Talaðu sannleika við náunga þinn
1 Eitt mesta boðorðið er þetta: „Þú skalt elska náunga þinn eins og sjálfan þig.“ (Matt. 22:39) Sá kærleikur fær okkur til að deila með náunga okkar því besta sem við eigum — sannleikanum sem við höfum fundið í orði Guðs. Þar sem Varðturninn og Vaknið! skýra nánar sannleiksboðskap Biblíunnar getum við ‚talað sannleika hver við sinn náunga‘ með því að dreifa þessum tímaritum í maí. — Ef. 4:25.
2 Þegar þú býður „Vaknið!“ gætir þú hafið kynningu þína með því að spyrja:
◼ „Hefur þú hugleitt þann möguleika að geta lifað að eilífu á jörðinni? [Gefðu kost á svari.] Vísindamenn tala oft um mannslíkamann sem kraftaverk. Við virðumst gerð til að lifa miðað við það hvernig líkamsvefirnir endurnýja sig. Það er í raun ráðgáta hvers vegna þessi endurnýjun hættir að mestu þegar aldurinn færist yfir okkur. Biblían sýnir líka að Guð skapaði manninn til lifa en ekki deyja. Hún útskýrir hvers vegna dauðinn kom til skjalanna en gefur jafnframt fyrirheit um að ellihrörnun og dauða verði útrýmt að lokum.“ Sýndu forsíðu blaðsins og fyrirsagnirnar á blaðsíðu 3, 4, 8 og 10 og bjóddu húsráðandanum að lesa það.
3 Þegar þú býður maítölublað „Varðturnsins“ gætir þú reynt að nefna nýlega atburði sem sýna öryggisleysi manna og spurt síðan:
◼ „Hvaða breytingar heldur þú að menn þurfi að sjá í samfélaginu til þess að þeim finnist þeir búa við öryggi? [Gefðu kost á svari.] Er í hreinskilni sagt raunhæft að treysta mönnunum sjálfum til þess að leysa vandamálin sem þjá mannkynið? [Gefðu kost á svari og lestu síðan Sálm 146:3.] Sálmaritarinn gefur okkur því næst ástæðu til bjartsýni. [Lestu Sálm 146:5, 6.] Þessi grein, ‚Lofið konung eilífðarinnar,‘ útskýrir hvers vegna við getum treyst því að Jehóva Guð muni færa málin til betri vegar á jörðinni í náinni framtíð.“ Bjóddu húsráðanda blöðin og nefndu að þú viljir koma aftur til að tala um hvernig mögulegt sé að búa við öryggi núna þegar.
4 Sýni húsráðandinn lítinn áhuga í upphafi er oft árangursríkt að nota smárit. Því næst, ef áhugi vaknar, má tengja smáritið nýjustu blöðunum. Þú gætir sagt:
◼ „Ég heyri að margir hafa áhyggjur af . . . [nefndu eitthvað úr fréttum]. Heldur þú að það hafi verið ætlun Guðs að heimurinn yrði svona?“ Gefðu kost á svari og sýndu smáritið Líf í friðsömum nýjum heimi. Farðu nokkrum orðum um myndina á blaðsíðu 1 og ræddu nokkur atriði úr smáritinu eftir því sem aðstæður leyfa. Ef viðbrögðin eru þá jákvæð má vekja athygli á greinaröðinni „Af hverju er lífið svona stutt?“ og bjóða blöðin.
5 Ef þú vilt hafa kynningarorðin stutt gætir þú reynt þetta:
◼ „Mörgum finnst vera orðið allt of mikið um peningamál, kynlíf eða ofbeldi í tímaritum sem núna eru gefin út. [Sýndu Varðturninn og Vaknið!] Við erum að dreifa þessum tímaritum sem innihalda heilnæmt og uppbyggjandi efni sem byggt er á Biblíunni. Þau eru mjög fræðandi og kenna okkur að tilbiðja Guð, elska náungann og hegða okkur á þann hátt sem Guði er þóknanlegur. Ef slíkt lestrarefni er þér að skapi er ég viss um að þú munt hafa ánægju af því sem er að finna í þessum tölublöðum.“
6 Ef við erum kostgæfin við að tala sannleika við náunga okkar gæti okkur tekist að færa mörgum mikinn fögnuð. — Post. 8:4, 8.