Ikokohọ Ubrotọ Mai I bi Ru Iwuhrẹ Uzẹme na Vẹ
1. Didi eware emọ Izrẹl a jẹ hae kareghẹhọ evaọ ehaa ẹgbukpe rai?
1 Isiasa ẹgbukpe emọ Izrẹl a jẹ hai kokohọ kẹ ehaa. Dede nọ ezae gbe emezae na ọvo o gbahọ inọ a re kpohọ ehaa na, ahwo buobu a jẹ hae wha iviuwou rai kpobi kpohọ Jerusalẹm re a wo omaweromẹ ehaa na. (Izie. 16:15, 16) Emọ Izrẹl a jẹ hae jọ ikokohọ yena wuhrẹ je roro kpahe eware nọ i re fi obọ họ kẹ ae gọ Ọghẹnẹ. Eme họ eware itieye na jọ nọ a jẹ hae ta ẹme kpahe? Ojọ họ, Jihova ọ vọ avọ ọghọruo. (Izie. 15:4, 5) Ofa họ, a rẹ sae rẹroso iẹe inọ ọ te kpọ ae jẹ sẹro rai. (Izie. 32:9, 10) U te no ere no, ikokohọ na e jẹ hae lẹliẹ emọ Izrẹl kareghẹhọ inọ Jihova ọ salọ e rai re a jọ ahwo riẹ, fikiere a re koko izi ikiẹrẹe riẹ. (Izie. 7:6, 11) Nẹnẹ, ma be jọ ikokohọ ubrotọ mai wuhrẹ eware itieye na.
2. Ẹvẹ ikokohọ ubrotọ i bi ro ru ẹme Ọghẹnẹ vẹ?
2 A rẹ Jarai Ru Ẹme Ọghẹnẹ Vẹ: A rẹ jọ ikokohọ ubrotọ mai ru eme, edrama, idhesẹvia, gbe ekiẹriwo nọ i re fi obọ họ kẹ omai riẹ otọ eme nọ e rrọ Ebaibol na. (Jọn 17:17) A ruẹrẹ eware buobu kpahe no kẹ okokohọ ubrotọ nọ ma te nya na. Ukoko Jihova o be ruẹrẹ eme nọ i kiehọ uyero ahwo evaọ kabọ kabọ akpọ na họ. (Mat. 24:45-47) Kọ oma o gbẹ be kpakpa owhẹ re who kpohọ okokohọ na je yo eme nọ a ti ru?
3. Ẹvẹ ma sai ro wo erere ziezi no okokohọ na ze?
3 Re ma wo erere ziezi no okokohọ na ze, ma rẹ nya edẹ esa na gba, jẹ gaviezọ ziezi. Orọnọ who ri mi uvẹ hẹ, jọ oke onana mi ohwo nọ ọ rehọ owhẹ iruo uvẹ. Evaọ aso kpobi taure ẹdẹ okokohọ o te ti te, wezẹ doma, re whọ seba ẹwezẹ evaọ okenọ a ti ruẹme. Ibuobu a ruẹ nọ a tẹ tẹrovi ọnọ o bi ru ẹme na, jẹ be hai kere eme fihotọ u re fi obọ họ. Whọ jọ ifonu ra ọ whaha owhẹ gbe amọfa ezọgaviẹ hẹ. Whaha ẹmeọta, ifonu nọ a re ro vi uwou, emuọriọ, gbe idieda evaọ okenọ a bi ru ẹme.
4. Ẹvẹ esẹgbini a re ro fi obọ họ kẹ emọ rai wo erere no okokohọ na ze?
4 Evaọ urere ikpe ihrẹ kpobi, nọ emọ Izrẹl a te bi kpohọ Ehaa Iwoudhu, a rẹ wha “emaha” rai lele oma “re a yo je wuhrẹ.” (Izie. 31:12) U re woma kẹhẹ re ma ruẹ iviuwou nọ a keria oria ọvo avọ emọ rai nọ e be gaviezọ! Kowọwọ kowọwọ nọ wha te te uwou, wha rri eme nọ wha kere fihotọ jẹ ta ẹme kpahe eme nọ e mae were owhai. Fikinọ “ugheghẹ o rọ eva ọmaha,” u fo re esẹgbini a muẹrohọ emọ rai, evaọ oke eriosehọ gbe obọ iwou nọ a wohọ, orọnikọ a re ‘vu ai wa’ ha.—Itẹ 22:15; 29:15.
5. Ẹvẹ emamọ uruemu mai o rẹ rọ lẹliẹ iwuhrẹ mai si ahwo urru?
5 Emamọ Uruemu Mai O rẹ Lẹliẹ Iwuhrẹ Mai Si Ahwo Urru: Emamọ uruemu nọ ma re dhesẹ evaọ ẹwho okokohọ na o rẹ lẹliẹ iwuhrẹ mai si ahwo urru. (Tait. 2:10) Ahwo nọ i wo ehọtẹle gbe iwou nọ ma wohọ a re muẹrohọ omai nọ ma te bi koko izi nọ a fihọ, thihakọ kẹ enọ i bi ru iruo evaọ etẹe, jẹ romakpotọ ta ẹme kẹ ae. (Kọl. 4:6) Ukpe nukpo nọ inievo na a jẹ gwọlọ iwou kẹ ahwo evaọ ehọtẹle jọ, ọnọ o wuzou enọ e rẹ zẹ emu ọ ta nọ: “Ma gwọlọ nọ ahwo rai a hae nyaze ti wohọ ehọtẹle mai keme a wo emamọ uruemu. A rrọ wowou je wo omaurokpotọ, yọ a rẹ rẹrote eware ehọtẹle na jẹ rọ adhẹẹ kẹ iruiruo mai.”
6. Ẹvẹ ẹgọ mai o sai ro ru ahwo wo isiuru kpahe ẹme Ọghẹnẹ evaọ ẹwho okokohọ?
6 Ma tẹ sa ebaje okokohọ mai mu, ọ rẹ lẹliẹ ahwo riẹ kpahe okokohọ na, fi obọ họ kẹ inievo efa vuhu omai, jẹ maero o rẹ ta usiuwoma kẹ amọfa. Ahwo nọ e rrọ ẹwho okokohọ na a te ruẹ nọ ohwo kpobi nọ ọ sa ebaje mu ọ sẹ emamọ osẹ orọnikọ osẹ owhọwhọhọ gbe erọ ọfariẹ-ogbe akpọ na ha. (1 Tim. 2:9, 10) Fikiere u fo re ma sẹ osẹ nọ o rrọ kpatiẹ evaọ ẹwho okokohọ na, makọ okenọ ma bi kpohọ oria nọ ma bi ti wohọ. Ma tẹ wha inika gbe ipolo nya u ti bru ọghọ họ okokohọ na ha. Makọ eva Ọgwa Okokohọ hayo oria ọfa a be jọ ru okokohọ na, ẹgọ mai o rẹ jọ kpatiẹ. Ma tẹ gwọlọ nwene ewu evaọ okenọ okokohọ o te kuhọ no re ma nyae re emu, ma rẹ gbẹ kareghẹhọ inọ okokohọ ma nyaze, fikiere ẹgọ mai ọ rẹ jọ kpatiẹ ghele.
7. Edhere jọ vẹ ma sai ro wo omawere okugbe nọ ọ rrọ ukoko Jihova nọ ma te kpohọ okokohọ?
7 Evaọ ehaa ẹgbukpe na, emọ Izrẹl a jẹ hai kuomagbe ibe eg’Ọghẹnẹ nọ i no ewho efa gbe erẹwho efa ze, yọ onana u je ru ai wo okugbe. (Iruẹru. 2:1, 5) Amọfa a rẹ ruẹ obọdẹ okugbe nọ ọ rrọ udevie mai nọ ma te kpohọ ikokohọ ubrotọ. Yọ onana o rẹ were ae gaga. (Ol. 133:1) Ukpenọ ma re no ọgwa na kpobọ otafe nyae dẹ emu evaọ oke eriosehọ uvo na, u re woma re ma wha ememu jọ nya, re ma rọ uvẹ yena lele inievo efa nọ e keria kẹle omai gbiku!
8. Fikieme ma re ro ru iruo evaọ okokohọ na nọ uvẹ utioye u te rovie kẹ omai?
8 Oma o rẹ were ahwo nọ a tẹ ruẹ ikokohọ mai nọ a ruẹrẹhọ kpatiẹ, maero nọ a te yo nọ unevaze a ro ru eware na kpobi. Kọ whọ te rọ unevaze ru iruo evaọ okokohọ na? (Ol. 110:3) Esẹgbini jọ a rẹ rehọ emọ rai gboma ru iruo okokohọ na re a rọ ere wuhrẹ ai epanọ a rẹ rọ unevaze ru iruo. Otẹrọnọ whọ rẹ dhomovuọ, who te kuomagbe iruo okokohọ na u ti fi obọ họ kẹ owhẹ riẹ inievo efa. Oniọvo-ọmọtẹ jọ ọ ta nọ: “U te no ahwo uviuwou mẹ gbe umutho egbẹnyusu mẹ no, mẹ riẹ inievo efa evaọ okokohọ na ha. Rekọ nọ me ru iruo orufuọ, mẹ tẹ te riẹ inievo buobu. O jọ oware omaweromẹ gaga!” Iruo okokohọ na nọ ma re kuomagbe u re fi obọ họ kẹ omai wo egbẹnyusu ekpokpọ, yọ onana o te wha oghọghọ ulogbo se omai. (2 Kọr. 6:12, 13) Otẹrọnọ whọ re dawo iẹe ẹdọvo ho, nọ ekpako ukoko rai epanọ whọ sae rọ jọ omọvo enọ e rẹ fialoma via.
9. Ẹvẹ ma ti ro zizie ahwo kpohọ okokohọ ubrotọ na?
9 Zizie Amọfa Ze ti Yo Iwuhrẹ Uzẹme: Wọhọ epaọ anwẹdẹ, eka esa taure okokohọ na o te ti te, ma ti zizie ahwo. O tẹ lọhọ, ukoko kpobi o rẹ daoma ghale obe-uzizie na nya ẹkwotọ rai re. (Rri ẹkpẹti na “Ẹvẹ Ma te rọ Kẹ Ahwo Obe-Uzizie na?”) Ma rẹ wha enọ ma ghale kiọkọ kpohọ okokohọ na. Ma te rehọ ai zizie ahwo nọ ma nyaku evaọ ẹwho okokohọ na.
10. Kẹ iriruo nọ i dhesẹ nọ ahwo nọ ma be hai zizie na a be hae ziọ ikokohọ mai?
10 Kọ ahwo nọ ma be hai zizie na a be hae nyaze? Evaọ okokohọ jọ, oniọvo jọ nọ ọ rẹ ruẹrẹ ahwo họ oria ẹkeria o dhesẹ agbara kẹ ọzae-avọ-aye jọ nọ a nyaze. A ta kẹ oniọvo na inọ obe-uzizie na o lẹliẹ e rai roro nnọ “okokohọ na o ti woma.” A dhẹ ikilomita nọ i bu vi 320 kpohọ okokohọ na! Ọzae ọfa nọ oniọvo-ọmọtẹ mai ọ kẹ obe-uzizie evaọ usiuwoma ota n’uwou ruọ uwou o dhesẹ isiuru kpahe okokohọ na. Fikiere oniọvo na ọ tẹ romatotọ dhesẹ eme nọ e rrọ obe-uzizie na kẹe. Emedẹ jọ e vrẹ no, ọ tẹ jọ okokohọ na ruẹ ọzae na avọ egbẹnyusu riẹ nọ a kru obe nọ a siobọno evaọ okokohọ na!
11. Fikieme u je wuzou re ma kpohọ ikokohọ ubrotọ mai?
11 Ehaa ẹgbukpe na e jọ emamọ ọruẹrẹfihotọ nọ Jihova o ru re u fi obọ họ kẹ emọ Izrẹl “gọ e uvi ẹgọ eva orọwọ.” (Jos. 24:14) Ere ọvona, ekpohọ ikokohọ ubrotọ kukpe kukpe u re fi obọ họ kẹ omai ‘nya evaọ uzẹme na’ jẹ gọ Ọghẹnẹ ziezi. (3 Jọn 3) Ajọ Jihova o fi obọ họ kẹ ahwo kpobi nọ i you iwuhrẹ uzẹme na re a kpohọ okokohọ ubrotọ na je wo erere noi ze!
[Ẹme nọ a fi ẹgba họ nọ ọ rrọ ẹwẹ-obe avọ 2]
Emamọ uruemu nọ ma re dhesẹ evaọ ẹwho okokohọ na o rẹ lẹliẹ iwuhrẹ mai si ahwo urru
[Ẹme nọ a fi ẹgba họ nọ ọ rrọ ẹwẹ-obe avọ 3]
Eka esa taure okokohọ na o te ti te, ma ti zizie ahwo
[Ẹkpẹti nọ o rrọ ẹwẹ-obe avọ 2-4]
Ekareghẹhọ Okokohọ Ubrotọ 2012
◼ Oke Ọruẹrẹfihotọ: Ọruẹrẹfihotọ okokohọ na ọ te hai muhọ evaọ 9:20 a.m. evaọ edẹ esa na. Nọ ikporakporo i te muhọ no, mai kpobi ma rẹ keria ọvuọ oria riẹ re ọruẹrẹfihotọ na ọ ruẹsi muhọ kpatiẹ. Ọruẹrẹfihotọ Edisoi-Oka gbe Ẹdẹ-Ọmaha i ti kuhọ evaọ 4:55 p.m., ọrọ Ẹdoka o ve ti kuhọ evaọ 3:40 p.m.
◼ Eria nọ A rẹ Dhẹ Imoto, Emẹshini, gbe Idhighere Fihọ: Evaọ eria ikokohọ kpobi, inievo jọ e te jariẹ nọ e te kpọ ahwo evaọ eria nọ a rẹ dhẹ eware fihọ. Iviena ru lele ọkpọvio rai.—1 Kọr. 13:4, 5.
◼ Ẹrawọ Oria Ẹkeria: Ahwo nọ wha gbẹ ruọ omoto ọvona ze, hayo enọ wha gbẹ rrọ uwou ovona gbe emọ-uwuhrẹ Ebaibol ra ọvo whọ rẹ sae rawo ekpala kẹ.—1 Kọr. 13:5.
◼ Emu Uvo: Iviena wha emu uvo lele oma viukpenọ who re no ogege okokohọ na kpohọ otafe nyae gwọlọ emu dẹ evaọ etoke eriosehọ uvo. Whọ rẹ sae rehọ orawo-emu osese nọ who re fihọ otọ akpala rọ wha emu ra ze. Ma kuvẹ orawo-emu ulogbo, eglase, ilolo, gbe idẹro evaọ ogege okokohọ na ha.
◼ Okẹ Unevaze: Ma rẹ sai dhesẹ nọ ọruẹrẹfihotọ okokohọ na o da omai ẹro ẹkwoma ugho nọ ma re ro ru unevaze evaọ obọ okokohọ na rọ tha iruo akpọ-soso na uke. Echẹke kpobi (obe nọ a rẹ rọ rehọ igho evaọ ebanke) nọ a bi ro ru unevaze, a re kere fihọ iẹe nọ, a hwa ugho na kẹ “Watch Tower,” yọ a re kere iei eme ivẹ.
◼ Omonwa gbe Eware-Idudhe: Ẹyao hayo omonwa o tẹ romavia idudhe evaọ ogege okokohọ na, iviena vuẹ omọvo eruẹrẹahwohọ nọ ọ kẹle owhẹ re o fi obọ họ rehọ ohwo na kpohọ First Aid Department (Ẹko-Iruo Obufihọ Ọsosuọ) na, re inievo nọ e rrọ etẹe na a sai fi obọ họ kẹ ohwo na.
◼ Imu-Oyibo: Otẹrọnọ umu jọ o riẹ nọ whọ be hae rehọ, iviena wha enọ i re te owhẹ rehọ lele oma kpohọ okokohọ na, keme a te jọ obọ okokohọ na kẹ owhẹ umu utioye he. A re fi iguede gbe eware nọ a rọ kẹ ohwo nọ o wo ẹyao evẹ uduwo họ ikete erara evaọ oria okokohọ na hayo iwou nọ a wohọ họ, rekọ a re ku ai fiẹ thabọ re e siọ enwoma ba ẹwhase amọfa.
◼ Eviẹ: Re ohwo ọ siọ oma ba ẹnwa, o rẹ mai woma re ọ wha eviẹ ekpakpatiẹ nọ e rẹ jẹ ohwo nyonya ababọ omonwa.
◼ Eware nọ I re Gbore Awere nọ A rẹ Nẹ Fihọ Oma: O rẹ jọ oware ororokẹ re ma siọ isialẹ nọ i re gbore gaga ba ẹnẹ vọ oma, keme oghẹrẹ isialẹ jọ e rẹ kẹ ahwo jọ uye.—1 Kọr. 10:24.
◼ Efọmo Please Follow Up (S-43): A rẹ rehọ efọmo Please Follow Up ro kere evuẹ kpahe ohwo kpobi nọ o dhesẹ isiuru kpahe ovuẹ Uvie na evaọ etoke okokohọ na. Jọ iwhowho-uvie a wha ọvo hayo ivẹ lele oma kpohọ okokohọ na. A rẹ rehọ efọmo nọ a kere eme fihọ no kpohọ Book Room (Oria nọ A rẹ Jọ Rehọ Ebe) hayo rehọ iẹe kẹ okere-obe ukoko rai nọ wha te te uwou no.—Rri Odibọgba Uvie Mai ọrọ May 2011, ẹwẹ-obe avọ 3.
◼ Oria nọ A rẹ jọ Zẹ Emu gbe Ahwo nọ A rẹ Zẹ Eware Evaọ Otafe Ogba Okokohọ Na: Wha ọghọ se odẹ Jihova ẹkwoma uruemu uwoma ra. U fo ho re whọ nyae dẹ eware evaọ okenọ a bi ruẹme.
◼ Iwou nọ A re Wohọ: Nọ Ẹko-Iruo Iwou na a tẹ be kẹ omai iwou nọ ma re wohọ evaọ ogege okokohọ na hayo obọ otafe, u fo re ma dhesẹ ubi ẹzi na. (Gal. 5:22, 23) Ahwo nọ e rẹ gwọlọ obufihọ rai a rẹ jọ buobu. Fikiere o rẹ were ae nọ ma te dhesẹ ẹwo, ithihakọ, gbe ororokẹ. Eware jọ nọ ma sai jo dhesẹ ororokẹ họ:
1) Iviena whọ jọ uwou hayo ehọtẹle nọ a fi owhai họ rehọ ibriwou bu hrọ họ, yọ who fi ahwo họ ubruwou ọvo bu vi unu nọ a kẹ uvẹ riẹ hẹ.
2) Otẹrọnọ whọ jọ ehọtẹle hayo oria jọ rehọ uwou, whọ kpairoro vrẹ riẹ hẹ, ajokpanọ ẹbẹbẹ jọ ọ romavia idudhe, yọ whọ rẹ vuẹ ọnọ ọ be rẹrote uwou na.
3) There emu evaọ oria nọ a jọ kẹ uvẹ riẹ ọvo. Who there emu hu evaọ okenọ a bi ruẹme, keme onana u dhesẹ adhẹẹ kẹ eware abọ-ẹzi vievie he.—Luk 10:38-42.
4) Esẹgbini, wha rẹrote emọ rai ẹsikpobi evaọ oria kpobi nọ wha wohọ, makọ evaọ ehọtẹle hayo ogege okokohọ na.
5) Who wohọ uvumọ uwou evaọ ogege okokohọ na ha otẹrọnọ Ẹko-Iruo Iwou na o gbẹ rehọ iẹe kẹ owhẹ hẹ. Oria nọ a kẹ owhẹ ọvo who re wohọ. U fo ho re inievo-emezae e jọ oria nọ a rọ kẹ inievo-emetẹ te udevie aso hayo tubẹ wezẹ etẹe dede, yọ inievo-emetẹ a re ru ere gbe he.
6) Otẹrọnọ ẹbẹbẹ jọ ọ romavia evaọ oria nọ who wohọ, vuẹ Ẹko-Iruo Iwou na ababọ oke oraha re a sai fi obọ họ kẹ owhẹ.
◼ Iruo Unevaze: Ohwo kpobi nọ ọ gwọlọ ru iruo unevaze o re kpohọ Ẹko-Iruo Unevaze okokohọ na. Emọ nọ e re vrẹ ikpe 16 ha a rẹ sai ru iruo evaọ otọ ọsẹ hayo oni rai hayo ohwo nọ a be rria kugbe hayo omọfa nọ ahwo nana a kẹ uvẹ.
[Ẹkpẹti nọ o rrọ ẹwẹ-obe avọ 4]
Ẹvẹ Ma te rọ Kẹ Ahwo Obe-Uzizie Na?
Re ma sai ru ẹkwotọ mai re, ma rẹ ta ẹme na kpẹkpẹe. Ma te yere ohwo na no, ma sae ta nọ: “Ma be ghale obe-uzizie jọ. Ọra ọna. Whọ te jariẹ ruẹ oke gbe oria nọ ma te jọ ru okokohọ mai.” Ta ẹme na sasasa. Whọ tẹ be ghale obe-uzizie na evaọ Ẹdẹ-Ọmaha gbe Ẹdoka, whọ rẹ sae jẹ rọ emagazini kẹ ahwo nọ i dhesẹ isiuru.