Okokohọ Ubrotọ “Ewhovuẹ Udhedhẹ Ọghẹnẹ” ọ Isẹri Jihova ọrọ 1996
1 Ma yo emamọ eme uyere evawere gbe ovuhumuo kẹ ọruẹrẹfihotọ omosasọ ẹzi no obọ ahwo 462,540 ze nọ i kpohọ Ikokohọ Ubrotọ “Enọ I bi Jiri Avọ Oghọghọ” evaọ Nigeria ọrọ 1995. Idu mai e vọ avọ oghọghọ nọ ma rọ ruẹ ahwo 7,603 nọ i bi jiri Jihova nọ i dhesẹ oka omorọkẹ rai ẹkwoma ame-ọhọ. Ma ghọghọ nọ ma ro wo ebe ekpokpọ ivẹ na, Jehovah’s Witnesses and Education gbe Eriariẹ Nọ I Re Su Kpohọ Uzuazọ Ebẹdẹ Bẹdẹ. Nọ ma reawere ọruẹrẹfihotọ omosasọ ọyena ukpe n’ukpo, hayo emuhọ ukpe nana no na, o rẹ ghinẹ w’omai re ma dao ẹgba mai kpobi re ma kpohọ ọruẹrẹfihotọ nọ a bi ru kẹ Okokohọ Ubrotọ “Ewhovuẹ Udhedhẹ Ọghẹnẹ” ọrọ 1996 na. U fo re mai kpobi a zizie emọ-uwuhrẹ Ebaibol mai je fiobọhọ kẹ ai re a jariẹ kugbe omai. Ikokohọ enana e te jọ ehri uduotahawọ gbe ọbọga nọ ma gbẹ be gọ Jihova avọ oghọghọ evaọ edẹ urere enana.
2 Jọ u mu owhẹ ẹro nọ whọ kaki ru ọruẹrẹhọ okokohọ ra re whọ te reawere ọruẹrẹfihotọ ẹzi omawere edẹ esa na, no ole emuhọ rite olẹ ekuhọ. Fiki ofa imoto nọ e rọ ghaghae, enẹna họ okenọ a re ro mu ugho họ ekoko re whẹ avọ uviuwou ra a sae nya. Rehọ uyoyou ku ahwo nọ i wo ẹgwọlọ obufihọ kugbe oma-iruo ra, maero kọ ahwo ọkpokpọ nọ i wo isiuru, re a sae jariẹ eva abọ kpobi. U ti fiobọhọ ziezi re a rehọ evuẹ nọ e rọ uko obeva nana jiroro kugbe emọ-uwuhrẹ Ebaibol kpobi nọ e sae ma-oma re a nya. (Gal. 6:6, 10) Ọruẹrẹfihotọ na ọ te rehọ ikporakporo muhọ evaọ Edisoi-Oka eva 9:20 a.m. o ve ti kuhọ eva oke wọhọ 4:30 p.m. Ọruẹrẹfihotọ Ẹdẹ-Ọmaha na o ti muhọ eva 9:00 a.m. ọ vẹ te rehọ ole gbe olẹ kuhọ eva oke wọhọ 4:00 p.m. Abọ ohiohiẹ Ẹdoka o ti muhọ eva 9:00, ọruẹrẹfihotọ ẹdẹ na o ve ti kuhọ eva uvo oke wọhọ 3:30. Evuẹ enana i ti fiobọhọ k’owhẹ evaọ oma oruẹrẹfihọ ra.
3 Ithubro kẹ Ewo Iwou nọ A re Wohọ: Ma te daoma vi unu emebe ọ Room Request nọ i te ro se ukoko ovuovo. U re mu okere-obe ukoko na ẹro nọ a kere eme gbagba fihọ omobe ọ Room Request kpobi nọ a vi. WHỌ NWANI kere unu iwhowho-uvie nọ e gwọlọ uwou ọvo ho, wọhọ “iwhowho-uvie 50,” evaọ oria nọ a re kere idẹ ahwo fihọ na. A re kere eme na kpobi vevẹ nọ a rẹ sae ruẹ se. Iviena jọ u mu owhẹ ẹro nọ whọ kẹ evuẹ kpobi kpahe odẹ, unuikpe, ọzae hayo aye, gbe sọ ohwo nọ ọ be yare uwou na yọ ọkobaro hayo owhowho-uvie ukoko. Fi emọ na kugbe edẹ ahwo na. Evaọ oke jọ n’ukpemu ikoko jọ a kere edẹ ekpako na ọvo. Onana u re ru ọruẹrẹfihotọ uwou jọ gaga. Otẹrọnọ eria nọ a re kere eme fihọ evaọ obe na u te he, kere fihọ obe ọfa gheghe. Otẹrọnọ ahwo nọ a kere fihọ obe na i bu vi omọvo, iviena dhesẹ usu nọ o rọ udevie ahwo nọ e be yare uwou na evaọ oria nọ u fo evaọ obe na. U re mu okere-obe ukoko na ẹro nọ eme nọ a kere fihọ omobe ọ Room Request na e rọ gbagba taure o te ti vi ei kpohọ Ẹko-Iruo Iwou ọrọ okokohọ na.
4 Ẹgwọlọ Obọdẹ: Ọruẹrẹfihotọ ọnana ọ rọ kẹ iwhowho-uvie nọ e rọ uvi oriruo, gbe emọ rai nọ i wo emamọ uruemu ọvo, nọ Ogbẹgwae Iruo-Odibọgba Ukoko a rọwo kugbe. Ukoko nọ ahwo nọ a wo ẹgwọlọ obọdẹ a rọ ae a re ru ọruẹrẹfihotọ nọ a rẹ rọ rẹro te enọ i wo ẹgwọlọ obọdẹ, ukpenọ a re fi owha-iruo onana họ ọruẹrẹfihotọ okokohọ na uzou. Ekpako ukoko gbe amọfa nọ e riẹ kpahe epanọ oma ahwo ọnana o rọ a rẹ sae kẹ obọfihọ avọ uyoyou. Onana u dhesẹ nọ iwhowho-uvie a re roro kpahe ẹgwọlọ ahwo nọ e rọ iruo odibọgba oke-kpobi, enọ e kpako no, enọ oma rai o ga ha, gbe amọfa. Iwhowho-uvie a rẹ sae fiobọhọ ẹkwoma ahwo otiọye na nọ a rẹ rehọ lele oma hayo rẹro te ẹgwọlọ rai evaọ idhere efa nọ i w’iruo.—Jem. 2:15-17; 1 Jọn 3:17, 18.
5 Dede, Ẹko-Iruo Uwou na a te daoma rehọ uwou nọ u fo kẹ iwhowho-uvie nọ i wo obọdẹ ẹgwọlọ otẹrọnọ ahwo nọ e rọ ukoko rai a sai fiobọhọ kẹ ai hi. Iwhowho-uvie enana a rẹ sae ta epanọ a rọ kẹ okere-obe ukoko na. Okere-obe ukoko na ọ rẹ t’ẹme kugbe Ogbẹgwae Iruo-Odibọgba Ukoko na re ọ ruẹ sọ o te lọhọ re ukoko na u fiobọhọ kẹ ahwo ọnana rẹro te uwou nọ a re wo họ. Otẹrọnọ ukoko na ọ sae kẹ obọfihọ nọ a gwọlọ họ, okere-obe na ọ rẹ sae kẹ ahwo otiọye na obe ọ Room Request na nọ o kere eme fihọ vevẹ no, eva obehru ọ ẹwẹ-obe ọsosuọ na, eme wọhọ, “ẸGWỌLỌ OBỌDẸ.” Ahwo nọ a wo ẹgwọlọ obọdẹ ọvo a re kere odẹ fihọ obe nọ a kpoka obọdẹ họ na. Ohwo nọ o bi ru ayare na o re kere eme fihiẹe. A re zihe iei se okere-obe na, ọnọ ọ rẹ kiẹe riwi kẹ ẹgbagba, evevẹ, gbe imuẹro ọrọ oware nọ u ru ohwo ọnana te kẹ ororokẹ otiọye na. Okere-obe na o re DHESẸ VEVẸ kpahe epanọ ohwo na ọrọ evaọ oria abọdekọ omobe na. A rẹ kaki ru enana kpobi taure okokohọ na o te ti te. Okere-obe na o ve vi obe na se Ẹko-Iruo Uwou na. A te vuẹ ohwo nọ o bi ru ayare na ovavo kpahe uwou nọ o ti wohọ na.
6 Ahwo nọ a wo ẹgwọlọ obọdẹ a re kpohọ okokohọ na re a yare uwou evaọ okenọ a te te obei no VIEVIE he, keme Ẹko-Iruo Uwou na a re yo no obọ Ogbẹgwae Iruo-Odibọgba Ukoko na ze hrọ.
7 Ewohọ Iwou Amọfa: Otẹrọnọ a fi owhẹ họ uwou oniọvo hayo ohwo nọ ọ rọ ukoko na ha, iviena woi họ iroro nọ u woma ha re whọ nwani fievahọ ọghoruo riẹ re who rẹro nọ o ti fi owhẹ họ uwou edẹ buobu taure okokohọ na o te muhọ hayo nọ o te kuhọ no ho. A kẹ iwou enana evaọ edẹ okokohọ na ỌVO. Ahwo nọ a wo họ iwou itieye na a re wo imuẹro nọ te ai te emọ rai a rẹ rehọ ọghọ kẹ uwou ohwo nọ a rọ na, a rẹ nya eria kpobi duwu hayo raha ekwakwa ọnọ o wo uwou na hayo nya ro ubrukpẹ riẹ evaọ uwou na ha. Otẹrọnọ enọ i wo iwou na a ruẹ ebẹbẹ jọ evaọ abọ ọnana, a rẹ jẹ ọsẹro ẹko-iruo uwou na riẹ ababọ okioraha evaọ okokohọ na yọ o te were iẹe re o fiobọhọ.
8 Ẹsalọ Ekokohọ Ra: Okpẹwho okokohọ ọvuọvo gbe ikogho (hayo abọ riẹ jọ) nọ a fodẹ gbe ọvuọ edẹ rai, gbe ọvuọ okokohọ riẹ nọ a re kpohọ, e rọ obotọ na. Ajokpa eware nọ a sae whaha ha e roma via, u fo re who kpohọ okokohọ nọ a kẹ okogho hayo ukoko ra. A te bi ru ikokohọ ivẹ hayo bu viere evaọ oria ovo na, u fo re whọ nya evaọ ẹdẹ nọ a dhesẹ kẹ okogho ra hayo abọ okogho na nọ o kiọkọ. Nọ whọ be ma-oma re whọ jariẹ na, rehọ uyoyou ku amọfa nọ e gwọlọ obọfihọ gb’oma, maero kọ ahwo ọkpokpọ nọ i wo isiuru, re ae oma rai a sae jariẹ evaọ abọ kpobi.—Gal. 6:10.
9 Obọ rọ t’Ẹme kẹ Idiezọ Na: Evaọ Okokohọ OTA 7, nọ a ti ru evaọ December 13-15, 1996, gbe Okokohọ ULI 7 nọ a ti ru evaọ January 10-12, 1997, a ti ru ọruẹrẹfihọ re inievo emezae gbe emetẹ nọ i te a fa ọruẹrẹfihotọ na kpobi fihọ Obọ rọ t’Ẹme Amerika. Ahwo nọ i diezọ evaọ ikoko Nigeria kpobi a tudu họ ae awọ nọ o tẹ make kao a ma-oma re a kpohọ ọjọ evaọ eria ikokohọ enana. Ekpako ukoko a rẹ kiẹ ziezi kugbe omomọvo nọ o diezọ evaọ ukoko rai nọ o w’otoriẹ Obọ rọ t’Ẹme Amerika re u mu ai ẹro nọ ahwo ọnana a riẹ kpahe ọruẹrẹfihotọ ọnana re a jẹ riẹ sọ a gwọlọ obọfihọ re a sae nya.
10 Enọ E be ze Okokohọ nọ E rọ Ọrai Hi: Enwenọ evaọ eria kpobi, oria nọ a kẹ owhẹ na oye o mae kẹle ukoko ra. Re o jọ inọ a wo ẹkẹ eruẹrẹfihotọ nọ i te, ebe, emuore, iwou nọ a re wohọ, gbe eware-efa, o rehọ oma hwa imuẹro na nọ iwhowho-uvie na buobu a ti kpohọ okokohọ nọ a kẹ ukoko rai. Ghele, otẹrọnọ fiki ẹjiroro jọ who ti kpohọ okokohọ nọ ọ rọ ọ ra ha yọ whọ gwọlọ uwou, okere-obe ukoko na ọ sae k’owhẹ omobe ọ Room Request na. Whọ sai kere eme fihiẹe whọ vẹ rehiẹe kẹ okere-obe na re ọ whobọ hiẹe taure who te ti vi iei kpohọ okokohọ nọ whọ gwọlọ nya na.
11 O Gwọlọ Ẹmeoyo Ra: Obokparọ ọruẹrẹfihotọ iwou na o roma hwa ẹmeoyo ahwo kpobi nọ i w’obọ kpahiẹe. (Hib. 13:17) Fikiere, ma be vuẹ ahwo kpobi nọ a yoẹme kẹ ọruẹrẹfihotọ Ukoko-Ulogbo kpahe iwou na. Iviena rọwo jẹ uwou kpobi nọ a rọ k’owhẹ hayo utu ra hayo ukoko ra rehọ. Otẹrọnọ who re ru ọruẹrẹfihotọ obọ ra, ẹsejọhọ fikinọ uwou nọ a k’owhẹ o were owhẹ hẹ, whọ rẹ sai ru erei. Rekọ whọ rehọ uwou nọ Ẹko-Iruo Uwou okokohọ na a rehọ no ho ẹkwoma igho fiba unuigho nọ a rọwo kugbe no vẹre he. Onana u dhesẹ ororokẹ gbe uyoyou kẹ inievo ra ha, yọ o tẹ jẹ rọ uruemu ọ ababọ-evafihọ kẹ ukoko Jihova. Ma riẹ nọ inievo na kpobi a gwọlọ wo uwou kẹle okokohọ na, rekọ orọnikọ ahwo kpobi a sae kẹ iwou evaọ edhere ọnana ha. Ahwo jọ a rẹ rria eria nọ e dina thabọ no okokohọ na. Otẹrọnọ o via nnọ u te oke ra re a kẹ owhẹ uwou nọ u thabọ no otọ okokohọ na, kele onana wọhọ oma nọ whọ lahiẹ nọ who ro dhesẹ ovuhumuo kẹ iruo egaga nọ Ẹko-Iruo Uwou okokohọ na a ru rọ gwọlọ uwou k’owhẹ. Umutho edẹ ọvo o te rehọ, who ve zihe kpohọ obọ ukoko ra. Rekọ whọ tẹ gwọlọ ru ọruẹrẹfihotọ obọ ra, ivie na kake nọ mi Ẹko-Iruo Uwou na kpahe oria nọ whọ gwọlọ ruẹrẹ na sọ a mi rie no. O te jọ iroro ọ Ẹko-Iruo Uwou okokohọ na re a ruẹ nọ inievo mai gbe amọfa nọ e be ze okokohọ na a kẹ rai emamọ iwou gbe enọ e ghare ga hrọ họ, wọhọ epanọ eyero rai o rọ, re a sai wo omosasọ jẹ reawere emamọ irere ọruẹrẹfihotọ ẹzi na vọvọ.
12 Ababọ ẹmeoyo evaọ eria nọ ma t’ẹme te no na u re ru ei bẹbẹ re a ruẹrẹ iwou họ, yọ e rẹ wha ẹpoviẹ se odẹ Jihova gbe ukoko riẹ. (Ol. 119:168) Fikiere, Ukoko-Ulogbo ọ te vuẹ Ẹko-Iruo Uwou na re a kiẹ kugbe enọ i wo iwou na re a riẹ sọ ejọ rai i bi wo ebẹbẹ gbe ahwo nọ e wha ebẹbẹ na ze. Ọruẹrẹfihotọ okokohọ na o bi ruiruo gaga re o lọhọ inievo mai re a siọ igho buobu ba ẹraha. Fikiere, o rọ ewoma ahwo kpobi re a yoẹme kẹ ọruẹrẹfihotọ Ukoko-Ulogbo rọ kẹ iwou re iruo enana e gbẹ nyaharo ziezi. Obọfihọ omarokpotọ ra kẹ ọruẹrẹfihotọ Jihova ọnana ẹkwoma ọrigbo ẹrọwọ gbe areghẹ na ze o te were omai gaga.
[Ọjọriẹ kẹ Ugboma Ekpako na: Nọ uko obeva onana o tẹ nwani te owhai obọ, ivie na ru owhowhovia kpahe oria gbe ẹdẹ nọ Ukoko-Ulogbo o kẹ ukoko ra evaọ Ewuhrẹ Odibọgba nọtha gbe Ewuhrẹ Uwou-Eroro nọ u lele i rie. U re ziezi re a si usi họ ẹwho gbe edẹ okokohọ nọ a kẹ ukoko ra re wha fi abọ ọyena họ akpala ovuẹ ukoko na.
Okere-obe ukoko na o re ru eme nọ i kpomahọ okokohọ gbe iwhowhovia evaọ iwuhrẹ obaro kpobi. Ekpako ukoko kpobi a rẹ gwọlọ ruiruo-kugbe vọvọ re a ruẹ nọ eware nọ i kpomahọ okokohọ kpobi a ru rai evaọ ẹruoke, jajaja, gbagba.]