Ete gbe Omaruẹrẹhọ re A Wuhrẹ Amọfa
1 Okenọ a rehọ Mosis mu wọhọ ohwo ẹro Jihova, o roro nọ o te re o whowho ẹme Ọghẹnẹ kẹ Fẹro ho. (Ony. 4:10; 6:12) Jerimaya o dhesẹ ababọ aruọwha riẹ via nọ o re ro ruiruo wọhọ ọruaro Jihova, ọ tẹ ta kẹ Ọghẹnẹ nọ ọ riẹ epanọ a rẹ t’ẹme he. (Jeri. 1:6) Ghelọ ababọ aruọwha ọsosuọ rai, eruaro ivẹ eyena a dhesẹ oma rai fihọ isẹri aruọwha Jihova. Ọghẹnẹ o ru rai te ziezi.
2 Nẹnẹ, ma yere Jihova, ma wo oware nọ ma gwọlọ nọ ma re ro ru odibọgba mai gba avọ aruọwha. (2 Kọr. 3:4, 5; 2 Tim. 3:17) Wọhọ ọwena avọ ekwakwa iruo egbagba riẹ, a ruẹrẹ omai họ no re ma ru odibọgba nọ a k’omai gba avọ ona. Evaọ January ma ti fi obe na họ ada, Whọ Sae Ria Bẹdẹ Bẹdẹ eva Aparadase ọ Otọakpọ. Dede nọ okwakwa ẹzi ọnana yọ okpokpọ họ, uzoẹme Ikereakere riẹ o gbẹ kpokpọ yọ u ti fiobọhọ kẹ ahwo wuhrẹ uzẹme na. A rẹ sae rehọ idhesẹvia obotọ na ruiruo evaọ efihọ ada obe na.
3 A rẹ sae rehọ ẹme ewuhrẹ kpare isiuru fihọ Ẹme Ọghẹnẹ. Whọ rẹ sae mu ẹmeọta họ whọ vẹ ta nọ:
◼ “A bi fi ẹgba gaga họ ẹgwọlọ emamọ ewuhrẹ nẹnẹ. Evaọ ẹjiroro ra, didi oghẹrẹ ewuhrẹ u fo nọ ohwo o le re o wo imuẹro evawere nọ ọ mae rro jẹ ruẹ ewoma evaọ uzuazọ? [Kuvẹ kẹ uyo.] Ahwo nọ a wo eriariẹ Ọghẹnẹ a rẹ sai wo irere ebẹdẹ bẹdẹ. [Se Jọn 17:3.] Obe onana Whọ Sae Ria Bẹdẹ Bẹdẹ eva Aparadase ọ Otọakpọ, a si rie no Ebaibol ze. O riobọ kpohọ ehri eriariẹ ọvuọvo nọ o sae su kpohọ uzuazọ ebẹdẹ bẹdẹ.” Dhesẹ uzedhe oriruo evaọ obe na ẹkwoma erovie kpohọ ifoto evaọ ẹwẹ-obe avọ 128. Se edhe-ẹme avọ 5. Fi obe na họ ada evaọ azọhọ ₦80 je ru ọruẹrẹfihotọ ozihebro.
4 Okenọ who te bi zihe bru ọnọ o wo uwou nọ whọ t’ẹme kugbe kpahe epanọ ewuhrẹ Ebaibol u wuzou te, whọ rẹ sae ta nọ:
◼ “Evaọ iweze mẹ n’ukpo, ma t’ẹme kpahe Ebaibol na wọhọ ehri ewuhrẹ nọ o rẹ kẹ imuẹro obaro ebẹdẹ bẹdẹ mai. Dede na, o rẹ rehọ omodawọ re ma wuhrẹ oware nọ o gwọlọ nọ ma riẹ no Ikereakere na ze. [Se Itẹ 2:1-5.] O re bẹbẹ kẹ ahwo buobu re a wo otoriẹ abọ jọ Ebaibol na. Mẹ gwọlọ dhesẹ edhere kpẹkpẹe jọ k’owhẹ nọ ma ro fiobọhọ kẹ ahwo buobu no re a wuhrẹ haro kpahe iwuhrẹ Ebaibol nọ e mai wuzou.” Rovie kpohọ uzou avọ 15 je dhesẹ uwuhrẹ Ebaibol kpẹkpẹe. Otẹrọnọ ọnọ o wo uwou na ọ gwọlọ wo uwuhrẹ ekẹse kẹse, ta kẹe nọ who ti he zihe ze avọ obe obọfihọ ewuhrẹ mai Eriariẹ Nọ I Re Su Kpohọ Uzuazọ Ebẹdẹ Bẹdẹ na.
5 Emọ akpọ nọ i bu te ima buobu nọ e be ruẹ uye o be kẹ ahwo buobu idhọvẹ. Ẹsejọhọ whọ sai fiobọhọ kẹ ọnọ o wo uwou na ruẹ epanọ Ọghẹnẹ o re riwi oware onana whọ vẹ ta nọ:
◼ “Ababọ avro who yo iyẹrẹ kpahe emọ nọ ohọo u bi kpe no, enọ e be mọ, gbe enọ a gbabọkẹ evaọ akpọ na soso. Fikieme ikoko nọ i wo ororokẹ a gbẹ re sai ru eyero ọnana woma ha? [Kuvẹ kẹ uyo.] Oware nọ o mai woma ọvo Ọghẹnẹ ọ gwọlọ kẹ ahwo-akpọ. Muẹrohọ oware nọ ọ yaa kẹ emọ gbe ekpako, wọhọ epanọ a kere fihọ Ebaibol na. [Se Eviavia 21:4.] Obe onana o kẹ eware ikokodo kpahe akpọ nọ Ọghẹnẹ o bi ru nọ uye-oruẹ o gbẹ te jọ họ.” Otẹrọnọ o lọhọ, rovie kpohọ ifoto nọ e rọ ewẹ-obe avọ 12 gbe 13 na nọ u dhesẹ Aparadase jẹ t’ẹme kpahiẹe. Fi obe na họ ada evaọ azọhọ ₦80, je ru ọruẹrẹfihotọ kẹ ozihebro.
6 Otẹrọnọ oke ọsosuọ whọ t’ẹme kpahe uye-oruẹ emọ, evaọ ẹwariẹ zihe ra whọ sae t’ẹme na haro whọ vẹ ta nọ:
◼ “Kẹle na nọ me te etenẹ, who dhesẹ ọdawẹ kpahe emọ nọ e be ruẹ uye fiki erọo nọ e fa no, ohọo, ẹyao, gbe ozighi. O rọ oware ọbọga re ma se evaọ Ebaibol na kpahe akpọ nọ te emọ te ekpako a te gbẹ jọ ruẹ uye ẹyao, edada, hayo uwhu hu. Eruaruẹ obe Aizaya u dhesẹ uzuazọ owoma nọ o te ze otọakpọ na.” Se jẹ t’ẹme kpahe Aizaya 65:20-25. Ẹkwoma ero ruiruo umutho edhe-eme jọ evaọ uzou 1 ọrọ obe ọ Ria Bẹdẹ Bẹdẹ na, dhesẹ eme isiuru jọ nọ i wo iruo.
7 Nọ uruemu olẹ o rọ odode kẹ ahwo egagọ na, whọ sai mu ẹmeọta kpahe uzoẹme ọnana họ whọ vẹ ta nọ:
◼ “Evaọ okejọ evaọ uzuazọ mai, ibuobu mai a ruẹ ebẹbẹ no nọ e wọ omai lẹ se Ọghẹnẹ kẹ obufihọ. Ghele na, ibuobu a roro nọ a bi yo elẹ rai hi. O tubẹ wọhọ nọ isu egagọ nọ e be lẹ kẹ udhedhẹ evaọ ogbotu a bi yo elẹ rai hi. Ma ta erei keme ẹmo gbe ozighi ọ gbẹ be kẹ ahwo-akpọ uye. Kọ Ọghẹnẹ ọ be ghinẹ gaviezọ kẹ elẹ? Otẹrọnọ o bi ru erei, fikieme o jẹ wọhọ nọ a be k’uyo elẹ buobu jọ họ? [Kuvẹ kẹ uyo.] Olezi 145:18 o dhesẹ oware nọ o gwọlọ otẹrọnọ a re yo elẹ mai. [Se ikereakere na.] Oware jọ họ, elẹ se Ọghẹnẹ i re no udu ze hrọ e vẹ jẹ rọwo kugbe uzẹme nọ a re duku evaọ Ẹme riẹ, Ebaibol na.” Rovie kpohọ uzou avọ 27 evaọ obe ọ Ria Bẹdẹ Bẹdẹ na, jẹ riobọ họ oware nọ o ta kpahe aghare olẹ. Fi obe na họ ada evaọ azọhọ ₦80.
8 Okenọ whọ tẹ be nya lele ẹme nọ a ta vẹre no kpahe olẹ, whọ sae dawo onana:
◼ “Ẹmeọta mai kpahe olẹ o were omẹ oma gaga. Ababọ avro, whọ te ruẹ nọ iroro Jesu kpahe oware nọ a rẹ lẹ kẹ yọ obufihọ ọkpọvio.” Se Matiu 6:9, 10, whọ vẹ riobọ họ uzedhe ọdawẹ nọ Jesu o dhesẹ evaọ olẹ oriruo riẹ. Dhesẹ uzou avọ 27, “Epanọ A ro Wo Obufihọ Ẹkwoma Olẹ,” evaọ obe ọ Ria Bẹdẹ Bẹdẹ na, whọ vẹ nọ sọ whọ sai dhesẹ epanọ a re wuhrẹ oria na.
9 Okenọ a tẹ t’ẹme te eriariẹ Ọghẹnẹ nọ a rẹ rehọ kẹ amọfa, ma sae nọ inọ, “Kọ ono o te kẹ eware nana?” Ikereakere na e k’uyo nọ: ‘Mai họ ahwo na.’—2 Kọr. 2:16, 17.