Iwhowho Uvie A n’Iyẹrẹ

Eduku Ahwo eva Eria Iruo Rai

DIDI oware ikọ na Matiu, Pita, Andru, Jemis, gbe Jọn a wo kugbe? Jesu o se rai kpobi eva okenọ a jọ oria iruo rai. Pita, Andru, Jemis, gbe Jọn a je ru iruo okuori rai nọ Jesu o zizie ae, ta nọ: “Wha nya lele omẹ.” Matiu ọ jọ ọfisi osa-uzou nọ a zizie ei re ọ jọ olele Jesu.—Matiu 4:18-21; 9:9.

Isẹri nọ a re se kẹ ahwo eva oria iruo rai o rẹ sae kẹ erere. Nọ a vuhu onana mu, kẹle na Isẹri Jihova evaọ Japan a daoma gaga re a wo obọ evaọ abọ nana ọrọ odibọgba na. Eme o no rie ze? Nọ a ru iruo na te emerae jọ no, a wo idu izihebro buobu je mu iwuhrẹ Ebaibol 250 họ. Roro kpahe iyẹrẹ nọ e rrọ obotọ na.

Ọgbodibo oke-kpobi jọ evaọ Tokyo ọ nyaku ohwo jọ nọ o wuzou ehọtẹle, ọnọ o lele Osẹri jọ t’ẹme oware wọhọ ikpe 30 nọ i kpemu evaọ isukulu. Dede nọ ọnọ o wo uzou ehọtẹle na o wo otoriẹ eware buobu nọ a ta evaọ oke oyena ha, o wo isiuru kpahe Ebaibol na. Nọ a wariẹ kpare isiuru riẹ no na, ọ tẹ rọwo vẹrẹ vẹrẹ inọ ọ gwọlọ uwuhrẹ Ebaibol, a tẹ rehọ obe na Eriariẹ Nọ I Re Su Kpohọ Uzuazọ Ebẹdẹ Bẹdẹ ru uwuhrẹ kugbei.a Fibae, o te muọ Ebaibol họ ese kẹ omobọ riẹ owọwọ kpobi taure o te kiẹzẹ.

Ọkobaro obọdẹ jọ o weze kpohọ ọfisi jọ. Dede nnọ ọnọ o wuzou ọfisi na ọ jariẹ hẹ, uvovo aye nọ ọ tọlọ ifonu ọnọ o wuzou na ọ tẹ nọ inọ: “Kọ whọ sai lele omẹ t’ẹme?” Nọ a rehọ ifonu t’ẹme kpẹkpẹe no, aye na ọ tẹ nya lahwe, ọ tẹ ta nnọ o wo isiuru kpahe ese Ebaibol na. Ọkobaro obọdẹ na o te ru ọruẹrẹfihotọ re ọ wha Ebaibol ze je mu uwuhrẹ Ebaibol họ kugbei, onọ a jẹ hai ru evaọ oria ekẹloma jọ taure aye na o te ti kpohọ iruo.

Eva ọfisi ọfa, ọzae jọ ọ ruẹ ibe oruiruo riẹ nọ o mi emagazini ọ Uwou-Eroro Na gbe Awake! rekọ ọ tẹ nwani gbolo ai kufiẹ nọ Osẹri na ọ ruọ otafe no. Nọ ọzae na o te uwou, ọ tẹ ta kẹ aye riẹ nọ ọ rrọ Osẹri inọ o hae rọnọ ọye, ọ hae gaviezọ omojọ. Ọmọtẹ riẹ, nọ o yo ẹme na, ọ tẹ ta ẹme na kẹ Osẹri jọ nọ ọ rẹ jọ oria iruo yena ta usiuwoma. Osẹri na ọ tẹ nwani weze bru ọzae na eva obọ ọfisi, o te muọ uwuhrẹ Ebaibol họ kugbei. U kri hi ọzae na o te muọ iwuhrẹ Ẹdoka họ ekpohọ ẹsikpobi.

Isẹri-ise kẹ ahwo eva oria iruo e wha irere efa ze no. Iwhowho-uvie buobu evaọ Japan a riẹ epanọ a re ru izihebro ziezi no evaọ eria nọ a rẹ jọ thueki, ekọmpene, gbe ọfisi. Fibae, ẹkwoma edhere isẹri-ise nana, a nya ku ibuobu nọ e siọ iruo uvie na ba no vẹre, a tẹ wariẹ mu uwuhrẹ họ kugbe ai. A re gbiku ewoma nọ o no rie ze no ho. Kẹlena, ukoko jọ evaọ Tokyo o niyẹrẹ iwuhrẹ Ebaibol 108, bu vi akuava enọ a niyẹrẹ riẹ ukpe nọ u kpo.

[Oruvẹ-obotọ]