Gbẹ Hae Ta Uzẹme Na
1 Ikọ na a whowho nọ: “Ma rẹ sae siọ oware nọ ma ruẹ je yo ba ẹta ha.” (Iruẹru 4:20) Nẹnẹ na ma rẹ gbẹ ta uzẹme na hrọ. Dede nọ ẹghale Uwou-Eroro Na gbe Awake! yọ edhere nọ ma rẹ rọ gwọlọ ahwo nọ a rẹ gaviezọ, ma re zihe hrọ otẹrọnọ ma ti gbe wuhrẹ enọ i wo isiuru kpahe uzẹme na haro.
2 Okenọ whọ tẹ be nya lele “Awake!” obọdẹ ọrọ April nọ a fihọ ada avọ uzoẹme riẹ “Okenọ Emo E Gbẹ Te Jọ Họ,” whọ rẹ sae mu uwuhrẹ Ebaibol họ ẹkwoma onọ inọ:
◼ “Ẹdẹ dekọ, ma t’ẹme kpahe emo erẹwho na gbe abọ nọ egagọ wo evaọ eva rai. Kọ who vuhumu no nọ eviavia itieye na i dhesẹ vevẹ nọ ma be rria evaọ etoke nọ Ebaibol o se edẹ urere na? [Dhesẹ obe ọ Eriariẹ na. Se edhe ọsosuọ ọrọ uzou 11, je ru ẹkpẹti nọ ọ rọ ẹwẹ-obe 102 na vevẹ.] Obe onana u ru uzoẹme onana vevẹ kugbe izoeme 18 efa nọ a kere fihọ abọ eware nọ e rie eva na. [Dhesẹ ẹwẹ-obe 3.] Otẹrọnọ whọ k’omẹ uvẹ, mẹ gwọlọ dhesẹ epanọ obe nana o sai ro fiobọhọ k’owhẹ wo otoriẹ eme Ebaibol enana nọ i w’uzou.” A tẹ k’owhẹ uvẹ, mu uwuhrẹ họ eva ẹwẹ-obe 6.
3 Otẹrọnọ whọ yeyaa nọ who ti zihe re who dhesẹ epanọ o rọ lọhọ re a reawere uzuazọ ufuoma enẹna, whọ sae t’ẹme jọ wọhọ ọnana:
◼ “Okenọ ma kake ruẹ oma, mẹ ghale eria jọ no Ebaibol ze kugbe owhẹ nọ o k’omai ẹjiroro nọ ma re ro wo ẹruore kpahe obaro ohwo-akpọ. Nẹnẹ na mẹ gwọlọ zihe iroro ra ze oware nọ u dhesẹ ohwo nọ ọ rẹ sae k’omai iroro ufuoma enẹna.” Se Olezi 4:8. Rovie obe Eriariẹ na kpohọ ẹwẹ-obe 168 je se edhe 19. Nọ n’ikọ: “Whọ te reawere uwuhrẹ Ebaibol ọvọvẹ nọ u dhesẹ vevẹ epanọ whẹ omara ọ sae ro duku oghẹrẹ ufuoma onana evaọ uzuazọ ra?” Uyo na o tẹ rọ E, rovie kpohọ uzou 1.
4 Otẹrọnọ whọ t’ẹme kpahe ababọ osegboja egagọ evaọ etoke iweze ra nọ u kpemu, evaọ ozihebro ra whọ rẹ sae dawo oghẹrẹ onana:
◼ “Ẹsejọhọ whọ kareghẹhọ nọ ma t’ẹme kpahe ababọ osegboja egagọ evaọ oke iweze mẹ nọ u kpemu, yọ mẹ yeyaa nọ ma te t’ẹme kpahe epanọ a re ro duku egagọ nọ Ọghẹnẹ ọ jẹrehọ. Ẹme Jesu nọ a kere fihọ Matiu 7:21-23 ọ rẹ sae kpomahọ eriwo ohwo kpahe egagọ.” (Se jẹ kpahe fihọ ikereakere na.) “Oke ọsosuọ ma se Aizaya 11:9 kpahe evihọ eriariẹ Ọghẹnẹ evaọ otọakpọ na. (Dhesiẹe kpẹkpẹe.) Re a wo eriariẹ itieye na o gwọlọ nọ a re wuhrẹ Ebaibol na kẹse kẹse. Ebaibol na u wo ekpọvio nọ i re fiobọhọ k’omai duku egagọ nọ Ọghẹnẹ ọ rẹ jẹrehọ.” Rovie kpohọ uzou 5 evaọ obe ọ Eriariẹ na, “Egagọ Ono Ọghẹnẹ Ọ rẹ Jẹrehọ?,” je se edhe-eme ivẹ ọsosuọ na. Fi obe na họ ada evaọ unuigho riẹ je ru ọruẹrẹfihotọ re whọ wariẹ zihe re wha ru uwuhrẹ na haro.
5 Whọ rẹ sae mu uwuhrẹ họ ovavo evaọ ozihebro whọ vẹ ta nọ:
◼ “Ma rẹ ghale emagazini mai evaọ akpọ-soso re e vuẹ ahwo evaọ koria koria kpahe oware nọ Ebaibol o wuhrẹ. Otẹrọnọ omomọvo o vuhu aghare oware nọ a wuhrẹ mu, ma re ru uwuhrẹ Ebaibol ọvọvẹ kugbei. [Riobọhọ ẹkpẹti na ‘Kọ Whọ Gwọlọ Dede Evuẹ Efa Rehọ?’ evaọ obuke ọ Uwou-Eroro Na.] Ma be rehọ obe onana, Eriariẹ Nọ I Re Su Kpohọ Uzuazọ Ebẹdẹ Bẹdẹ, ruiruo wọhọ oware nọ u re fiobọhọ. Jọ me dhesẹ k’owhẹ kpẹkpẹe epanọ a re ru uwuhrẹ.”
6 Otẹrọnọ ma gbẹ be hae ta uzẹme na, ma sae wo imuẹro nọ ejọ e te jariẹ nọ e te gaviezọ je dede ẹme na rehọ ziezi.—Mak 4:20.