagt þetta:
◼ „Ég veit að sem foreldri viltu börnum þínum alls hins besta. Það er ógerningur að skýla þeim fyrir öllu sem illt er svo maður verður að kenna þeim hvernig þau geta tekist á við vandamál lífsins. Hvernig heldur þú að hægt sé að gera það? [Gefðu kost á svari.] Gott uppeldi er eitt það mikilvægasta sem foreldrar geta gefið börnum sínum.“ Flettu upp á blaðsíðu 145-6 í Þekkingarbókinni og vektu athygli á hagnýtum leiðbeiningum Biblíunnar. Leggðu áherslu á mikilvægi þeirra og hvernig það geti orðið til blessunar að fylgja þeim. Því næst getur þú boðist til að koma aftur til að sýna hvernig hægt sé að nota þessa bók til að læra meira um hvernig öðlast megi hamingjuríkt fjölskyldulíf.
5 Ef þú er kominn aftur þangað sem þú notaðir stutt kynningarorð gætir þú sagt:
◼ „Það var aldrei tilgangur Guðs að við skyldum hrörna og deyja. Hann ætlaði okkur að lifa að eilífu í paradís á jörð.“ Sýndu myndina á blaðsíðu 188-9. Lestu tölugrein 11 á blaðsíðu 184. Gerðu ráðstafanir til að koma í aðra heimsókn.
6 Sannarlega er þessi nýja bók enn ein ráðstöfunin frá Jehóva til að „hraða“ uppskerustarfinu á þessum síðustu dögum. (Jes. 60:22) Ef við notum hana af leikni og kostgæfni getum við miðlað þekkingu sem getur hjálpað sumum til að öðlast eilíft líf.