Kọ Whọ Rọ Ababọ Uvẹ?
1 Pọl ọ ta nọ ‘kẹse kẹse ma hẹ jọ owhreze iruo Ọnowo na.’ (1 Kọr. 15:58) A ta k’omai re ma yọrọ edhere owowa uwuhrẹ omobọ mai, w’abọ kẹse kẹse evaọ odibọgba na, kpohọ iwuhrẹ ẹsikpobi, jẹ rẹro te iruo ukoko ziezi. Fiba oyena, ma re fiobọhọ kẹ amọfa nọ e gwọlọ obufihọ mai. Avọ eware buobu nọ a re ru, ẹsejọ o rẹ j’omai oma nọ eware e d’omai abọ fia, roro nọ ma rẹ gwọlọ edhere nọ ma re ro si eware jọ no owha iruo mai.
2 Eware jọ e rẹ whae ze nọ u je ru ei w’iroro avọ areghẹ re ma si iruo jọ no hayo bru rai kpẹre. Ahwo jọ a re roro nọ oware kpobi nọ amọfa a yare mi ai a re ru. Ababọ owowa evaọ abọ nana o sae wha otunyẹ gbe idhọvẹ ze nọ e rẹ sae wha ọraha ze evaọ ukuhọ riẹ.
3 Kpomavi: Usiavẹ omakpọvi o roma hwa eyo uthubro Pọl na re ma ‘wo imuẹro eware nọ e mae wo uzou.’ (Fil. 1:10) Oyena u dhesẹ vevẹ nọ ma rẹ tẹro vi eware nọ i ghine muẹme, gbe otẹrọnọ uvẹ hayo oke o riẹ, ma vẹ rẹro te eware esese efa nọ e dina w’uzou. Ewha-iruo uviuwou họ eware nọ e mai kpehru evaọ udevie eware eyena nọ e r’oja. A rẹ sae rẹro te ewha-iruo efa gheghe. Dede, Jesu o wuhrẹ nọ eware ọsosuọ mai i re no ehri ẹkake gwọlọ Uvie na ze. Ma rẹ kaki ru eware nọ e rẹ k’omai uvẹ ru omarọkẹ mai kẹ Jihova gba.—Mat. 5:3; 6:33.
4 Ma te wo onana họ iroro, u re mu omai ẹro nọ ma siọ ilale eware omobọ mai nọ e r’oja ha ba, arozaha nọ o vrẹ ẹta, gbe iruo amọfa nọ i w’uzou te ere he no oma-iruo mai. Nọ ma tẹ be m’oma iruẹru mai k’oka k’oka, ma re fi emamọ oke họ rọ kẹ ewuhrẹ omobọ mai, abọ o wo evaọ usiuwoma ota ziezi, ekpohọ iwuhrẹ, gbe eware efa nọ i kpoma họ egagọ mai kpekpekpe. Ma sae ghale oke nọ u kiokọ fihọ ilale efa, eva oghẹrẹ nọ enana e rẹ zọhọ kugbe ute ọsosuọ mai ọrọ Ileleikristi nọ e kpomamu nọ e be kake gwọlọ Uvie na.
5 Makọ ere dede, o sae gbẹ j’omai oma nọ owha-iruo mai o re gbẹgbẹdẹ. Otẹrọ ere, u fo nọ ma k’uyo kẹ uzizie Jesu: “Whai e ruẹ uye gbe enọ e wha owha ogbẹgbẹdẹ kpobi, wha bru omẹ ze, mẹ rẹ kẹ owhai udhedhẹ.” (Mat. 11:28) Ere re, riwi bru Jihova, “ọnọ ọ be hae yọrọ omai kẹdẹ kẹdẹ” jẹ rehọ eri kẹ enọ oma o rẹ rọ. Ọ yeyaa nọ ọ rẹ rọwa re okiẹrẹe na o kie he. (Ol. 55:22; 68:19; Aiz. 40:29) Ma rẹ sae wo evaifihọ nọ ọ te k’uyo elẹ mai, nọ u ti ru ei lọhọ re ma thihakọ evaọ uzuazọ iruo na.
6 Nọ u mu omai ẹro nọ eware i ti bu omai abọ evaọ ilale isiuru Uvie na, ma sae ghọghọ re ma riẹ nọ iruo mai eva Ọnowo na e rọ ivrẹvru hu.—1 Kọr. 15:58.