Geymið

Kynningartillögur fyrir boðunarstarfið

Hvernig nota á þennan viðauka

Flestar af eftirfarandi tillögum hafa birst í eldri tölublöðum Ríkisþjónustu okkar. Prófaðu eins margar tillögur og þú vilt og sjáðu hver árangurinn verður. Haltu þessum viðauka til haga og notaðu hann þegar þú undirbýrð þig fyrir boðunarstarfið.

Þú getur vakið áhuga á orði Guðs ef þú kemur þér fljótt að efninu. Berðu fram spurningu og komdu svo með stutt svar frá Biblíunni. Þú gætir reynt þessar tillögur:

„Ertu bjartsýn(n) eða svartsýn(n) þegar þú hugsar um framtíðina? [Gefðu kost á svari.] Biblían spáði þeim óskemmtilegu atburðum sem blasa við núna og jafnframt hver framvindan yrði.“ — 2. Tím. 3:1, 2, 5; Orðskv. 2:21, 22.

„Margir hafa áhyggjur af heilbrigðismálum. En vissirðu að Guð lofar að leysa öll heilsufarsvandamál til frambúðar?“ — Jes. 33:24; Opinb. 21:3, 4.

„Vissirðu að Biblían spáir því að ein stjórn muni ríkja yfir öllum heiminum?“ — Dan. 2:44; Matt. 6:9, 10.

„Hvernig heldurðu að ástandið yrði ef Jesús Kristur stjórnaði heiminum?“ — Sálm. 72:7, 8.

„Mörgum er mismunað sökum kynferðis, trúar eða kynþáttar. Hvað heldurðu að Guði finnist um slíka fordóma?“ — Post. 10:34, 35.

„Við vitum að Jesús Kristur gerði mörg kraftaverk þegar hann var á jörð. Ef þú gætir beðið hann að gera enn eitt kraftaverk, um hvað myndirðu biðja?“ — Sálm. 72:12-14, 16.

„Flestir eru orðnir dauðleiðir á að heyra um vandamál. Þeir vilja heyra um lausnir. En hvar getum við fundið raunhæfar lausnir á vandamálum okkar? — 2. Tím. 3:16, 17.

„Veistu hvaða ríki þú biður um í Faðirvorinu?“ — Opinb. 11:15.

Leiðir til að hefja samræður

Spurningarnar hér að neðan eru unnar úr Reasoning From the Scriptures (Rökræðubókinni). Svar við hverri spurningu er að finna á þeirri blaðsíðu sem vísað er í.

Hvers vegna hrörnum við og deyjum? (98)

Hvert er ástand hinna dánu? (100)

Eru góðar og gildar ástæður til að trúa á Guð? (145)

Skiptir það Guð einhverju máli hvað verður um okkur mennina? (147)

Er Guð raunveruleg persóna? (147)

Fara allir góðir menn til himna? (162)

Verður maður að fara til himna til að eiga farsæla framtíð? (163)

Hvers vegna er mikilvægt að þekkja og nota einkanafn Guðs? (196)

Er Jesús Kristur í raun Guð? (212)

Hverju kemur Guðsríki til leiðar? (227)

Hver er tilgangur lífsins? (243)

Hvernig er hægt að bæta hjónabandið? (253)

Hafa öll trúarbrögð velþóknun Guðs? (322)

Hvernig er hægt að bera kennsl á hina sönnu trú? (328)

Hversu voldugt afl er Satan í heimi nútímans? (364)

Hvers vegna leyfir Guð þjáningar? (393)

Hvers vegna er illskan svona mikil í heiminum? (427)

Hver er höfðingi heimsins — Guð eða Satan? (436)

Kynningartillögur fyrir Kröfubæklinginn

„Þú ert eflaust sammála því að margir trúa á Guð. Þeir sem það gera eru sannfærðir um að hann krefjist einhvers af okkur en geta hins vegar ekki komið sér saman um hvað það er.“ Bjóddu næst Kröfubæklinginn, flettu upp á 1. kafla og ræddu um hann.

„Ýmiss konar fjölskylduvandamál eru algeng núna, en hefur þú einhvern tíma hugleitt hver sé lykillinn að hamingjuríku fjölskyldulífi?“ Eftir að viðmælandinn hefur svarað skaltu útskýra að Guð opinberi okkur í Biblíunni hvernig sé í raun og veru hægt að lifa hamingjusömu fjölskyldulífi. Lestu Jesaja 48:17. Flettu síðan upp á kafla 8 í Kröfubæklingnum og bentu á nokkur biblíuversanna sem vísað er í og veita hverjum og einum í fjölskyldunni áreiðanlega leiðsögn. Lestu spurningalistann í upphafi kaflans og spyrðu viðmælanda þinn hvort hann vilji lesa svörin.

„Í þessum bæklingi er námsefni sem nær yfir grundvallarkenningar Biblíunnar. Á hverri blaðsíðu má finna svör við spurningum sem hafa valdið mönnum hugarangri öldum saman. Eitt dæmi er spurningin: Hver er tilgangur Guðs með jörðina?“ Flettu upp á 5. kafla og lestu spurningarnar í upphafi kaflans. Spyrðu húsráðandann hver þeirra honum finnist áhugaverðust og lestu því næst tilheyrandi tölugrein(ar) og flettu upp viðeigandi ritningarstöðum. Útskýrðu að jafnauðvelt sé að finna fullnægjandi svör við hinum spurningunum. Leggðu til að þú komir aftur til að ræða aðra spurningu.

„Hvers vegna heldur þú að það sé svona mikið ofbeldi í skólum? Stafar það af lélegu barnauppeldi eða eru einhver ill öfl þar að verki?“ Leyfðu viðmælanda þínum að svara. Ef hann segir það geta stafað af áhrifum illra afla, skaltu lesa Opinberunarbókina 12:9, 12 og benda á þátt djöfulsins í glundroðanum í heiminum. Flettu upp á 4. kafla í Kröfubæklingnum og spyrðu hvort hann hafi velt fyrir sér hvaðan djöfullinn hafi komið. Lestu síðan og ræddu fyrstu tvær greinarnar. Ef viðmælandinn segir að ofbeldi í skólum stafi af „lélegu barnauppeldi,“ skaltu lesa 2. Tímóteusarbréf 3:1-3 og benda á sumt sem stuðlar greinilega að vandanum. Flettu síðan upp í 8. kafla í Kröfubæklingnum, lestu gr. 5 og haltu samræðunum áfram.

„Finnst þér skynsamlegt að ætlast til að skaparinn gefi okkur þá þekkingu sem við þurfum til að byggja upp hamingjuríkt fjölskyldulíf?“ Eftir að viðmælandinn hefur svarað skaltu kynna Kröfubæklinginn, fletta upp á 8. kafla og útskýra að þar sé að finna frumreglur frá Biblíunni fyrir alla í fjölskyldunni. Þú skalt bjóðast til að sýna hvernig nota megi bæklinginn með Biblíunni til að hafa sem mest gagn af honum.

„Menn þurfa að takast á við margt í lífinu nú á tímum og því mætti spyrja hvort bænin geti hugsanlega komið okkur að raunverulegu gagni? [Gefðu kost á svari.] Margir segja að bænin veiti þeim innri styrk. [Lestu Filippíbréfið 4:6, 7.] Engu að síður getur þeim fundist að þeir fái ekki bænheyrslu. [Opnaðu Kröfubæklinginn á kafla 7.] Þessi bæklingur útskýrir hvernig bænin getur gagnast okkur sem best.“

„Við höfum verið að tala við fólk um það hvers vegna það eru svona mörg trúarbrögð í heiminum, þó er Biblían aðeins ein. Hver heldur þú að sé ástæðan fyrir trúarbragðaóreiðunni? [Gefðu kost á svari. Flettu upp á 13. kafla í Kröfubæklingnum og lestu upphafsspurningarnar.] Þú færð fullnægjandi svör við þessum spurningum með því að lesa þennan kafla.“

Eftir að hafa dreift tímaritunum Varðturninum og Vaknið! gætir þú spurt viðtakandann hvort þú megir lesa stutta grein fyrir hann. Ef hann samþykkir það opnaðu þá Kröfubæklinginn á kafla 5. Bentu á spurningarnar í upphafi kaflans og biddu hann að hlusta eftir svarinu við fyrstu spurningunni á meðan þú lest fyrstu greinina. Spyrðu spurningarinnar þegar þú hefur lokið við að lesa greinina og hlustaðu á svar hans. Bjóddu honum bæklinginn og ef hann þiggur hann skaltu gera ráðstafanir til að koma aftur og fá svar hans við næstu tveim spurningum við þennan kafla.

Kynningartillögur fyrir Þekkingarbókina

Hafðu Biblíuna í hendinni og byrjaðu með því að segja: „Við höfum verið að sýna fólki hér í götunni einn ritningarstað. Þar segir . . ..“ Lestu Jóhannesarguðspjall 17:3 og spyrðu: „Tókstu eftir hverju er lofað ef við höfum ákveðna þekkingu? [Gefðu kost á svari.] Hvar er slíka þekkingu að finna?“ Þegar þú hefur fengið svar skaltu sýna Þekkingarbókina og segja: „Þessi bók vísar á þekkinguna sem leiðir til eilífs lífs. Hún gerir það með því að svara algengustu spurningunum sem fólk hefur um Biblíuna.“ Sýndu efnisyfirlitið og spyrðu viðmælanda þinn hvort hann hafi velt einhverjum þessara spurninga fyrir sér.

„Hefur þú einhvern tíma hugleitt hvort Guði sé alveg sama um óréttlætið og þjáningarnar sem við sjáum allt í kringum okkur og verðum jafnvel sjálf fyrir? [Gefðu kost á svari.] Biblían fullvissar okkur um að Guð elski okkur og að hann muni hjálpa okkur á erfiðleikatímum.“ Lestu úrdrátt úr Sálmi 72:12-17. Flettu upp á 8. kafla í Þekkingarbókinni og bentu á að hún svari spurningu sem milljónir manna hafa spurt: Hvers vegna leyfir Guð þjáningar? Ef tækifæri gefst skaltu ræða um einhverjar af þeim biblíulegu hugmyndum sem fram koma í greinum 3 og 5. Þú getur líka gert það þegar þú kemur aftur.

„Flest höfum við séð á eftir ástvinum í dauðann. Hefur þú velt fyrir þér hvort við munum sjá þá aftur? [Gefðu kost á svari.] Jesús sannaði að hægt er að reisa látna ástvini okkar upp frá dauðum. [Lestu Jóhannes 11:11, 25, 44.] Þó að þetta hafi átt sér stað fyrir mörgum öldum sýnir það hvað Guð hefur lofað að gera fyrir okkur.“ Opnaðu Þekkingarbókina á blaðsíðu 85 og lestu myndatextann. Sýndu síðan myndina á blaðsíðu 86 og farðu nokkrum orðum um hana. Leggðu grunninn að næstu heimsókn með því að spyrja: „Langar þig að vita ástæðuna fyrir því að mennirnir hrörna og deyja?“ Farðu aftur til að ræða um 6. kafla.

„Hefurðu nokkurn tíma velt því fyrir þér hvers vegna menn þrá lengra líf?“ Þegar viðmælandi þinn hefur svarað, skaltu fletta upp á 6. kafla í Þekkingarbókinni og lesa grein 3. Rökræddu út frá ritningarstöðunum sem vitnað er í. Spyrðu svo viðmælanda þinn hvort hann vilji fá svör við spurningunum sem bornar eru upp í lok greinarinnar. Ef svo er haltu þá áfram að ræða efni næstu greina.

„Við erum að spyrja fólk hvort það trúi þessu . . .“ Lestu 1. Mósebók 1:1 og spyrðu svo: „Ertu sammála þessari staðhæfingu?“ Ef húsráðandi er sammála segðu þá: „Ég trúi þessu líka. En ef Guð skapaði alla hluti ber hann þá líka ábyrgð á allri mannvonskunni?“ Þegar þú hefur fengið svar skaltu lesa Prédikarann 7:29. Opnaðu svo Þekkingarbókina á 8. kafla og lestu grein 2. Ef hann er ekki sammála því sem kemur fram í 1. Mósebók 1:1 skaltu hvetja hann til að skoða vandlega rökin fyrir tilvist skapara. — Sjá Reasoning From the Scriptures (Rökræðubókina), bls. 84-6.

„Ertu ekki sammála því að við þurfum öruggan leiðarvísi í lífinu í ljósi þess hve ört siðferðisgildi manna breytast? [Gefðu kost á svari.] Enda þótt Biblían sé allra bóka elst hefur hún samt að geyma raunhæf ráð fyrir nútímamanninn og frábær heilræði um hamingjuríkt fjölskyldulíf.“ Flettu upp á 2. kafla í Þekkingarbókinni og lestu 10. greinina og fyrstu setninguna í 11. greininni, ásamt 2. Tímóteusarbréfi 3:16, 17.

„Langar þig til að vita hvað framtíðin ber í skauti sér fyrir okkur mennina og jörðina? [Gefðu kost á svari.] Biblían lýsir framtíð jarðarinnar með einu orði — paradís. Guð setti fyrstu mannhjónin á þannig stað þegar hann skapaði þau. Hér geturðu lesið lýsingu á því hvernig þetta hlýtur að hafa verið.“ Opnaðu Þekkingarbókina á blaðsíðu 8 og lestu grein 9, undir millifyrirsögninni „Líf í paradís.“ Ræddu síðan meginatriði 10. greinarinnar og lestu Jesaja 55:10, 11 sem vitnað er í. Bjóðstu til að halda áfram umræðum um það hvernig lífið í endurreistri paradís verður með því að fara yfir greinar 11-16.

Þegar þú ferð aftur til þeirra, sem tekið hafa tímaritin Varðturninn og Vaknið!, geturðu sagt:

„Síðast þegar ég kom til þín lét ég þig fá eintak af Varðturninum. Þú tókst ef til vill eftir því að fullt nafn blaðsins er Varðturninn kunngerir ríki Jehóva. Mig langar til að segja þér hvað þetta ríki er og hvað það getur þýtt fyrir þig og fjölskyldu þína.“ Opnaðu svo Kröfubæklinginn á 6. kafla og lestu og ræddu um eins mikið og tími viðmælanda þíns leyfir.

„Ég heimsótti þig nýlega og skildi eftir hjá þér eintök af tímaritunum Varðturninum og Vaknið!. Þessi blöð efla virðingu manna fyrir Biblíunni og leiðsögn hennar í siðferðilegum efnum. Ég tel að það sé öllum nauðsynlegt að skilja orð Guðs og því er ég komin(n) hingað aftur til að sýna þér dálítið sem getur hjálpað þér til þess.“ Kynntu Kröfubæklinginn eða Þekkingarbókina og bjóddu biblíunámskeið.

Þegar þú býður bækurnar Fjölskyldulíf þitt gert hamingjuríkt, Sannur friður og öryggi — hvernig? og Öryggi um allan heim undir stjórn Friðarhöfðingjans, gætirðu prófað þessa kynningu:

„Nú á tímum er lögð mikil áhersla á nauðsyn góðrar menntunar. Hvers konar menntunar álítur þú að menn ættu að afla sér til að tryggja sem mesta hamingju og farsæld í lífinu? [Gefðu kost á svari og lestu svo Orðskviðina 9:10, 11.] Þessi kennslubók [nefndu titil bókarinnar sem þú ert að bjóða] er byggð á Biblíunni. Hún bendir á eina staðinn þar sem þekkingu, sem getur leitt til eilífs lífs, er að finna.“ Sýndu dæmi í bókinni og hvettu viðmælanda þinn til að lesa hana.

Önnur rit

Kynningartillögur fyrir fleiri bækur og bæklinga er að finna í efnisskránni (Watch Tower Publications Index) undir flettunni:

Presentation (Kynningar)

List by Publication (Flokkaðar eftir ritum)

Að bjóða biblíunámskeið beint

Þú getur reynt að hefja biblíunámskeið með því að bjóða það beint og segja:

„Vissirðu að þú þarft aðeins að taka þér fáeinar mínútur til að fá svör við þýðingarmikilli biblíuspurningu? Til dæmis . . .“ Berðu því næst upp spurningu sem er að finna í byrjun einhvers kafla í Kröfubæklingnum og þú heldur að höfði til viðmælanda þíns.

„Ég er hingað komin(n) til að sýna þér hvernig biblíunámskeið fer fram, það tekur um fimm mínútur. Hefurðu fimm mínútur aflögu?“ Ef svarið er jákvætt notaðu þá 1. kaflann í Kröfubæklingnum til að sýna hvernig námið fer fram. Lestu aðeins eina eða tvær valdar ritningargreinar. Þegar þú hefur lokið við að fara yfir kaflann geturðu spurt: „Hvenær hefurðu um 15 mínútur aflögu til að fara yfir næsta kafla?“

„Margir eiga Biblíu en gera sér ekki grein fyrir því að hún hefur að geyma svör við þeim mikilvægu spurningum sem við öll höfum um framtíðina. Með því að nota þetta námsrit [Kröfubæklinginn eða Þekkingarbókina] í um það bil klukkustund á viku getur þú á örfáum mánuðum öðlast undirstöðuþekkingu á Biblíunni. Það væri mér ánægja að fá að sýna þér hvernig námið fer fram.“

„Ég er hingað komin(n) til að bjóða þér ókeypis heimabiblíunámskeið. Í rúmlega 200 löndum taka fjölskyldur sér tíma til að ræða saman um Biblíuna. Ef ég má þá langar mig að sýna þér á fáeinum mínútum hvernig slíkar umræður fara fram. Við getum notað einhverja af þessum fyrirsögnum sem umræðugrundvöll. [Sýndu efnisyfirlitið í Þekkingarbókinni.] Hver finnst þér vera sérstaklega áhugaverð?“ Bíddu eftir að viðmælandi þinn velji kafla. Flettu upp þeim kafla og byrjaðu námið frá fyrstu tölugreininni.

„Ég held ókeypis biblíunámskeið og hef möguleika á að bæta við mig nemendum. Á námskeiðunum er þetta biblíunámsrit notað. [Sýndu Þekkingarbókina.] Það tekur aðeins nokkra mánuði og veitir svör við spurningum eins og: Hvers vegna leyfir Guð þjáningar? Hvers vegna hrörnum við og deyjum? Hvað verður um látna ástvini okkar? Og hvernig getum við nálægt okkur Guði? Má ég sýna þér hvernig námskeiðið fer fram?“

Ef þú hefur fundið áhrifaríka kynningu, sem vekur áhuga, skaltu fyrir alla muni nota hana áfram! Aðhæfðu hana aðeins ritatilboði hvers mánaðar.