“Ẹme Ọghẹnẹ [O] Wo Ẹgba”

“Ẹme Ọghẹnẹ ọ rrọ uzuazọ o te je wo ẹgba.”—HIB. 4:12.

1. Ẹvẹ ma sae rọ ta avọ imuẹro nọ Ẹme Ọghẹnẹ o wo ẹgba? (Rri uwoho nọ o rrọ emuhọ uzoẹme na.)

MAI idibo Jihova ma riẹ vevẹ nọ Ẹme riẹ nọ ọ rọ kẹ ahwo-akpọ na, “ọ rrọ uzuazọ o te je wo ẹgba.” (Hib. 4:12) Oware nọ o via kẹ omai otujọ buobu no o kẹ imuẹro nọ Ebaibol na o gine wo ẹgba nọ o re ro nwene uzuazọ ahwo. Ibe Ileleikristi mai jọ nẹnẹ a jọ iji, egba ivovavovo, hayo igberẹ vẹre. Efa i wo ẹnyaharo gaga evaọ akpọ na, rekọ a tẹ ruẹ nọ oware jọ u bi vru mi ai. (Ọtausi. 2:3-11) Noke toke, otu jọ nọ o wọhọ nọ a gbe wo ẹruore evaọ uzuazọ họ, a bi duku edhere uzuazọ ẹkwoma obufihọ ẹgba nọ Ẹme Ọghẹnẹ o re ro nwene ohwo. Ẹsejọhọ who se iku ahwo otiọnana jọ no nọ e were owhẹ gaga evaọ uzoẹme na “Ebaibol na O re Nwene Uzuazọ Ohwo,” nọ o be hae romavia ẹsikpobi evaọ emagazini Uwou-Eroro Na. Yọ whọ ruẹ vuhumu nọ ohwo ọ tẹ jẹ uzẹme na rehọ je zihe ruọ Oleleikristi no, Ebaibol o re gbe fiobọhọ kẹe ru inwene nọ oke o be nyaharo na.

2. Ẹvẹ ẹgba Ẹme Ọghẹnẹ o ro dhesẹ omavia evaọ ikpe-udhusoi ọsosuọ?

² Kọ u re gbe omai unu inọ ahwo buobu nẹnẹ a ru inwene ilogbo nọ a wuhrẹ Ẹme Ọghẹnẹ no? Vievie! Onana o rẹ kareghẹhọ omai Ileleikristi ikpe-udhusoi ọsosuọ nọ i wo ẹruore obọ odhiwu. (Se 1 Ahwo Kọrint 6:9-11.) Nọ Pọl ukọ na ọ fodẹ oghẹrẹ ahwo jọ nọ a te ruọ Uvie Ọghẹnẹ hẹ no, o fibae nọ: “Ere whai otujọ wha jọ.” Rekọ Ikereakere na gbe ẹzi ọfuafo Ọghẹnẹ o fiobọhọ kẹ ai ru inwene nọ i fo. Nọ ejọ e make jẹ uzẹme na rehọ no, a thọ izi ilogbo jọ nọ u kpomahọ usu rai kugbe Jihova yoyoma. Wọhọ oriruo, Ebaibol na ọ fodẹ Oleleikristi ikpe-udhusoi ọsosuọ jọ nọ a sino ukoko, rekọ nọ a zihe ziọ ukoko na uwhremu na. (1 Kọr. 5:1-5; 2 Kọr. 2:5-8) Kọ o gbẹ be kẹ omai uduotahawọ nọ ma te roro kpahe ebẹbẹ sa-sa nọ ibe Ileleikristi mai a rẹriẹ ovao dhe je fi kparobọ no avọ obufihọ Ẹme Ọghẹnẹ?

3. Eme ma te ta kpahe evaọ uzoẹme nana?

³ Nọ orọnọ Ẹme Ọghẹnẹ o wo ẹgba gaga yọ ma wo rie na, o gwọlọ nọ ma rẹ rehọ iẹe ru iruo ziezi. (2 Tim. 2:15) Fikiere, ma te jọ uzoẹme nana ta kpahe epanọ ma sae rọ rehọ ẹgba Ẹme Ọghẹnẹ ruiruo ziezi (1) evaọ uzuazọ mai, (2) nọ ma tẹ rrọ usiuwoma ota gbe (3) okenọ ma te bi ru ẹme evaọ eplatfọmo. Onana u ti fiobọhọ kẹ omai wo edẹro gbe uyoyou kẹ Ọsẹ obọ odhiwu mai viere, ọnọ o bi wuhrẹ omai re ma wo erere kẹ omobọ mai.—Aiz. 48:17.

EVAỌ UZUAZỌ MAI

4. (a) Re Ẹme Ọghẹnẹ ọ sai wiruo evaọ uzuazọ mai, eme o gwọlọ? (b) Ẹvẹ whọ be sai ro wo oke kẹ isase Ebaibol ra?

⁴ Re Ẹme Ọghẹnẹ ọ sai ruiruo evaọ uzuazọ mai, o gwọlọ nọ ma re sei kẹdẹ kẹdẹ. (Jos. 1:8) Uzẹme na họ, uvẹ o be hae jọ kẹ omai otujọ tere he fiki eware buobu nọ ma bi ru kẹdẹ kẹdẹ. Dede na, isase Ebaibol ikẹdẹ kẹdẹ u wuzou vi oware nọ ma rẹ kuvẹ re oware ofa jọ kpobi o rehọ ẹta riẹ. (Se Ahwo Ẹfisọs 5:15, 16.) Idibo Jihova buobu nẹnẹ a duku idhere sa-sa nọ a be hai ro wo oke kẹ isase Ebaibol ikẹdẹ kẹdẹ rai no. Otujọ a be hai ru onana evaọ ohiohiẹ, owọwọ, hayo udevie okpẹdoke na. Oma o be hae jarae wọhọ ọso-ilezi na nọ o kere nọ: “O, epanọ me you uzi ra! O rọ eva iroro mẹ kẹdẹ kẹdẹ.”—Ol. 119:97.

5, 6. (a) Fikieme eroro-odidi o ro wuzou? (b) Ẹvẹ ma sai ro roro didi ziezi? (c) Ẹvẹ Ebaibol na nọ whọ be hai se je roro didi kpahe u ro fiobọhọ kẹ owhẹ no?

⁵ Ma te se oria Ebaibol no, u wuzou re ma hai roro didi kpahe oware nọ ma se. (Ol. 1:1-3) Enẹ ma te sai ro fi oria nọ ma se na hiruo kẹ omama. O tẹ make rọnọ Ebaibol nọ o rrọ omai obọ hayo okwakwa ekọmputa ma be jọ sei, utee mai o rẹ jọ epanọ eware nọ ma bi se i re ro te omai udu.

⁶ Ẹvẹ ma sai ro roro didi ziezi? Oware nọ u fiobọhọ kẹ otujọ buobu no họ, a te se oria ikere jọ no a vẹ fọ jẹ nọ omarai nọ: ‘Eme oria nana u wuhrẹ omẹ kpahe Jihova? Idhere jọ vẹ me bi ro fi oria ikere nọ me se no na hiruo evaọ uzuazọ mẹ? Kọ abọ vẹ u fo nọ mẹ rọ jọ ru ẹnyaharo?’ Nọ ma tẹ be hae lẹ je roro didi kpahe Ẹme Ọghẹnẹ, oma o te wọ omai fi ithubro riẹ hiruo ziezi. Enẹ ma rẹ rọ kuvẹ re ẹgba Ẹme Ọghẹnẹ ọ jọ oma mai ruiruo.—2 Kọr. 10:4, 5.

EVAỌ USIUWOMA OTA

7. Ẹvẹ ma sae rọ rehọ Ẹme Ọghẹnẹ ruiruo ziezi evaọ usiuwoma ota mai?

⁷ Eme o rẹ sai fiobọhọ kẹ omai rọ Ẹme Ọghẹnẹ ruiruo ziezi evaọ usiuwoma ota mai? U wuzou gaga re ma hai se no Ebaibol na ze ẹsikpobi nọ ma be ta usiuwoma kẹ ahwo hayo wuhrẹ ai Ebaibol na. Oniọvo jọ ọ ta nọ, “Otẹrọnọ whẹ avọ Jihova wha rrọ usiuwoma ota nuwou ruọ uwou, whọ ọvo whọ te ta ẹme manikọ whọ te kuvẹ nọ ọ ta ẹme re?” Otọ ẹme riẹ na họ: Ma tẹ be hai se no Ebaibol na ze ẹsikpobi, ma be kuvẹ re Jihova ọ ta ẹme kẹ ohwo nọ ma be ta usiuwoma kẹ. Ma tẹ salọ oria ikere nọ u kiehọ uyero ohwo, u re wo ẹgba vi ẹme obọmai jọ kpobi nọ ma hae te ta. (1 Tẹs. 2:13) Nọ omara nọ, ‘Kọ mẹ be hae daoma se no Ebaibol na ze kẹ ohwo kpobi nọ mẹ be ta usiuwoma kẹ?’

8. Ma tẹ be ta usiuwoma, fikieme o rọ gwọlọ nọ ma re ru oria ikere nọ ma se vẹ?

⁸ Dede na, orọnikọ ma te se oria Ebaibol kẹ ohwo yọ u re no ho. Fikieme? Keme ahwo buobu nẹnẹ a riẹ oware ovo evaọ Ebaibol na ha. Yọ epọvo na o jọ re evaọ ikpe-udhusoi ọsosuọ. (Rom 10:2) Fikiere ajọ ma du roro nọ ma tẹ nwani se oria ikere jọ kẹ ohwo yọ ọ riẹ oware nọ o ta no ho. O gwọlọ nọ ma rẹ romatotọ se, je fiẹgbahọ ugogo oware nọ u kiekpahe ẹme nọ ma be ta na, ma sae wariẹ tube se ugogo ẹme na dede, kẹsena ma ve ru ei vẹ kẹ ohwo na. Ma tẹ be hai ru ere, u ti ru nọ Ẹme Ọghẹnẹ o ti ro te udu ohwo nọ ma be ta usiuwoma kẹ.—Se Luk 24:32.

9. Taure ma te ti se oria ikere, ẹvẹ ma sae rọ ta ẹme nọ o re fi adhẹẹ họ Ebaibol na? Kẹ oriruo.

⁹ O tẹ jẹ gwọlọ nọ ma rẹ ta ẹme nọ u re fi adhẹẹ họ Ebaibol na, taure ma te sei. Wọhọ oriruo, ma sae ta nọ, “Joma rri oware nọ Ọnọ ọ ma omai ọ ta kpahe ẹme nana.” Otẹrọnọ ohwo nọ ma bi lele ta ẹme yọ Oleleikristi hi, ma sae ta nọ, “Muẹrohọ oware nọ Ikereakere Ẹri na e ta.” Hayo otẹrọnọ ohwo nọ ma be ta usiuwoma kẹ na yọ ohwo nọ ọ riẹ obe gaga, ma sae nọe nọ, “Kọ who yo ohare anwae nana no ẹdẹjọ?” Joma kareghẹhọ nọ duọ ohwo duọ ọvuọ ẹgwọlọ riẹ, fikiere ma re nwene onaa usiuwoma ota mai lele uyero ohwo nọ ma nyaku.—1 Kọr. 9:22, 23.

Isẹri Jihova nọ e be rọ Ebaibol wuhrẹ ohwo evaọ usiuwoma ota

10. (a) Kẹ oriruo oware nọ oniọvo jọ o ru ẹdẹjọ. (b) Ẹvẹ whọ rọ ruẹ ẹgba Ẹme Ọghẹnẹ no evaọ usiuwoma ota ra?

¹⁰ Ahwo buobu a ruẹ no nọ a te se Ebaibol na kẹ ohwo evaọ usiuwoma ota, u re fiobọhọ gaga. Joma ta kpahe oriruo jọ. Ẹdẹjọ oniọvo-ọmọzae jọ o zihe bru ọzae jọ nọ ọ be hai se emagazini mai anwọ ikpe buobu nọ i kpemu. Rekọ ukpenọ oniọvo na ọ kẹe Uwou-Eroro ọkpokpọ na ọvo, o te se oria ikere jọ evaọ Uwou-Eroro Na kẹe. O se obe 2 Ahwo Kọrint 1:3, 4 nọ o ta nọ: “Ọsẹ nọ o wo ohrọ-oriọ gbe Ọghẹnẹ nọ ọ rẹ kẹ omosasọ evaọ oghẹrẹ uyero kpobi [na,] ọ rẹ sasa omai oma evaọ uye kpobi nọ ma rrọ.” Oria ikere na u duobọte ọzae na udu te epanọ ọ rọ vuẹ oniọvo na nọ jọ ọ wariẹ sei. Ọzae na ọ ta nọ tei te aye riẹ a ginẹ gwọlọ omosasọ, onana u ru nọ ọ rọ rọwo nọ a wuhrẹ Ebaibol kugbei. Kọ onana o gbẹ kẹ owhẹ imuẹro nọ Ẹme Ọghẹnẹ o wo ẹgba evaọ usiuwoma ota mai?—Iruẹru 19:20.

WHO TE BI RU ẸME EVAỌ EPLATFỌMO

11. Owha-iruo vẹ inievo-emezae a wo nọ a te bi ru ẹme evaọ eplatfọmo?

¹¹ O rẹ were omai kpobi gaga re ma kpohọ iwuhrẹ ikoko gbe ikokohọ. Ugogo oware nọ o be lẹliẹ omai nya họ re ma gọ Jihova. Ẹme Ọghẹnẹ nọ ma rẹ jọ obei wuhrẹ o be hai fiobọhọ kẹ omai gaga re. Fikiere uvẹ-ọghọ ulogbo o rrọ nọ oniọvo jọ o te wo ẹme. Evaọ oke ovona, jọ a kareghẹhọ nọ onana yọ owha-iruo nọ a re se gboja ziezi. (Jem. 3:1) A rẹ ruẹ nọ oware nọ a bi wuhrẹ ẹsikpobi u re no Ebaibol ze jẹ jọ gbagba. A tẹ kẹ owhẹ ẹme, ẹvẹ whọ sae rọ rehọ Ẹme Ọghẹnẹ ruiruo ziezi?

Oniọvo nọ ọ be rọ Ebaibol ru ẹme evaọ eplatfọmo

12. Ẹvẹ oniọvo nọ o bi ru ẹme ọ sae rọ ruẹ nọ Ebaibol na o bi wuhrẹ no ze?

¹² Daoma ruẹ nọ oware nọ who bi wuhrẹ kpobi u no Ikereakere na ze. (Jọn 7:16) Ẹvẹ whọ sai ro ru onana? Edhere jọ họ, whọ rẹ yọroma re iriruo, etadhesẹ, oghẹrẹ nọ whọ rẹ rọ ta ẹme, gbe eware efa i gbe si iroro ahwo na no oria ikere nọ who se he. U te no ere no, kareghẹhọ nọ orọnikọ who re se oria ikere buobu taure a tẹ te riẹ nọ Ebaibol who bi wuhrẹ no ze he. Uzẹme riẹ họ, who te se eria Ebaibol bu hrọ o rẹ sai ru nọ ahwo nọ a be gaviezọ kẹ owhẹ a gbe ro kru oware ovuọvo dhobọ họ. Fikiere salọ oria ikere nọ i wuzou nọ who ti se, romatotọ se ai, rọ iriruo ru ai vẹ, je dhesẹ oghẹrẹ nọ a sai ro fi ai hiruo ziezi. (Neh. 8:8) Otẹrọnọ a kẹ owhẹ omaa-ẹmeọta, romatotọ sei jẹ riẹ ugogo oware nọ o be ta kpahe, gbe Ikereakere nọ e riẹe eva. Daoma riẹ oghẹrẹ nọ oria ikere nọ e riẹe eva i ro kiekpahe ẹme na. Kẹsena whọ vẹ salọ eria ikere nọ i ti ru ugogo ẹme na lahwe. (Whọ rẹ sae ruẹ idhere jọ nọ whọ sai ro ru onana ziezi evaọ obe na Wo Erere no Ewuhrẹ ọ Isukulu Odibọgba Esuo-Ọghẹnẹ Ze, evaọ uwuhrẹ avọ 21 rite 23.) Oware nọ o mai wuzou kpobi họ, lẹ se Jihova re o fiobọhọ kẹ owhẹ rọ Ẹme riẹ wuhrẹ ziezi.—Se Ẹzra 7:10; Itẹ 3:13, 14.

13. (a) Ẹvẹ oria ikere nọ a jọ obọ ewuhrẹ se u ro duobọte oniọvo-ọmọtẹ jọ? (b) Ẹvẹ oria ikere nọ a jọ obọ ewuhrẹ se u ro fiobọhọ kẹ owhẹ no?

¹³ Oria ikere jọ nọ a jọ obọ ewuhrẹ se u duobọte oniọvo-ọmọtẹ jọ udu gaga evaọ obọ Australia. Dede nọ ọ rọ ẹro ruẹ eware iyoma buobu evaọ okenọ ọ jọ emaha, ovuẹ Ebaibol na u nwene uzuazọ riẹ onọ u ru nọ ọ rọ roma mudhe kẹ Jihova jẹ họ-ame. Dede na, o be hae jọ bẹbẹ kẹe re ọ rọwo nọ Jihova o gine you rie. Rekọ nọ oke o be nyaharo na, u te ti mu ei ẹro nọ Jihova o gine you rie. Eme o fiobọhọ kẹe nwene eriwo riẹ? Onana o via nọ o roro didi kpahe oria ikere jọ nọ a se evaọ obọ ewuhrẹ, jẹ ruẹ epanọ oria ikere yena u ro wobọ kugbe eria efa evaọ Ebaibol na.a Kọ u wo ẹdẹjọ nọ a jọ ewuhrẹ hayo okokohọ se oria ikere jọ nọ u duobọte owhẹ no?—Neh. 8:12.

14. Ẹvẹ ma sai ro dhesẹ nọ ma wo edẹro kẹ Ẹme Jihova?

¹⁴ Kọ u gbe fo re ma yere Jihova nọ ọ rọ kẹ omai Ẹme riẹ Ebaibol na? Orọnikọ ọ rehọ Ẹme riẹ kẹ omai ọvo ho, rekọ o bi ru eyaa nọ ọ ya kpahe Ẹme riẹ na gba inọ ọ rẹ jọ bẹdẹ. (1 Pita 1:24, 25) Ajọ ma hai se Ẹme Ọghẹnẹ kẹdẹ kẹdẹ, fi iei hiruo evaọ uzuazọ mai, jẹ rehọ iẹe fiobọhọ kẹ amọfa. Enẹ ma re ro dhesẹ nọ ma wo edẹro kẹ okẹ oghaghae nana, je you Jihova nọ ọ kẹ omai okẹ na.

a Rri ẹkpẹti na “U Nwene Eriwo Mẹ.”

“U Nwene Eriwo Mẹ”

Evaọ ikpe buobu nọ Victoria ọ họ-ame no, o jọ bẹbẹ kẹe re ọ rọwo nọ Jihova o gine you rie. Eme o fiobọhọ kẹe nwene eriwo riẹ uwhremu na? Victoria ọ ta nọ:

“Onana o via nọ ikpe ikpegbisoi e ruemu no, rono okenọ mẹ rọ họ-ame. Ẹdẹjọ nọ oniọvo jọ ọ jẹ kẹ ovuẹ ogbotu evaọ obọ Ọgwa Uvie . . . , o se obe Jemis 1:23, 24. A jọ oria ikere yena rọ Ẹme Ọghẹnẹ dhesẹ ughẹgbe nọ ma sae jọ ruẹ oma mai oghẹrẹ nọ Jihova ọ be ruẹ omai. Me te je roro sọ oghẹrẹ nọ Jihova o bi rri omẹ me bi rri oma mẹ na. Mẹ kaki se ẹme nana gboja ha. Me gbe je roro nọ Jihova ọ rẹ sai you omẹ hẹ.

“Edẹ jọ nọ i lele i rie, me te se oria ikere jọ nọ u nwene uzuazọ mẹ. Oria yena họ Aizaya 1:18, nọ Jihova ọ jọ ta nọ: ‘Wha nyaze, ma jẹ iroro kugbe, . . . dede nọ izieraha rai e ware wọhọ azẹ, e rẹ te fo wọhọ ukpoiwo.’ O jọ omẹ oma nọ Jihova ọ be ta kẹ omẹ nọ: ‘Nyaze Vicky, re ma jiroro kugbe. Mẹ riẹ owhẹ, Mẹ riẹ izieraha ra, Mẹ riẹ udu ra, yọ Me you owhẹ.’

“Mẹ sae wezẹ aso yena ha. Me gbe je roro nọ Jihova ọ rẹ sai you omẹ hẹ, rekọ me te mu idhe ẹtanigbo Jesu họ eroro kpahe. Idudhe na, me te vuhumu nọ kpakọ Jihova o bi thihakọ kẹ omẹ anwọ ẹdẹ, yọ ọ be rọ idhere buobu dhesẹ kẹ omẹ no o you omẹ. Ghele na, o tẹ wọhọ ẹsenọ mẹ be ta kẹe nọ: ‘Uyoyou ra u te obo mẹ hẹ. Idhe ẹtanigbo Ọmọ ra e sae voro izieraha mẹ no ho.’ O tẹ wọhọ nọ me bi gbolo idhe ẹtanigbo na zihe kẹ Jihova. Rekọ obọnana, nọ me roro kpahe idhe ẹtanigbo na no, mẹ tẹ ruẹ nọ Jihova o gine you omẹ.”